3 Juan
Ãba Gayoba biꞌia wauɗa
1 Mʉ Chõrabʉ.* Mʉʉba nau karta ɓʉʉruu mʉ ãba Gayo baita. Mʉʉba bichi biawãra kʉ̃ria ɓuu. 2 Ãba, mʉʉba Dachi Akõremaa ʉtaa iɗi ɓuu bichi ichi ome biꞌia ɓuuɗeeba ne jomaɗe biꞌia ɓuamera mauɗe kakua biꞌia ɓuamera. 3 Mʉ ãrea kĩrajʉʉsii, waabenarã ãbarã mʉʉmaa neepeɗaaɗaba nebʉrʉsiɗauɗeeba bichiba chi biawãra beɗea ijãa ɓuu. 4 Mʉ ãbarãba chi biawãra beɗea ijãa panuu ũriiruuɗe, mʉ ãrea kĩrajʉʉ ɓuabarii. *
5 Ãba, bichiba ãbarã aiɗa ɓuuɗeeba biꞌia wau ɓuu. Chi bichiba unukau ãbarã siɗa aiɗabariiɗeeba biawãra ãrea biꞌia wau ɓuu. 6 Ãbarã araa ãbua imisiɗauɗe, jomaurã daaɗe maarãba bichi kʉ̃ria panuu ʉ̃rʉbena nebʉrʉsiɗau. Mʉ kĩra chuburiáse, ãchi aiɗase biꞌia wãɗamera Dachi Akõreba ichi traju waubadaurã aiɗabiabarii kĩra. 7 Ãchiba Jesucristo ʉ̃rʉbena jaradeaɗe wãsiɗauɗe, chi Dachi Akõreɗe ijãaɗakaurãɗebena ne adauɗaabasii. * 8 Mauɗeeba dachiba mau ãbarã biꞌia aiɗaɗai panuu. Maka ãchi ome ãbua traja panuu chi biawãra beɗea kuitaabiaɗai baita.
Ãba Diotrefesba kachirua wauɗa
9 Mʉʉba naeɗe karta ɓʉsii joma ãbarã mamabena baita. Maamina Diotrefesba dai beɗea ijãawẽa nii. Ichi ãbarã tãeɗe chi mechiu nibai kʉ̃ria ɓuu. 10 Mauɗeeba mamaa wãaruuɗe mʉʉba jomaurãmaa kuitaabiai ichiba kachirua wau ɓuu. Ichiba dai ʉ̃rʉbena setaa kachirua jarabarii. Mau awara chi ãbarã mamaa wãaduu ichiba biꞌia irsibiabikau mauɗe chi ãbarãba ãchi deɗe biꞌia irsibi kʉ̃ria panuuɗe ida ɓukau. Maarã biꞌia irsibiiduubʉrã mau ãbarã duabʉikabarii.
Ãba Demetrio ʉ̃rʉbena biꞌia ɓʉɗa
11 Ãba, chi kachirua waubadau kĩra waurã́se maumaarã biꞌia wause. Chi biꞌia waubarii Dachi Akõreɗebʉ, maamina chi kachirua waubariiba Dachi Akõre adua ɓuu.
12 Ãba Demetrio ʉ̃rʉbena jomaurãba biꞌia berrea panuu. Chi biawãra beɗea ijãa ɓuuɗeeba unubia ɓuu ichi jipa nii. Dai biɗa ichi ʉ̃rʉbena biꞌia kʉ̃risia panuu. Machiba kuitaa panuu daiba jara panuu biawãrabʉ.
Juanba nau kartaɗe aanama ɓʉɗa
13 Mʉʉba ne ãrea bichimaa jara kʉ̃ria ɓumina kartaɗe ɓʉwẽma. 14 Isa bichi ichiaɗe wã kʉ̃ria ɓuu. Maabae ãbua berreaɗai. 15 Mʉʉba kʉ̃ria ɓuu Dachi Akõreba ichi jirukaraayuwãe ɓuabii. Chi namabena ãbarãba kʉ̃ria panuu bichi biꞌia ɓuai. Jãmabena ãbarãmaa ãchi kakawaa jarakuase mʉʉba kʉ̃ria ɓuu ãchi biꞌia duanaɗai.