Ha umwe ufuku, Nabukanezore yalota chitaka chimwe chilota. Chocho, yasanyika akwa-mana jenyi hanga amulumbunwine chilota chacho. Alioze niumwe wa kuli ayo kakahashile kumulumbunwina cho. Hi kusongo, mwanangana yahanjika ni Daniele.

Nabukanezore yalweza Daniele ngwenyi: ‘Mu chilota chami, namonanga umwe mutondo. Mutondo wacho usuku chinji unahete ndo mwilu. Te unamoneka hashi heswe. Mafwo jawo apema nawa te uli ni mihuko yinji. Tushitu te kanahwimina mushi liawo nawa tujila te kanahwimina ku mitangu yawo. Hachino, yingumona umwe mungelo kanahulumuka mu malilu. Iye yakololoka ngwenyi: “Patulenu mutondo, nawa sembenu mitango yawo. Alioze hichikenu chishina cha miji mu mavu, kasenuko chikungo cha utale ni unengu. Mbunge ya mutondo yikalumuke ngwe ya mutu, akamwehe kunyonga cha kashitu, mba tungonde shimbiali akamupalike. Atu eswe makanyingika ngwo Zambi kali Mwata nawa ngwo iye mahasa kuhana wanangana kuli mutu mweswawo mazanga.”

Yehova yajimbulwila Daniele ulumbunwiso wa chilota. Muze Daniele anyingikine ulumbunwiso wacho, yaputuka kwivwa woma. Yamba ngwenyi: ‘Mwanangana, te ngunamono ngwami chilota chino chilli cha akwa-kole je, alioze chinatale yena. Mutondo uno apatwile unalumbunuka yena. Mukatokesa wanangana we, nawa kumukalia yambu ngwe kashitu wa mu yambu. Alioze amu mungelo ambile hanga ahichike shina lia mutondo ni miji yako, yena mukafunyina wanangana we.’

Hakupalika cha mwaka umuwika, Nabukanezore yaputuka kwendela ha fulumba lia zuwo lienyi lia wanangana, ni kukomoka Babilonia. Iye yamba ngwenyi: ‘Ayino ye mbonge yinene ya Babilonia yakutunga kuli yami mwene. Kashika nguli munene chinji!’ Muze te anahanjika, limwe liji mu malilu yiliamba ngwo: ‘Nabukanezore! Haliapwila wanangana we wakukatuka.’

Hazehene, Nabukanezore yazaluka yapwa ngwe kashitu wa mu yambu. Yamuhuma mu zuwo lia wanangana, yaya ni kutwama ni tushitu amu yambu. Kambu ja Nabukanezore yijisuhwa chinji yijipwa ngwe ngona ja tela, nawa yala yenyi yiyipwa ngwe ya kajila.

Hakupalika cha miaka shimbiali, Nabukanezore yahinduka, chocho Yehova yamupwisa nawa mwanangana mu Babilonia. Hachino, Nabukanezore yamba ngwenyi: ‘Ngunahalisa Yehova, Mwata wa malilu. Haliapwila mba hinanyingika ngwami, Yehova kali Mukwa-Kuyula munene. Iye kakupalumwisa akwa-kulinangamisa, nawa mahasa kuhana wanangana kuli mweswawo mazanga.’

Hakupalika cha miaka, Beleshazare yapwa mwanangana mu Babilonia. Ha umwe ufuku, iye yasanyika tununu twa atu jenyi alemu amu chifuchi ha chiwanyino. Yalweza tuvumbi twenyi hanga atuhwise misenge ya oru yize Nabukanezore anjile mu tembele ya Yehova. Beleshazare ni atu jenyi yanwinamo ni kuhalisa tuzambi two. Susumuku, kwoko lia umwe lunga yiliputuka kusoneka sona ja yijimbikilo ku chikalakala cha chipatulo cha kulila.

Beleshazare yevwa woma. Yasanyika tahi jenyi nawa yaalakenya ngwenyi: ‘Mweswawo mahasa kulumbununa sona jino, mungumupwisa mukwa-kuyula wamuchitatu mu wanangana wa Babilonia.’ Ayo yesekako chikehe, alioze niumwe wa kuli ayo kahashile kulumbununa sona jacho. Hachino, mwazovu yezamo ni kwamba ngwenyi: ‘Kuli umwe lunga yoze avuluka ngwo Daniele yoze wapwile ni kulumbununa yuma kuli Nabukanezore. Iye mahasa kukulumbunwina sona jino.’

Daniele yeza kuli mwanangana. Beleshazare yamulweza ngwenyi: ‘Nyi mutanga ni kulumbununa sona jino, mungukujika lenge lia oru mu kota ni kukupwisa mukwa-kuyula wamuchitatu mu wanangana wa Babilonia.’ Daniele yamba ngwenyi: ‘Kuchazangile yawana ye, chipwe chocho mungukulweza ulumbunwiso wa sona jino. Tatenu Nabukanezore, kalizachile, chocho Yehova yamupalumwisa. Yena unanyingika yuma yeswe yize yalingiwile kuli iye, alioze unahono Yehova vumbi ha kunwina vinyu mu misenge ya oru ya mu tembele Yenyi. Kashika Zambi asoneka sona jino ngwenyi: Mene, Mene, Tekele, Ufarsine. Maliji wano kanalumbunuka ngwo, A-Media ni A-Persia makakumba wanangana wa Babilonia nawa yena kuuchi kapwa nawa mwanangana.’

Chasolokele ngwe niumwe te keshi kuhasa kukumba Babilonia. Mbonge yino yapwile ya kufunga ni yikalakala yikolo nawa yisuku-yisuku hamwe ni lwiji munene. Alioze ha umwe ufuku, A-Media ni A-Persia yaalukukila. Mwanangana wa A-Persia, Siru yakondolola lwiji, chocho maswalale jenyi yazauka ha ufuku wacho ni kuheta ku pito ja mbonge. Muze aheteleko, yawana ma pito te awashi! Maswalale yapupa ma pito, yanongesa mbonge, nawa yashiha mwanangana. Hachino, Siru yapwa mwanangana wa Babilonia.

Ha mwaka wenyi utangu, Siru yatwa mutambi ngwenyi: ‘Yehova kangulweza hanga ngutungulule tembele yenyi mu Yerusaleme. Atu jenyi eswe waze mazanga kukwasa mulimo wacho mahasa kuyako.’ Hachino, ngwe chize Yehova alakenyene, hakupalika cha miaka 70 chize haze anongesele Yerusaleme, A-Yunda anji yafuna kumahio. Siru yafunyisa misenge ya oru ni ya prata ni yikwata yeswe yize Nabukanezore anjile mu tembele. Shina wamona chize Yehova azachishile Siru hanga akwase atu Jenyi?