Kwasa Alongi je a Mbimbiliya Akwate Chiyulo cha Kuwayila Yehova

1-2. (a) Mumu liaka alongi amwe a Mbimbiliya akwivwa woma wa kupwa Yela ja Yehova? (b) Yika mutulilongesa ha mutwe uno?

SHINA wapwile ni kwivwa woma wa kupwa Chela cha Yehova? Hanji wevwile woma ngwo, akwa-milimo-ni-akwenu, masepa hanji asoko je malimika ni yena. Hanji nawa wanyongene ngwe kuuchi kuhasa kutwama kulita ni shimbi ja Zambi. Nyi ngwe che walivwile, unanyingika chize amwe alongi a Mbimbiliya akulivwa, ni yize yakwakwika kukwata chiyulo cha kupwa Yela ja Yehova.

² Yesu kanyingikine ngwenyi, woma wa mutapu au, muuhasa kukinda amwe kuwayila Yehova. (Mateu 13:20-22) Alioze, iye kakechele kukwasa atu waze apwile ni kwivwa woma wa kumukaula. Shimbu achilinge, iye yasolola kuli tumbaji twenyi chize mahasa kukwasa atu jacho (1) kunyingika yize yaakwakwika kuwayila Yehova, (2) kukolesa zango lio kuli Yehova, (3) kusa Yehova ha chihela chitangu ku mwono wo, ni (4) kukumba woma. Kuchi mutuhasa kukaula yize Yesu alwezele tumbaji twenyi ha kukalakala ni mukanda Wahilila ku Mwono ku Miaka Yeswe!, hanga tukwase alongi amane nguu mu umwenemwene?

KWASA ALONGI JE ANYINGIKE YIZE YINAAKWIKA KUWAYILA YEHOVA

3. Yika kota yakwikile Nikondemu kukaula Yesu?

³ Nikondemu kapwile mutu mulemu mukachi ka A-Yunda. Alioze, kwalingiwile yimwe yize yamukwikile kukaula Yesu. Nikondemu kanyingikine ngwenyi Yesu kapwile Mesaya, muze te hakumbanyisa tukweji asambano mu mulimo wenyi wa kwambujola. (Yoa. 3:1, 2) Alioze mumu lia kwivwa “woma wa A-Yunda,” Nikondemu yasakula kuliwana ni Yesu kwa ukwawo. (Yoa. 7:13; 12:42) Iye kota kanyongene ngwenyi, nyi mapwa kambaji ka Yesu matokesa yuma yinji.a

4. Kuchi Yesu akwashile Nikondemu kunyingika yize Zambi apwile ni kushimbwila kuli iye?

⁴ Nikondemu te kanyingika Shimbi ya Mose, alioze katambile kumukwasa hanga anyingike yize te Yehova anashimbwila kuli iye. Kuchi Yesu amukwashile? Mumu lia kupwa chihanyi, Yesu yasa mashimbu jenyi hanga aliwane ni Nikondemu ha ufuku. Yesu yasolola zwalala yize Nikondemu te atamba kulinga mba apwe kambaji kenyi: kulikonyeka ku shili, kumupapachisa mu meya ni kufuliela muli Mwana wa Zambi.​—Yoa. 3:5, 14-21.

5. Kuchi mutuhasa kukwasa longi wa Mbimbiliya anyingike yize yinamukwika kujama ku ufulielo?

⁵ Chipwe ngwe longi wa Mbimbiliya kananyingika kanawa Yisoneko, nihindu mutuhasa kumukwasa hanga anyingike yize yinamukwika kujama ku ufulielo. Ngwe chilweza, muchihasa kupwa ngwe mulimo wenyi wakumumbata mashimbu anji hanji asoko jenyi keshi kuzanga hanga apwe Chela cha Yehova. Chizechene ngwe Yesu, sako mashimbu hanga ukwase longi ye. Muhasa kumusanyika hanga nupalikise mashimbu hamuwika. Kulinga chino, muchihasa kumukwasa hanga azulule mbunge yenyi ni kukulweza yize yinamupinjisa. Kolweza longi ye alumune yimwe ku mwono wenyi. Mwiulule ngwo, keshi kwalumuna yitanga yenyi hanga akuvwise kuwaha, alioze hanga evwise Yehova kuwaha.

6. Kuchi muhasa kukwasa longi ye hanga apwe ni hamu lia kukaula yize akulilongesa? (1 A-Korindu 16:13)

⁶ Nyi longi wa Mbimbiliya mapwa ni shindakenyo ngwenyi, Yehova mamukwasa kutwama kulita ni shimbi ja mu Mbimbiliya, chino muchimwaha hamu lia kukaula yize analilongesa. (Tanga 1 A-Korindu 16:13.) Mulimo we mutuhasa kuutesa ni wa longeshi ku shikola. Longeshi mupema, keshi kulongesa wika longi chize malinga yuma, alioze kakumukwasa nawa alivwe ngwo kali ni uhashi wa kuyilinga. Chizechene nawa, longeshi mupema wa Mbimbiliya, keshi kulongesa wika yize Zambi anazange hanga tulinge, alioze kakukwasa nawa longi apwe ni shindakenyo ngwenyi, ni ukwaso wa Yehova, iye mahasa kwalumuna yimwe ku mwono wenyi. Kuchi muhasa kuchilinga?

KWASA ALONGI JE AKOLESE ZANGO LIO KULI YEHOVA

7. Kuchi Yesu akwashile atu waze apwile ni kumupanjika hanga akolese zango lio kuli Yehova?

⁷ Yesu kanyingikine ngwenyi, kuzanga Zambi te muchikwasa tumbaji twenyi akaule yize apwile ni kulilongesa. Ha yisuho yinji, iye te kakulongesa tumbaji twenyi yuma yize muyaakwasa kukolesa zango lio kuli Yehova. Ngwe chilweza, iye katesele Yehova ni chisemi yoze wakuhana yuma yipema kuli ana jenyi. (Mateu 7:9-11) Atu amwe waze apwile ni kupanjika Yesu, kota kakapwile ni yisemi waze te akwazanga. Achinyonga chize o alivwile muze Yesu ahanjikile ha chishima cha tata wa keke yoze watambwile cheka mwanenyi chihulia, muze afunyine ku zuwo. Chishima chino chaakwashile kumona ngwo, Yehova kakwazanga chinji nawa kanazange kwakwasa.​—Luka 15:20-24.

8. Kuchi muhasa kukwasa longi ye wa Mbimbiliya akolese zango lienyi kuli Yehova?

⁸ Muhasa nawa kukwasa longi ye hanga akolese zango lienyi kuli Yehova, ha kushindakenya chinji ha yitanga ya Yehova muze unamulongesa. Muze unamulongesa, mukwase hanga amone chize yuma yize analilongesa yinasolola zango lia Yehova. Muze munuhanjika ha ukuule, shindakenya ha chize unakwate hali iye. (Roma 5:8; 1 Yoa. 4:10) Nyi longi manyingika chize Yehova akumuzanga, muchimukwasa neye kuzanga chinji Yehova.​—Ngala. 2:20.

9. Yika yakwashile Michael kwalumuna mwono wenyi?

⁹ Tutalenu chilweza cha Michael wa ku Indonésia. Iye kakolelele mu usoko wa Yela ja Yehova, alioze kakasele tachi hanga amupapachise. Muze apwile ni miaka 18, yaya mu chifuchi cheka, koko yawana mulimo wa kwendesa minyau. Ha kupalika cha mashimbu yambata, alioze yahichika usoko wenyi, yanunga ni kukalakala ku chifuchi cheka. Ha mashimbu jacho, mukwo-pwo ni mwanenyi yaputuka kulilongesa Mbimbiliya ni kujama ku ufulielo. Muze naye afwile, Michael yafuna ku zuwo hanga afunge tato, chocho yatayiza kulilongesa Mbimbiliya. Kuhengwola chikuma “Nyingika Nawa,” chize chili ha longeso 27 mu mukanda Wahilila ku Mwono ku Miaka Yeswe! chamukwachile ku mbunge. Muze apukwine ha chize Yehova alivwile ha kumona Mwanenyi mamona lamba, Michael yaputuka kulila. Muze anyingikine chize Yehova ni Yesu akumuzanga, yasolola usakwililo wenyi ha kwalumuna mwono wenyi ni kulihana hanga amupapachise.

KWASA ALONGI JE ASE YEHOVA HA CHIHELA CHITANGU

10. Kuchi Yesu akwashile tumbaji twenyi atangu kunyingika yize masa ha chihela chitangu ku mwono wo? (Luka 5:5-11) (Tala nawa chizulie.)

¹⁰ Tumbaji atangu a Yesu kanyingikine ngwo, iye kapwile Mesaya yoze alakenyene. Alioze kafupile ukwaso mba ase mulimo wa kwambujola ha chihela chitangu ku mwono wo. Petulu ni Andeleu te hapwa tumbaji twa Yesu ha amwe mashimbu muze aalwezele hanga anjile mu mulimo wa shimbu lieswe. (Mateu 4:18, 19) Ayo te kakulinga mulimo wa kuta yishi, kota hamwe ni Tiangu ni Yoano. (Marku 1:16-20) Alioze, Petulu ni Andeleu ‘kahichikile manda jo’ hanga akaule Yesu mu mulimo wa shimbu lieswe. Muze akwachile chiyulo chacho, ayo kasele nawa shindakenyo ngwo, nihindu manunga ni kukwasa asoko jo ha yize te mafupa ku musunya. Yika yaakwashile kusa mulimo wa kwambujola ha chihela chitangu kuhiana mbongo? Lusango uli ha Luka kanasolola ngwo, Yesu kalingile chikomokeso chize chakolesele ujikijilo wo muli Yehova ni ha uhashi wenyi wa kwafunga.​—Tanga Luka 5:5-11.

11. Yika mutuhasa kulweza alongi jetu hanga yakwase kukolesa ufulielo wo?

¹¹ Yetu kutushi kuhasa kulinga yikomokeso ngwe chize Yesu alingile. Alioze, mutuhasa kwalumbunwina yilweza ya chize Yehova akukwasa waze akumusa ha chihela chitangu ku mwono wo. Ngwe chilweza, shina wakwiuluka chize Yehova akukwashile muze waputukile kukunguluka? Kota wahanjikile ni mwata we ku mulimo ni kumulweza ngwo, kuuchi kupwa ni kukalakala nawa ha maola waze hi a mulimo ko mumu chakukukwika kukunguluka. Muze mulianyina ni longi ye yize wakupalika ku mwono, mulumbunwine chize ufulielo we wakolele ha kumona ukwaso wa Yehova ha chiyulo wakwachile cha kusa uwayilo wenyi ha chihela chitangu.

12. (a) Mumu liaka twatamba kuya ni mandumbu alisa muze mutuya ni kusongwela longeso lia Mbimbiliya? (b) Kuchi kusolola yinema muchihasa kukukwasa kulongesa kanawa longi ye? Hana chilweza.

¹² Longi ye mahasa nawa kuyuka ha kwivwa chize mandumbu akwo alumwine mwono hanga ase Yehova ha chihela chitangu. Kashika muze unayi ni kusongwela longeso, yako ni mandumbu alisa. Ete hanga alumbunune chize anyingikine umwenemwene ni yize alingile mba ase Yehova ha chihela chitangu ku mwono wo. Chikwo nawa, muze nunalilongesa, senu mashimbu hanga nutale yinema yize yili ha yikuma “Nyingika Nawa” hanji “Hengwola Nawa” mu mukanda Wahilila ku Mwono ku Miaka Yeswe! Ngwe chilweza, nyi ngwe nunalilongesa longeso 37, muhasa kushindakenya shimbi ja mu Mbimbiliya jili ha chinema, Yehova Kumatwaha Yeswayo Mutufupa.

KWASA ALONGI JE HANGA AKUMBE YIHUNGUMIONA

13. Kuchi Yesu aluliekele tumbaji twenyi ha yihungumiona yize te muyiza kulutwe?

¹³ Yesu, kalwezele tumbaji twenyi ha yisuho yinji ngwenyi, te maahungumiona kuli akwo chipwe lume kuli asoko jo. (Mateu 5:11; 10:22, 36) Muze mulimo wenyi wa kwambujola te unayi ni kuheta ku songo, Yesu yatoweza tumbaji twenyi ngwenyi, te mahasa kwashiha mumu lia kuwayila Yehova. (Mateu 24:9; Yoa. 15:20; 16:2) Yaatoweza nawa hanga akanyame mu mulimo wo wa kwambujola. Yaaha yiyulo hanga ahone kulihangujola ni atu waze te keshi kwazanga ni kwakanyamisa ha yize malinga ni yize mahanjika mu mulimo wa kwambujola.

14. Kuchi mutuhasa kukwasa alongi jetu alilulieke hakutwala ku yihungumiona yize muyiza kulutwe? (2 Timoteu 3:12)

¹⁴ Mutuhasa kulumbunwina alongi jetu yize akwa-mulimo-ni-akwo, masepa ni asoko jo mahasa kwamba hanji kwalinga mumu lia kulilongesa Mbimbiliya. (Tanga 2 Timoteu 3:12.) Amwe waze akukalakala hamwe ni alongi jetu mahasa kwasosomba ha kunyingika ngwo, kanakaula yize akulilongesa mu Mbimbiliya. Atu akwo, chipwe lume asoko jo mahasa kwakekuna mumu lia kulilongesa Mbimbiliya. Nyi mutululieka alongi jetu hakutwala ku yihungumiona yize muyiza kulutwe, o mapwa akulilulieka muze muyaawana.

15. Yika muyihasa kukwasa alongi akumbe yihungumiona yize muyihasa kukatuka kuli asoko?

¹⁵ Hakutwala ku yihungumiona yize muyihasa kukatuka kuli asoko, kolweza alongi je amone mumu liaka amwe asoko jo mahasa kwaevwila uli. Ayo hanji kakunyonga ngwo, Yela ja Yehova kakulongesa yuma ya mahuza, nawa hi atu apema ko. Chipwe Yesu, asoko jenyi amwe kakapwile ni kuwahilila ha yize apwile ni kulinga. (Marku 3:21; Yoa. 7:5) Kwasa alongi je apwe akwa-kulihumikiza ni kusolola vumbi muze mahanjika ni asoko jo ni atu akwo nawa.

16. Kuchi mutuhasa kukwasa alongi asolole mana muze malianyina ni akwo yize afuliela?

¹⁶ Muze asoko mazanga kunyingika yimwe hakutwala ku Mbimbiliya, alongi masolola mana ha kwecha kwalumbunwina yuma yinji ha chisuho chimuwika. Nyi machilinga, mahasa kuhongesa asoko jo, hachino o malituna kuhanjika no ha yize afuliela. Kashika, kolweza alongi je alianyine ni akwo yize afuliela mu jila yize muyaaha uhashi wa kuchilinga ha yisuho yikwo. (Kolo. 4:6) Hanji mahasa kulweza asoko jo hanga anjile ha site jw.org. Chino muchikwasa asoko jo kulilongesa yuma yinji hakutwala kuli Yela ja Yehova kulita ni uhashi wo.

17. Kuchi muhasa kukwasa alongi je akumbulule yihula yize atu anji akuhula hakutwala kuli Yela ja Yehova? (Tala nawa chizulie.)

¹⁷ Muhasa kusolwela alongi je chikuma “Yihula Yize atu Akuhula Chinji Hakutwala kuli Yela ja Yehova” chili ha site jw.org, hanga wakwase alulieke makumbululo ashi a yihula yize asoko hanji akwa-mulimo-ni-akwo mahasa kwahula. (2 Timo. 2:24, 25) Ha kuhwa cha longeso, hengwolenu chikuma “Atu Amwe Kakwamba Ngwo” chili mu mukanda Wahilila ku Mwono ku Miaka Yeswe!. Kolweza alongi je hanga alulieke makumbululo mu maliji jo ene. Kanda wecha kwaha yiyulo hakutwala ku chize malulieka makumbululo jo. Yikuma yino yashi, muyaakwasa kupwa ni hamu lia kukalila yize afuliela.

18. Kuchi muhasa kukolweza alongi je alianyine ni akwo yize afuliela mu mulimo wa kwambujola? (Mateu 10:27)

¹⁸ Yesu kalwezele tumbaji twenyi hanga ambujole sango jipema ha mbunga. (Tanga Mateu 10:27.) Nyi longi wa Mbimbiliya chize ku uputukilo malianyina ni akwo yize afuliela, muchipwa chashi kujikijila muli Yehova. Kuchi muhasa kukwasa alongi je hanga akaule chikuma chino? Muze mu chikungulwila chenu matwamo mutambi wa kwambujola chalipwila, kolweza alongi je anyonge ha yize atamba kulinga hanga apwe akwa-kwambujola. Alumbunwine ngwo, chapwa chashi kwambujola ha mashimbu jacho. Ayo mahasa nawa kuyuka ha fumbo lize twakutambula ha kukunguluka cha mukachi ka poso. Nyi makaula chikuma chacho, manyingika chize mahasa kukalila yize afuliela ni shindakenyo yeswe.

JIKIJILA ALONGI JE A MBIMBILIYA

19. Kuchi Yesu asolwele ngwenyi kapwile ni kujikijila hali tumbaji twenyi, mba kuchi mutuhasa kumwimbulula?

¹⁹ Muze Yesu te kanda achiya mu malilu, iye yalweza tumbaji twenyi ngwenyi, tangwa limwe te maliwana no cheka. O kakanyingikine ngwo, Yesu te kanahanjika ha kuya chenyi mu malilu. Chipwe ngwe tumbaji twenyi kapwile ni kukakajana, nihindu Yesu kapwile ni shindakenyo ngwenyi, o kazangile kuvwisa Yehova kuwaha. (Yoa. 14:1-5, 8) Iye kanyingikine ngwenyi, te kwatamba kupalika mashimbu mba yuma yimwe yaalumbunuke, ngwe kutalatala cha kuya mu malilu. (Yoa. 16:12) Chizechene ngwe Yesu, ni yetu mutuhasa kujikijila alongi jetu ngwetu, kanazange kuvwisa Yehova kuwaha.

20. Kuchi ndumbu Chifundo asolwele ngwenyi kakujikijila muli longi yenyi?

²⁰ Pwako ni shindakenyo ngwe, alongi je kanazange kulinga yuma yalita. Tutalenu chilweza cha ndumbu Chifundo, yoze watwama mu Malawi. Iye kaputukile kusongwela longeso lia Mbimbiliya mu mukanda Wahilila ku Mwono ku Miaka Yeswe! kuli Alinafe, umwe mwana-pwo wa mu yingeleja ya Catolika. Muze ahetele ku songo lia longeso 14, yamuhula hakutwala ku yize akunyonga ha kuwayila tuponya. Ni sambi jeswe, Alinafe yakumbulula ngwenyi: “Chino chili chiyulo cha mutu ni mutu!” Chocho Chifundo yanyonga ngwenyi, kota Alinafe mecha kulilongesa Mbimbiliya. Alioze ni uhumikizo weswe, yanunga ni kulilongesa nenyi ni kushimbwila ngwenyi, ha kupalika cha mashimbu yuma muyimulumbunuka. Muze kwapalikile amwe tukweji, Chifundo yamuhula chihula chize chili ha longeso 34, chinambe ngwo: “Kuchi longeso lie lia Mbimbiliya ni umwenemwene hakutwala kuli Yehova yinakuyukisa?” Chifundo kanalumbununa chize Alinafe akumbulwile, ngwenyi: “Iye yatongola yikuma yinji yilemu, chimwe cha mu yikuma yacho chili ngwo, Yela ja Yehova keshi kulinga yuma yize Mbimbiliya yakukanjisa.” Ha kupalika cha amwe mashimbu, yecha kuwayila tuponya ni kujama hanga amupapachise.

21. Kuchi muhasa kukwasa alongi je hanga amane nguu mu umwenemwene?

²¹ Chipwe ngwe Yehova mwe “wakutatwisa” alongi a Mbimbiliya, nihindu yetu mutuhasa kwakwasa hanga ajame ku ufulielo. (1 Kori. 3:7) Twakulinga yuma yinji hi wika ko kwalongesa yize Zambi anazange hanga alinge. Twakwakwasa hanga akolese zango lio muli Yehova. Twakwakolweza nawa asolole zango liacho ha kumusa ha chihela chitangu ku mwono wo. Chikwo nawa, twakwalongesa hanga ajikijile muli Yehova muze mapalika mu yipikalo. Nyi twasolola ngwetu twakujikijila alongi jetu, mutwakwasa hanga atwame kulita ni shimbi ja Yehova ni kumana nguu mu umwenemwene.