¿Jeowa ɗebena Jaranũrẽrã chi Biblia inuree ãyaa ɓea junebenaɗeebiɗa?
Chi Jeowa ɗebena Jaranũrẽrã Biblia diwara ɓee ome kawapeɗaaɗa baɗa. Maka ɓumina, chi aude busta nuree naubʉ chi Traducción del Nuevo Mundo, mau chi beɗea ãrĩãdu ãyaa ɓeeɗebena ɓuuɗeeba, chi Dachi Akõre trʉ̃du bara ɓuuɗeeba mauɗe biʼia chi ariɗe ɓuu kawabi ɓuuɗeeba.
Chi Dachi Akõre trʉ̃ jara ɓuu. Chi Biblia imprimi nureerã maarãmaa biʼiwẽa ɓuu chi Dachi Akõre trʉ̃ jaraɗai baita. Ara jari Bibliaɗebena tradusiɗa baɗaba jara ɓuu chi trʉ̃ 70 ẽbẽrarãɗebenadu ãchi trajasiɗau ɓʉɗayua chi Biblia, maamina naarã Bibliaɗe eɗa kuɓuwẽe chi trʉ̃ra chi naa ɓʉpeɗaaɗa baɗaba: Jeowa.
Makarã, chi Traducción del Nuevo Mundo, mauba ɓuisii chi Dachi Akõre trʉ̃ nau Bibliaɗe eɗa ara jãka ɓoosiiɗeeba chi copiarã naeɗeeɗabenarã, mauɗe nau Bibliaba jarawẽa ɓuu kairã trajapeɗaaɗa baɗa tradusiɗayua.
Chi ariɗeburu ɓuu jara ɓuu. Baraa chi nuree Bibliarãɗe ariɗe jarawẽa ɓuu mau chi Dachi Akõreba kʉ̃ria ɓuu kĩra. Aɓa Biblia tradusiɗa baɗaba Mateo 7:13ɗe naka jara ɓua: “Wã́sturu chi poroa pĩsua ɓuuɗe, mau chi o ĩpiernoɗaa odoe ɓuuɗebena, mau jõparrea ɓoapeɗa mechibena ɓuu”. Maka ɓumina chi naeɗe ɓʉsii “ĩpierno” jarawẽa ɓua, bari “akawa ɓoduataiɗebenaburu” a ɓua. Mau chi jãuɗebena tradusibadaurãba jara panuu chi ẽbẽra kachiruarã joma ĩpiernoɗaa wãuribadau. Maka ɓumina Bibliabara mau jaradeawẽa. Mauɗéburu, chi Traducción del Nuevo Mundo jãuba jara ɓuura “akawa ɓoduataiɗebena” a ɓua, ara jãka chi jari naeɗe ɓʉpeɗaaɗa kĩraka.
Dachi baita chaareawẽe ãrĩã kawayu ɓuu. Mauɗéburu chi Biblia biʼia ɓʉba chi wãrabenadu jara ɓua maabea dachimaa chaareawẽe kawayu ɓua. Ochiaɗaika aɓa versículo Bibliaɗebena. Chi Biblia aria Mateo 5:3ɗebenaba naka jara ɓuu: “Kĩrajʉʉ nureabadaa chi poore kirureerã jauriɗe”. Cha nau beɗea ãrĩã chaarea ɓuu kawai baita ẽbẽrarãba. Mauɗe chi Traducción del Nuevo Mundo jãuba naka jara ɓua: “Chi kuitaa duanuu ãchia nesita panuu kawaɗai Dachi Akõre ʉ̃rʉbena kĩrajʉʉ nurea”.
Chi Traducción del Nuevo Mundo jãuba respeta ɓua chi Dachi Akõre trʉ̃, chi wãrabenadu jara ɓua maabea ariɗe jaradea ɓua dachia kawai baita, mauɗe aude biʼia ɓuu nau Bibliaɗebena, ẽbẽrarãmaa bari deabadaa. Mauɗéburu ẽbẽrarã nau iujãa jomauɗebenaba leaɗai ɓua ara ãchi beɗeaɗeburu mau bariara chi nejarra wãʼãe nuree nedoi baita biɗa.