UTULIKILO WA MIKANDA HA INTERNET wa Watchtower
Watchtower
UTULIKILO WA MIKANDA HA INTERNET
Chokwe
  • MBIMBILIYA
  • MIKANDA
  • KUKUNGULUKA
  • Yehova Yasolwela Yona Uhumikizo
    Yize Muhasa Kulilongesa mu Mbimbiliya
    • Yona kanashimbama mu kalunga-lwiji kuze kunasanyina yishi munene

      LONGESO 54

      Yehova Yasolwela Yona Uhumikizo

      Ninive, mbonge ya A-Suria, atu jamo te kakwete yitanga yipi. Yehova yalweza profeta wenyi Yona hanga aye mu Ninive ni kwaatoweza ngwenyi, katamba kwalumuna yitanga yo. Alioze Yona yachina yaya kweka. Yakwata kawashi-washi ulungu uze te unayi ku Tashi.

      Muze ulungu wapwile ha kalunga-lwiji, kangunga mukolo yaputuka, chocho akwa-ulungu yaputuka kwivwa woma. Ayo yalemba kuli tuzambi two ni kwahula ngwo: ‘Mumu liaka yino yinalingiwa?’ Hi kusongo, Yona yaalweza ngwenyi: ‘Yino yinalingiwa mumu lia yami. Mumu ngunachina kulinga yuma yize Yehova angutumanga kulinga. Ngumbilenu mu kalunga-lwiji, hanga kangunga yono alitwamine.’ Akwa-ulungu kakazangile kumbila Yona mu kalunga-lwiji, alioze Yona yaajijiminya. Muze ayo amumbilile mu kalunga-lwiji, kangunga yahwa.

      Yona yanyonga ngwenyi mafwa. Muze te anayi ni kushimbama mu kalunga-lwiji, aye yalemba kuli Yehova. Hachino, Yehova yatuma yishi munene. Yishi wacho yamina Yona, alioze kakamushihile. Muze apwile mujimo lia yishi, Yona yalemba kuli Yehova ngwenyi: ‘Ngunakulakenya kukwononokena mashimbu eswe ku mwono wami.’ Yehova yafunga Yona mujimo lia yishi ha matangwa atatu nawa yalingisa yishi wacho hanga asajile Yona ku chana.

      Kukatuka haze Yehova alamwinyine Yona, shina chino chinalumbunuka ngwo Yona te kechi kuya ku Ninive? Ka. Yehova kalwezele nawa Yona hanga ayeko. Ha shimbu liacho, Yona yononoka ku shimbi ya Yehova. Iye yayako ni kulweza atu jacho api ngwenyi: ‘Ha matangwa 40, Ninive kumakayonona.’ Hohene, yikulingiwa chimwe chuma, akwa-Ninive yapanjika ni kwalumuna yitanga yo. Mwanangana wa mu Ninive yalweza atu jenyi ngwenyi: ‘Lembenu kuli Zambi nawa likonyekenu. Hanji mecha kutwonona.’ Muze Yehova amwene ngwenyi, atu jacho halumuna yitanga yo, chocho yecha kwaashiha.

      Yona hakundama ku Ninive

      Yona yevwa uli unji mumu mbonge ya Ninive kakayinongesene. Achinyonga kama: Yehova kasolwele uhumikizo ni keke hali Yona, alioze Yona kakapwile ni keke hali atu amu Ninive. Hachino, ni ufwatulo weswe, iye yaya haze lia mbonge yatwama mu chizulie cha lwitwi. Chocho lwitwi wacho yoma, Yona yevwa uli unji. Hachino, Yehova yamulweza ngwenyi: ‘Yena hiwevwila keke lwitwi kuhiana akwa-Ninive. Yami hinaasolwela keke, nawa hinaalamwina.’ Longeso lika twawana hano? Akwa-Ninive te kakwete ulemu unji kuhiana mutondo weswawo.

      ‘Yehova . . . kapwa ni uhomboloji kuli yenu, se kazangile niumwe kutoka, alioze eswe alikonyeke.’—2 Petulu 3:9

      Yihula: Malongeso aka Yehova ahanyine kuli Yona? Yika mutuhasa kulilongesa ha yize yalingiwile kuli Yona?

      Yona 1:1–4:11

  • Mungelo wa Yehova Yakwasa Hezekia
    Yize Muhasa Kulilongesa mu Mbimbiliya
    • Mungelo yashiha maswalale A-Suria

      LONGESO 55

      Mungelo wa Yehova Yakwasa Hezekia

      A-Suria kakumbile mavungu eswe kumi a wanangana wa Izalele. Haliapwila Senakeribe, mwanangana wa Suria, yazanga nawa kutambula mavungu aali a wanangana wa Yunda. Iye yaputuka kukumba mbonge ni mbonge ya A-Yunda. Alioze mbonge yize azangile chinji kukumba te Yerusaleme. Chipwe chocho, Senakeribe kakanyingikine ngwo Yehova te kakufunga Yerusaleme.

      Hezekia, mwanangana wa mu Yunda, yafweta mbongo jinji kuli Senakeribe hanga awuchike Yerusaleme. Chipwe ngwe, Senakeribe katambwile mbongo, nihindu yatuma maswalele jenyi a ndundo hanga aye ni kunongesa Yerusaleme. Atu mu mbonge yeswe yaputuka kwivwa woma, mumu A-Suria te hakundama ku mbonge. Hachino, Hezekia yaalweza ngwenyi: ‘Kanda nwivwa woma. A-Suria kali ni tachi, alioze Yehova matupwisa akwa-tachi jinji kuhiana ayo.’

      Senakeribe yatuma kanganda kenyi, Rabeshaka, hanga alenye atu mu Yerusaleme. Rabeshaka yamana haze lia mbonge yaputuka kukololoka ngwenyi: ‘Yehova kechi kunukwasa. Kanda nwecha Hezekia hanga anwonge. Mumu kukushi zambi niumwe yoze mahasa kunulamwina kuli yetu.’

      Hezekia yahula kuli Yehova yize atamba kulinga. Yehova yamukumbulula ngwenyi: ‘Kanda wivwa woma wa yize anambe Rabeshaka. Senakeribe kechi kukumba Yerusaleme.’ Kusulaho, Hezekia yatambula yimwe mikanda ya Senakeribe. Mikanda yacho yambile ngwo: Lihanenu kwenu. Mumu Yehova kechi kunulamwina.’ Hezekia yalemba ngwenyi: ‘Yehova, lisesa, tulamwine hanga atu eswe anyingike ngwo yena wika mwe Zambi wamwenemwene.’ Yehova yamulweza ngwenyi: ‘Mwanangana wa A-Suria kechi kanjila mu Yerusaleme. Mungukafunga mbonge yami.’

      Senakeribe kapwile ni shindakenyo ngwenyi te kwasala hakehe hanga akumbe Yerusaleme. Alioze ha umwe ufuku, Yehova yatuma mungelo mu chilombo cha maswalale A-Suria haze lia mbonge. Mungelo wacho yashiha maswalale eswe! Mwanangana Senakeribe yatokesa maswalale jenyi a tachi. Kakapwile nawa ni chize malinga, chocho yafuna ku zuwo lienyi. Yehova yalamwina Hezekia hamwe ni Yerusaleme, ngwe chize alakenyene. Nyi wapwile mu Yerusaleme, kachi wafuliele muli Yehova?

      “Mungelo wa Yehova kakutunga chilombo chenyi chakujingilika waze akumuvwila woma, kakuapulula.”—Samu 34:7

      Yihula: Kuchi Yehova afungile Yerusaleme? Shina unanyongo ngwe Yehova makakulamwina?

      2 Mianangana 17:1-6; 18:13-37; 19:1-37; 2 Sango ja Mianangana 32:1-23

Mikanda ya Chokwe (2008-2026)
Fwambuka
Njila
  • Chokwe
  • Tuma
  • Kululieka
  • Copyright © 2025 Watch Tower Bible and Tract Society of Pennsylvania
  • Shimbi Yakuyizachisa
  • Shimbi ja Kufunga Sango ja Mutu
  • Configurações de Privacidade
  • JW.ORG
  • Njila
Tuma