Jesús kĩra nureaɗaika

KĨRA CHUBURIA NUREAƊAYUA

Jesús pekaoswẽa nibasii bẽrã, dachi ẽbẽrarã problema nuree kĩraka nibaabasia mauɗe preocupaabasia. Makasmina, ichia ẽbẽrarã kʉ̃ria ãrĩã nibasia mauɗe ãrĩã aiɗayudu kʉ̃risiabachia. Ãchirã kakua ãrĩãdu aseɗa basia. Ichia ẽbẽra ãrĩã chuburiasii bẽrã waabenarã aiɗabachia. Ochiaɗai ɓuu saka ase nibaɗa chi capitulorãɗe 32, 37, 57 mauɗe 99 baara.

ẼBẼRARÃ DACHIMAA NEEBIƊAIKA

Joma ẽbẽrarã, chõra ɓee, kũudrãa keɗee, Jesusmaa neeɗa kʉ̃ria nureasia, chi Jesús ẽbẽra juakaya nii kĩra nibaabasia bari ichia ẽbẽrarã baaraburu niba kʉ̃riaɗaa. Ẽbẽrarãba unusiɗauɗe Jesusba kʉ̃ria ua nibasii, ãchirã siɗa ichi baara nurea kʉ̃riasiɗaa. Kawaɗaika, saka Jesusba ẽbẽrarã ichi jʉ̃kaa neebi ɓoosiiɗebena chi capitulorãɗe 25, 27 mauɗe 95 baara.

KAPICHIA ɄTAA WIƊIƊAYUA

Jesusba ara jãka wiɗisia ichi corazonɗeeba, du aɓa aka ɓuuɗe mauɗe junebenarã ẽbẽrarã Dachi Akõre baita traja nuree ome biɗa. Ãrĩãdu wiɗi nibasii chi chiko koi naeɗe. Maubapeɗa ʉtaa wiɗisia ara kiruma jarai baita mauɗe mipitaa beɗea jarasia ichi Akõremaa, ichi aiɗai baita wiɗisii ichia asei naeɗe. Kawaɗaika kãare pasaɗa baɗa chi capitulorãɗe 24, 34, 91, 122 mauɗe 123 baara.

AIƊAƊAIKA JUNEBENARÃ SIƊA

Ɓesɗe, Jesús apii aka ɓooi kʉ̃riabachii, sĩu noɓooyua, maka ɓumina ichi jãka aseebasii junebenarã aiɗayua. Ichi ẽbẽra kachirua nibaabasia. Jesusba dachimaa jãu ejemplo deasia ara jãka ichi kĩra nureayua. Ochiaɗaika saka ichi jãka nibasii chi capitulorãɗe 19, 41 mauɗe 52 baara.

PERDONADUAƊAIKA JUNEBENARÃ SIƊA

Jesusba kawabiaɗa saka perdona nibayu junebenarã siɗa, mauɗe ichia biɗa jãu ejemplo deaɗa basia, ichia jãka asesiiɗe ichi discipulorã mauɗe june ẽbẽrarã ome biɗa. Ochiaɗaika saka ichi jãka nibasii chi capitulorãɗe 26, 40, 64, 85 mauɗe 131 baara.

TRAJADUAƊAIKA DACHI AKÕRE BAITA JOMA DACHI CORAZONƊEEBA

Chi profeciaɗebenarãba jarapeɗaaɗaa kabanaa chi judioɗebenarãba ijãaɗaabai basii Jesusɗe, mauɗe ichi iadaa nureerãba beaɗai basii. Makarã Jesús ɓiɗĩikaburu trajai ɓoosii Dachi Akõre baita. Maka ɓumina ichi ãrĩãdu aseyu kʉ̃risiaɗa basia trajayua Dachi Akõre baita. Jomaurã baita kuɓusii ejemplo ichi kĩraka nibaɗayua waabenarãba dachi ũri kʉ̃riaɗawẽeɗe maebʉrã jaradeabiɗawẽeɗe Jeowa ʉ̃rʉbena. Kʉ̃risiaɗaika chi jaradea kuɓuu chi capitulorãɗe 16, 72 mauɗe 103 baara.

ẼBẼRA BARIKIA NUREAƊAYU

Jesusdu mechibena nibasia ẽbẽrarã aude, ichi kawa ãrĩã nibasia junebenarã aude. Ichi pekaoswẽa niiɗeeba ichi kakua chi kʉ̃ris siɗa chaarea ãrĩã nibasia. Maka ɓumina, ẽbẽra barikia nibasia mauɗe waabenarã siɗa aiɗasia. Nauɗebena kawaɗayua chi capitulorãɗe 10, 62, 66, 94 mauɗe 116.

BIKÃA KÃRIBAƊAIKA

Chi apostolerã mauɗe junebena ẽbẽrarãba Jesusba asesii kĩraka aseɗakabachiɗauɗe Jesusba kawabiaɗa kĩra, ichi kĩruubasii. Ichia bari mauchaburu jaradeɗekasii ãchia nesita kopanuu Jeowa kaita nureaɗayua. Jesús biʼbikãa kãribasiiɗebena kawaɗai ɓua chi capitulorãɗe 74, 98, 118 mauɗe 135.