Malongeso a Mukanda Wakuzachisa ha Kukunguluka cha Mwono ni Mulimo Wetu
7-13 MARÇO
YIKUMA YILEMU YA MU LIJI LIA ZAMBI | 1 SAMUELE 12-13
“Kulengumuka Chakuneha Sonyi”
(1 Samuele 13:5-7) A-Filistea akungulukile mukwasa jita ni A-Izalele. Apwile ni makumi atatu a tununu (30,000) a matemba-a-jita, ni tununu asambano (6,000) a akwa tuvwalu, ni atu ha kuaalula ngwe masekeseke a ku sesa lia kalunga-lwiji. Yakanduka, yasa chilombo cho ku Mikimashi, ku sali lia Mbete-Avene ku Chivumbuko. 6 Muze malunga A-Izalele amwene ngwo, Twasakaminya (mumu atu alifwichile) mba aswamine mu yivwenge, ni mu usaki, ni mu yimawe, ni mu pembo, ni mu mena. 7 Amwe A-Izalele te hazauka Yordau haya ku chifuchi cha Ngate ni Ngiliate, alioze Saulu aye hindu te kanatwama ku Ngilingali mba atu eswe amukawile nikuchikima.
(1 Samuele 13:8, 9) Yashimbula matangwa shimbiali nikulita ni shimbu lize Samuele hamusela, alioze Samuele kahetele ku Ngilingali, ni atu akatukile kuli Saulu nikumwangana. 9 Saulu yamba ngwenyi, Nehenu kuli yami mulambu wa kulumba ni milambu ya sambukila. Yalambula wa kulumba.
w00 1/8 13 ¶17
Kulengumuka Chakuneha Sonyi
17 Ku uputukilo, yuma yize Saulu alingile yasolokele ngwe yipema. Ha mashimbu jacho, atu ja Zambi te ‘kanalifwichi’ ni kuchikima mumu lia ukalu uze te anapalika. (1Sa 13:6, 7) Hi chipiko kuputuka kulinga yimwe nyi wamona ngwe yinalite. Alioze, chili chipema kwiwuluka ngwo, Yehova mahasa kutanga yize yili ku mbunge ni kunyingika manyonga jetu. (1Sa 16:7) Kashika, iye kanyingikine yimwe yuma hakutwala kuli Saulu yize yishi ha lusango yono wa Mbimbiliya. Chakutalilaho, Yehova kota kamwene ngwenyi Saulu kasolo kulihumikiza mumu lia kulizata. Saulu kota kevwile uli unji hakunyonga ngwenyi, amu iye kali mwanangana wa mu Izalele yeswe, katambile kushimbwila mutu yoze iye te akumona ngwe profeta kashinakaji walaluka. Saulu kapwile ni kunyonga ngwe kulaluka cha Samuele chamuhele uhashi wa kulinga yuma mwene ni kulengulula usongwelo uze amuhele. Mba yika yalingiwileko? Samuele kakachichimiekene Saulu ha yize alingile. Alioze, yamupajila ni kumwamba ngwenyi: “Wanangana we kuuchi kulinduluka . . . mumu yena kwalingile chize Yehova akwambile.” (1Sa 13:13, 14) Cheka nawa, kulengumuka chakuneha sonyi.
(1 Samuele 13:13, 14) Samuele yamba kuli Saulu ngwenyi, Hiwalinga uhepuke. Kwalingile nikulita ni shimbi ya Yehova Zambi ye yize akwambile. Mumu nyi kachi walinga kanawa kachi Yehova kakolesa wanangana we kuli A-Izalele ku miaka ya mutolo. 14 Alioze haliapwila wanangana we kuuchi kulinduluka. Yehova halifupila mutu umwe malita ni mbunge yenyi. Yehova hamutongola akayule atu jenyi, mumu yena kwalingile chize Yehova akwambile.
w07 15/6 27 ¶8
Yehova Kakulemesa Chinji Kwononoka Chetu
8 Lusango wa mu Mbimbiliya hakutwala kuli Mwanangana Saulu kanashindakenya ha ulemu wa kwononoka. Muze Saulu aputukile kuyula te kakulikehesa ni kuhomboka, kashika alimwene ngwe ‘kali mukehe.’ Alioze hakupalika cha mashimbu, yiyulo yenyi ni manyonga yiyipwa ya kulizata. (1Sa 10:21, 22; 15:17) Tangwa limwe, te kwasala hakehe Saulu hanga ase jita ni A-Filistea. Samuele yamulweza mwanangana hanga amushimbwile, eze alambule milambu kuli Yehova ni kumwaha nawa usongwelo. Alioze, Samuele kakahetele ha ola yize apwile ni kumushimbwila, kashika atu yaputuka kulimwanga. Hachino, Saulu yalambula “milambu ya kulumba.” Yehova yachivwila kupiha. Muze Samuele ahetele, mwanangana yaputuka kulikalila mwene ni kwamba ngwenyi, kulaluka cha Samuele che ‘chamukapwola’ hanji chamutwala hanga alambule mulambu ‘alembele vumbi lia Yehova.’ Mwanangana Saulu kanyongene ngwenyi, kulambula chitapo te chili chilemu kuhiana kwononokena shimbi yize amuhele ya kushimbwila Samuele hanga alambule chitapo chacho. Kashika Samuele yamwamba ngwenyi: “Hiwalinga uhepuke. Kwalingile nikulita ni shimbi ya Yehova Zambi ye yize akwambile.” Kuhona kwononokena Yehova yichitokesa wanangana wa Saulu.—1Sa 10:8; 13:5-13.
Kuhengwola Yikuma Yilemu ya mu Mbimbiliya
(1 Samuele 12:21) Kanda nupiasuka ha kukaula yuma yamokomoko yize kuyichi kuhasa kunukwasa hanji kunupulula mumu kuyapwa yamokomoko.
w11 15/7 13 ¶15
Shina Yena Mukaula Usongwelo wa Zango wa Yehova?
15 Shina atu kapwile ni kunyonga ngwo mwanangana yoze maayula, kali wamwenemwene, nawa katamba kumujikijila kuhiana Yehova? Ni chenacho apwile ni kunyonga, ayo te kanaliongo ene. Chikwo nawa, ayo kapwile ni kulinjisa mu ponde ha kukaula yuma yikwo yangwaza ya Satana. Kwayula kuli atu te muchipwa chashi kwapiangula hanga akombelele mahamba. Waze akukombelela mahamba kakulionga ene ha kunyonga ngwo shinaho kuwayila tuponya waze tunamono, kuhiana kuwayila Yehova Zambi yoze keshi kumoneka, watangile yuma yeswe. Alioze, ngwe chize ambile postolo Paulu, mahamba “hi chimwe ko,” chekwamba keshi ni ulemu. (1Ko 8:4) Mahamba keshi kumona, kwivwa, kuhanjika hanji kulinga chimwe. Yena muhasa kwamona, kwakwata, alioze kwawayila chili ngwe unakisa wika mashimbu je, nawa muchikunehena wika lamba.—Sam 115:4-8.
Kutanga Mbimbiliya
(1 Samuele 12:1-11) Samuele yamba kuli A-Izalele eswe ngwenyi, Hinapanjika ku liji lieswe nwambile kuli yami. Hinanwaha mwanangana kunuyula. 2 Haliapwila mwanangana kanende kumeso jenu ni yami hinapwa kashinaji ni kambu jitoma, ni anami a malunga kwali hakachi kenu. Hingunende kumeso jenu chize ku wanuke wami ndo musono. 3 Yami uno. Shindakenyenu hakutwala kuli yami kumeso ja Yehova ni kumeso ja yono hanawayisa. Ngombe jaya natambula? Hanji chimbulu? Yoze namwiya mbongo, iya? Napinjisa iya? Kuli iya natambula chindo ngujike nacho meso jami? Ambenu nguchihilwise. 4 O ambile ngwo, Kwatwiyile, chipwe kutupinjisa, chipwe kutambula chimwe kuli umwe mutu. 5 Iye yamba kuli ayo ngwenyi, Yehova chela kuli yenu, ni yono hanawayisa ni maji iye nawa chela musono chakwamba ngwenu, Kutwawanyine nichimwe mu kwoko lienyi, nyi? O ngwo, Iye chela. 6 Samuele yamba kuli atu ngwenyi, Mwe Yehova Iye Mwene wanuhele Mose ni Arone, wachijile tulamba twenu nawa ku chifuchi cha Engitu. 7 Kashika manenu haliapwila nguhanjike ni yenu kumeso ja Yehova ha kutwala ku yitanga yeswe ya ululi ya Yehova, yize anulingilile, ni yenu ni tulamba twenu. 8 Muze Yakomba ayile ku Engitu mba tulamba twenu atetele kuli Yehova, henaho Yehova yatuma Mose ni Arone. O yachiza tulamba twenu ku Engitu, yaatungisa mu chifuchi chino. 9 Alioze yavulama Yehova Zambi yo kashika iye yaalanjisa kuli Sisera kapitau ka tujita twa Hazore, ni kuli A-Filistea, ni kuli mwanangana wa Moape, ashile no jita. 10 Yateta kuli Yehova ni kwamba ngwo, Hitwavulumuna mumu ha kwehuka Yehova nikulingila Ambale ni Asatarote. Alioze utupulule kama haliapwila kuli akwa kole jetu mba mutukulingila. 11 Mba Yehova watumine Njerubale, ni Mbedane, ni Jefeta, ni Samuele nikunupulula kuli akwa kole jenu kweswe kwa kujingilika chocho nwatwamine kawape.
14-20 MARÇO
YIKUMA YILEMU YA MU LIJI LIA ZAMBI | 1 SAMUELE 14-15
“Kwononoka Kuchahiana Yitapo”
w07 15/6 26 ¶4
(1 Samuele 15:3) Kashika yako haliapwila ukalambe Amaleke ukonwone yize yeswe alinayo. Kanda uavwila keke alioze shiha malunga, ni mapwo, ni twanuke ni akwa kwamwa, ni ngombe, ni mapanga, ni tumelu, ni yimbulu.
(1 Samuele 15:13-15) Samuele yaheta kuli Saulu, mba Saulu yamba kuli iye ngwenyi, Yehova anuwahise! Hinalinga shimbi ja Yehova. 14 Samuele yamba ngwenyi, Mba kuteta acho cha mapanga ni kuteta cha ngombe ngunevu kuchi chinalumbunuka? 15 Saulu yamba ngwenyi, E aze atambwile kuli A-Amaleke, mumu atu alamwinyine yimuna apema hakachi ka mapanga ni ngombe akaalambule kuli Yehova Zambi yenu. Alioze akwo eswe hitwanongesa liakulu.
(1 Samuele 15:22, 23) Samuele yamba ngwenyi, Te Yehova kakuwahilila ni milambu ya kulumba ni yitapo, nyi kakuwahilila nyi waze mamwononokena? Kwononoka kuchahiana kulambula yitapo. Kupanjika kuchahiana kuhana maji a kuji a mapanga. 23 Mumu kukolema kuchapwa ngwe mulonga wa umbanda, ni upama kuwapwa ngwe uhenge ni kukombelela. Ena hiunalitunu liji lia Yehova; kashika aye hanalitunu yena. Kuchi kupwa mwanangana.
Yehova Kakulemesa Chinji Kwononoka Chetu
4 Ngwe Sakatanga, Yehova kali mwenya yuma yeswe yize tukwete ya ku musunya. Chipwe chocho, shina kuli chuma chimwe chize mutuhasa kumwaha? Ewa, mutuhasa kumwaha chuma chilemu chinji. Chuma chika chenacho? Kumbululo lili ha utowezo uno: “Mwanami, pwako ni mana ukawahise mbunge yami, ngukahase kukumbulula yoze manguchoka.” (Yis 27:11) Kashika chuma chize mutuhasa kuhana kuli Yehova chili kumwononokena. Chipwe ngwe tukwete mwono walisa, nawa tunakakolela kweswako, nihindu nyi twononoka mutuhasa kuhangulula Satana Ndiapu yoze wambile ngwenyi, atu kechi kununga ni kushishika kuli Zambi muze anapalika mu yeseko. Chino chili kuyuka chinene!
it-3 114 ¶11
Kwononoka
Kukushi chuma ni chimwe chize mutuhasa kusalakanyisa ni kwononoka, nawa kutuchi kuhasa kupwa ni utayizo wa Zambi chakuhona kwononoka. Ngwe chize Samuele ambile kuli Mwanangana Saulu: “Te Yehova kakuwahilila ni milambu ya kulumba ni yitapo, nyi kakuwahilila nyi waze [forma de sha·má] mamwononokena? Kwononoka [chinalumbunuka kupanjika] kuchahiana kulambula yitapo. Kupanjika kuchahiana kuhana maji a kuji a mapanga.” (1Sa 15:22) Kwecha kwononoka chili kwehuka liji lia Yehova, ni kusolola ngwo mutu keshi kufuliela ni kujikijila ha liji liacho ni hali Mwenya liji. Kashika, mutu yoze keshi kwononoka kapwa ngwe chimbanda hanji mukwa-kukombelela mahamba. (1Sa 15:23; tesa ni Ro 6:16) Kutayiza wika mu kanwa kuchalumbunukine kulinga yize atwita; kwehuka kwononoka chakusolola kuhona vumbi mwenya usongwelo. (Mat 21:28-32) Waze akuwahilila wika ha kwivwa ni kutayiza chamutayijila umwenemwene wa Liji lia Zambi, alioze keshi kulinga yize akweta hanga alinge, kakulionga ene, nawa kechi kazuka yiwape. (Tia 1:22-25) Yesu kasolwele pundu ngwo, chipwe waze akulinga yuma yize akwalweza hanga alinge, alioze mayilinga mu mulali upi hanji ni nyonga lipi, kechi kahinga Wanangana, makeehuka.—Mat 7:15-23.
Kuhengwola Yikuma Yilemu ya mu Mbimbiliya
(1 Samuele 15:24) Saulu yamba kuli Samuele ngwenyi, Hingunavulumuna, mumu hinatangula shimbi ja Yehova ni maliji jenu nawa, mumu nevwilile woma e atu nikupanjika ku liji lio.
it-1 535
Keke
Kutayiza kulinga chuma chize Zambi keshi kuzanga mumu lia keke, muchihasa kutunehena kapinda munji ku mwono. Yino yinasoloka ha yize Mwanangana Saulu alingile. Muze A-Izalele akatukile ku Engitu, atu atangu waze azangile kuliasa no jita chakuhona kwasosomba kapwile A-Amaleke, kashika shimbu lia kwonona te hiliaheta. Yehova yahana shimbi kuli Saulu ahone kwevwila keke. Alioze, Saulu yamushinjila kuli yilolo jenyi, hachino, yehuka kukaula shimbi ya Yehova ni mbunge yeswe. Kashika, Yehova yalituna Saulu kupwa mwanangana. (1Sa 15:2-24) Mutu yoze wakulemesa chinji shimbi ja ululi wa Yehova ni kushishika kuli Iye ni mbunge yeswe, mahasa kwehuka kulinga uhenge ngwe uze Saulu alingile ni kutokesa utayizo wa Zambi.
Kutanga Mbimbiliya
(1 Samuele 15:1-16) Samuele yamba kuli Saulu ngwenyi, Yehova wangutumine kukuwayisa ni maji nikukupwisa mwanangana wa atu jenyi, A-Izalele. Kashika panjika kanawa liji lia Yehova. 2 Yehova-wa-Tujita kanambe ngwenyi, Hingunamono chize A-Amaleke alingile kuli A-Izalele, chize alimikine no mu jila ha kukatuka ku Engitu. 3 Kashika yako haliapwila ukalambe Amaleke ukonwone yize yeswe alinayo. Kanda uavwila keke alioze shiha malunga, ni mapwo, ni twanuke ni akwa kwamwa, ni ngombe, ni mapanga, ni tumelu, ni yimbulu. 4 Saulu yasanyika atu, yaalula ku Telaime, apwile kulakaji aali a tununu (200,000) a maswalale a kwenda hashi, ni kumi lia tununu a malunga a Yunda. 5 Saulu yeza ku limbo lia Amaleke, yajikinyina mu chikulo. 6 Saulu yamba kuli A-Kene ngwenyi, Katukenu, yenu nutuhuke hakachi ka A-Amaleke kuchina mungunwonwona hamuwika. Mumu yenu nwalingile ni vumbi kuli A-Izalele eswe muze akatukile ku Engitu. Chocho A-Kene yakatuka hakachi ka A-Amaleke. 7 Mba Saulu yalamba A-Amaleke chize ku Havila mu jila ya kuya ku Shure hatalanganyi ni Engitu. 8 Yakwata Agage mwanangana wa A-Amaleke wa mwono. Yanongesa liakulu atu eswe ni tutana. 9 Saulu ni e atu kashihile Agage ni yimuna apema hakachi ka mapanga, ni ngombe, ni yimbembe a maji, ni ana-mapanga, ni yuma yeswe yipema; kayinongesene. Alioze api eswe, amokomoko o aanongesene liakulu. 10 Henaho liji lia Yehova yiliza kuli Samuele ngwenyi, 11 Hinalikonyeka ha kupwisa Saulu mwanangana, mumu hanalitwamina kungukaula. Kalingile chize hamutumine. Samuele yalifwita mu mbunge, yateta kuli Yehova ufuku weswe. 12 Samuele yalimeneka chimenemene akatakane ni Saulu. Yalweza Samuele ngwo, Saulu heza ku Karmela, halimikina luliwe lwa kumwiwuluka, halumuka, hapalumuka ku Ngilingali. 13 Samuele yaheta kuli Saulu, mba Saulu yamba kuli iye ngwenyi, Yehova anuwahise! Hinalinga shimbi ja Yehova. 14 Samuele yamba ngwenyi, Mba kuteta acho cha mapanga ni kuteta cha ngombe ngunevu kuchi chinalumbunuka? 15 Saulu yamba ngwenyi, E aze atambwile kuli A-Amaleke, mumu atu alamwinyine yimuna apema hakachi ka mapanga ni ngombe akaalambule kuli Yehova Zambi yenu. Alioze akwo eswe hitwanongesa liakulu. 16 Samuele yamba kuli Saulu ngwenyi, Kala! Mungukwambulwila chize Yehova angwambanga ha ufuku. Saulu yamba ngwenyi, Hanjikenu tuhu.
21-27 MARÇO
YIKUMA YILEMU YA MU LIJI LIA ZAMBI | 1 SAMUELE 16-17
“Jita Yambala ya Yehova”
(1 Samuele 17:36, 37) Yami kavumbi kenu nashihile ndumba ni ursu, eswe aali, mba yono chilima cha Ka-Filistea mapwa ngwe umwe hakachi ko se hatomba chizavu cha tujita twa Zambi ya mwono. 37 Ndawichi yamba nawa ngwenyi, Yehova yoze wangupulwile ku tachi ja ndumba ni ku tachi ja ursu mangupulula nawa ku tachi ja yono Ka-Filistea. Saulu yamba kuli Ndawichi ngwenyi, Yako. Yehova mapwa hamwe ni yena.
wp16.5 11 ¶2-3
“Jita Yambala ya Yehova”
Ndawichi kahanjikile hakutwala ha chize ashihile ndumba ni ursu, mba Saulu atayize nyonga lienyi. Shina iye te kanazange kulisamba? Ka. Ndawichi kanyingikine ngwenyi, kakakumbile yilianyi jacho ku tachi jenyi. Iye yamba ngwenyi: “Yehova yoze wangupulwile ku tachi ja ndumba ni ku tachi ja ursu mangupulula nawa ku tachi ja yono Ka-Filistea.” Hachino, Saulu yatayiza ni kwamba ngwenyi: “Yako. Yehova mapwa hamwe ni yena.”—1 Sa 17:37.
Unazange kupwa ni ufulielo ukolo ngwe wa Ndawichi? Ufulielo wa Ndawichi te kuushi kukatuka ha yuma ya ngwaza hanji ya mu mutwe wenyi. Iye te hi chihepuke ko. Yuma yize alilongesele ni yize amwene, ye yamukwashile kupwa ni ufulielo ukolo. Iye te kananyingika kanawa ngwenyi, Yehova kakufunga tuvumbi twenyi ni kumanununa yilakenyo yenyi. Nyi tunazange kupwa ni ufulielo ngwe wa Ndawichi, twatamba kununga ni kulilongesa hakutwala kuli Yehova. Muze twakulinga yize Yehova akutwita, mwono wetu wakupema. Nawa ufulielo wetu wakukola.—Hep 11:1.
(1 Samuele 17:45-47) Mba Ndawichi yamba kuli Ka-Filistea ngwenyi, Ena uneza kuli yami ni katana, ni kunga, ni kunga lia kukonga, alioze yami nguneza kuli yena ni jina lia Yehova-wa-Tujita, Zambi ya maswalale a Izalele yoze wakutomba-tomba. 46 Tangwa lino Yehova makukunjika mu moko jami mba mungukushiha, mungukutapa mutwe. Musono munguhana mijimba ya A-Filistea kuli tujila a mu tetela ni kuli tushitu a mu yambu, hanga akwa hashi eswe akanyingike ngwo, Kwali umwe Zambi mu Izalele. 47 Chikwo nawa hanga wano eswe anakunguluka kuno akanyingike ngwo, Yehova keshi kulamwina ni katana hanji ni kunga. Mumu jita ya mbala ya Yehova neye makuhana mu kwoko lietu.
wp16.5 11-12
“Jita Yambala ya Yehova”
Kumbululo lia Ndawichi lili chilweza chipema cha ufulielo kuli yetu. Iye yatala kuli Ngoliate ni kukololoka ngwenyi: “Ena uneza kuli yami ni katana, ni kunga, ni kunga lia kukonga, alioze yami nguneza kuli yena ni jina lia Yehova-wa-Tujita, Zambi ya maswalale a Izalele yoze wakutomba-tomba.” Kuli Ndawichi, tachi jeswe ni mata ja Ngoliate yapwile yuma yangwaza. Ngoliate kapwile ni kutuka Yehova, kashika Yehova te malimika nenyi. Hachino, Ndawichi yamba ngwenyi, “jita ya mbala ya Yehova.”—1Sa 17:45-47.
Ndawichi kamwene utohwe wa Ngoliate ni mata jenyi. Chipwe chocho, iye kakevwile woma. Kakembulwile uhenge wa Saulu ni tujita twa A-Izalele. Shimbu alitese ni Ngoliate, Ndawichi yatesa Ngoliate ni Yehova. Ngoliate kapwile ni usuhwe wa mbandu 3. Kapwile munene chinji kuhiana malunga akwo. Usuhwe wa mbandu 3 nichimwe ha kuutesa ni Sakatanga wa malilu ni hashi. Kuli Yehova, mutu kali ngwe kangenyengenye. Ngoliate kapwile wika ngwe umwe kangenyengenye munene ndambu, chipwe chocho Yehova te kali ni uhashi wa kumushiha!
(1 Samuele 17:48-50) Muze Ka-Filistea hakatuka hakundama akatakane ni Ndawichi, mba Ndawichi hatambuka nikuzomboka kuli maswalale atakane ni Ka-Filistea. 49 Ndawichi yanjisa kwoko lienyi mu ngonga, yachizamo liwe, yalikonga, yililamba Ka-Filistea ha huma. Liwe yilinjila ha huma lienyi, yalimbukila hashi. 50 Chocho Ndawichi yakumba Ka-Filistea ni liwe lia kukonga ni chikapa. Yalamba Ka-Filistea, yamushiha, alioze Ndawichi te keshi ni katana mu kwoko lienyi.
wp16.5 12 ¶4
“Jita Yambala ya Yehova”
Musono, tuvumbi ja Yehova keshi kwasa jita ya ku musunya. Mashimbu akwasa jita hanapalika. (Mat 26:52) Chipwe chocho, twatamba kwimbulula ufulielo wa Ndawichi. Yehova katamba kupwa mutu wamwenemwene kuli yetu, yoze watela uhaliso wetu. Ha mashimbu amwe, milonga yetu muyihasa kusolola ngwe yinene chinji. Alioze nyi twayitesa ni ndundo ja Yehova jize kujishi songo, mutuyimona ngwetu yili yikehe. Nyi twasakula kulingila Yehova Zambi yetu ni kufuliela muli iye, ngwe chize alingile Ndawichi, kutuchi kuvwila atu woma chipwe chuma cheswacho. Ndundo ja Yehova jahiana kapinda mweswawo mutupalika!
Kuhengwola Yikuma Yilemu ya mu Mbimbiliya
(1 Samuele 16:14) Spiritu wa Yehova te hakatuka kuli Saulu; spiritu umwe mupi wa kuli Yehova yamupinjisa.
it-3 547
Saulu
Muze Yehova achijile spiritu yenyi muli Saulu, yichipwa chashi spiritu yipi yitwame muli iye. Spiritu yacho yiyiputuka kupinjisa Saulu ni kumuchiza sambukila mu mbunge ni kumusa manyonga api. Kwehuka kwononokena Yehova, chasolwele upi wa ku mbunge ni manyonga ja Saulu, mumu te keshi nawa ni spiritu ya Zambi hanga yimufunge. Amu Yehova echele hanga ‘spiritu yipi’ yisalakane spiritu yenyi ni kupinjisa Saulu, kashika apwile ni kuyivuluka ngwo “spiritu umwe mupi wa kuli Yehova.” Nawa tuvumbi ja Saulu kapwile ni kuyisanyika ngwo “umwe spiritu mupi wa kuli Zambi.”—1Sa 16:14-23; 17:15.
Kutanga Mbimbiliya
(1 Samuele 16:1-13) Yehova yamba kuli Samuele ngwenyi, Ndo mwiji muka mukalishimwoka hali Saulu, se hinalitunaye, kechi kupwa mwanangana wa Izalele? Zalisa mbinga ye ni maji, yako, mungukutuma kuli Yese wa ku Mbeteleme, mumu hinalisela mwanangana hakachi ka anenyi a malunga. 2 Samuele yamba ngwenyi, Kuchi munguhasa kuya? Nyi Saulu machivwa mangushiha. Yehova yamba ngwenyi, Twala chimbembe wa chihwo ukambe ngwe, Ngunayi mukulambula chitapo kuli Yehova. 3 Sanyika Yese eze ku chitapo, mba mungukulweza chize mulinga. Mukawayisa ni maji yoze mungumutongola. 4 Samuele yalinga chize Yehova amwambile; yeza ku Mbeteleme. Makulwana a chihunda yamupatwiza nikuchikima. Yamba ngwo, Nuneza ni sambukila? 5 Iye ngwenyi, Ni sambukila nguneza ni kulambula chitapo kuli Yehova. Liselenu ku usandu nwize ni yami ku chitapo. Iye yasela ku usandu Yese ni ana jenyi; yaasanyika ku chitapo. 6 Muze heza aye yatala Eliape yamba ngwenyi, Pundu, yoze mamuwayisa kuli Yehova kwali kumeso jami. 7 Alioze Yehova yamba kuli Samuele ngwenyi, Kanda utala ku meso jenyi, hanji ku chizundamo chenyi, mumu hinalitunaye. Yehova kamwene ngwe atu akumona. Mumu atu kakutala ku kusoloka cha haze, alioze Yehova kakutala ku mbunge. 8 Mba Yese yasanyika Abinadambe akapalike kumeso ja Samuele. Alioze yamba ngwenyi, Chipwe yono, Yehova kamutongwele. 9 Mba Yese yapalikisa Shama. Alioze yamba ngwenyi, Chipwe yono, Yehova kamutongwele. 10 Chocho Yese yapalikisa ana jenyi a malunga shimbiali kumeso ja Samuele, alioze Samuele yamba kuli Yese ngwenyi, Yehova katongwele wano. 11 Samuele yamba kuli Yese ngwenyi, Ana je eswe, waene nyi? Iye yamba ngwenyi, Kwasala mwe kasulasongo, kanafungu mapanga. Samuele yamba kuli Yese ngwenyi, Tuma amusake, mumu kutuchi kutwama ndo meza kuno. 12 Yatuma yamusaka. Iye te muchila chikolo, meso jenyi apema, kanawaha chikolo ha kumutala. Yehova yamba ngwenyi, Mwenawo, katuka umuwayise. 13 Samuele yanda mbinga ya maji yamuwayisa hakachi ka ayayo. Mba Spiritu wa Yehova yeza ni tachi hali Ndawichi chize ku tangwa lize. Samuele yakatuka yaya ku Rama.
28 MARÇO–3 ABRIL
YIKUMA YILEMU YA MU LIJI LIA ZAMBI | 1 SAMUELE 18-19
“Nunga ni Kulikehesa Muze Unazuku Yiwape”
(1 Samuele 18:5-7) Ndawichi wayile kweswako Saulu amutumine ni kulinga ni mana, mba Saulu yamusa helu lia tujita twenyi. Acho chapemenene atu eswe. Chipwe ngamba eswe a Saulu chaapemenene. 6 Alioze chapwile te ha kuhiluka ku kushiha Ka-Filistea mapwo atuhukile mu membo eswe a Izalele ni kupatwiza mwanangana Saulu nikwimba, nikuhangana, ni tumikupiela, ni kulikwiza ni yisaji. 7 Mapwo alitawijile umwe ni mukwo ngwo, Saulu hashiha tununu twenyi; Ndawichi hashiha makumi jenyi a tununu.
w04 1/4 15 ¶4
Jikijila ha Spiritu ya Zambi Muze Yuma Muyalumuka ku Mwono
4 Ha mashimbu akehe, mukweze yono kafunga mapanga yaputuka kupwa ni lufuma mu Izalele. Yamusanyingika hanga akalakalile mwanangana ni kumwimbila kalialia. Iye yashiha kajita Ngoliate, umwe chitakame munene, yoze te akuvwila woma kuli tujita ajama a Izalele. Ndawichi yamutongola hanga asongwele tujita a Izalele, nawa kalingile kanawa mulimo wacho ha kukumba A-Filistea. Atu kapwile ni kumuzanga chinji. Yaputuka kumwimbila miaso ya kumuchichimieka nayo. Chikwo nawa, umwe chilolo wa Mwanangana Saulu, kahanjikile hakutwala kuli mukweze Ndawichi ngwenyi, iye keshi kunyingika wika “kwimba kalialia kanawa,” alioze nawa “kapwa chitakame mukwa hamu, kajita, chikanyame, mupema ku meso.”—1 Sa 16:18; 17:23, 24, 45-51; 18:5-7.
(1 Samuele 18:14) Ndawichi walingile ni mana mu majila jenyi eswe, mba Yehova wapwile hamwe nenyi.
(1 Samuele 18:22, 23) Saulu yatuma ngamba jenyi ngwenyi, Hanjikenu ni Ndawichi ku tenga ngwenu, Tala mwanangana kanakuzange chikolo, ni ngamba jenyi eswe kanakuzange, kashika pwako tato-weno ya mwanangana. 23 Ngamba ja Saulu yambulula maliji wano mu mutwi ja Ndawichi. Ndawichi yamba ngwenyi, Kuli yenu te chinapu chuma chilelu kupwa tato-weno ya mwanangana, se nguli chiswale; mutu mulelu lume?
Tala Kulisa Chatwama Hakachi ka Atu
6 Atu amwe kakulizata mumu kali apema, kaanyingika kuli atu anji, kakwimba miaso kanawa, kakwete tachi hanji kakwaakomoka kuli akwo. Ndawichi kapwile ni yuma yeswayi, alioze kapwile mukwa-kulikehesa ku mwono wenyi weswe. Chakutalilaho, muze Ndawichi ashihile Ngoliate, Mwanangana Saulu yalweza Ndawichi hanga ambate mwanenyi. Alioze Ndawichi yamba ngwenyi: “Yami iya, hanji mwono wami ni munyachi wa tata mu Izalele kuchi wapwa mba ngukapwe tato-weno wa mwanangana?” (1 Samuele 18:18) Yika yakwashile Ndawichi mba apwe mukwa-kulikehesa? Iye kanyingikine ngwenyi, kapwile ni yitanga, utotombo, ni yiteli yeswayo, mumu Zambi kapwa mukwa-kulikehesa nawa te kakumufunga kanawa. (Samu 113:5-8) Ndawichi kanyingikine ngwenyi chuma cheswacho chipema apwile nacho chakatukile kuli Yehova.—Tesa nawa ni 1 A-Korindu 4:7.
7 Ngwe Ndawichi, atu ja Yehova musono kakusa tachi hanga alikehese. Twakwivwa kuwaha ha kunyingika ngwetu Yehova mwene, Mukwa-Ndundo-Jeswe, kapwa mukwa-kulikehesa. (Samu 18:35) Twakuzanga kukaula maliji wano: “Zalenu mbunge ja keke, ni utu, ni mbunge ja kulikehesa, ni kushimbika, ni uhomboloji.” (A-Kolosu 3:12) Nawa tunanyingika ngwetu, “zango kulishi kulisangala, kulishi kulifuza.” (1 A-Korindu 13:4) Muze atu mamona ngwo twakulikehesa, no mazanga kunyingika Yehova. Chizechene ngwe yitanga yipema ya pwo mukwa-Kristu muyihasa kukwasa mukwo-lunga yoze hi mukwa-Kristu ko akundame kuli Yehova, atu mahasa kukundama kuli Zambi hamukunda wa kulikehesa cha tuvumbi twenyi.—1 Petulu 3:1.
Kuhengwola Yikuma Yilemu ya mu Mbimbiliya
(1 Samuele 19:23, 24) Iye yaya ku Naiote mu Rama, mba Spiritu wa Zambi yahulumukina hali iye nawa, yaya nikuprofeteza ndo ku Naiote mu Rama. 24 Iye nawa yazula mazalo jenyi, iye nawa yaprofeteza kumeso ja Samuele. Yambomba uselesele tangwa lize lieswe ni ufuku uze weswe. Kashika akwamba ngwo, Saulu nawa hakachi ka aprofeta ali, nyi?
it-3 337
Profeta
Muze Saulu apwile ni kukaujola Ndawichi, ‘yalipwisa ngwe profeta,’ ha kuzula mazalo jenyi ni kupomba “uselesele tangwa lize lieswe ni ufuku uze weswe.” (1Sa 19:18–20:1) Chino kuchalumbunukine ngwo, aprofeta kapwile ni kwenda uselesele, Mbimbiliya kuyishi kusolola chocho. Yisuho yaali yize aprofeta azulile mazalo jo, kachilingile hanga asolole chize uprofeto muumanunuka. (Iza 20:2-4; Mik 1:8-11) Saulu kota kazulile mazalo jenyi hanga te asolole ngwenyi kali ngwe mutu mweswawo, chikwo nawa, ha kuzula mazalo a wanangana, kota kasolwele ngwenyi mazalo jacho kuli Yehova keshi ni ulemu.
Kutanga Mbimbiliya
(1 Samuele 18:25–19:7) Saulu yamba ngwenyi, Ambenu kuli Ndawichi ngwenu, Mwanangana kazangile yihako yikwo shina misosha ya kulakaji lia A-Filistea akalikale hali akwa kole jenyi. Saulu te kananyongo ngwenyi, Ndawichi mafwa kuli A-Filistea. 26 Muze ngamba jenyi halweza Ndawichi maliji wano chamuwahilile kanawa kupwa tato-wenu ya mwanangana. Matangwa te kanda ahwa 27 kashika Ndawichi ni malunga jenyi yakatuka, yaya, yashiha kulakaji aali a A-Filistea. Mba Ndawichi yaneha misosha yo, yayihana yeswe kuli mwanangana akapwe tato-weno ya mwanangana. Chocho Saulu wamuhele mwanenyi Mikale akapwe pwo lienyi. 28 Mba Saulu yamona, yanyingika ngwenyi, Yehova kwali hamwe ni Ndawichi. Chikwo nawa Mikale mwana Saulu wazangile Ndawichi. 29 Kashika Saulu yavwila Ndawichi woma kuhiana nawa. Yapwa kuli Ndawichi mukwa-kole yenyi matangwa eswe. 30 Mianangana ja A-Filistea matuhwokatuhwoka mukwasa jita, alioze jila yeswe atuhukile Ndawichi walingile ni mana kuhiana atu eswe a Saulu. Kashika jina lienyi liafumanyine.
19:1 Saulu yahanjika ni mwanenyi Jonata ni kuli ngamba jenyi eswe ashihe Ndawichi. Alioze Jonata mwana Saulu wazangile chikolo Ndawichi. 2 Jonata yalweza Ndawichi ngwenyi, Tata Saulu kanafupu kukushiha. Kashika kanyama kanawa hamene chimene ukaswame mu chiswamino chimwe. 3 Mba ami munguya ngukamane hamwe ni tata mu yambu kuze uli. Munguhanjika ni tata ha kutwala kuli yena. Nyi mungwivwa chimwe chuma mungukulweza. 4 Jonata yahanjika kanawa kuli tato Saulu ha kutwala kuli Ndawichi ngwenyi, Mwanangana kanda uvulumuna kavumbi ke Ndawichi, se iye kakuvulumwine, nyi chikwo nawa hakukwasa chiko ni yitanga yenyi.5 Mumu wanjilile mu utoji ni kushiha mwe Ka-Filistea mba Yehova walingile kukumba chinene hali A-Izalele. Ni yena kuwachimwene, yikuwahilila, kashika kuchi te muvulumuna manyinga keshi mulonga ukashihe Ndawichi, chitela chakuhi? 6 Saulu yapanjika ku liji lia Jonata, yalishinga ngwenyi, Ni mwono wa Yehova, kechi kamushiha. 7 Mba Jonata yasanyika Ndawichi, yamulweza yuma yino yeswe. Jonata yaneha Ndawichi kuli Saulu, yatwama kumeso jenyi chizechene ngwe wapwile kunyima.
4-10 ABRIL
YIKUMA YILEMU YA MU LIJI LIA ZAMBI | 1 SAMUELE 20-22
“Chize Muupwa Sepa Mupema”
(1 Samuele 20:1, 2) Mba Ndawichi yachina ku Naiote mu Rama yeza kuli Jonata yamba ngwenyi, Yika nalinga? Chitela chami chika? Mulonga wami uka kumeso ja tatenu, kanazange kungushiha? 2 Iye yakumbulula ngwenyi, Hi chocho ko. Kuchi kufwa. Tata kechi kulinga nichimwe chipwe chinene chipwe chikepe, ndo mangulweza. Kuchi te tata manguswekela chuma chino? Kuchapwile chocho.
Kolesa Usepa we ni Mandumbu Shimbu Songo Kanda Liheta
18 Musono, mandumbu jetu kanapalika mu yipikalo yalisa. Anji akuli ayo kanapalika mu luyinda wa chisemewa, minyiko ni yilungo. Akwo kanapalika mu upi uze atu akuneha, ngwe jita ni ungalwe. Muze yino yakulingiwa, amwe akuli yetu twakupwa ni uhashi wakutambula mandumbu jacho ku mazuwo jetu. Eka kali ni uhashi wa kuhana ukwaso wa mbongo. Alioze, chuma chize tulieswe mutuhasa kulinga chili kulemba kuli Yehova ni kwita hanga akwase mandumbu jetu. Muze twakwivwa ngwo, umwe ndumbu hanji umwe pangi kananenganyana, chakupwa chikalu kunyingika yize mutwamba ni yize mutulinga. Alioze tulieswe tuli ni yinji yakuhana. Chakutalilaho, mutuhasa kusa mashimbu jetu hanga tupwe hamwe ni masepa jetu. Mutuhasa kumupanjika kanawa muze anahanjika. Mutuhasa nawa kumutangila chimwe chisoneko cha Mbimbiliya twazanga chinji, chize muchimutakamisa. (Iza. 50:4) Chahiana ulemu chili kupwa hamuwika ni mandumbu jetu muze ayo mafupa ukwaso wetu.—Tanga Yishima 17:17.
(1 Samuele 20:12, 13) Jonata yamba kuli Ndawichi ngwenyi, Yehova Zambi ya Izalele apwe chela. Muze hineseka tata, ngwe ola yinoyene hamene hanji tangwa liamuchitatu, nyi kanevu kuwaha ni Ndawichi, mungukulweza. 13 Alioze ni tata mazanga kukulinga chipi Yehova achilinge kuli yami Jonata nikuwezaho nawa nyi chakulwezelecho nikukushika ukaye ni sambukila. Yehova akapwe ni yena chizechene ngwe hapwa ni tata.
w08 15/2 8 ¶7
Twendenu mu Majila ja Yehova
7 Zambi kanazange hanga tupwe masepa amwenemwene. (Yis 17:17) Jonata, mwana wa Mwanangana Saulu, kapwile sepa lia Ndawichi. Muze Jonata anyingikine ngwenyi, Ndawichi kashiha Ngoliate, “mbunge ya Jonata yiyilinunga ni mbunge ya Ndawichi. Jonata yamuzanga ngwe mbunge yenyi mwene.” (1Sa 18:1, 3) Jonata katowezele Ndawichi ngwenyi, Saulu kanafupu kumushiha. Muze Ndawichi achinyine, Jonata yaya ni kuliwana nenyi mba yalinga usendo. Muze Jonata ahanjikile ni Saulu hakutwala kuli Ndawichi, Saulu yazanga kushiha Jonata, alioze masepa wano aali yalitakana cheka hanga akolese usendo wo. (1Sa 20:24-41) Hakuliwana cho chakasula, Jonata yakolweza Ndawichi “nikumutakamisa muli Zambi.”—1Sa 23:16-18.
(1 Samuele 20:30-32) Mba Saulu yatenukina chikolo Jonata. Yamwamba ngwenyi, Ena mwana wa chihulia cha pwo mukwa kupiya. Te chanyingikine hiunatongola mwe mwana Yese chikapwe sonyi ja yena ni ja uselesele wa noko, nyi? 31 Mumu shimbu mwe mwana Yese matwama ni mwono hano hashi yena kuchi kakola, chipwe wanangana we. Kashika tuma umusake mumu chamutamba kufwa lume. 32 Jonata yakumbulula kuli tato Saulu ngwenyi, Kuchi te mamushiha? Yika alinga?
w09 15/10 19 ¶11
Chize Mutununga ni Kukolesa Usepa Wetu Hano Hashi Kuheshi Zango
11 Shishika. Solomone kasonekene ngwenyi: “Sepa lia mutu kakuzanga matangwa eswe; alioze ha tangwa lia lamba he hakusemukina uyaya.” (Yis 17:17) Hakusoneka maliji wano, kota Solomone kanyongene ha usepa uze tato Ndawichi apwile nawo ni Jonata. (1Sa 18:1) Mwanangana Saulu te kanazange hanga mwanenyi Jonata ahinge ngunja ya wata mu Izalele. Alioze, Jonata kanyingikene ngwenyi Yehova hanasakula Ndawichi hanga akapwe mwanangana. Jonata kakevwilile Ndawichi ukwa ngwe chize Saulu evwile. Jonata kakevwilile Ndawichi ukwa mumu lia kumuchichimieka kuli atu, chipwe kutayiza yuma ya saki yize Saulu apwile ni kumulamikiza. (1Sa 20:24-34) Shina tuli ngwe Jonata? Muze masepa jetu akwaha yiteli, shina twakuwahilila hamwe no? Shina twakwalembejeka ni kwakwasa muze akumona lamba? Nyi twevwa umwe mutu kanahanjika upi hali sepa lietu, shina twakutayiza ni kawashi yize anambe? Ngwe Jonata, shina twakushishika hakukalila sepa lietu?
Kuhengwola Yikuma Yilemu ya mu Mbimbiliya
(1 Samuele 21:12, 13) Ndawichi yapachikila maliji wano mu mbunge, yavwila woma Akishe mwanangana wa Ngata. 13 Chocho yalumuna kwenda chenyi kumeso jo; yalionga kuzaluka hakachi ko; yasonyekasonyeka ha yajilo ya chikolo. Yazulumuna yileji ha wevu wenyi.
w05 15/3 24 ¶4
Yikuma Yilemu ya Mukanda wa 1 Samuele
21:12, 13. Yehova kakushimbwila hanga tuzachise utotombo wetu muze tunapalika mu kapinda ku mwono. Iye hanatwehe Liji lienyi, lize liakutwaha mana, chinyingi ni uhashi wa kunyonga kanawa. (Yis 1:4) Nawa tuli ni ukwaso wa makulwana a mu chikungulwila.
Kutanga Mbimbiliya
(1 Samuele 22:1-11) Kashika Ndawichi yakatuko yaya ku chivwenge cha Ndulame, mba muze ayayo ni akwa zuwo lia tato eswe achivwile ayile kuli iye. 2 Ni mweswe mukwa lamba, ni mweswe mukwa makongo, ni mweswe wevwile kupiha akungulukilile kuli iye, mba iye wapwile kapitau ko. Wapwile no kulakaji awana a malunga. 3 Ndawichi yakatukako yaya ku Mizepa mu Moape. Yamba kuli mwanangana wa Moape ngwenyi, Tayizenu kama tata ni mama atwame ni yenu ndo mungunyingika chize Zambi mangulingila. 4 Yaahichika ni mwanangana wa Moape, o kwenako atwamine shimbu lieswe Ndawichi wapwile mu mbonge yenyi. 5 Aho profeta Ngate wambile kuli Ndawichi ngwenyi, Kanda utwama mu mbonge ye. Katuka uye ku chifuchi cha Yunda. Chocho Ndawichi yaya ndo ku usaki wa Herete. 6 Saulu yevwa ngwo, Hawana Ndawichi ni malunga aze ali no hamuwika. Saulu te kanatwama mu Ngibia mushi lia mutonda mu Rama, kunga lienyi mu kwoko ni atu jenyi kanamujingilika. 7 Saulu yamba kuli atu jenyi waze anamujingilika ngwenyi, Panjikenu enu A-Mbenjamine. Yono mwana Yese manwaha eswe minda ni mitondo ya uva, nyi? Manupwisa eswe akwa kuyula tununu ni akwa kuyula makulakaji, 8 kashika eswe hinwangutwama punga, nyi? Nyi mwanami hakolesa usendo ni mwe mwana Yese, niumwe kangulwezelecho. Nyi mwanami mavundula kavumbi kami kungujikinyina ngwe analingi musono, niumwe manguvwila kama vumbi wakuhi angulwezecho. 9 Mba Doege Ka-Endome te kanamana hamwe ni atu ja Saulu, yamba ngwenyi, Ami namwene mwe mwana Yese maheta ku Nobe kuli Ahimeleke mwana wa Ahitube. 10 Mba Ahimeleke yahula Yehova hali iye nikumwaha ya kulia ni katana ka Ngoliate Ka-Filistea. 11 Mwanangana yatuma kusanyika sasendote Ahimeleke mwana wa Ahitube ni akwa zuwo lia tato eswe, asasendote aze apwile ku Nobe. Eswe yaheta kuli mwanangana.
18-24 ABRIL
YIKUMA YILEMU YA MU LIJI LIA ZAMBI | 1 SAMUELE 23-24
“Shimbwila Muli Yehova ni Uhumikizo Weswe”
(1 Samuele 24:3-5) Mu jila yaheta ku malimba a mapanga kuze kuli chivwenge mba Saulu yanjilamo ni kutwama hashi. Ndawichi ni malunga jenyi te kanatwama mwe muchima lia chivwenge. 4 Malunga ja Ndawichi yamba kuli iye ngwo, Lino lie tangwa Yehova ambile ngwenyi, Mungukunjika mukwa kole ye kuli yena mba muhasa kumulinga cheswacho chinakupemena. Ndawichi yakatuka, yateta ku lupula wa uzalo wa Saulu, iye kachinyingikine. 5 Alioze kulutwe Ndawichi yalikonyeka mu mbunge mumu hateta lupula wa uzalo wa Saulu.
(1 Samuele 24:6, 7) Yamba kuli malunga jenyi ngwenyi, Yehova angukanjise kulinga chuma chino kuli mwata wami wakuwayisa ni maji kuli Yehova, ngwolole kwoko liami kulimika nenyi, se Yehova hanamuwayisa. 7 Chocho ni maliji wano Ndawichi wakunwine malunga jenyi. Kaatayijile kulamba Saulu. Mba Saulu yakatuka, yatuhuka mu chivwenge; yaya kwenyi.
(1 Samuele 24:12, 15) Yehova apatule hakachi ka yami ni yenu. Yehova angukale hali yenu. Alioze kwoko liami kulichi kulimika ni yenu. 15 Kashika Yehova apatule akatwehe upatwilo hakachi ka yami ni yenu, achimone, anguhakwile, angupulule kuli yenu.
w04 1/4 16 ¶8
Jikijila ha Spiritu ya Zambi Muze Yuma Muyalumuka ku Mwono
8 Ndawichi yalituna kulinga upi Saulu. Ufulielo ni kulihumikiza yakwashile Ndawichi kukunjika kapinda wenyi ku moko ja Yehova. Muze mwanangana atuhukile mu chivwenge, Ndawichi yakololoka ni liji linene ngwenyi: “Yehova apatule hakachi ka yami ni yenu. Yehova angukale hali yenu. Alioze kwoko liami kulichi kulimika ni yenu.” (1Sa 24:12) Chipwe ngwe kanyingikine ngwenyi Saulu kalinga upi, nihindu Ndawichi kakafunyishine upi ha upi, chipwe kumwamba yuma yipi hanji kumuhona vumbi. Ha yisuho yinji, Ndawichi kapwile ni uhashi wakufunyisa upi ha upi kuli Saulu. Alioze, iye yashimbwila kuli Yehova ngwenyi malulieka yuma.—1Sa 25:32-34; 26:10, 11.
w04 1/6 22-23
Shina Mwono we Unazala Too ni Yipikalo?
Longeso liamuchitatu lili ngwo, shimbu tuzachise majila waze kalitele hanga tuhwise kapinda wetu, twatamba kujikijila muli Yehova. Kambaji Tiangu kasonekene ngwenyi: “Kunyongonona chikaye ndo ku songo lia milimo yacho, hanga nukapwe angunu, a muwundu, nikuhona nichimwe.” (Tia 1:4) Twatamba kwecha hanga kunyongonona chiye “ndo ku songo lia milimo yacho,” ha kununga ni kulihumikiza mu yeseko ndo kusongo, chakuhona kuzachisa majila waze kalitele ni Mbimbiliya hanga tuhwise kapinda wetu. Muze ufulielo wetu muupalika mu yeseko, kunyongonona muchisolola ndundo ja ufulielo wetu. Yosefwe ni Ndawichi kanyongonwene. Ayo kakalingile chuma ni chimwe chize te muchipihisa usepa wo ni Yehova hanga ahwise kapinda wo. Alioze, yasa tachi hanga anunge ni kulihumikiza muze te anapalika mu kapinda. Yajikijila muli Yehova, nawa yatambula yiwape yinji hakuchilinga! Yehova yaazachisa hanga apulwile ni kusongwela atu jenyi.—Upu 41:39-41; 45:5; 2Sa 5:4, 5.
Ni yetu mutuhasa kupalika mu kapinda yoze mutuhasa kweseka kuzachisa majila waze kalitele ni Mbimbiliya hanga tuhwise kapinda wetu. Chakutalilaho, shina yena wakunyenganyana mumu kuwawanyine mutu yoze mulimbata nenyi? Nyi yino ye unapalika ehuka nyonga lia kwecha kwononokena shimbi ya Yehova ya kulimbata “muli mwe Mwene wika.” (1Ko 7:39) Shina uli ni yipikalo mu ulo we? Shimbu utayize nyonga lia atu waze keshi kuwayila Yehova lia kulihandununa ni kulilakula, sako tachi hanga umone chize munuhwisa kapinda wacho hamuwika. (Mal 2:16; Efw 5:21-33) Shina unapalika mu kapinda wa chize mufunga usoko we mumu lia kuhona mbongo? Kujikijila muli Yehova chinalumbunuka nawa kwehuka milimo yize kuyalitele ni shimbi hanga tuzuke mbongo. (Sam 37:25; Hep 13:18) Kwamba umwenemwene, yetu eswe twatamba kulikwolweza hanga tununge ni kulihumikiza muze tunapalika mu yipikalo ni kulinga yuma yize muyisolola ngwo tunazange hanga Yehova atuwahise. Nyi twachilinga, muchitukwasa kushimbwila muli Yehova ngwetu mahwisa kapinda wetu mu jila yalita.—Mik 7:7.
Kuhengwola Yikuma Yilemu ya mu Mbimbiliya
(1 Samuele 23:16, 17) Jonata mwana Saulu yakatuka yaya kuli Ndawichi mu usaki nikumutakamisa muli Zambi. 17 Ngwenyi, Kanda wivwa woma mumu tata Saulu kechi kukuwana. Yena kumukapwa mwanangana wa Izalele ni yami mungukakuhata ha kota. Ni tata Saulu kanachinyingika.
Kanda Wecha Nichimwe Chikukinde Kuzuka Yiwape
11 Nyi twalikolweza hanga tupwe yimbovu ni kusolola zango liamwenemwene, kutuchi kupwa ni chipululu. Mbimbiliya yinambe ngwo: ‘Zango uhomboloji lili nawo, utu lili nawo. Zango kulishi chipululu.’ (1 A-Korindu 13:4) Mba tunyingike ngwetu kutushi akwa-chipululu twatamba kumona yuma ngwe chize Yehova akuyimona. Twatamba kumona mandumbu jetu ngwe kali yihanda ya mujimba wetu, ye yinalingi chikungulwila. Mbimbiliya yinambe ngwo: “Nyi malemesa chihanda chimwe, yihanda yeswe muyiwahilila hamuwika nacho.” (1 A-Korindu 12:16-18, 26) Nyi chuma chipema muchilingiwa kuli umwe ndumbwetu, mutuwahilila nenyi, chakuhona kumuvwila chipululu. Achinyonga ha chilweza chipema cha Jonata mwana wa Mwanangana Saulu. Jonata kakapwile ni chipululu muze asakwile Ndawichi ngwe mwanangana, chakuhona kumusakula iye. Shimbu evwe chipululu, iye yakolweza Ndawichi ni kumukwasa. (1 Samuele 23:16-18) Kutala mutuhasa kama kupwa yimbovu hamwe ni zango ngwe Jonata?
Kutanga Mbimbiliya
(1 Samuele 23:24–24:7) O yakatuka, yatetekela Saulu ku Zife. Ndawichi ni malunga jenyi o apwile mu puya ya Mayone ku Arapa ku Sule ya Njeshimone. 25 Saulu ni malunga jenyi ayile nikumufupa. Yachilweza kuli Ndawichi kashika iye wayile ku luliwe luze luli mu puya ya Mayone. Muze Saulu hachivwa yakaula Ndawichi mu puya ya Mayone. 26 Saulu yapalikila sali limwe lia mulundu, ni Ndawichi ni malunga jenyi ha sali likwo lia mulundu. Ndawichi te kanalipupwisa kuchina Saulu shimbu Saulu ni malunga jenyi machimuseleka amukwate. 27 Kumanyi kanganda yaheta kuli Saulu ngwenyi, Tambukenu nwize mumu A-Filistea hanjila mu chifuchi. 28 Mba Saulu yahiluka; kakawile nawa Ndawichi; yaya ni kulimika ni A-Filistea. Kashika alukile kuma kuze ngwo, Liwe lia ulamwino. 29 Ndawichi yakatukako yatwama mu mbonge ja mu Engedi.
24:1 Muze Saulu hahanga A-Filistea hahiluka, yamulweza ngwo, Ndawichi mu puya ya Engedi ali. 2 Mba Saulu yasanyika tununu atatu (3,000) a malunga akusakula kuli A-Izalele eswe, yaya ni kufupa Ndawichi ni malunga jenyi kulutwe lia Yimawe ya Pembe-a-mu-yambu. 3 Mu jila yaheta ku malimba a mapanga kuze kuli chivwenge mba Saulu yanjimo ni kutwama hashi. Ndawichi ni malunga jenyi te kanatwama mwe muchima lia chivwenge. 4 Malunga ja Ndawichi yamba kuli iye ngwo, Lino lie tangwa Yehova ambile ngwenyi, Mungukunjika mukwa kole ye kuli yena mba muhasa kumulinga cheswacho chinakupemena. Ndawichi yakatuka, yateta ku lupula wa uzalo wa Saulu, iye kachinyingikine. 5 Alioze kulutwe Ndawichi yalikonyeka mu mbunge mumu hateta lupula wa uzalo wa Saulu. 6 Yamba kuli malunga jenyi ngwenyi, Yehova angukanjise kulinga chuma chino kuli mwata wami wakuwayisa ni maji kuli Yehova, ngwolole kwoko liami kulimika nenyi, se Yehova hanamuwayisa. 7 Chocho ni maliji wano Ndawichi wakunwine malunga jenyi. Kaatayijile kulamba Saulu. Mba Saulu yakatuka, yatuhuka mu chivwenge; yaya kwenyi.
25 ABRIL–1 MAIO
YIKUMA YILEMU YA MU LIJI LIA ZAMBI | 1 SAMUELE 25-26
“Shina Wakulinga Yuma ni Kalusulusu?”
(1 Samuele 25:7-11) Ngunevu ngwo uli ni akwa kutewula mapanga. Tufunga twe atwamine ni yetu; kutwaalingile chipi; kahonene nichimwe shimbu lieswe apwile mu Karmela. 8 Hula akweze je, makulweza. Kashika akweze jami akawane vumbi kumeso je se tuneza ha tangwa lia kuwaha. Hana cheswacho uli nacho kuli wano tuvumbi twe ni kuli yami mwane Ndawichi. 9 Ha kuhetako akwaze ja Ndawichi yambulula yino yuma yeswe kuli Nabale mu jina lia Ndawichi mba yamana. 10 Nabale yakumbulula kuli akweze ja Ndawichi ngwenyi, Ndawichi iya? Mwana wa Yese kuchi apwa? Matangwa ano ngamba anji kakuchina akako. 11 Te mungwanda mbolo yami, ni meya jami, ni yifwo yami hinashihila akwa kutewula mapanga jami ngukayihane kuli malunga amwe waze chanyingikine kuze anakatuka, nyi?
ia 78 ¶10-12
Iye Kasolwele Mana
10 Kuchi maswalale waze atakama apwile ni kutwama ni tufunga? Ha mashimbu amwe te muchihasa kupwa chashi kwanda umwe panga, alioze ayo kakachilingile. Ayo kapwile ngwe chipanga chize chapwile ni kufunga mapanga ni tuvumbi twa Nabale. (Tanga 1 Samuele 25:15, 16.) Ha mashimbu jacho, mapanga ni tufunga kapwile ni kupalika mu ponde yinji. Kwapwile yilianyi anji, njiza ya Izalele ku sule yapwile hakamwihi ni kuze te akufungila mapanga, kashika te chakupwa chashi yilianyi ni eji kwiya mapanga.
11 Kuhana kulia kuli malunga eswe aze apwile mu puya te mulimo ukalu. Kashika Ndawichi atumine mikeji kumi kuli Nabale hanga ete ukwaso. Ndawichi yasakula mashimbu alita. Mashimbu jacho kapwile a chiwanyino cha kutewula mapanga. Ha mashimbu jacho te kakulinga yiwanyino ni kuhana yawana. Ndawichi nawa yasakula kanawa maliji, ni kuhanjika ni vumbi. Yamba kuli Nabale ngwenyi, “mwane Ndawichi,” kota kambile chocho mumu te kananyingika ngwenyi Nabale kapwile mukulwana wenyi. Kuchi Nabale akumbulwile?—1Sa 25:5-8.
12 Iye yevwa uli! Mukweze yoze twatongola ku uputukilo, yalweza Abigale yize yalingiwileko ni kwamba ngwenyi, Nabale “kaachokanga.” Lunga yono chiminyi yaputuka kulinyenyeta mumu lia mbolo, meya ni yifwo yenyi. Iye yakekuna Ndawichi, ni kusolola ngwenyi Ndawichi keshi ni ulemu, ni kumutesa ni ngamba yoze unachina kako. Nabale kota kapwile ni kumona Ndawichi ngwe chize Saulu te akumumona, te keshi kumuzanga. Ayo kakapwile ni kunyonga ngwe chize Yehova akunyonga. Zambi te kakuzanga Ndawichi, keshi kumumona ngwe ngamba chihulia, alioze ngwe mwanangana yoze makayula mu Izalele.—1Sa 25:10, 11, 14.
(1 Samuele 25:13, 21, 22) Ndawichi yamba kuli malunga jenyi ngwenyi, Mutu mweswe alipakate katana kenyi. Malunga eswe alipakachile tutana two. Ni Ndawichi neye walipakachile katana kenyi. Ngwe kulakaji awana a malunga akawile Ndawichi. Kulakaji aali asalile ni yikwata. 21 Ndawichi te hamba ngwenyi, Pundu nafungile yuma yeswe ya yono lunga mu puya, nichimwe chamutokele chakuhi. Alioze kuchamulumbunukine; kananguhilwisa yipi ha yipema yami. 22 Ha chimenemene nyi mungumuhichikila umwe lunga umuwika wa kuli atu jenyi eswe, Zambi chocho angulinge nikuwezaho nawa.
(1 Samuele 25:25, 26, 32, 33) Mwene wami kanda nunyonga yono mukwa kupiya Nabale. Nikulita ni jina lienyi chocho apwa. Jina lienyi Nabale mba uhepuke kali nawo. Alioze yami kavumbi kenu chamwene akweze ja mwene wami waze nwatumanga. 26 Kashika, mwene wami, ni mwono wa Yehova ni mwono wa yenu nawa, se Yehova hananukwika ku uhie wa manyinga nukalikale ni kwoko lia yenu mwene, kashika akwa kole jenu ni waze eswe anazange kulinga chipi kuli yenu mwene wami, akapwe ngwe Nabale. 32 Ndawichi yamba kuli Abigale ngwenyi, Yehova Zambi ya Izalele afumane yoze wakutumanga kungupatwiza. 33 Mana je akawahe, ni yena mwene ukawahe wangukwikanga ku uhie wa manyinga ha kulikala yami mwene ni kwoko liami.
ia 80 ¶18
Iye Kasolwele Mana
18 Abigale kalingile yuma yize Nabale kakalingile, yaya ni kwita ukonekeno kuli Ndawichi. Iye kahanjikile umwenemwene muze ambile ngwenyi, mukwo-lunga kali chihepuke, ngwe chize jina lienyi linasolola, chekwamba, Abigale kota kahanyine nyonga kuli Ndawichi hanga ahone kulinga upi Nabale, mumu chino te muchilelesa wika Ndawichi. Iye kapwile ni kujikijila kuli Ndawichi ni kunyingika ngwenyi, kanamanyinako Yehova, nawa kanase “jita hali Yehova.” Chikwo nawa, kapwile ni kunyingika chilakenyo cha Yehova hakutwala kuli Ndawichi ni wanangana wenyi, kashika ambile ngwenyi: “Yehova . . . hanupwisa mwanangana wa Izalele.” Abigale yeta nawa kuli Ndawichi hanga eche kulinga chuma chize muchihasa kumunehena mulonga wa manyinga hanji chize muchihasa kumuvwisa “chinyengo” kulutwe lia matangwa, chekwamba, chuma chize muchihasa kupinjisa shimbi ya mbunge yenyi. (Tanga 1 Samuele 25:24-31.) Wano kapwile maliji apema!
Kuhengwola Yikuma Yilemu ya mu Mbimbiliya
(1 Samuele 25:18, 19) Mba Abigale fuji-fuji yanda kulakaji aali a mbolo, ni tuku jaali ja vinyu, ni mapanga atano a kuhangula kulu ni njongo jitano ja mbuto yumu, ni kulakaji lia yichakata ya uva yumu, ni kulakaji aali a yandanda ya makuyu, ayo yeswe yayisa ha yimbulu. 19 Yamba kuli akweze jenyi ngwenyi, Tetekelenu; ngunanukaula. Alioze kalwezele lunga lienyi Nabale.
ia 80 ¶16
Iye Kasolwele Mana
16 Shina chino chinalumbunuka ngwo Abigale kalimikine ni wata wa Nabale? Ka, iwuluka ngwe Nabale kakumbulwile chipi kavumbi wakuwayisa wa Yehova. Yuma yize ambile te muyihasa kushihisa atu anji akwa zuwo lienyi, waze kalingile niumwe upi. Nyi Abigale kakalingile nichimwe, shina kachi ni neye kapwile ni mulonga ngwe mukwo lunga? Kulita ni chikuma chize tunahanjikila, iye te katamba kwononokena chitangu Zambi mba kusulaho mukwo lunga.
Kutanga Mbimbiliya
(1 Samuele 25:1-13) Samuele wafwile. A-Izalele eswe akungulukile nikumulila. Mba yamufunda mu zuwo lienyi mu Rama. Ndawichi aye yakatuka, yaya ku puya ya Parane. 2 Kwapwile umwe lunga mu Mayone alioze upite wenyi wapwile mu Karmela. Iye wapwile pichi munene; te kali ni tununu atatu (3,000) a mapanga, ni kanunu (1,000) ka pembe. Te kanatewula mapanga jenyi mu Karmela. 3 Jina lia mwe lunga Nabale. Jina lia mukwo-pwo Abigale. Pwo wapwile mukwa mana anji, chileza, alioze lunga mukwa kuvutuka, keshi vumbi, wa ku munyachi wa Kalemba. 4 Ndawichi yevwa mu puya ngwo, Nabale kanatewula mapanga jenyi. 5 Kashika Ndawichi yatuma kumi lia akweze. Ndawichi yamba kuli akweze ngwenyi, Yeenu ku Karmela kuli Nabale nungumenekeneye. 6 Nukamumeneke ngwenu, Sambukila kuli yena, ni sambukila yikapwe ku zuwo lie, ni sambukila yikapwe ku yuma yeswe uli nayo. 7 Ngunevu ngwo uli ni akwa kutewula mapanga. Tufunga twe atwamine ni yetu; kutwaalingile chipi; kahonene nichimwe shimbu lieswe apwile mu Karmela. 8 Hula akweze je, makulweza. Kashika akweze jami akawane vumbi kumeso je se tuneza ha tangwa lia kuwaha. Hana cheswacho uli nacho kuli wano tuvumbi twe ni kuli yami mwane Ndawichi. 9 Ha kuhetako akwaze ja Ndawichi yambulula yino yuma yeswe kuli Nabale mu jina lia Ndawichi mba yamana. 10 Nabale yakumbulula kuli akweze ja Ndawichi ngwenyi, Ndawichi iya? Mwana wa Yese kuchi apwa? Matangwa ano ngamba anji kakuchina akako. 11 Te mungwanda mbolo yami, ni meya jami, ni yifwo yami hinashihila akwa kutewula mapanga jami ngukayihane kuli malunga amwe waze chanyingikine kuze anakatuka, nyi? 12 Chocho akweze ja Ndawichi yakatukako; yeza; yamwambulwila yeswe. 13 Ndawichi yamba kuli malunga jenyi ngwenyi, mutu mweswe alipakate katana kenyi. Malunga eswe alipakachile tutana two. Ni Ndawichi neye walipakachile katana kenyi. Ngwe kulakaji awana a malunga akawile Ndawichi. Kulakaji aali asalile ni yikwata.