Judas
Nau kartaɗe Judasba naa ɓʉɗa
1 Mʉ Judasbʉ, Santiago ãba mauɗe Jesucristo baita bari trajabarii.* Nau karta ɓʉmaa ɓuu joma Dachi Akõre bajãaɗebenaba iukuaɗa baita. Ichiba machi kʉ̃riakuabarii mauɗe Jesucristoɗeeba nu ua ɓuabarii. 2 Mʉʉba kʉ̃ria ɓuu ichiba machi ãrea kĩra chuburia ɓuai, ãrea jirukaraayuwãe duanubiai, mauɗe machi ãrea kʉ̃ria ɓuai.
Setaa jaradeabadaurã
3 Ãbarã, mʉʉba nau kartaɗe Dachi Akõreba dachi karibaɗa ʉ̃rʉbena ɓʉ kʉ̃ria ɓuasii. Maamina mʉ baita, bibuara ɓuu jãabae ɓʉi kauwa panaɗamera. Chi machiba ijãa panuu aɓaumaa ida ãyaa jaradeabirã́sturu. Dachi Akõreba chi biawãra beɗea ichi ẽbẽrarãmaa ɓes aɓaburu deasii. Diware deakau. 4 Maka ɓʉ ɓuu june ãbarã kĩra nuree machi tãeɗe duanuuɗeeba. Maarã ẽbẽrarãba setaa jaradeabadau Dachi Akõreba ichi sõbiaɗeeba dachi karibakuasiiɗeeba dachi kakuaba kachirua wau kʉ̃ria ɓuu poyaa wauɗai panuu. Maarãba Dachi Mechiu aɓa nii Jesucristo ida ɓubadau. Eskareeɗeeɗe ɓʉ kuɓuu Dachi Akõreba ãchi kastikai ʉ̃rʉbena.
5 Mau joma kuitaa panumina mʉʉba kĩrababiai Dachi Mechiuba ichi puuru Egiptoɗebena karibasii. Maamina karibasiiɗe chi ichiɗe ijãapeɗaaɗawãe nuree baribasii. 6 Mauɗe kĩrabásturu chi nuree angelerã Dachi Akõreba duanuɗa kĩra paneeɗaabasii. Maumaarã chi panaɗamaa ida ɓusiɗau. Mauɗeeba Dachi Akõreba choɓea pãriuɗe jʉ̃akuasii ewaricha paneeɗamera chi ichiba kastikai ewariɗaa. 7 Ara mau kĩra Dachi Akõreba Sodomaɗebena, Gomorraɗebena mauɗe chi puururã ara kaitaɗebena kastikasii. Maarãba mianejasia waubachiɗau. Dachi kakuaba barikiu kachirua wauɗaabai panuu, ãchiba waubachiɗau. Mauɗeeba Dachi Akõreba maarã ewaricha tʉbʉchia kiikauɗe biꞌiwãe panabiai. Mauba dachimaa kuitaabia ɓuu Dachi Akõreba chi kachirua joma maka kastikabarii.
8 Chi machi tãeɗe neepeɗaaɗa maarã ẽbẽrarã kĩra nuree. Maarãba chi kamokaraaduu ijãabadau. Chi kakuaba waubi kʉ̃ria ɓuu waubadau, Dachi Mechiu ida ɓubadau, mauɗe chi bajãaɗebenarã ʉ̃rʉbena kachirua jarabadau.* 9 Maamina chi ángel aude mechiu nii Miguel abadauba maka wauka basii. Moisés biusiiɗe Miguel chi mau kakua ʉ̃rʉbena jʉbawãe nii ome chi kai juaɗe ɓeei ʉ̃rʉbena kĩru berreasiɗau. Maamina jʉbawãe niimaa kachirua jarai kʉ̃risiabasii, maumaarã jarasii: «Dachi Mechiuba bichi kastikai». 10 Maamina chi maarã ẽbẽrarã machi tãeɗe neepeɗaaɗaba, ãchiba adua panuu ʉ̃rʉbena kachirua berreabadau. Ãnimararãba kʉ̃risiabadau kĩra kʉ̃risiabadau mauɗe chi kakuaba waubi kʉ̃ria ɓuu kĩráburu waubadau. Mauɗeeba Dachi Akõreba kastikakuai.
11 ¡Miichuburi chi kachiruaɗe nuree! Ãchiba Cainba wauɗa kĩra waubadau. Chi nejarra kʉ̃riabadauɗeeba, kachirua wau nibabadau, Balaanba wauɗa kĩra. Coreba Moisés ida ɓuɗa kĩra, Dachi Akõre ida ɓusiɗauɗeeba, kastikakuai. 12 Machi ãbua neeɗapeɗa kʉ̃riaɗeeba kĩrajʉʉ komaa panuuɗe ãchi wapeaɗawẽa machi baara kobadau. Maka machiba wau panuu maarãba kachiruabiabadau. Ara ãchiɗéburu kʉ̃risiabadau. Maarã jʉ̃rʉara pũatuba adoebarii kĩra nuree. Pũaturãba jʉ̃rʉara ãyaa adoeruuɗe kui chekau. Ara mau kĩra ãchiba jaradeaduuba aiɗakau. Bakuru ɓes ome biuɗa kĩra nuree, chi chaui ewariɗe chi netaa deakauɗeeba mauɗe chi karraɗeeɗe ẽesiiɗeeba. 13 Marɗebena ʉ̃rape meserãa kĩra nuree. Marba ichi ʉ̃rapeɗebena kõpepeabibarii kĩra, naarãba ne barikia nejasia waubadau. O kachiruaɗe wãaduuɗeeba, pusterrea aoko barikiuɗe wãaruu kĩra nuree. Dachi Akõreba choɓea pãriu kuɓusii ewaricha kastikakuai baita.
14 Enocba maarã ʉ̃rʉbena berreasii. (Adanɗebena aɓa Enocɗaa ẽbẽrarã imipeɗaaɗarã 7 panasiɗau). Enocba Dachi Mechiu baita naka berreasii: «¡Ũrísturu! Dachi Mechiu ichiɗirã ãrea baara neei joma kastikakuai baita. Mauɗe joma ichi kʉ̃riaɗakaurã kastikakuai. Maka waui kachirua wausiɗauɗeeba Ichi kʉ̃riaɗaabasiiɗeeba, mauɗe Ichi ʉ̃rʉbena kachirua ãrea berreasiɗauɗeeba». 15 —. 16 Maarãba ne barikia kakua ãi berreabadau, mauɗe waabenarã ʉ̃rʉbena ne barikia beɗea waubadau. Ara ãchiba kʉ̃ria panúturu jʉrʉbadau. Chi aude mechiurã kĩra berreabadau. Waabenarãmaa kũraabadau ãchiba kʉ̃ria panuu adauɗai baita.
Chi ãbarãba kãare wauɗai panuu
17 Maamina ãbarã, chi Dachi Mechiu Jesucristoba bʉiɗarãba jarapeɗaaɗa kĩrabásturu. 18 Machimaa naka jarasiɗau: «Kaaɗearebena ewariɗe baraai ẽbẽrarãba Dachi Akõremaa atua jarabadaurã mauɗe ãchi kakuaba waubii kʉ̃ria ɓuu wau panabadaurã».19 Maarãba ãbarãmaa ãchi kakawaa kʉ̃risia panabiabadau, ãchiba kʉ̃riaduu ne barikia waubadau, mauɗe Dachi Akõre Jauri wãꞌãe nuree.
20 Maamina ãbarã, machicha aiɗásturu Cristoɗe ãrea ijãaɗamera. Dachi Akõremaa ichi Jauriɗeeba ʉtaa iɗísturu. 21 Dachi Akõre kʉ̃riaɗeeba nibásturu. Dachi Mechiu Jesucristoba kĩra chuburia ɓuuɗeeba ewaricha chokae nibabiaɗai eseɗau panásturu.
22 Chi ãbarã ãrea ijãawẽa nuree kĩra chuburiásturu. 23 Chi tʉbʉchia kiikauɗaa wãaduu karibásturu. Waabenarã kĩra chuburiásturu, maamina kauwa panásturu. Maarãba kachirua waubadau ida ɓústuru.
Judasba Dachi Akõremaa biꞌia berreaɗa
24 Dachi Akõreba machi poyaa nu ua ɓuai ɓuu kachiruaɗe ɓaerãaɗamera. Ichi kĩrawãrea daaɗe kachiruaswãe poyaa biꞌia ɓui. Aria machi kĩrajʉʉ panaɗai. 25 Dachi Akõre aɓaburu nii. Ichi dachi karibabariibʉ. Ichi chi aude Mechiu nii, mauɗe joma poyaa waui ɓuu. Jomaurã chibaribʉ. Nabẽraeɗeeɗebena maka nii. Iɗibae biɗa maka nii, mauɗe maka ɓuai. Dachi Akõremaa biꞌia berreaɗai panuu Dachi Mechiu Jesucristoɗeeba. ¡Biꞌia ɓuu maka ɓuai!