Chize Mwiuluka Yisoneko

Shina chakukukalila kwiuluka chisoneko chize wakuzanga chinji? Chisoneko chacho muchihasa kupwa chize chakukutakamisa, chakukukwasa kukumba manyonga api hanji chize wakuzanga kulianyina ni akwenu. (Samu 119:11, 111) Tala yize muyikukwasa kupwa ni kwiuluka yisoneko.

• Kalakala ni etiqueta yili ha JW Library^®. Tunga etiqueta ni chikuma ngwo, “Yisoneko yize nakuzanga” ni kutulika yisoneko yeswe yize unazange kwiuluka.

• Sako yisoneko haze muchipwa chashi muyimona. Soneka ha papilo versu yize unazange kwiuluka ni kuyisa haze muhasa muyimona. Atu amwe kakuyisa ku katalilo, akwo ku geleira. Mba eka kakukwata foto ha chisoneko chacho ni kuchisa ngwe chizulie chitangu chize chakusolola ha telefone hanji ha computador yo.

• Soneka tumapapilo. Soneka mukanda, kapitulu ni versu ya Mbimbiliya ha limwe papilo; ku sali likwo lia papilo, sonekako maliji waze ali ha versu yacho. Mba muze mutala sali limwe, eseka kwiuluka yize yili sali likwo.