Kʉ̃risiábaɗa Lot wẽra sakaɗa baɗa

Lot ichi tío Abrahán baara Canaanɗe nibapeɗaaɗa. Ãchi ãnimara ãrĩã bara nibaɗe wãsiɗauɗeeba chi iujãaɗe poyaa omea paneeɗaabasii. Jãuɗeeba, Abrahanba naka jaraɗa Lotmaa: “Jãabae dachi ara aɓa ɓuu iujãaɗe nibaɗaabai ɓuu. Mauɗeeba, jaraba bichi sama wã kʉ̃ria ɓuu, mauɗe mʉ siɗa drua junebenaɗaa wãyua”. ¿Bʉa sakaiba Abrahanba biʼia jarasaaka maka jarasiiba?

Lotba ochiasii drua mipitaa Sodoma puuru kaita, mama bania ãrĩã bara ɓoopeɗa mauɗe sirua ãrĩã siɗa. Mauɗeeba Lot mau druaɗaa wãsii ichi deɗabenarã baara.

Chi ẽbẽra chi puuru Sodomaɗebena mauɗe ẽbẽra puuru ara kaita koɓee Gomorra abadauɗebena, kachirua ãrĩã nureaɗa baɗa, mauɗeeba Jeowaba kenatai aɗa baɗa. Maamina, Dachi Akõreba kʉ̃ria ɓoosii Lot ichi deɗabenarã baara biuɗawẽe bayua, mauɗeeba bʉekaɗa baɗa angelerã ome naka jaraɗayua: “¡Wã́baɗa nau puuruɗebena! ¡Jeowaba joma chi puuru kenataburua asii! ¡Isa wãstu!”.

Maka ɓumina Lot isa wãabasii, ãrĩã́turu demora koɓeeɗa. Mauɗéburu chi angelerãba Lot, ichi wẽra mauɗe ichi kaurã baara juaɗe jidau adauɗapeɗa, isa pira uaɗoɗa baɗa. Mauɗe jarapeɗaaɗa: “¡Piradrústuru! ¡Isa pira wãɗayua, maabae akarrnaa ochiarã́baɗa! Akarrnaa ochiabudaubʉrã, machi biuɗayua”.

Mau puuru Zoarɗaa neesiɗauɗe, Jeowaba chi puuru Sodoma mauɗe Gomorra ʉ̃rʉ, ʉtʉʉba urua ɓaebisii kue cheburuu kĩra. Jãarã puuru ome akawa baa kenasii. Maka ɓumina, Lot wẽraba ũriwẽe basiiɗeeba ichi apii akʉ noɓeepeɗa mo kĩra tãɗebena ba wãsii. Lot ichi kaurã baara chokae paneesii Jeowa ũrisiɗauɗeeba. Maka ɓumina, ãchi ãrĩã nomaa paneesii Lot wẽraba Jeowa ũriwẽe basiiɗeeba.