Aɓa biuburuuɗe kãareba aiɗaɗai ɓua: Nau asei ɓua

Dachia jʉrʉburuubʉrã aɓa biuburuuɗe kãare aiɗaɗai ɓua, unuɗai ɓua ãrĩã barau dachi baita serviyu ɓuu. Dachirã aɓaaɓaa puʼua sentibadaa, maamina junebe diwara ɓee. Chi ɓee aɓa nii ẽbẽra baita serviyu ɓua, maka ɓumina junebena baitara serviwẽa.

Chi nureerã baita nau aseɗayu biʼia ɓua. Chi kuitaa nureerãba nauɗebena jarabadau, mauba unubi ɓuu chi Bibliadu libro biʼia ãrĩã ɓuu.

1: IDA AIƊABIBA DEƊABENARÃ MAUƊE AMIKORÃMAA BIƊA

• 

  Chi kuitaa nureerãba jarabadau biʼia ɓuu ida aiɗabiyu deɗabenarãmaa mauɗe amikorãmaa biɗa. Maamina ɓesɗe dachi akawa du aɓa akʉ ɓoi kʉ̃riabaria. Mauɗe kĩrubaria ẽbẽrarãba dachi aiɗa kʉ̃ria panuuɗeebiɗa. Jãka pasabarima dachimaa mauɗe jomaurãmaa biɗa.

• Kʉ̃risiarã́ba bichi akawa joma ẽbẽrarã baara ɓoobayua, mauɗe chi joma chi tiempo akawa du aɓa biɗa ɓoobayua. Mauɗe bichia nesita ɓua junebenarãba bichi aiɗaɗai baita. Jaraba bichia nesita ɓuu mauɗe bichia nesitawẽe, maka ɓumina respeto iɗaa mauɗe kʉ̃ria jarayua.

• Kʉ̃risiaba bichia nesita ɓuuɗe, jʉrʉba tiempo bichi du aɓa ɓoi baita mauɗe tiempo jʉrʉyu junebenarã baara ɓoi siɗa. Jãu omeerã dachi baita biʼia ãrĩã ɓua.

CHI BIBLIABA JARA ƁUU: “Biʼia ɓua ome ɓooyu, akawa du aɓa ɓoi kãyabãra [...]. Ãchi omeɗebena aɓa jeeɗa ɓaeburuubʉrã, aɓauba ʉtʉ jiradrubiiruu” (Eclesiastés 4:9, 10).

2: BIʼIA KO NIBAPEƊA EJERCICIO ASE NIBABA

• Chiko biʼia koburuubʉrã bichi kachirua kʉ̃risia noɓooɗa nomaa kuɓuuɗeeba waya biʼia kʉ̃risia noɓeerua. Fruta, verdura mauɗe kiuru drãa ɓiɗĩika baraa ɓeedu kochase.

• Bania mauɗe biʼia ɓee do nibai baita dose.

• Chiko koomaa kuɓuuɗe biɗa, chiko ɓiɗĩika ara kapichia kose. Doctormaa vitamina wiɗii ɓua.a

• Awara wãba ãdaɗe maebʉrã ejercicio aseba nomaa koɓeemaaba. Chi nureeba ejercicio asebudauɗe chi ẽbẽra biuɗa baɗa ʉ̃rʉbena kʉ̃risiabadaa mauɗe junebenarãba ejercicio asebadau biuɗa baɗa ʉ̃rʉbena kʉ̃risiamaaba.

CHI BIBLIABA JARA ƁUU: “Wãʼãe aɓa ichi kakua iadaa ãrĩã ɓoobarii, bari kʉ̃riapeɗa cuida inibapeɗa” (Efesios 5:29).

3: BIʼIA KÃI NOƁOOBA

• 

  Bichi ẽbẽra kʉ̃ria inibaɗa biubariibʉrã, biʼia ãrĩã ɓua kãi ɓooyu, dachi nomaa duaneebudauba ãrĩã cansabibariiɗeeba.

• Kape ɓaa, ituaɗeeɗa ãrĩã do nibarã́ba máubara dachi biʼia kãibikau.

CHI BIBLIABA JARA ƁUU: “Ara ɓua hora aɓa descansa koɓooyu ome hora traja koɓooi baɗa bara, ãrĩãdu traja ɓuubʉrã serbiwẽa maka biɗa” (Eclesiastés 4:6).

4: KɄ̃RISIA NIBABA BICHI WAABENARÃ KĨRA ƁUUWẼE

• 

  Ẽbẽra biubariiburuuɗe jomaurã ara aɓau sentiɗakaa. Ara bichi du aɓaburu kʉ̃risiai kãare biʼia ɓuu bichi baita.

• Chi nuree nomaa beɗeabudauɗe beɗeayu bustabadaa mauɗe chi nureerã makaɗakaa. Chi kuitaa nureerãba didiwaraa jarabadaa beɗeayu maebʉrã beɗeabayu nomaa duaneebudau ʉ̃rʉbena. Bichia nesita ɓuubʉrã junebena ome beɗeai saka senti ɓuu ʉ̃rʉbena maka ɓumina chaarea ɓuubʉrã, ¿sãi bikãa bikãa berreawẽe bẽe amiko jʉ̃kaabena ome?

• Chi nureeba jẽaidu nesita nurea, junebenarã makaɗakaa.

CHI BIBLIABA JARA ƁUU: “Aɓaaɓaa dachi sõɗe sufri ɓuu kuitaa nurea” (Proverbios 14:10).

5: MIADAA ƁEE ASE NIBARÃ́BA

• 

  Ẽbẽrarã nomaa ɓee ẽbẽra biuɗa baɗa kakua itua, droga siɗa ãrĩã dobadaa nomaa koɓeeɗaamaaba. Mara miadaa ɓua. Mauba ɓaʼãraburu kĩrajʉʉbiai ɓuu, maka ɓumina dachi kakua ãrĩã dañai ɓua. Bichi kakua biʼia nibai baitaburu ase nibaba.

CHI BIBLIABA JARA ƁUU: “Nau kakuaba kachirua waubarii mauɗe dachi kʉ̃risiaɗeeba waubarii joma ida ɓuɗai panuu” (2 Corintios 7:1, Biblia Chamí WPS.).

6: TIEMPO PERDE ƁOORÃ́BA

• Tiempo saca nibaba nomaa kuɓuuɗebena beɗeai baita maabeaburu junebenadu ase nibaba biʼia kʉ̃risiai baita.

• Amiko chiwiɗi jʉrʉ nibaba, amiko inibabarii aude mera nibaba, trajo asei baita kawa nibaba mauɗe eɗuwaa pasiaɗe wãba. Maka asekua niibʉrã, nomaa koɓooɗa baɗa waya biʼia ɓeei ɓua.

• Bichi apii chi biuɗa baɗa ʉ̃rʉbenadu kʉ̃risia ɓeebayua, bikãa bikãaɗeeburu junebena aseburuuba biʼia kʉ̃risia ɓeei ɓua.

CHI BIBLIABA JARA ƁUU: “Ewari bia jomaurã baita ɓua [...]: jẽai baita ewari ɓoopeɗa mauɗe ʉi baita ewari ɓua” (Eclesiastés 3:1, 4).

7: BICHI NAA ƁOOƊACHAA KÃRIBABA

• 

  Bichi naa ase nibabarii baɗa waya ase kãribaba.

• Ara mau horaɗe kãi noɓoose, trajase, mauɗe junebe ase nibaba.

• Bari ɓoorã́ba, ãrĩã ase nibaba nomaa sentiimaaba.

CHI BIBLIABA JARA ƁUU: “Ãrĩã kʉ̃risiabai ɓuu ichi ɓaʼãra ɓooyuɗebena, Dachi Akõre chi ariɗe ɓuuba ichi corazonɗe kĩrajʉʉ ɓuu ʉ̃rʉbenadu kʉ̃risiabia ɓuuɗeeba” (Eclesiastés 5:20).

8: ISA KɄ̃RISIARÃ́BA ASEI BAITA

• Ẽbẽra biuɗakareburu ãrĩãrãba aɓaeɗa kʉ̃risiabadaa maaɗakare maka aseebai baɗa a kʉ̃risiabadaa.

• Ẽbẽra biuburuu dauchia isa jʉrʉrã́ba junebe de ɓoi baita maebʉrã junebe trajo mauɗe chi biuɗa baɗaba inibaɗa, nakaeɗe ɓatarã́se maebʉrã junebenamaa dearã́se.

CHI BIBLIABA JARA ƁUU: “Chi trajabarii naeɗe biʼia kʉ̃risiaburuubʉrã jãturua biʼia nibayua; maumaarã, chi biʼia kʉ̃risiaka ɓuu nii akawa wãʼãe nibaɗe wãyua” (Proverbios 21:5).

9: ẼBẼRA KɄ̃RIA INIBAƊA KɄ̃RISIA NIBABA

• 

  Chi ẽbẽra biuɗa baɗa ome ase nibarii baɗa ara maka asekeraba waaburu kʉ̃risia koɓooyua.

• Foto chi biuɗa baɗaɗebena ira ɓooba mauɗe junebenaɗeeɗa, cuadernoɗe ɓʉ adause chi biuɗa baɗa ome nibaɗaɗebena, nauba aiɗai ɓua nomaa ɓoomaaba.

• Chi biuɗaɗebena baɗa uarda nibaba ichi ʉ̃rʉbena kʉ̃risiai baita mauɗe bichia kʉ̃riaburuu diaɗe ochiaba jãu.

CHI BIBLIABA JARA ƁUU: “Chi naabena ɓoosiiɗebena kʉ̃risiaba” (Deuteronomio 32:7).

10: EƊUWAA PASIAƊE WÃSE

• Kʉ̃risiase eɗuwaa pasiaɗe wãi baita.

• Bichi eɗuwaa ãrĩã pasiaɗe wãi poyaawẽebʉrã, makarã día aɓa maebʉrã día ome wãba, kakua ẽrosãa diɗii baita.

• Chi bichia noremaacha asebarii, diwara aseburuuɗe, waya kĩrajʉʉ ɓeei ɓua.

CHI BIBLIABA JARA ƁUU: “Urústuru mʉ baare; wãuriɗaika du aɓa kuɓuuɗaa descansaɗayua” (Marcos 6:31).

11: WAABENARÃ AIƊA KERABA

• 

  Bichia waabenarã aiɗaburuubʉrã mauba bichi biʼia sentibi ɓua.

• Aiɗa nibaba deɗabena biuɗa baɗarãmaa, ãchia biɗa nesitaɗai ɓuẽka ãchi nomaa duanuu ʉ̃rʉbena beɗeaɗayua.

• Waabenarã aiɗapeɗa kĩra chuburiabudauba bichi nomaa koɓooɗa baɗa waya kĩrajatua nibai ɓuu.

CHI BIBLIABA JARA ƁUU: “Ãrĩãdu kĩrajʉʉ ɓuu dearuuba adauruu kãyabãra” (Hechos 20:35).

12: KɄ̃RISIA NIBABA KÃAREDU NAA BIʼIA ƁUA BICHI BAITA

• Ẽbẽra biuɗakare bichi nomaa koɓeeburuuba aiɗai ɓuu kʉ̃risiai baita kãaredu biʼia ãrĩã ɓua bichi baita.

• Kauwa kʉ̃risia nibaba bichi kãare ase nibabarii ʉ̃rʉbena.

• Naa ase nibabarii baɗa ida ɓui ɓua bichia nesita ɓuubʉrã.

CHI BIBLIABA JARA ƁUU: “Nomaa duanuu deemaa wãi ara ɓua kĩrajʉʉ baera duanuumaa wãi kãyabãra, ẽbẽrarã biubudauɗe jãabera acababadaa, mauɗe chi chokae nureerãbara jãuɗe kawa kʉ̃risia nibaɗayua” (Eclesiastés 7:2).

Bichia nau joma aseburuu siɗa, ɓesɗe ara maka ɓiɗĩika nomaa koɓeei ɓua. Maka ɓumina, chi nuree ara jari nau articuloɗe jara ɓuu kĩraka ase duanabaria, mauba ãchi aiɗasii ãrĩã nomaa koɓeeɗaamaaba. Nau waarã maucha asei ɓua. Maamina, nau aseburuubʉrã, apii nomaa koɓeebayua.