7 Chi kosarã biarã jaradeɗekayua

¿MAKA ASERUUBɄRÃ SAKA NIBAIBA?

Dachi warrarãba kawaɗayua kãare biʼia ɓuu mauɗe kãare biʼia wẽ ɓuu dachia jaradeɗekabaraaɗai. Bichia setaa jarai mauɗe orroai bustakaubʉrã, makãrã bichia jaradeɗekabaraai bichi warrarãmaa, makaburu bichi kĩra nibaɗayua.

Ẽbẽraba joma biʼia asebarii bustabariniibʉrã, ichi trajayu, waabenarã aiɗayu, mauɗe ẽbẽrarãba biʼia asebadaa joma biʼiadu ochiabarinii. Dachi aude kũudrãa niibʉrã, dachia ãrĩãdu mau ase kawaɗai ɓua.

BIBLIABA NAKA JARAƁUA: “Chi warrmaa ariɗe jaradeaba chi sãu oɗe wãi baita mauɗe ichi chõra baruusiɗa idarabiibayua” (Proverbios 22:6).

¿SAKAYUA NAU IMPORTANTE ÃRĨÃ ƁUA?

Dachi warrarãmaa jaradeɗekabaraaɗai chi selularɗe biɗa kosarã kachiruarã barau. Dana Karyn abadauba naka aɗabasia: “Chi selularɗeeba, teleisor, interneɗeeba dachi warrarãba kosarã kachirua unuɗai ɓua, bariara dachirã ãchi jʉ̃kaa duanuusiɗa ochiaɗai ɓua. Maka dachia kawaɗawẽ kãare saka ochiamaaduanuu.

BIBLIABA NAKA JARAƁUA: Chi “kawaɗayuaburu akostumbranuree maarãba kuitaaduanua saka unuɗayu chi sãu biʼia ɓuu mauɗe chi sãu kachirua ɓuu. Bikãa ãchia kʉ̃risiakopaneebadaa biʼia ãrĩãburu” (Hebreos 5:14).

Ẽbẽra bia kirureaɗayua. Warrarãba “mʉ chuburia” mauɗe “ara kiruma” aɗayua waabenarãmaa jaradeɗekabaraaɗai. Maubapeɗa ãchimaa beɗeabudauɗe chi selular juaɗe iraɓuu omeburu beɗeapaneeɗawẽa jari iɗibea ẽbẽrarãba asebadau kĩra.

BIBLIABA NAKA JARAƁUA: “Ara jãka waabenarã ẽbẽrarãba bichi aseɗai kʉ̃riapanuubʉrã, bichia biɗa aseba ãchimaa” (Lucas 6:31).

¿KÃARE ASEI ƁUA?

Ariɗe jaradeɗekakuas chi kãare biʼia ɓuu mauɗe kãare kachirua ɓuu. Chi nuree propesionalrãba jarabadau chi akõrerãba ãchi warrarãmaa kũudrãarã ara maka ambua kãiɗawẽa nureerã, deeɗaareba jaradeaɗayua nau aseɗaabai baita.

NAU ASES: Bichia notisia ochiamaaɓuuɗe mama aria ẽbẽra beapeɗaaɗa unubudauɗe, bichi warr ome akuɓuuɗe, ichimaa wiɗis kãare kakua beasiɗau jãu ẽbẽra. Mambea ichimaa naka achãu: “Ichi jãu ẽbẽraba aɓabena iaɗaa nibasme jãu kakuaburu beasiɗau”. Mambea ichimaa kawabiba dachia aɓabena iaɗaa nibayu biʼiawẽ ɓuu.

“Chi warrarãba kosa biarã aseɗayua, chi akõrerãba jaradeabaraaɗai kãare biʼia ɓuu mauɗe kãare kachirua ɓuu” (Brandon).

Ẽbẽra bia kirureaɗai baita jaradeɗekabaraaɗai. Chi biɗĩka kirureerã biɗa kawaɗai ɓua “mʉ chuburia” mauɗe “ara kiruma” aɗai baita. Makãrã waabenarã ãrĩãdu aiɗaɗai ɓua. Chi libro Parenting Without Borders (Padres sin fronteras) jãuba naka aɓua: “Chi warraba ichidu aude importante ãrĩã nii, ãrĩã kuitaanii, maebʉrã chi eskuelaɗe, ichi deemare o ichi drua bibiniimaa ichi du importante nii kʉ̃risianiiwẽbʉrã, makara waabenarã ãrĩãdu aiɗai ɓua”.

NAU ASES: Trajo asebiaba bichi warrarãmaa makaburu ãchia waabenarã ãrĩãdu aiɗa kawaɗayua.

“Bichia deeɗa bichi warrarãmaa dee barrebipeɗa, chiko chubipeɗa mauɗe waabenarã kosarã barau asebiniibʉrã, makãrã ãchi kimabaraabudauɗe ãrĩãdu chaarea ɓoobayua ãchia jãka ɓee aseɗai baita” (Tara).