Hechos
27 Maabea uaɗoɗapeɗa bʉikasiɗaa Sanedrín kĩrapeta. Maabea chi sacerdote mechibena niiba wiɗi uru koɓeesia. 28 Ãchimaa naka jarasia: “Daiba jarapeɗaaɗa waya kawabiɗaabayu jãu mukĩra trʉ̃ɗe. Mauɗe machirãba joma kawabiasiɗau joma Jerusalenɗe. Machia daidu culpa a jara kʉ̃ria panuu jãu mukĩra biusiiɗebena”. 29 Pedro mauɗe waabenarã apostolerãba a jarasiɗaa: “Daiba ũribaraaɗai Dachi Akõredu, ichi gobernante kĩra nii bẽrã ẽbẽrarã kãyabãra. 30 Chi Dachi Akõre dai naeɗeeɗa nureasiirãɗe mauba Jesús piradrubiɗa baɗa, jari machia beasiɗau bakuruɗe jiranuɗapeɗa. 31 Dachi Akõreba kuɓuɗa baɗa ichi jua biare, machi líder choroma nii kĩraka mauɗe karebabarii, chi Israel kʉ̃risia biʼiaɗayua mauɗe perdonakuayua machi pekaorã. 32 Dairãba unu panua nau joma mauɗe chi Jauri Dachi Akõre biɗa, chi Dachi Akõreba deasii chi ichi kobernante kĩraka ũribadaurãmaa”. 33 Ãchirãba nau ũrisiɗauɗe, ãrĩãdu kĩrusiɗaa ãchi bea kʉ̃riasiɗau. 34 Mauɗe nibasii aɓa fariseo chi trʉ̃ Gamaliel, leyɗebena kawabibarii basii chi puuruɗebenarãba ãrĩã respeta uniɗauɗebena, ichi piradru aka nuɓeesii chi Sanedrinɗe maabea jaraɗa baɗa ɓiɗĩika awara odoeɗayua naarã mukĩrarã. 35 Maabea jarasii waabenarãmaa: “Mukĩrarã Israelɗebenarã, kauwa kuitaa nureábaɗa machia aseɗa kʉ̃ria duanuu naarã mukĩrarã. 36 Jãmanaaɗe neesii mukĩra Teudas abadau, ichia jarabachii ichi mechibena nii, mauɗe 400 mukĩrarã ichi kaaɗe nureasii. Mauɗe, ichi beatasiɗauɗe, joma chi ichi kaaɗe nureapeɗaaɗa baɗa wãuri diɗisii jãmaburu basii joma. 37 Mauɗe ichi nibaɗakare unusiɗau Judas, aɓa galileo nii chi día jusiamaa ɓoosiiɗe ẽbẽrarã, ichia ichi kaaɗe ẽbẽrarã ãdabiasii. Cha nii mukĩra siɗa biuɗa basia, mauɗe joma ichi kaaɗe nureapeɗaaɗa siɗa wãuripeɗaaɗa basia. 38 Mau kakua, nau joma mʉa jaraburua ida duanúbaɗa naarã mukĩrarã, waurã́baɗa. Cha naka ase duanuu, jãu ẽbẽrarãɗebena nee ɓuubʉrã, akawa poyaa aseɗaabayua. 39 Maka ɓumina, Dachi Akõreɗebena nee ɓuubʉrã, maabera machia ida poyaa asebiɗaabai. Maubapeɗa chi Dachi Akõre ome peliaɗe wãɗai ɓua”. 40 Mau kakua ãchia ũrisiɗaa, chi apostolerã iuɗapeɗa, sĩɗe wãsiɗaa, ãchimaa jarasiɗaa Jesús trʉ̃ɗebena jaraɗaabayu maabea bʉekasiɗaa. 41 Ãchirã kĩrajʉʉ wãuchiɗau Sanedrín kĩrapeta, Dachi Akõreba bi’ia unu ɓoosiɗeeba ãchi sufri panasii bẽrã Jesús ʉ̃rʉbena beɗea panaɗa kakua. 42 Maabea noremaacha, apii bari noɓoowẽa, waaburu jaradea duanasia mauɗe chi beɗea biarã Cristo, Jesús ʉ̃rʉbena jaraɗapeɗa, chi temploɗe, decha biɗa.