Apocalipsis

Wẽra auɗuabarii Juanba unuɗa

17 Jua aɓa ome angelerãɗebena sãu 7 uru ɓuaɗa aɓa mʉ ɓuumaa neepeɗa mʉʉmaa naka jarasii: «Wãuríduru. Mʉʉba unubii Dachi Akõreba saka wẽra auɗuabarii trʉ̃ poa ɓuu kastikaaruu. Mau wẽra bania ãrea tãeɗe akʉ ɓuu.* 2 Nau iujãaɗebena reyrã mau wẽra ome kachirua waubachiɗau. Mauɗe mau wẽraba ichi kakuaba barikiu kachirua wauruu unubachiiɗeeba joma nau iujãaɗebenarã biɗa ara mau kĩra waubachiɗau ituaba biu panuu kĩra».

3 Ara makʉɗe Dachi Akõre Jauriɗeeba angelba mʉ drua sirua wãꞌãe ɓuuɗaa adoesii. Aria mʉʉba wẽra aɓa ãnimara kachirua ʉ̃rʉ akʉ ɓuu unusii. Puria nibasii mauɗe ichi kakuaɗe trʉ̃ ãrea Dachi Akõre ʉ̃rʉbena kachirua jaraaruu ɓʉ inibasii. Boro 7 mauɗe kachu 10 inibasii. 4 Mau wẽra paru pãaraa mauɗe puria jʉ̃ nibasii. Nee, mo doɗaa mipitaa mauɗe perla jʉ̃ nibasii. Ichi juaɗe sãu nee wauɗa uru ɓuasii. Mau sãuɗe barikia ne joma Dachi Akõreba kʉ̃riakau duanasii mauɗe mau wẽraba mia kĩra nejasia wau ɓuaɗa. 5 Ichi dauɓʉʉrʉɗe trʉ̃ aɓa ẽbẽrarãba kauwa ũriɗakau ɓʉ inibasii. Naka ɓʉ inibasii:

«Mʉ Babilonia chi puuru mechiubʉ. Mʉ wẽrarã auɗuabadaurã nawebʉ, mauɗe ne joma Dachi Akõreba nau iujãaɗe kʉ̃riakau nawebʉ».

6 Mʉʉba ichiasiiɗe kuitaasii mau wẽra ẽbẽrarã Dachi Akõreɗerã oaba itua biu ɓuasii, chi Jesusɗe ijãabadaurã mauɗe chi ichi ʉ̃rʉbena jarabadaurã beapeɗaaɗa oaba.

Mau wẽra unuɗakare kãare kʉ̃risiai adua basii. 7 Mauɗe angelba mʉʉmaa nau iɗisii: «¿Sakãe kãare kʉ̃risiai aduama? Mau wẽra ʉ̃rʉbena aɓauba kauwa ũrii ɓuu mauɗe chi ãnimara ʉ̃rʉ mau wẽra wãaruu akʉ ɓuu mʉʉba mau kauwa jarai. Mauɗe chi ãnimara boro 7 inii, mauɗe ichiba kachu 10 inii ʉ̃rʉbena biꞌia jarai. 8 Chi bichiba unuɗa ãnimara naeɗe chokae nibaɗa iɗibae wãꞌãe. Maamina ewari aɓaɗe eakarr eɗaa choɓeaɗebena ʉtaa neeruuɗe, Cristoba mau ewaricha kastikai. Nau iujãaɗebenarãba chi naeɗe nibaɗa mauɗe iɗibae wãꞌãe waya neeruu unuuduuɗe kãare kʉ̃risiaɗai adua panaɗai. Nau iujãa waui naeɗe ãchi trʉ̃ chi ewaricha chokae duanabarii kartaɗe ɓʉwẽa ɓuasii.

9 »Chi bichiba unuɗa kauwa ũrii baita chi kuitaa ãrea nibai. Chi 7 boro, 7 ea jara ɓuu. Chi wẽra auɗuabarii mau 7 ea ʉ̃rʉ akʉ ɓuu. 10 Mauɗe chi 7 boro, 7 rey jara ɓuu. Maarã 7 reyrãɗebena, jua aɓa biusiɗau. Chi maarãɗebenaba ẽbẽrarã wabiɗa ichi juaɗe ua ɓuu. Mauɗe wabiɗa maarãɗebenarã aɓa awara neewẽa ɓuu, maamina chi mau neeruuɗe ẽbẽrarã rey baarumina ãrea ɓuabai. 11 Chi ãnimara chi naeɗe nibaɗa mauɗe iɗibae wãꞌãe, mau chi jua aɓa õbea reybʉ. Mau chi 7 reyrãɗebenabʉ. Cristoba mau ewaricha kastikai.

12 »Chi bichiba unuɗa kachurã 10 panuu, 10 reyrã baɗai panuu jara ɓuu; wabiɗa reyrã baɗawẽa panuu. Maamina chi ãnimara rey baaruuɗe ãchi siɗa rey baɗai, ewari ãrea panaɗaabai ɓumina.* 13 Maarã 10 reyrã kʉ̃risia araɓauɗe panuu. Mauɗeeba chi poyaabarii chi ãnimaramaa deaɗai mauɗe ãchi puuru ichi juaɗe ɓuɗai. 14 Maabae chi maarã Oeja Kaebe Nii ome chĩoɗai. Maamina chi Oeja Kaebe Niiba chi maarã poyaakuai, ichi Jomaurã Reyrã Audeara Chi Aude Mechiu Nii mauɗe Joma Chi Mechiurã Audeara Chi Aude Mechiu Niiɗeeba. Poyaakuaɗakare chi ichiɗe ãrea ijãabadaurã ichi baara paneeɗai. Ichiba chi maarã iukuapeɗa jʉrʉ adaukuasii».

15 Maabae chi angelba naka jarasii: «Bichiba chi mau wẽra akʉ ɓuumare doorã ãrea unusii. Chi mau doorã ãrea puuru didiwaraa, beɗea didiwaraa mauɗe drua didiwaraa jara ɓuu. 16 Chi bichiba unuɗaba kachurã 10 panuurãba mauɗe chi ãnimaraba wẽra auɗuabarii kĩramaa panaɗai. Mauɗeeba chi mauba uru ɓuu joma juakaa adauɗai. Joma ewaraa ɓuɗai. Maarãba ichi kiuru koɗapeɗa maabae chi ɓeeruu baataɗai. 17 Dachi Akõreba maarã 10 reyrã sõɗe ɓusii ichiba kʉ̃ria ɓuu wauɗamera. Mauɗeeba maarãba kʉ̃risia araɓauɗe uru panaɗai mauɗe chi ãnimaraba jaraaruu joma ijãaɗai Dachi Akõreba jaraɗa makaaruuɗaa. 18 Chi bichiba unuɗa wẽra auɗuabarii puuru mechiu jara ɓuu. Mau puuruɗebena reyba drua jomaɗebena reyrã ichi juaɗe ua ɓuu».