¿Sakayua bichi aude Bibliaɗebena kawaiba?

1. ¿Sakayua ariɗe ɓua bichi aude Bibliaɗebena kawai?

Iɗiɗaa, bichia nau poyetoɗe chi ara ɓãarã kawaɓuu Biblia ʉ̃rʉbenaba bichia Jeowa aude kʉ̃riabiɓua. Maamina aude nesitaɓua bichia chi ichi kʉ̃rianii waribii baita (1 Pedro 2:2). Bichi Jeowa jʉ̃kaa ara kaitaɓuubʉrã mauɗe Bibliaɗebena kawamaaɓuubʉrã waa biuwẽa nibaɗe wãyua. Juan 17:3; Judas 21 leas.

Bichi pe aude chaarea nibabiyua Dachi Akõre ʉ̃rʉbena aude kawayua, makaburu ichia kʉ̃riaɓuu asei (Hebreos 11:1, 6). Peba chi dachia naeɗe ne kachirua asepeɗaaɗabaɗa jãuba waya aseyu baɗa asebiwẽa. Hechos 3:19 leas.

2. ¿Saka bichia wabenarã ũkuru aiɗai ɓua?

Jomaurãba kosarã biʼia ɓee wabenarãmaa jaraɗai bustabadaa, mauɗeeba bichia biɗa chi bichia kawaɗabaɗa wabenarãmaa jarai ɓua. Bichia bikãa kawakãrii chi Bibliaɗebena mambea jamabena kawaɗabaɗa wabenarãmaa Jeowa ʉ̃rʉbena jaradeai ɓua. Mauɗe ichi kãare beɗea kĩrawãrea barau ʉ̃rʉbena siɗa joma ẽbẽrarã baita. Romanos 10:13-15 leas.

Bichia deɗabena bichi amikorã baare Jeowa ʉ̃rʉbena beɗeakoɓei ɓuma. Maamina ẽbẽra bianibapeɗa mauɗe respeto unubipeɗa. Chi ãchia ijãabadau atua jarawẽa, bari jaradeɗekas Dachi Akõre ʉ̃rʉbena mauɗe ichia kãare asekʉ̃riaɓuu dachi ẽbẽrarã ome. Chi bichia aseburuu wabenarã baita ariɗe ɓua bichi beɗeaɗeebiɗa. 2 Timoteo 2:24, 25 leas.

3. ¿Bichi Bibliaɗebena kawaɗakare saka ɓei ɓua Dachi Akõre ome?

Biblia ʉ̃rʉbena kawakoɓeeruuɗe bichi pe aude waribii ɓua. Mauɗe Jeowa jʉ̃kaa ara kaita ɓei ɓuu. Mauɗe Jeowa deɗabena baare eɗaa akuɓei kĩraɓua. 2 Corintios 6:18 leas.

4. ¿Saka aude kawai ɓua?

Bibliaɗebena kawai baɗa ida ɓuirãaba (Hebreos 5:13, 14). Wiɗis Jeowa ɗebena jaranũrẽabariimaa bichimaa semanacha Bibliaɗebena jaradeayua mauɗe chi libro ¿Qué nos enseña la Biblia? ome. Bichia aude kawarã, aude kĩrajʉʉ nibaɗe wãi. Salmo 1:1-3; 73:27, 28 leas.

Akordaba beɗea kĩrawãrea Bibliaɗe eɗaɓee Jeowaɗeeburu eɗa baraa, ichi Dachi Akõre kĩrajʉʉ bẽrã, chi Dachi Akõre baita kĩrajipa trajanuree ome meraaniibʉrã bichi siɗa ichi kaita nibaɗe wãyua (Hebreos 10:24, 25). Mauɗe, kʉ̃riaɗeeba bichia chi Jeowaba kʉ̃riaɓuu aseɓuubʉrã waa biuwẽa nibaɗe wãyua. Mauɗeeba chi bichia ariɗe asei bʉrã Dachi Akõre jʉ̃kaa ara kaita nibaɗe wãi. 1 Timoteo 1:11; 6:19 leas.