SECCIÓN 6
Job jipa nia
Satanasba Job jipawãe nii aɗa baɗa Dachi Akõremaa, maka ɓumina ichi jipa nibasia Jeowa ome
¿CHI Dachi Akõre baita traja nuree jipa nureaɗai ɓuẽ, bariara ãchi ãrĩã sufri kopanuu adua? Mukĩra Job abadau maka pasaɗaa. Ochiaɗaika kãare pasaɗa.
Job deɗabena kĩra nibasia Abrahán ome. Iɗibae Arabia abadauɗe vivi nibaɗa, israelitarã Egiptoɗe vivi nureasiiɗe. Día aɓauɗe, ichiɗebenáturu beɗeapeɗaaɗa asamblea Jeowaba bajãaɗe asesiiɗe angelna baara. Mama aria biɗa chi Satanás koɓoosia. Jomaurã daaɗe, Jeowaba Job ʉ̃rʉbena biʼia beɗeaɗa baɗa ichi kĩra jipa niiɗeeba, jãkaburu unubiɗa ichia ichiɗe confia nibasii. Maka ɓumina Satanasba jaraɗa baɗa Dachi Akõreba ichimaa ãrĩã dea nibapeɗa, kareba niiɗeeburu Job ichia Jeowa ãrĩã kʉ̃ria nibasia. Maaɗaba jaraɗa baɗa Job ichia ua nii joma perdeburuubʉrã, makarã Job ichia Jeowa ɓui basii.
Dachi Akõreba idaarabisii Satanasmaa ichia Job ichia ua nibaɗa, mauɗe ichi warrarã ẽebarii baita maabae ẽpermabiai baita. Job ichia adua basii baerã Satanasburu joma jãkabiɗa baɗa, ichia poyaa kawaabasii sakãera Dachi Akõreba maka idaarabi ɓuu. Maka kuɓuu adua, ichia akawa Jeowa ida ɓuibasia.
Chi amikorã õbea niɗaurãba Job ochiaɗe neepeɗaaɗa maabae kachirua beɗea kopaneesia. Mau Job libroɗe, eɗa ɓʉbari ɓua. Maka jarabudauba ichimaa ijãabisiɗau Dachi Akõreburu ichi kastika kuɓuu, ichia kachirua ɓee miru aseɗa baɗaɗeeba. ¡Maka ɓumina mara makawẽe basii! Ãchia jarasiɗau Dachi Akõreba ochiakaa ichi baita traja nureerã mauɗe ãchirãɗe confiakaa. Maka ɓumina Job ichia mara ijãa kʉ̃riabasia maabae jarasia ichi kĩra jipa nibayua ichi biuruuɗaa.
Maka ɓuu adua, Job ara ichiɗéburu audeara kʉ̃risiasii ara ichi du aɓa defendeyua. Elihú, kũudrãa niiba ũriɗa baɗa ãchia berrea awa panuuɗebena, Jobmaa iadaabaɗa ara ichiɗéburu audeara kʉ̃risiasii, chi Jeowadu aude mauɗe ichia manda niiɗe biɗa aude. Maabae, ãrĩã iadaasii chi kõpaerorã Jobɗe kachirua ãrĩã nuree.
Maaɗakareburu, ara Jeowaburu Job iadaaɗa baɗa. Chi ichia kĩrawãrea ɓee waukaɗa baɗaɗeeba, ichimaa kawabiasii ẽbẽra Jeowa niiɗeebiɗa dachi ẽbẽra ɓiɗĩi ãrĩã nii. Job nejuakayawẽa nibasia. Maabea Jeowaba ichimaa iadaaɗa baɗa ũriɗa basia, Jeowa “mauba kĩra chuburia ɓuu, mauɗe kʉ̃riaɗeeba aiɗai ɓuu”, mauɗeeba Job ẽperma koɓooɗa baɗa waya biʼia ɓeebisia maabea chi ichia naa ua nibaɗa aude dea ɓooɗa, mauɗe diez warrarã siɗa dea ɓooɗa baɗa (Santiago 5:11). Job jipa nibasiiba Satanasmaa kawabiɗa baɗa, dachi ẽbẽrarã kĩra jipa nureaɗai ɓuu dachi baita chaarea kuɓuu adua.
(Chi libro Jobɗe ome aɓau kuɓuu.)