A-Yunda nihindu te kakwehuka Yehova ni kuwayila tuzambi a mahuza. Ha miaka yinji, Yehova yanunga ni kwaakwasa. Iye yatuma aprofeta anji hanga aatoweze, alioze ayo kakapanjikileko. Hachino, ayo yahepwisa aprofeta jacho. Kuchi Yehova ahwishile uwayilo wo wa mahamba?

Mwanangana wa Babilonia, Nabukanezore, te kakukumba vungu ni vungu. Ha shimbu litangu lize akumbile Yerusaleme, iye kakwachile Mwanangana Jehoachine, yilolo, tujita, yilangaji, eswe yaatwala ku Babilonia. Iye nawa yambata upite weswe wa mu tembele ya Yehova. Hachino, Nabukanezore yapwisa Zedekia mwanangana wa A-Yunda.

Chitangu, Zedekia te kakwononokena Nabukanezore. Alioze mavungu waze te asulangana no ni aprofeta a mahuza, yalweza Zedekia hanga alimike ni A-Babilonia. Jeremia yamutoweza ngwenyi: ‘Nyi mulimika no, mu Yunda mumukapwa kufwa, zala ni misongo.’

Muze hayula miaka nake, Zedekia yakwata chiyulo cha kulimika ni A-Babilonia. Yeta ukwaso kuli maswalale A-Engitu. Hachino, Nabukanezore yatuma maswalale jenyi hanga alimike ni Yerusaleme, chocho, ayo yasa chilombo cho hakamwihi ni mbonge. Jeremia yalweza Zedekia ngwenyi: ‘Yehova kamba ngwenyi, nyi munulihana kuli A-Babilonia, yenweswe hamwe ni mbonge kumanulamwina. Alioze nyi ka, A-Babilonia makocha Yerusaleme ni kunutwala mu ufunge.’ Zedekia yamba ngwenyi: ‘Ami kuchazangile kulihana!’

Hakupalika cha mwaka umuwika ni ndambu, tujita twa A-Babilonia yapupa yipanga ya Yerusaleme nawa yocho mbonge yeswe. Ayo yocha tembele, yashiha atu anji nawa yatwala tununu twa atu mu ufunge.

Zedekia yachina mu Yerusaleme, chipwe chocho, A-Babilonia yamukaula. Ayo yamukwachila hakamwihi ni Yeriku ni kumutwala kuli Nabukanezore. Mwanangana wa Babilonia yashiha ana ja Zedekia kumeso jenyi. Hachino, Nabukanezore yapwisa Zedekia kapuputa ni kumusa mu zuwo lia ususu, muze afwilile. Alioze Yahova yalakenya A-Yunda ngwenyi: ‘Hakupalika cha miaka 70, mungukanufunyisa ku Yerusaleme.’

Yika te muyilingiwa kuli atu waze atwalile mu ufunge ku Babilonia? Shina te manunga ni kushishika kuli Yehova?

Muze Nabukanezore atwalile yilolo A-Yunda ku Babilonia, iye yasa chilolo wa ku zuwo lia wata, yoze te avuluka ngwo, Ashepenaji hanga aafunge. Nabukanezore yalweza Ashepenaji hanga asakuleho akweze waze apema nawa alimuka. Akweze wano te maafumba ha miaka yitatu. Fumbo liacho te muliakwasa hanga apwe atu alemu mu Babilonia. Akweze jacho katambile kunyingika kutanga, kusoneka, ni kuhanjika Akadiana limi lia A-Babilonia. Nawa katambile kulia yize mwanangana ni atu jenyi te akulia. Akweze jacho awana kapwile, Daniele, Hanania, Mishaele ni Azaria. Ashepenaji yaaluka majina aha amu Babilonia ngwo: Belteshazare, Shadrake, Meshake ni Abedenego. Shina fumbo liacho te muliaakwika kuwayila Yehova?

Akweze wano awana, kakwachile chiyulo cha kwononokena Yehova. Ayo kanyingikine ngwo, katambile kulia yize te akulia mwanangana, mumu Shimbi ya Yehova yambile ngwo, kulia chacho chimwe te chaluchisa. Kashika ayo yalweza Ashepenaji ngwo: ‘Lisesa, kanda utulisa kulia chize akulia mwanangana.’ Ashepenaji yaalweza ngwenyi: ‘Nyi kunwachilile, mwanangana manumona ngwe nunayiji, hachino iye mangushiha!’

Daniele yapwa ni limwe nyonga. Yalweza tufunga two ngwenyi: ‘Lisese, twehenu wika yililima ni meya ha matangwa kumi. Mba nutesenu ni akweze waze malia yize akulia mwanangana.’ Chocho, tufunga yatayiza.

Muze kwapalikile matangwa kumi a cheseko, Daniele ni masepa jenyi atatu yasoloka ni mijimba yipema kuhiana akweze akwo. Yehova kevwile kuwaha mumu ayo kwononokene kuli iye. Nawa yahana Daniele mana akunyingika usolwelo ni yilota.

Muze fumbo liacho liahwile, Ashepenaji yatwala akweze jacho kuli Nabukanezore. Mwanangana yahanjikano nawa yamona ngwenyi, Daniele, Hanania, Mishaele ni Azaria kapwile ni mana nawa te kakanyama kuhiana akweze akwo. Yasakula akweze wano awana hanga akalakale ku zuwo lienyi lia wata. Mwanangana, kanji-kanji te kakufupa ukwaso hakutwala ku yikuma yilemu. Yehova yaapwisa akwa-mana kuhiana mianangana eswe a mana ni malunga waze te akulinga tufutafuta.

Chipwe ngwe kapwile mu chifuchi cha yilambala, nihindu, Daniele, Hanania, Mishaele ni Azaria kakavulamine ngwo, ayo te tuvumbi twa Yehova. Shina ni yena mukewuluka Yehova, chipwe muze uli kusuku ni asoko je?