BEƊEA 6

¿Chi kinipeɗaaɗabaɗa waya piradruɗabaka?

1. ¿Chi kinipeɗaaɗabaɗa waya piradruɗabaka?

Lazaro ichi nawekaurã baara Marta mauɗe Maria waya ichi piradrubiɗakare

Bes aɓa, Jesus wãsii puuru Betania abadauɗaa Jerusalen kaita ɓuuɗe. Aria Lazaro Jesus amiko ɓoobachia. Jesus neesiiɗe Lazaro dia kimare baɓoosia biuɗabaɗa. Jesus chi Lazaro ʉanuɓuumaa wãsia chi Lazaro nawekaurã Marta Maria baare. Aria ɓuuɗe ẽbẽrarã ãrea neekopaneesia mambea Jesusba ichi amiko waya piradrubisia. Kʉ̃risiachãu saka Marta Maria baare kĩrajʉʉsiɗau ãchia chi ãba unusiɗauɗe. Juan 11:21-24, 38-44 leas.

Bibliaɗe chi beɗea kĩrawãreaɓeeɗebena jãma jaraɓuu ẽbẽrarã biupeɗaaɗa waya ʉtaa piradruɗai ʉ̃rʉbena. Martaba kuitaaɓoosia Jeowaba ẽbẽrarã biupeɗaaɗabaɗa waya ʉtaa piradrubiai nama iujãaɗe waya nureaɗai baita. Job 14:14, 15 leas.

2. ¿Kãare sakaɓua dachi biupeɗaaɗakare?

Adan wauɗa mauɗe ichi biuɗa — Dachi Akõreba Adanmaa nakaasia: “Bichira ioroba wauɗaɗeeba makara waya ioroɗaa bayua” (GÉNESIS 3:19).

Joma ẽbẽrarã “ioro jeɗabenaba” aseɗabaɗa nurea (Génesis 2:7; 3:19). Dachiɗe jauri biukaɓuu wãʼãe nurea. Dachi kakuara ɓʉʉrʉ mauɗe kiuruba wauɗa nuree bẽrã biupeɗaaɗakare chokae nureaɗakau. Dachi boromor biuɗakare, nejoma kʉ̃risiaɗakaa mauɗeeba biupeɗaaɗarãba puʼua sentiɗaabapeɗa ni supriɗakaa. Makara Lazaro biuɗabaɗa waya piradrusiiɗe, wabenarãmaa jaraabasia ichia kãare unuɗabaɗa biunuɓuumisa. Salmo 146:4; Eclesiastés 9:5, 6, 10 leas.

Chi nureeba kʉ̃risiabadau Dachi Akõreba ẽbẽrarã biupeɗaaɗabaɗa iujãa akaraa buekabadau ĩpiernoɗaa mamaeɗa baaɗe wãi baita, maamina maara ariɗe jaraɓuuwẽ. Dachia kawapanuu kĩra, chi biupeɗaaɗarã kʉ̃risia wãʼãe duanua. Ẽbẽraba ĩpierno ʉ̃rʉbena jaradeaniibʉrã Jeowa trʉ̃ ʉ̃rʉbena biɗa atua jaraɓua, jãarã setaa jaraɓuuɗeeba. Ẽbẽrarã baakuai Jeowaba kʉ̃risiakaa. Deuteronomio 12:31 leas.

3. ¿Biupeɗaaɗarã ome beɗeaɗai ɓue?

Biupeɗaaɗarãba ũriɗaabapeɗa beɗeaɗakaa (Salmo 115:17). Maamina, anjelerã kachirua baraa ẽbẽrarã ome beɗeaɗapeɗa mambea chi biuɗabaɗa kĩraka beɗeaɗai ɓuu (2 Pedro 2:4). Nau kakua, Jeowaba idaribikaa biupeɗaaɗarã ome beɗeaɗai baita. Deuteronomio 18:10, 11 leas.

4. ¿Kairã waya piradruɗaiba?

Chi waya piradruɗabaɗa kawamaaɓuu chi ɓʉkoɓee iujãa kĩrawãreakiruuɗe mauɗe, maukaaɗe, waabenarã jiradrupeɗaaɗarãmaa jaradeamaaɓuu.

Ẽbẽrarã ãreadu biupeɗaaɗabaɗa waya piradruɗai nama iujãaɗe. Ẽbẽrarãba Jeowa ʉ̃rʉbena kawaɗaabapeɗa mauɗe ne kachirua asepeɗaaɗarã maarã siɗa waya piradruɗayua. Lucas 23:43; Hechos 24:15 leas.

Chi waya piradrubudauba Dachi Akõre ʉ̃rʉbena ariɗe kawaɗai ɓua, ãchia Jesusɗe ijãapanuu unubiɗai ɓua mauɗe ichi beɗea ũriduanai ɓua (Apocalipsis 20:11-13). Maka aseɗarã, kĩrajʉʉ biuɗawẽa duanaɗai nama iujãaɗe. Juan 5:28, 29 leas.

5. ¿Sakayua Jeowaba ẽbẽrarã biupeɗaaɗabaɗa waya piradrubiabama?

Jeowaba biupeɗaaɗa waya piradrubiaruu dachirã chi kʉ̃riaɓuuɗeeba mauɗe ichia korasonɗeeba aseɓuu. Dachi Akõreba ichi Warr dachirã kakua biubiyua bueɗa bẽrã, ariɗe kuitaapanuu biupeɗaaɗarãba waya piradruɗai. Mauɗe bichiara, ¿kai unukʉ̃riaɓuma waya piradrunii? Juan 3:16; Romanos 6:23 leas.

Bichia aude kawakʉ̃rianiibʉrã, jʉrʉs chi beɗea 6, 7 mauɗe 10 chi libroɗebena ¿Qué nos enseña la Biblia?