Ha umwe ufuku, Mwanangana Nabukanezore yalota chitaka chimwe chilota. Chino chamupinjishile chinji, hikahashile kuya tulo. Iye yasanyika tahi jenyi ni kwaalweza ngwenyi: ‘Ngulumbunwinenu chilota chize nalotanga.’ Ayo yamba ngwo: ‘Mwanangana tulweze yuma yize walotanga.’ Alioze Nabukanezore yamba ngwenyi: ‘Ka! Yenu ngulwezenu wika yuma yize nalotanga, neka mungunushiha.’ Ayo yamulweza nawa ngwo: ‘Tulweze yize walotanga, mba tuhase kukulumbunwinayo.’ Iye yamba ngwenyi: ‘Enu eswe nunafupu kungutela muheto. Ngulwezenu wika yize nalotanga!’ Ayo yamulweza ngwo: ‘Kukushi mutu niumwe hano hashi yoze mahasa kuchilinga. Mumu yuma yize unatwite yili yikalu chinji kuyilinga.’

Nabukanezore yevwa uli unji, chocho yahana shimbi hanga ashihe malunga eswe a mana mu chifuchi. Kuchingako, Daniele, Shadrake, Meshake ni Abedenego. Daniele yeta amwe mashimbu kuli mwanangana. Hachino, iye ni masepa jenyi yalemba kuli Yehova ni kumwita ukwaso. Yika Yehova alingile?

Mu umwe usolwelo, Yehova yasolola chilota cha Nabukanezore kuli Daniele ni kumwaha ulumbunwiso wacho. Ha tangwa lize liasulileho, Daniele yaya kuli tuvumbi a mwanangana ni kwaalweza ngwenyi: ‘Kanda nushiha niumwe lunga wa mana. Ami munguhasa kulumbununa chilota cha mwanangana.’ Tuvumbi jacho yatwala Daniele kuli Nabukanezore. Daniele yalweza mwanangana ngwenyi: ‘Zambi hajimbula yuma yize muyikalingiwa kulutwe. Chilota chenu chino: Wamonanga umwe kaponya munene uli ni mutwe wa oru, pambo ni moko jenyi a prata, jimo ni mashina ja molu a unengu, molu a utale, yiliato yakuchinga utale ni uma. Hachino, limwe liwe liakatukile ku mulundu, ni kupupa ku yiliato ya kaponya. Kaponya wacho yafwenyoka yapwa ngwe yizungu nawa yayihehula ku fuji. Liwe liacho yilialumuka mulundu unene, nawa yilizala hashi heswe.’

Hachino, Daniele yamba ngwenyi: ‘Ulumbunwiso wa chilota che uno: Wanangana we uli mutwe wa oru. Prata uli wanangana uze muwiza kulutwe. Mukukapwa umwe walifwa ni unengu, uno muukayula hashi heswe. Wanangana uze muukasulaho muukapwa ukolo ngwe utale. Hikusongo wanangana wacho muulihandununa, yihanda yimwe muyipwa yikolo ngwe utale, alioze yikwo yilelu ngwe uma. Liwe lize liakatukile ku mulundu lili Wanangana wa Zambi. Wanangana wacho muukafwenya mawanangana wano eswe, alioze wayo muukasala wa mutolo.’

Nabukanezore yafulamana hashi kumeso ja Daniele. Yamba ngwenyi: ‘Zambi ye kajimbulula chilota chami kuli yena. Kukushi nawa Zambi walifwa ngwe iye.’ Shimbu ashihe Daniele, Nabukanezore yamupwisa mwata wa akwa-mana ni akwa-kuyula eswe mu wanangana wa Babilonia. Haliapwila wahasa kumonna chize Yehova akumbulwile kulemba cha Daniele?

Hakupalika cha amwe mashimbu, chize haze Mwanangana Nabukanezore alotele umwe kaponya, chocho yalinga kaponya munene. Yamumika ha chana cha Dura nawa yasanyika atu a lufuma amu chifuchi, hamwe ni Shadrake, Meshake ni Abedenego yakunguluka kulutwe lia kaponya wacho. Mwanangana yahana shimbi ngwenyi: ‘Muze munwivwa zungo lia chitavwi ni kalialia ni ngayeta, fulamanenu kulutwe lia kaponya! Mweswawo malituna kufulamana mamumbila mu lutengo wa kahia.’ Shina A-Hepreu wano atatu te mafulamana kulutwe lia kaponya, nyi te mawayila wika Yehova?

Chocho, mwanangana yatuma kwimba miaso. Atu eswe yafulamana ni kuwayila kaponya, kuchizako wika Shadrake, Meshake ni Abedenego. Atu amwe yaamona, chocho yalweza mwanangana ngwo: ‘A-Hepreu wano atatu kanalitunu kuwayila kaponya ke.’ Nabukanezore yatuma atu jacho hanga aalweze ngwenyi: ‘Ami mungunwaha nawa uhashi ukwo hanga nuwayile kaponya. Nyi kunwachilingile, manumbila mu lutengo wa kahia. Mumu kukushi zambi niumwe yoze mahasa kunulamwina ku moko jami.’ Ayo yakumbulula ngwo: ‘Kutwafupile uhashi ukwo. Zambi yetu mahasa kutulamwina. Alioze chipwe ngwe kachilingile, mwanangana, nihindu kutuchi kuwayila kaponya yono.’

Nabukanezore yevwa uli unji. Yalweza atu jenyi ngwenyi: ‘Wezelenu kahia mu lutengo yisuho shimbiali kuhiana!’ Mba hiyalweza maswalale jenyi ngwenyi: ‘Kasenu malunga wano, nawa akongenu mu lutengo wa kahia!’ Lutengo kapwile ni kusasaminya chinji, kashika muze maswalale aheteleko, yafwa hazehene. A-Hepreu wano atatu yaakonga mu kahia. Alioze muze Nabukanezore atalile mukachi, shimbu amonemo malunga atatu, iye yamonamo malunga awana kanende. Chocho, yaputuka kwivwa woma ni kuhula akwa-milimo yenyi ngwenyi: ‘Kutwambilile malunga atatu mu kahia nyi? Ami ngunamono malunga awana, nawa umwe wa kuli ayo kanasoloka ngwe mungelo!’

Nabukanezore yaya hakamwihi ni lutengo ni kwamba ngwenyi: ‘Tuhukenumo, tuvumbi twa Zambi Mukwa-ndundo Jeswe!’ Atu eswe yakomoka ha kumona Shadrake, Meshake ni Abedenego kanatuhuka mukachika ka kahia. Yikowa, kambu, ni mazalo jo kakawemene, nawa kakapwile ni kunuka vumba lia kahia.

Nabukanezore yamba ngwenyi: ‘Zambi ya Shadrake, Meshake ni Abedenego kali munene. Iye katuma mungnelo wenyi ni kwaalamwina. Kukushi zambi walifwa ni wa ayo.’

Ngwe A-Hepreu wano atatu, shina mushishika kuli Yehova chipwe muze mukulingiwa yeswayo?