Mwanangana wa Seria, Mben-hadade, te kakulimika chinji ni A-Izalele. Alioze profeta Elisha te kakutoweza mwanangana wa Izalele hita shimbu, kashika iye ahashile kulilamwina. Hachino, Mben-hadade yafupa kukwata Elisha. Muze anyingikine ngwo Elisha kali ku Ndotane, iye yatuma maswalele A-Seria hanga amukwate.

A-Seria yaya ku Ndotane ha ufuku. Mukwachako, kavumbi wa Elisha yatuhuka haze nawa yamona mbonge yeswe hayijingilika kuli maswalale. Iye yatungumuka ni kukololoka ngwenyi: ‘Elisha, yika mutulinga?’ Elisha yamulweza ngwenyi: ‘Yetu tuli anji kuhiana ayo.’ Ha shimbu lizeliene, Yahova yakwasa kavumbi wa Elisha hanga amone chize ha milundu yeswe ya mu mbonge hazalile too ni tuvwalu ni matemba a kahia.

Muze maswalale A-Seria ambile kukwata Elisha, aye yalemba ngwenyi: ‘Yehova, lisesa apwise eswe tupuputa.’ Hazehene, chipwe ngwe te kanahase kumona, nihindu maswalale kakanyingikine kuze apwile. Elisha yalweza maswalale ngwenyi: ‘Enu nuli mu mbonge yeka. Ngukaulenu, mungunutwala kuli atu waze nunafupu.’ Ayo yakaula Elisha mujila yeswe ndo ku Samaria, kuze apwile mwanangana wa Izalele.

Muze A-Seria anyingikine kuze apwile, te keshi nawa ni chize malinga. Mwanangana wa Izalele yahula Elisha ngwenyi: ‘Shina natamba kwaashiha?’ Shina Elisha kazachishile yino ngwe uhashi hanga ashihe atu waze te anafupu kumulinga upi? Ka. Elisha yamba ngwenyi: ‘Kanda waashiha. Ehe kulia nawa afunyise kuze ezanga.’ Hachino, mwanangana yaalingila chiwanyino chinene ni kweecha hanga afune kumahio.

Jezebele kapwile ni mwana wa pwo yoze te avuluka ngwo Atalia, mwana wacho kapwile mupi ngwe naye. Atalia kamumbachile kuli mwanangana wa Yunda. Muze mukwo-lunga afwile, mwanenyi yaputuka kuyula. Alioze muze mwanenyi neye afwile, Atalia yalipwisa mwene mukwa-kuyula mu Yunda. Hachino, iye yafupa kunongesa munyachi weswe wa wanangana, hakufupa kushiha mutu mweswawo te mapwa mwanangana shinaho iye, chipwe ajikulu jenyi. Atu eswe te kakumwivwila woma.

Sasendote wa lutwe Jehoiada ni mukwo-pwo, Yehoshiba, yanyingika ngwo yuma yize te akulinga Atalia yapwile yipi chinji. Ayo yasa mwono wo mu ponde ha kusweka mujikulu wa Atalia, yoze te avuluka ngwo Njoashe mwana wacho te uchili kanuke. Ayo yamulelela mu tembele.

Muze Njoashe akumbanyishine miaka shimbiali, Jehoiada yakungulula tusongo eswe ni A-Levi, yaalweza ngwenyi: ‘Fungenu yikolo ya tembele, kanda nwecha niumwe hanga anjile.’ Chocho, Jehoiada yapwisa Njoashe mwanangana mu Yunda ni kumusa chipangula ku mutwe. A-Yunda yakololoka ngwo: ‘Mwanangana twama matangwa anji ku mwono!’

Mwazovu Atalia yevwa zungo lia mbunga ya atu mu tembele, chocho yayako. Muze amwene mwanangana mwaha, aye yakololoka ngwenyi: ‘Puunga! Puunga!’ Tusongo yamukwata, yamutwala haze ni kumushiha. Mba yika mutwamba ha yitanga yipi yize anehene ha vungu lieswe?

Johoiada yakwasa vungu ha kulinga usendo ni Yehova, ha usendo wacho ayo yalakenya kuwayila wika Iye. Jehoiada yatuma kupuzula tembele ya Mbale ni kupalwola tuponya twamo. Yatongola asasendote ni A-Levi hanga apwe ni kukalakala mu tembele, chino, chakwashile atu hanga aputuke kuwayilamo nawa. Iye yatongola tulayi afunge tembele hanga atu aluchisa achine kunjilamo. Mba hi Jehoiada ni tusongo yatwala Njoashe ku zuwo lia wanangana, koko yamutumbika ha ngunja. A-Yunda eswe yawahilila chinji. Hachino, ayo te mahasa kuwayila kanawa Yehova, mumu lia kwaatusula ku yitanga yipi ya Atalia ni ku uwayilo wa Mbale. Shina wamona chize hamu lia Jehoiada liakwashile atu anji?