Ẽbẽra kʉ̃ria inibaɗa biuɗakare dachi sõɗe chi pua ãrĩã ɓuu

“Sofíaa mʉ ome kimabaraapeɗaaɗa baɗa 39 año basiɗauɗe, ichi biubarisia ãrĩã ẽperma koɓeekare. Amikorãba mʉ ãrĩã aiɗasiɗau mauɗe mʉa ne joma ase kʉ̃riasia. Maka ɓumina año aɓa ɓuuɗe chi pua ãrĩã senti koɓeesia. Ɓesɗe biʼia ɓoapeɗa mauɗe ɓesɗe biʼia ɓookabachii. Iɗiiɗaa biɗa, 3 año basmina ichi biuɗa baɗa, ɓesɗe puʼuaswẽa ɓuuɗe mʉ sõɗe chi pua ãrĩã koɓeebaria” (Kostas).

¿Bichia ẽbẽra kʉ̃ria inibaɗa biu ɓuẽ? Maka ɓuubʉrã, Kostas kĩra senti ɓua. Dachi kima maebʉrã dachi deɗabena makawẽebʉrã amiko biuburuuɗe ãrĩã kʉ̃risia koɓeepeɗa chi pua ãrĩã sentibaria. Chi kauwa kʉ̃risia nureerãba nauɗebena maka ɓua abadaa. Artículo ɓʉpeɗaaɗa baɗa revista The American Journal of Psychiatry mauba jara ɓuu: “Ẽbẽra biuburuuɗe jãabera unuɗaabai ɓuu, jãu perde ɓuu”. Ẽbẽra kʉ̃ria inibaɗa biubariburuuɗe nomaa koɓeepeɗa naka kʉ̃risiai ɓuu: “¿Kãareɗaa mʉ jãka nomaa senti ɓoiba? ¿Tiempoɗaa waya kĩrajʉʉ ɓooyuẽ? ¿Kaiba mʉ kĩra chuburiaiba?”.

Nau revistaɗe ¡Despertad! jãuɗebena jara kuɓua. Mawãarebena articulorã jara kuɓuu sakayua chaarea ɓuu ãrĩã bawẽebʉrã bichi ẽbẽra kʉ̃ria inibaɗa biuɗa baɗabʉrã. Mauɗe chi waabenarã articulorãɗe ochiai ɓuu consejo ɓee bichi aiɗai ɓuu nomaa kuɓumina naa waa kãribai baita.

Daiba kʉ̃ria panuu nau revistaba bichi aiɗai ɓuu naa waa kãribai baita mauɗe jomaurã nomaa duanuurã chi ẽbẽra kʉ̃ria inibaɗa biuɗa baɗa kakua aiɗai ɓuu.