LONGESO 13

Kusolola Ulemu wa Pande

Yishima 3:21

CHIKUMA CHILEMU: Kwasa waze anakupanjika amone chize chikuma unahanjika muchihasa kwaakwasa ku mwono wo ni kwaasolwela yize atamba kulinga ha yize analilongesa.

YIZE WATAMBA KULINGA:

Nyonga hali waze anakupanjika. Shinginyeka ha yize waze anakupanjika atamba kuvwila sango jize unahanjika, ni kunyonga ha yikuma yize mumona ngwe muyihasa kwaakwasa chinji.
Muze unahanjika pande je, solwela waze anakupanjika yize atamba kulinga. Muze muputuka lume kuhanjika, hita mutu unakupanjika katamba kwivwa ngwenyi, ‘Pande jino jinatale ni hali yami.’ Hita chikuma chilemu muhanjika, solola mwakuchikawila. Kanda uhanjika yuma yize kuyishi mashina-ni-masongo.

Lumbununa shimbi ja Mbimbiliya ni zango ni kusolola ngwe unanyingika yize yakupalika ku mwono wa atu waze anakupanjika. Kanda uhanjika ngwe unaahisa, alioze kolesa zango ni ufulielo wo, ni kufuliela ngwe mbunge jo ene je mujaakwasa alinge yize muyivwisa Zambi kuwaha.