“Nyi Nunanyingika Yino Yuma, Munuwaha Nyi Munuyilinga”

1. Yika muyihasa kulingiwa nyi mutupwa ni kuzo?

MUMU liaka chapwa chikalu kukaula yize twakulilongesa mu Mbimbiliya? Ha mashimbu amwe chakulingiwa hamukunda wa kuhona kulikehesa. Ha ‘matangwa wano a kusula,’ chakupwa chikalu kulikehesa, mumu atu anji waze twanyingika kali “akwa kulifwila ene, akwa kufwila mbongo, akwa kulizata, akwa kulizelula nawa keshi kusuula.” (2 Timoteu 3:1-3) Yetu tuvumbi twa Zambi tunanyingika ngwetu, ndako jacho jipi, alioze mutuhasa kumona ngwe atu waze akwete ndako jacho kakuyuka ni kuwahilila ku mwono wo. (Samu 37:1; 73:3) Mba mutuhasa kulihula ngwetu: ‘Shina munguhasa lume kuyuka nyi mungunyonga chitangu akwetu kuhiana yami mwene? Nyi mungulikehesa, shina atu nihindu manguvumbika?’ (Luka 9:48) Nyi mutupwa ni yitanga ya hano hashi ngwe kuzo, mutuhasa kupihisa usepa wetu ni mandumbu jetu, nawa muchipwa chikalu atu kututayiza ngwo tuli akwa-Kristu. Alioze muze mutulilongesa yilweza ya tuvumbi twa Zambi alikehesa ni kwimbulula yitanga yo, mutuyuka chinji.

2. Yika mutuhasa kulilongesa kuli tuvumbi ashishika a Zambi a ku shakulu?

² Yika yakwashile tuvumbi ashishika a Zambi ku shakulu mba apwe masepa jenyi? Kuchi ayo evwishile Yehova kuwaha? Kulihi awanyine tachi mba alinge yuma yalita? Muze mututanga hakutwala ku yilweza yo mu Mbimbiliya ni kupukuna ha yize twatanga, ufulielo wetu muukola chinji.

YUMA YIZE YAKUKOLESA UFULIELO WETU

3, 4. (a) Yika Yehova akuzachisa mba atulongese? (b) Kuchizako chinyingi, chuma chika nawa tunafupiwa mba tukolese ufulielo wetu?

³ Yehova kakutwaha yize mutufupiwa hanga tukolese ufulielo wetu. Kakutwaha yiyulo yipema ni fumbo kupalikila mu Mbimbiliya, mikanda yetu ya Ukristu, site yetu, JW Broadcasting, ku kukunguluka cha chikungulwila ni cha mambonge. Alioze Yesu kalumbunwine ngwenyi tunafupiwa nawa chuma chikwo kuhiana chinyingi. Hakwamba ngwenyi: “Kulinga upale wa yoze wangutumine chenacho kulia chami, hanga ngukamanunune milimo yenyi.”—Yoano 4:34.

⁴ Kulinga upale wa Zambi chapwile ngwe kulia kuli Yesu. Muze twakulia kulia chipema, twakwivwa kanawa nawa mujimba wetu wa kupema. Chizechene nawa, kulinga upale wa Zambi, chakutuvwisa kuwaha ni kutunga ufulielo wetu. Chakutalilaho, ha mashimbu amwe twakuhonga ha kuya ni kwambujola, alioze muze twakuhwisa twakulivwa kanawa.

5. Yika mutuhasa kuyuka ha kupwa ni mana?

⁵ Mutusolola ngwetu tuli ni mana nyi mutulinga yize Yehova azanga. (Samu 107:43) Nawa atu waze akwete mana, kakuyuka chinji yuma yipema. Mbimbiliya yinambe ngwo, “nichimwe chize unazange muchilita no. . . . Mana kali ngwe mutondo wa mwono; mukwa mana mapwa ni mwono ni uwahililo.” (Yishima 3:13-18) Yesu kambile ngwenyi: “Nyi nunanyingika yino yuma, munuwaha nyi munuyilinga.” (Yoano 13:17) Tumbaji twa Yesu katambile kununga ni kulinga yize Yesu aalwezele mba apwe ni uwahililo. Kashika, katambile kukaula malongeso ni yilweza yenyi ku mwono wo weswe.

6. Mumu liaka twatamba kununga ni kulinga yuma yize twakulilongesa?

⁶ Musono, ni yetu nawa twatamba kununga ni kukaula yize twakulilongesa. Achinyonga mutu yoze wakululieka mashinyi. Iye kakwete yikwata yinji yakuzachisa nawa kanyingika chize akuyizachisa. Alioze, ndo azachise yikwata yacho mba asolole utotombo wenyi. Chipwe ngwe kalinga mulimo wacho ha miaka yinji, nihindu katamba kununga kukaula yize alilongesele mba ahase kululieka kanawa mashinyi. Chizechene nawa, muze twaputukile kulilongesa umwenemwene, yitwivwa kuwaha chinji ha kukaula yize twatangile mu Mbimbiliya. Alioze, mba tufunge uwahililo wacho, twatamba kununga ni kulinga yuma yeswe yize Yehova akutulongesa.

7. Yika twatamba kulinga mba yilweza yili mu Mbimbiliya yitukwase?

⁷ Ha mutwe uno, mutulilongesaho yuma yimwe yize muyihasa kupwisa chikalu yetu kupwa akwa-kulikehesa. Mutulilongesa nawa chize tuvumbi twa Zambi ashishika a ku shakulu, anungine ni kulikehesa. Alioze kutwatambile wika kutanga sango jacho. Twatamba kunyonga ha yuma yacho ni kuyikaula ku mwono wetu.

MONA ATU ESWE NGWE KALITA

8, 9. Yika twalilongesa ha kulikehesa cha Paulu chili ha mukanda wa Yilinga 14:8-15? (Tala chizulie ha uputukilo.)

⁸ Zambi kanazange hanga atu eswe ‘akalilamwine, akahete ku chinyingi cha umwenemwene.’ (1 Timoteu 2:4) Kuchi wakumona atu waze kanda achinyingika umwenemwene? Postolo Paulu te kakwambujola kuli A-Yunda, waze te hananyingika kulu Yehova. Alioze, yambujola nawa kuli atu waze te akuwayila tuzambi a mahuza. Kwambujola kuli atu jacho, chesekele kulikehesa cha Paulu. Mumu liaka?

⁹ Ha wenyi utangu wa Paulu ngwe mishionaliu, iye kayile ni Mbarnabe ku mbonge ya Lisetra. Atu waze apwile mu mbonge yacho, kapwile ni kumona Paulu ni Mbarnabe ngwe tuzambi ni kuputuka kwaasanyika majina a tuzambi two, Yupita ni Merkuriu. Shina Paulu ni Mbarnabe kalizachile ni kulivwa ngwe kali lume tuzambi? Shina kanyongene ngwo yino yalumuna mwono wo mumu kamwene yihungumiona mu mambonge aali waze amenekene chitangu? Shina ayo kanyongene ngwo yino yeswe muyilingisa atu hanga apanjike sango lipema? Ka! Ayo kevwile kupiha ni kwamba ngwo: “Malunga, kuchi nunalingi yino yuma? Yetu tuli atu chimuwika ni yenu.”—Yilinga 14:8-15.

10. Mumu liaka Paulu ni Mbarnabe kakanyongene ngwo kahiana A-Laikoneya?

¹⁰ Muze Paulu ni Mbarnabe ambile ngwo no kali atu, chino chasolwele ngwo no kali yihenge. Ayo kakambile ngwo te kakuwayila Zambi umuwika ni A-Laikoneya. Paulu ni Mbarnabe kaatumine kuli Yehova ngwe mishionaliu. (Yilinga 13:2) Ayo kapwile akuwayisa ni spiritu yisandu nawa kapwile ni kutalatala chipema. Chipwe chocho, ayo kakalivwile ngwe kahiana akwo. Kanyingikene ngwo atu akwo no te mahasa kwaawayisa nyi matayiza sango lipema.

11. Kuchi mutuhasa kulikehesa ngwe Paulu muze tunambujola?

¹¹ Tutalenu ha jila yimwe yize mutuhasa kusolwelamo ngwetu twakulikehesa ngwe chize alingile Paulu. Kutwatambile kulivwa ngwe twahiana akwetu mumu lia kwambujola sango lipema hanji kulinga yuma yize Yehova anatukwasa kulinga. Mutuhasa kulihula ngwetu: ‘Kuchi nakunyonga hali atu waze atwama mu njiza yami? Kutala ngukwete katonde kuli akwa-minyachi yeka?’ Hashi heswe, Yela ja Yehova kakuya ni kufupa atu waze anazange kupanjika sango lipema. Amwe kakusa tachi alilongese malimi ni mianda ya atu waze akwo akumona ngwe atu angwaza. Ayo keshi kulivwa ngwe kahiana atu waze akwambulwila sango lipema. Alioze, kakusa tachi hanga anyingike kanawa hita mutu mba amukwase kutayiza sango ja Wanangana.

MUZE UNALEMBE TONGOLA MAJINA JA AKWENU

12. Kuchi Epafwa asolwele pundu ngwenyi te kakulihulumba hali akwo?

¹² Jila yikwo yize mutuhasa kusolwelamo ngwetu twalikehesa yili kulembela mandumbu jetu, waze “hanazuku ufulielo ulemu umuwika ni uno wa yetu.” (2 Petulu 1:1) Yino ye alingile Epafwa. Mbimbiliya yamuvuluka yisuho yitatu wika. Muze Paulu apwile mu kamenga mu Roma, iye yasonekena akwa-Kristu amu Kolosu hakutwala kuli Epafwa ngwenyi: Iye “matangwa eswe kakulitachika chikolo hali yenu mu yilemba yenyi.” (A-Kolosu 4:12) Epafwa kanyingikine kanawa mandumbu, nawa te kakulihulumba chinji hali ayo. Paulu yamuvuluka ngwo “funge-ni-mukwetu,” chekwamba ngwo, Epafwa ni Paulu kapwile mu kapinda umuwika. (Fwilimu 23) Chipwe chocho, nihindu Epafwa te kakulihulumba hali akwo, ni kusa tachi hanga aakwase. Epafwa yalembelako mandumbu jenyi, ni kwaatongola ha majina, kashika, ni yetu mutuhasa kuchilinga. Yilemba yacho yikwete ndundo yinji.—2 A-Korindu 1:11; Tiangu 5:16.

13. Muze mulemba kuchi muhasa kwimbulula Epafwa?

¹³ Nyonga hali waze muhasa kutongola majina jo muze unalembe. Muhasa kutongola masepa je amu chikungulwila hanji asoko waze unanyingika ngwe kanapalika mu yipikalo, hanji kupinda ha kukwata yiyulo chipwe hakukumba yeseko. Muhasa kulembelako nawa ni mandumbu waze hali ha site jw.org, ha chikuma chakwamba ngwo, “Yela Ja Yehova Kali mu Mazuwo a Ususu Mumu lia Ufulielo Wo.” (Yako ha IMPRENSA> CASOS JURÍDICOS.) Muhasa nawa kulembelako, waze afwisa mutu yoze azanga, waze atokesa yuma ha mukunda wa umwe luyinda hanji ku jita ni waze ali mu uswale. Kuli mandumbu ni mapangi anji waze anafupiwa kulemba chetu. Muze mutwaalembela, tunasolola ngwetu kutushi kunyonga wika hali yetwene, alioze twakunyonga nawa hali akwetu. (A-Fwilipu 2:4) Yehova kakwivwa yilemba yacho!

‘LIPUPWISE KWIVWA’

14. Yika yinasolola ngwo Yehova kakwivwa yilemba yetu?

¹⁴ Jila yikwo yize mutuhasa kusolwelamo kulikehesa chetu, yili kupanjika kanawa akwetu. Mukanda wa Tiangu 1:19 wakwamba ngwo, ‘lipupwisenu kwivwa.’ Yehova kakutwivwa kanawa muze mutuhanjika nenyi. (Uputukilo 18:32; Yoshua 10:14) Chakutalilaho, tutangenu lusango uli ha Kutuhuka 32:11-14. (Tanga.) Yehova kechele Mose ambe nyonga lienyi chipwe ngwe Yehova kakafupiwile chiyulo chacho. Shina muhasa kupanjika ni uhumikizo weswe mutu yoze wahengesele yimwe yuma kunyima ni kukaula yize makulweza? Chochene, Yehova kakupanjika ni uhumikizo weswe atu waze a kulemba kuli iye ni ufulielo.

15. Kuchi mutuhasa kwimbulula Yehova ha kulemesa akwetu?

¹⁵ Achilihule ngwe: ‘Nyi Yehova kalikehesele hanga ahase kupanjika atu ngwe Apalahama, Rakele, Mose, Yoshua, Manoa, Eliya ni Hezekia, shina ni yami mungusa tachi hanga ngupanjike kanawa akwetu? Kutala mungulemesa mandumbu jami eswe ha kupanjika yize mamba ni kuyikaula nyi muchilita? Shina mu chikungulwila hanji mu usoko wami muli mutu yoze natamba kupanjika kanawa? Yika natamba kulinga ha chikuma chino?’—Uputukilo 30:6; Akwa Kuyula 13:9; 1 Mianangana 17:22; 2 Sango ja Mianangana 30:20.

“HANJI YEHOVA MATALA KU CHIPI CHINO ANANGULINGI”

16. Yika Mwanangana Ndawichi alingile muze amutukile kuli Shimei?

¹⁶ Kulikehesa muchitukwasa tulihumikize muze akwetu matulinga yuma yipi. (A-Efwesu 4:2) Tutalenu chilweza chipema chize chili ha mukanda wa 2 Samuele 16:5-13. (Tanga.) Shimei, usoko wa Mwanangana Saulu, katukile Ndawichi hamwe ni tuvumbi twenyi. Ndawichi kachi kakanjishile Shimei, alioze yalihumikiza ni kumulengulula. Kuchi chapwile mba Ndawichi asolole uhumikizo wacho? Mutuchinyingika ha kuhengwola Samu yamuchitatu.

17. Yika yakwashile Ndawichi mba alihumikize, nawa kuchi mutuhasa kumwimbulula?

¹⁷ Ndawichi kembile Samu yamuchitatu muze mwanenyi Absalome afupile kumushiha. Ha mashimbu jacho, he Shimei alimikine ni Ndawichi, alioze Ndawichi yalihumikiza. Kuchi ahashile kulihumikiza? Ha Samu 3:4, twakutangaho maliji a Ndawichi ngwenyi: ‘Munguteta kuli Yehova ni liji liami, iye kumangukumbulula ku mulundu wenyi usandu.’ Muze atu matulinga yuma yipi, twatamba kulemba ngwe chize alingile Ndawichi. Nyi twalinga chocho, Yehova matwaha spiritu yenyi yisandu hanga tuhase kunyongonona. Kutala muhasa kulihumikiza hanji kukonekena ni mbunge yeswe mutu yoze wakulinga yuma yipi? Shina wakufuliela ngwenyi Yehova makufunga ha lamba lize unamono nawa makukwasa ni kukuwahisa?

‘KUPWA NI MANA CHILI CHUMA CHAHIANA’

18. Kuchi mutuhasa kuyuka ha kukaula usongwelo wa Yehova?

¹⁸ Muze mutulinga yuma yalita, mutupwa ni mana nawa Yehova matuwahisa. Ha mukanda wa Yishima 4:7, Mbimbiliya yinambe ngwo: “Che chuma chahiana, mana.” Chipwe ngwe mana kakukatuka ku chinyingi, alioze kupwa ni mana hi kunyingika wika yimwe yuma ko. Kupwa ni mana chinafupiwa kukwata kanawa yiyulo ku mwono wetu. Tututu no kakwete mana ha kulikungila kulia cho ha mwaka wacho. (Yishima 30:24, 25) Kristu, kamuvuluka ngwo “mana ja Zambi,” nihindu kakulinga yize muyipemena kuli Tato. (1 A-Korindu 1:24; Yoano 8:29) Zambi makatuwahisa nyi mutununga ni kulikehesa ni kusolola mana ha kulinga yize tunanyingika ngwetu yalita. (Tanga Mateu 7:21-23.) Kashika nunga ni kukolweza akwenu mu chikungulwila hanga awayile Yehova ni kulikehesa cheswe. Chakumbata mashimbu ni uhumikizo mba tuhase kulinga yize tunanyingika ngwetu yalita. Alioze nyi twapwa akwa-kulikehesa, chino muchitukwasa tupwe ni uwahililo haliapwila ni kulutwe lia matangwa.