Iya Yoze Unazange Hanga Akunyingike?
‘Zambi hi chihenge ko, akavulame milimo yenu ni zango lize nwasolwele ku jina lienyi.’—A-HEPREU 6:10.
1. Nyonga lika yetweswe twakusemuka nalio?
KUCHI muwivwa nyi mutu yoze wanyingika kanawa mavulama jina lie hanji masolola ngwe kakunyingikine? Muwivwa yikola yinji ku mbunge. Mumu liaka? Mumu yetweswe twakusemuka ni nyonga lia kufupa hanga akwetu atunyingike. Alioze twakuzanga hanga ayo atunyingike kanawa, hi mukanwa wika ko. Nawa twakuzanga hanga ayo anyingike chize twapwa ni yize twakulinga ku mwono wetu.—Kwalula 11:16; Yombi 31:6.
2, 3. Nyonga lia kufupa kutunyingika kuli akwetu kuchi mulihasa kupwa? (Tala chizulie ha uputukilo.)
2 Alioze nyi kutwakanyamine, nyonga lino lia kufupa kutunyingika kuli akwetu mulihasa kupiha. Hashi hano ha Satana muhahasa kutushinjila hanga tuzange kupwa akwa-lufuma hanji atu alemu. Nyi chino muchilingiwa kutuchi kuhasa kuhalisa ni kuwayila Tata yetu wa mu malilu, Yehova Zambi, mu mutapu uze iye akuzanga.—Usolwelo 4:11.
3 Ha matangwa ja Yesu, amwe mangana a yingeleja te kakwete nyonga lipi ha chize atu atamba kwaanyingika. Yesu yatoweza tumbaji twenyi ngwenyi: ‘Keyelenu alongeshi a shimbi, waze akufwila kwendangana ni mahina asuku-asuku, akuzanga kuameneka mu yitanda, ni yitwamo ya lutwe mu masunangonga, ni yihela ya lutwe ku yiteleka.’ Yawezela nawa ngwenyi: “Wano kumakatambula uhiso wahiana.” (Luka 20:46, 47) Alioze, Yesu kachichimiekene tuliwa chiswale yoze wahanyine tumbongo tukehe twaali, chuma chize atu akwo kota kakachimwene. (Luka 21:1-4) Chochene, nyonga lia Yesu hakutwala ku chize akwetu matunyingika te lialisa chinji ni atu akwo. Mutwe uno mutukwasa hanga tununge ni kupwa ni nyonga lialita hakutwala ku chize atu matunyingika, ni nyonga lize Yehova Zambi anazange hanga tupwe nalio ha chikuma chacho.
JILA YIPEMA YIZE ATAMBA KUTUNYINGIKINAMO
4. Unyingikiso waya twatamba kupwa nawo, nawa mumu liaka?
4 Jila yika yipema yize atamba kutunyingikinamo? Unyingikiso tunambe hano, hi uze ko atu anji akufupa ha kulilongesa shikola yinene, kulinga mingoso hanji kupwa ni lufuma ha kulinga yiheho ya hano hashi. Paulu kaulumbunwine muze ambile ngwenyi: “Haliapwila se nunanyingika Zambi, hanji shinaho, Zambi kananunyingika, ngwe kuchi nunatewulukila cheka nawa ku yikuma yamokomoko ya ulelu ni ya uswale, nukalitenge ndungo jayo nawa?” (A-Ngalashia 4:9) Chili chiwape chinene ‘kutunyingika kuli Zambi,’ Chitunda wa malilu ni hashi! Yehova kanatunyingika chize twapwa, kakutuzanga, nawa kanazange hanga tukundame kuli iye. Iye katutangile hanga tupwe masepa jenyi.—Chilumbununyi 12:13, 14.
5. Yika twatamba kulinga mba atunyingike kuli Zambi?
5 Tunanyingika ngwetu Mose te sepa lia Yehova. Muze etele kuli Yehova ngwenyi: “Ngulweze kama majila je,” Yehova yamukumbulula ngwenyi: “Mungulinga nawa chino hiwamba, mumu hiwawana vumbi kumeso jami. Nawa ngunakunyingika ha jina lie.” (Kutuhuka 33:12-17) Yehova nawa kananyingika kanawa hita umwe wa kuli yetu. Yika twatamba kulinga mba tupwe masepa ja Yehova? Twatamba kumuzanga ni kuhana mwono wetu kuli iye.—Tanga 1 A-Korindu 8:3.
6, 7. Yuma yika muyihasa kupihisa usepa wetu ni Yehova?
6 Hachino, tunafupiwa kufunga kanawa usepa wetu ni Tata yetu wa mu malilu. Ngwe akwa-Kristu atangu mu Ngalashia, twatamba kwecha kupwa ndungo a “yikuma yamokomoko ya ulelu” ya hano hashi, kuchingako lufuma ni yize yakwiza ku lufuma wacho. (A-Ngalashia 4:9) Akwa-Kristu wano mu Ngalashia te hananyingika kulu Zambi, nawa Zambi te hanaanyingika. Alioze Paulu yamba ngwenyi, mandumbu jacho te ‘kanatewuluka cheka nawa’ ku yuma ya ngwaza. Mu maliji akwo, iye te kanaahula ngwenyi: ‘Mumu liaka nunafunu kunyima ni kupwa ndungo a yuma ya uhepuke ni yize kuyishi ulemu?’
7 Shina yuma yacho muyihasa kulingiwa kuli yetu? Ewa, muyihasa kulingiwa. Ngwe Paulu, muze twanyingikine umwenemwene, kota twechele yuma ya lufuma wa hano hashi ha Satana. (Tanga A-Fwilipu 3:7, 8.) Kota twechele kulilongesa shikola yinene, milimo yipema ni kulituna uhashi wa kuzuka mbongo jinji. Hanji te mutuhasa kupwa pichi hamwe ni lufuma mumu lia utotombo wa kwimba ni kwasa konda ni yiheho yikwo nawa. Alioze twalitunyine yuma yacho yeswe. (A-Hepreu 11:24-27) Muchipwa uhepuke kuliseha hamukunda wa yiyulo yipema yize twakwachile ni kunyonga ngwetu mwono wetu te muupema nyi twanungine ni kulinga yuma yacho! Manyonga jacho mahasa kutulingisa hanga tufunyine yuma ya hano hashi, yuma yize tunavuluka ngwetu “yamokomoko ya ulelu.”a—Tala maliji mushi lia lifwo.
YIZE MUTULINGA MBA TUPWE NI UTAYIZO WA YEHOVA
8. Yika muyikolesa nyonga lietu lia kupwa ni utayizo wa Yehova?
8 Kuchi mutuhasa kusa tachi hanga tupwe ni utayizo wa Yehova ni kwehuka utayizo wa hano hashi? Twatamba kulihulikila ha umwenemwene waali ulemu. Utangu, Yehova mashimbu eswe kakuwahisa atu waze akumuwayila ni ushishiko weswe. (Tanga A-Hepreu 6:10; 11:6) Yehova kakulemesa chinji hita kavumbi kenyi yoze washishika, kashika kuli iye chili ‘uhenge’ unene kwaavulama. Yehova nihindu “kananyingika” kanawa atu jenyi. (2 Timoteu 2:19) Iye ‘kananyingika jila ya akwa ululi’ nawa kananyingika chize maafunga.—Samu 1:6; 2 Petulu 2:9.
9. Hana yilweza yize yinasolola chize Yehova akwashile atu jenyi.
9 Ha mashimbu amwe, Yehova kakwashile atu jenyi mu majila alipwila. (2 Sango ja Mianangana 20:20, 29) Chakutalilaho, Yehova kalamwinyine atu jenyi ha Kalunga-lwiji Muchila muze tujita a ndundo a Falau aakawile hanyima. (Kutuhuka 14:21-30; Samu 106:9-11) Chino chapwile chikomokeso chinene chize atu jako apwile ni kuhanjika hakupalika cha miaka 40. (Yoshua 2:9-11) Chili utakamiso kunyingika ngwetu ku shakulu Yehova kazangile atu jenyi ni kuzachisa ndundo jenyi hanga aalamwine, mumu hikwasala hakehe hanga Ngoke wa Mangoke atulukukile. (Ezekiele 38:8-12) Ha mashimbu jacho, mutukawahilila chinji mumu lia kupwa ni utayizo wa Zambi hi wa hano hashi ko.
Ha mashimbu amwe, Yehova kakuwahisa tuvumbi twenyi mu mitapu yize ene keshi ni kushimbwila
10. Umwenemwene uka ukwo twatamba kulihulikila?
10 Umwenemwene wamuchiali uli ngwo, twatamba kulihulikila ha chize Yehova mahasa kutuwahisa mu mitapu yize kutushi ni kushimbwila. Nyi atu malinga chimwe chuma hanga akwo aanangamise, acho Yehova keshi kwaawahisa. Mumu liaka? Mumu, ngwe chize Yesu ambile, muze akwo maahalisa, chino che kuyuka cho. (Tanga Mateu 6:1-5.) Chikwo nawa, Yehova ‘kakumona ku tenga’ waze keshi kwaachichimieka mumu lia yuma yipema yize akulingila akwo. Iye kakumona yize ayo akulinga ni kwaawahisa. Nawa ha mashimbu amwe, Yehova kakuwahisa tuvumbi twenyi mu mitapu yize ene keshi ni kushimbwila. Tutalenu yimwe yilweza.
UMWE PWO YAMUWAHISA KULI YEHOVA, MU MUTAPU UZE MWENE TE KESHI NI KUSHIMBWILA
11. Kuchi Yehova awahishile Maria?
11 Yehova kasakwile Maria, umwe pwo yoze te walikehesa hanga apwe naye ya Mwanenyi, Yesu. Maria te katunga mu Nazare yimwe mbonge yikehe, yize te yatwama kusuku ni Yerusaleme hamwe ni tembele yamo yipema. (Tanga Luka 1:26-33.) Mba mumu liaka Yehova asakwile Maria? Mungelo Gabriele kamulwezele ngwenyi “yena hanakuvumbisa kuli Zambi.” Mutuhasa kumona ngwetu, iye kapwile ni usepa upema ni Yehova ha yuma yize alwezele usoko wenyi Izabele. (Luka 1:46-55) Yehova kamwene Maria ni kumuwahisa mu mutapu uze mwene te keshi ni kushimbwila, mumu te kashishika kuli iye.
12, 13. Kuchi Yesu amungamishine ha kusemuka chenyi ni muze Maria amutwalile mu tembele hakupalika cha matangwa 40?
12 Muze Yesu asemukine, aya waze Yehova alwezele hakutwala ku kusemuka chenyi? Iye kakalwezele yilolo alemu hanji akwa-kuyula mu Yerusaleme ni Mbeteleme. Alioze, katumine angelo kuli tufunga waze te anafunga mapanga jo mu chana cha Mbeteleme. (Luka 2:8-14) Hachino, tufunga jacho yaya ni kutala Yesu muze te uchili mwana-kemba. (Luka 2:15-17) Maria ni Yosefwe kota kakomokene hakumona chize Yesu amunangamishine mu mutapu wacho. Mutapu uze Yehova akulingilamo yuma walisa ni wa Ndiapu. Muze Satana atumine akwa-kuhengwola tutongonoshi hanga aye ni kutala Yesu ni yisemi jenyi, atu eswe mu Yerusaleme yanyingika kusemuka chenyi, chino yichineha lamba linji. (Mateu 2:3) Hachino, twanuke anji waze te keshi chitela yaashiha chamushihila.—Mateu 2:16.
13 Shimbi ya Yehova kuli A-Izalele yambile ngwo, pwo nyi mashita mwana wa lunga kwapalika matangwa 40, iye katamba kuhana chitapo kuli Yehova. Hachino, Maria ni Yosefwe hamwe ni Yesu yalinga wenyi wa tando livwa (kilometro) kukatuka ku Mbeteleme ndo ku tembele mu Yerusaleme. (Luka 2:22-24) Mu jila, kota Maria kalihulile nyi sasendote te malinga chimwe chize muchinangamisa Yesu. Yesu kamunangamishine, alioze mu mutapu uze Maria kakapwile ni kushimbwila. Yehova yasakula Simeone lunga “mukwa ululi, mukwa kuwayila Zambi” ni profeta Ana, umwe pwo tuliwa wa miaka 84 hanga ambujole ngwo Yesu te mapwa Mesaya yoze alakenyene, hanji Kristu.—Luka 2:25-38.
14. Kuchi Yehova awahishile Maria?
14 Shina Yehova kanungine ni kuwahisa Maria mumu lia kulela ni kufunga Yesu ni ushishiko weswe? Mba, che alingile. Zambi kasele shindakenyo hanga yuma yize Maria ambile ni yize alingile ayisoneke mu Mbimbiliya. Chinasoloka ngwe Maria kakendele hamwe ni Yesu ha miaka yitatu ni ndambu muze te anambujola sango lipema. Kota amu apwile tuliwa, iye katambile kununga mu Nazare. Hachino, iye kahonene yuma yinji yipema yize akwo amwene. Alioze, iye kapwile hamwe ni Yesu muze afwile. (Yoano 19:26) Kulutwe, Maria kapwile mu Yerusaleme hamwe ni tumbaji twa Yesu, shimbu te kanda atambula spiritu yisandu ha Pentekoste. (Yilinga 1:13, 14) Iye kota kamuwayishile hamwe ni tumbaji akwo. Nyi chenacho, chinalumbunuka ngwo iye kazukile uhashi wa kupwa hamwe ni Yesu mu malilu ku miaka ya mutolo. Kwamba pundu, chino chili chiwape chipema cha mulimo wenyi washishika!
YEHOVA KANANGAMISHINE MWANENYI
15. Kuchi Yehova anangamishine Yesu muze apwile hano hashi?
15 Yesu kakazangile hanga amunangamise kuli mangana a yingeleja ni akwa-mafwefwe. Alioze, mba akwase Mwanenyi anyingike ngwo kakumuzanga, Yehova yahanjika ha yisuho yitatu kukatuka mu malilu. Chino kota chakolwezele chinji Yesu! Muze Yesu te hamupapachisa mu Lwiji Yordau, Yehova yamba ngwenyi: “Yono mwe Mwanami, ngunamuzange chikolo.” (Mateu 3:17) Chino chinasoloka ngwe kuchizako Yesu, Yoano Chipapachisa neye kevwile maliji wano. Ha umwe mwaka, muze Yesu te kanda achifwa, apostolo jenyi atatu yevwa Yehova kanambe hakutwala kuli iye ngwenyi: “Yono mwe Mwanami, ngunamuzange chikolo, muli yiye ngunawahilila, mwivwenu iye.” (Mateu 17 :5) Kusongo, ha amwe matangwa muze Yesu te kanda achifwa, Yehova yahanjika nawa ni Mwanenyi kukatuka mu malilu.—Yoano 12:28.
Yika walilongesa ha chize Yehova anangamishine Mwanenyi? (Tala maparagrafu 15-17)
16, 17. Kuchi Yehova anangamishine Yesu mu mutapu uze mwene te keshi ni kushimbwila?
16 Yesu kanyingikine ngwenyi atu te mamusanyika ngwo mukwa-kushililika nawa ngwo te mafwa kufwa cha sonyi. Alioze kalembele hanga upale wa Zambi upwe kulutwe lia upale wenyi. (Mateu 26:39, 42) Yesu ‘kanyongonwene ha mutondo wa lamba, nikulelesa sonyi,’ mumu kazangile unangamiso wa Tato, hi wa hano hashi ko. (A-Hepreu 12:2) Kuchi Yehova amunangamishine?
17 Muze Yesu apwile hashi, iye kalembele hanga apwe ni uhenya uze apwile nawo chitangu mu malilu hamwe ni Tato. (Yoano 17:5) Mbimbiliya kuyambile ni hamwe ngwo, Yesu kafupile kupwa ni uhenya wahiana uze apwile nawo chitangu. Muze apwile ni kulinga upale wa Yehova hano hashi, iye kakashimbwile kuzuka yiwape yalipwila. Mba yika Yehova alingile? Iye yanangamisa Yesu mu mutapu uze mwene kakapwile ni kushimbwila. Muze Yehova ahindwishile Yesu, ‘yamunangamisa chikolo,’ chekwamba yamwaha chihela chilemu mu malilu. Yehova nawa yahana Yesu mwono uze kuushi kufwa, uhashi uze kakapwile nawo chitangu!b (Tala maliji mushi lia lifwo.) (A-Fwilipu 2:9; 1 Timoteu 6:16) Uno uli mutapu ulemu uze Yehova anakawahishilamo Yesu hamukunda wa mulimo wenyi ungunu!
18. Yika muyitukwasa mba tupwe ni utayizo wa Yehova hi wa hano hashi ko?
18 Yika muyitukwasa mba tupwe ni utayizo wa Yehova, hi wa hano hashi ko? Twatamba kulihulikila ha chize Yehova mashimbu eswe akunangamisa ni kuwahisa tuvumbi twenyi ashishika ni chize akwaawahisa mu mutapu uze ayo keshi ni kushimbwila. Mutuhasa wika kunyonga chize Yehova makatuwahisa kulutwe lia matangwa! Alioze haliapwila, muze tunanyongonona mu yipikalo ni lamba hano hashi hapi, twiwulukenu ngwetu hashi muhapalika. Kashika lufuma mweswawo mutufupa hano hashi neye makatoka liakulu. (1 Yoano 2:17) Alioze Tata yetu wa zango, Yehova, kechi kavulama mulimo ni zango lize twakusolola ha jina lienyi, mumu iye keshi “chihenge.” (A-Hepreu 6:10) Kwamba pundu, iye hanji makatunangamisa mu mutapu uze kanda tuchinyonga kama!
a Mbimbiliya jikwo, shimbu jizachise liji “yikuma yamokomoko ya ulelu,” jakuzachisa maliji wano, “yuma ya ngwaza,” “yuma ya pola,” “yuma yize kuyishi ulemu,” ni “yuma yipi.”
b Chiwape chino, Yesu kakapwile ni kuchishimbwila, mumu mwono uze kuushi kufwa (imortalidade) kakautongwele mu Yisoneko ya Hepreu.