Josué mauɗe Gabaonɗebenarã ome

Chi ẽbẽrarã junebena puuru Canaanɗebenarãba kawapeɗaaɗa Jericoɗe pasaɗa baɗa. Chi reyrã jãu puuruɗebenarã ãbua wãuchiɗau israelitarã ome chĩoyua. Chi ẽbẽrarã Gabaonɗebenarãba diwara kʉ̃risiapeɗaaɗa aseɗai baita. Ãchia paru chi sore ɓee jʉ̃siɗau, maabea Josuemaa wãɗapeɗa naka jarasiɗau: “Dai iujãa kaitawẽe ãrĩã ɓuuɗebena neesiɗau. Daiba ũripeɗaaɗa Jeowaba joma machi baita aseɗa baɗa Egiptoɗe mauɗe Moabɗe biɗa. Machia daimaa jarabudaubʉrã dai ome chĩoɗaabai, makarã dai machi baita bari trajaɗayua”.

Josueba kʉ̃risiaɗa ãchia jarasiɗau ariɗe ɓoosii mauɗe ãchi ome chĩoɗaabayu aɗa baɗa. Õbea día baɗakare, Josueba kawasii ãchirã kaitawẽa panakabachii, ãchi Canaanɗeburu duanaɗa baɗa. Mauɗeeba, Josueba wiɗisii Gabaonɗebenarãmaa: “¿Sakayua machia setaa jarasiɗama?”. Ãchia panausiɗau: “Dai ãrĩã perasiɗauɗeeba. Daiba kuitaa panuu machi Dios Jeowa machi kakua chĩobarii. Muchuburia dai bearã́baɗa”. Josueba maka aseɗa baɗa mauɗeeba beakuabasia.

Maaɗakare, cinco rey Canaanɗebenarã soldaorã baarauba chi Gabaonɗebenarãmaa jarasiɗau ãchi ome chĩoɗai apeɗaaɗa. Josué ichi soldaorã baara joma ẽsebuɗe tʉapeɗaaɗa chi Gabaonɗebenarã karebaɗayua. Ãchi ewariburuuɗe chĩo kopaneesiɗau. Chi ẽbẽrarã Canaanɗebenarã chi o kuɓuuɗe aɓaaɓaa miru kopaneesiɗau, mauɗe ʉtareeba Jeowaba ãchi ʉ̃rʉ chi hielo mechia ɓaebisii. Mauɗe Josueba Jeowamaa wiɗisii chi ʉmada apii koɓeebiyua. Naeɗera chi ʉmada jãka apii koɓeekau basii. ¿Sakayua Josueba Jeowamaa jãka wiɗisaa? Josueba Jeowaɗe ãrĩã ijãa nibaɗa bẽrã. Chi ʉmada eɗaa ɓaewẽa, apii koɓeesii. Jãu diaɗe pãrikua koɓeebasii, aɓa chi israelitarãba rey Canaanɗebena ãchi soldaorã baare beakuasiɗauɗaa.