Karta Chi Juntaɗe

Ãba chekerã:

Dachirãba Dachi Akõre mauɗe ẽbẽrarã kʉ̃ria panuu bẽrã, asebadaa chi Bibliaba jara kuɓuu: “Jomaurã ẽbẽrarã puuruɗebenarãmaa machia jaradeaɗe wã́sturu, mʉ kaaɗe duanabii baita. Bautizabikuásturu” (Mat. 28:19, 20; Mar. 12:28-31). Dachia ẽbẽrarã biawãra kʉ̃ria niɗaubʉrã, chi Dachi Akõre “jʉrʉbadau” corazonmaa neeɗai ɓua (Heb. 11:6).

Naeɗera dachi kʉ̃risiaɗeburu adaubachiɗau chi ẽbẽrarãmaa kãare jaraɗayu mauɗe berekabachiɗau kartarã ẽbẽrarã juamaa deaɗayu. Jãabera nesita panua aude biʼiaburu beɗeaɗayu ẽbẽrarã ome. Dachia ãchi kʉ̃ria nii unubi panua beɗeabudaubʉrã ãchia beɗeabi kʉ̃ria panúturu. Jomaurã ẽbẽra aɓau nureewẽma, aɓaaɓaa diwara nurea, mauɗeeburu ara aɓa ɓúturu beɗeaɗakau jomaurãmaa, kuitaaɗayua kãareɗebena beɗea kʉ̃ria kuɓuu mauɗe ara nauɗe kãareba preocupa kuɓua, ara jãuɗebena beɗeaɗayua. ¡Cha nau karta wau ɓua jãu baitaburu!

Cha ɓuu folleto 12 lecciona bara ɓua, jãuɗe beɗea kuɓuu saka ẽbẽramaa unubiyua ãchi kʉ̃ria nuree mauɗe saka biʼiaburu kawabiɗayu. Chi leccioncha chi Bibliaɗebena nebʉrʉ kuɓuu Jesusɗe mauɗe ẽbẽrarã siglo naeɗebenaɗe beɗea ɓea, ãchi kãare asepeɗaaɗa biʼia kawabiɗayua. Iɗibeara nesitaɗawẽa kʉ̃risiaɗe ira koɓooyu kãare beɗeayuɗebena, jãabera unubi kʉ̃ria panuu kʉ̃ria nii chi ẽbẽrarã. Joma cha eɗa jara kuɓuu nesita kopanuu Bibliaɗebena jaradeɗekai baita, maka ɓumina chi ɓee nesita panuu beɗea erdauɗayua, waya beɗeaɗe wãɗayua maebʉrã ẽbẽramaa semanacha jaradeayua.

Chi leccioncha kawaaruuɗe, kauwa kʉ̃risiaba saka ara chi ɓʉ kuɓuu kĩraka aseyu jaradeayua chi ẽbẽra bichi niimare. Jeowa kʉ̃riapeɗa mauɗe ẽbẽrarã siɗa kʉ̃riaburuu, jã́turu aude importante ɓuu, boroɗe kʉ̃risiaɗa beɗeai baɗa kãyabãra. Mauɗeeba berekaba Jeowa mauɗe ẽbẽrarã siɗa aude kʉ̃ria nibai baita. Makaburu bichia aude ẽbẽrarã Jesús kaaɗe tʉabiyua.

Ãbua machi baara Jeowa baita traja nibayu, jãu biʼia ãrĩã ɓua (Sof. 3:9). ¡Jeowaba machi ãrĩã aiɗayua jãka bereka waabenarãmaa kʉ̃riaɗeeba jaradea panuu bẽrã!