Chi rey naa nibasii Israelɗebena

Jeowaba israelitarãmaa juez nureerã deasii ãchi ua nibaɗai baita, maka ɓumina, ãchia reydu bara kʉ̃ria panasii. Mauɗeeba, Samuelmaa jarapeɗaaɗa: “Jomaurã puuru rey bara duanuu, dai biɗa aɓa unibaɗai kʉ̃ria panua”. Samuel baita jãu biʼiwãe ɓoosii. Mauɗeeba, Jeowamaa wiɗiɗa baɗa, mauɗe ichia naka panausia: “Bichi ɓuiɗawẽeɗe, bari mʉ́turu ɓui panua. Jaraba ãchia rey aɓa unibaɗai ɓuma, maka ɓumina, jãu reyba ãchimaa ãrĩã́turu asebiyua”. Chi ẽbẽrarãba, ara makaburu jara duanasii: “¡Makawãema! ¡Daiba rey kʉ̃ria panuma!”.

Mauɗeeba, Jeowaba Samuelmaa jarasii, mukĩra chi trʉ̃ Saúl mau chi nabena rey bayua. Saulba Samuel ochiaɗe wãsiiɗe puuru Ramá abadauɗe, Samuelba aceite Saúl boro ʉ̃rʉ ea bʉesii, unubiyua ichi chi rey bayu.

Maaɗakare, Samuelba chi israelitarã chibʉrʉbiɗa baɗa chi rey unubiyua. Maka ɓumina, Saúl unuɗaabasii. ¿Mau sakayua basaa? Ichi miru koɓoosiiɗeeba. Ichi unusiɗauɗe, ara mauɗe awara odoepeɗaaɗa, maabae ẽbẽrarã tãeɗe ɓari nuɓusiɗau. Waabenarã aude ichidu deseroa nibapeɗa kĩrawãrea nibasii. Samuelba jarasia: “Ochiábaɗa chi Jeowaba jʉrʉɗa baɗa”. Chi ẽbẽrarãba chi rey unusiɗauɗe ãrĩã kĩrajʉʉsiɗau.

Naeɗeeɗa, Saulba Samuel ũripeɗa mauɗe Jeowa siɗa ũribachia. Maaɗakare ũri kʉ̃riabasii. Ɓes aɓa ɓuuɗe, Samuelba Saulmaa jaraɗa baɗa ichi esperábaɗa asii ãnimara Jeowamaa baa deai baita. Chi reyba poyaa ãnimara beapeɗa baa bʉebai basii. Maamina, Samuel neei baita ãrĩã demorasiiɗeeba Saulba ãnimara beapeɗa baa bʉesii Jeowa baita. ¿Kãare asesaa Samuelba? Ichia Saulmaa naka jarasii: “Bichia Jeowa ũri nibai basii, maka ɓumina ũriibaɗa”. ¿Saulba kawasaaka Jeowa ũri nibai baita?

Maaɗakare, Saúl chĩoɗe wãsii amalequitarã ome, mauɗe Samuelba jarasii joma kenakuábaɗe aɗa baɗa. Maka ɓumina Saulba chi rey Agag beabasii. Jeowaba Samuelmaa naka jarasii: “Saulba mʉ ɓuisii, jãabaera mʉ ũriwẽe”. Samuel ãrĩã nomaa koɓeesia, maabae Saulmaa naka asii: “Jeowaba junebena rey jʉrʉburuu bichia ichi jãabaera ũriwẽeɗeeba”. Samuel akarrnaa tʉasiiɗe jãmabena wãyua, Saulba ichi paru iikaa jidausii maabae kõetasii. Samuelba Saulmaa jarasii: “Cha nau paru kõetasii kĩra Jeowaba jãabaera bichi rey babiwẽe”. Jeowaba junebena rey jʉrʉsii ichi kʉ̃riapeɗa ũri nibabarii.