¿Saka kĩrajʉʉnibai deɗabena ome?

1. ¿Sakayua ariɗewẽɓua kimabaraaɗawẽa panaɗayu?

Jeowaba beɗea kĩrawãrea jaraɓuu mauɗe ichi kĩrajʉʉɓuu bẽrã, ichia dachi deɗabenarã ome kĩrajʉʉduanai kʉ̃riaɓua (1 Timoteo 1:11). Ichia wẽra mukĩra naabena kimabaraabiasia. Biʼia ɓua kimabaraaɗayu, chi mukĩra wẽra omeba chi warrarã biʼia waribiaɗai mauɗe ũkuru chi deɗabena ambuaduanaɗapeɗa kĩrajʉʉduanaɗai baita. Mauɗeeba Jesusɗe ijãanurerã notariaɗe o juskaoɗe kimabaraaɗayua. Lucas 2:1, 4, 5 leas.

Dachi Akõreba kʉ̃risiaɓua wẽra mukĩra baare kimabaraaduurã, ãchi biuduuɗaa bayua. Chi kimabaraapeɗaaɗa ãchi chiya junebe jʉrʉɗaabayua (Hebreos 13:4). Jeowaba iadabarii chi kimabaraapeɗaaɗa ɓuisiɗarã (Malaquías 2:16). Ichia ẽbẽra kimabaraaɗabaɗa chi karta pirmapeɗa ɓuiyu idaribiɓua mambea junebena ome kimabaraai baita ichi kima junebena ome kãinoɓooɗabʉrã. Mateo 19:3-6, 9 leas.

2. ¿Saka nibaɗaiba wẽra mukĩra ãchi chiya?

Jeowaba mukĩra mauɗe chi wẽra baare waukaɗabasia ãchi chiya aiɗaɗai baita kimabaraapeɗaaɗakare (Génesis 2:18). Mukĩraba joma deɗa ochiakuɓuu, mauɗeeba ichia jʉrʉbarai saka deɗabena uaɓoi baita, mauɗe Dachi Akõre ʉ̃rʉbena ichi deɗabenarãmaa jaradeɗekuayua. Mauɗe wẽra kʉ̃ria kakua ichi baita asei baɗa chi wẽra baita aseɓua. Chi kimabaraapeɗaaɗa ãchi chiya kʉ̃riaɗapeɗa mauɗe respetabaraɗai. Ãchi omera ne kachirua waubadau niɗau bẽrã, kʉ̃risiabaraɗai perdonaɗapeɗa mauɗe kĩrajʉʉnureai baita. Efesios 4:31, 32; 5:22-25, 33; 1 Pedro 3:7 leas.

3. ¿Chi kimabaraapeɗaaɗa problema barapanuubʉrã ariɗe ɓue amaaɗayu?

Kimabaraapeɗaaɗa problema baraduanuubʉrã, ara ambua kʉ̃ria iɗaaburu beɗeapanaɗayua (1 Corintios 13:4, 5). Dachi Akõre beɗeaba chi kimabaraapeɗaaɗa barikiau problemaɓuu kakua barapanuuɗe amaaɗai jaraɓuuwẽ. 1 Corintios 7:10-13 leas.

4. ¿Dachi Akõreba warrarã saka nureabikʉ̃riaɓua?

Jeowaba warrarã kĩrajʉʉduanai kʉ̃riaɓuu. Mauɗeeba ichia jaradeɗekaɓuu saka kĩrajʉʉnureaɗai kũudrãanureɗe. Ichia kʉ̃riaɓuu warranaba ãchi akõreɗebena kawaɗai baita ãchirã chi kuitaaɓuura bẽrã (Colosenses 3:20). Mauɗe ichia kĩrajʉʉnureaɗai baita kʉ̃riaɓuma, dachi Wauɗabaɗaba, mauɗe ichi Warrba wiɗibudau aseduuɗe. Eclesiastés 11:9-12:1; Mateo 19:13-15; 21:15, 16 leas.

5. ¿Akõrerãba saka chi warrarã kĩrajʉʉnureabiɗai ɓua?

Chi akõrerãba chiko, de, paru baare deaɗayua (1 Timoteo 5:8). Maamina jãu joma wẽ. Ãchia Dachi Akõre ʉ̃rʉbena jaradeaɗayua ãchi warrarãmaa ãchia biɗa ichi kʉ̃riaɗai baita (Efesios 6:4). Chi akõrerãba warrarãmaa unubiɗarã ãchia Dachi Akõre kʉ̃ria uniɗau, chi warrarã biɗa ara jãka aseɗai ɓua. Chi Dachi Akõre beɗeaba kawabibudaubʉrã ãchia biʼia kʉ̃risiaɗayua o ãi wãɗaamaba. Deuteronomio 6:4-7; Proverbios 22:6 leas.

Warrarãba akõreba ãchimaa beɗea mipitaa jaraɗai nesitanurea ãchia joma asepanuu kakua. Mauɗe besesɗe sĩ juaba sĩtapeɗa o beɗeaba jarai nesitaduanua chi ãchia añaa ne kachirua aseɗai baɗa asebiɗaamaba (Proverbios 22:15). Mauɗe iadabudauɗe beɗea siɗa aribia miaɗaa jaraɗawẽa ni puʼua biɗa aseɗaabayua. Colosenses 3:21 leas.

Jeowa ɗebena jaranũrẽba librorã aribia aseduanua akõrerã mauɗe warrarã baita. Chi mama eɗa ɓʉkoɓee Bibliaɗebena eɗa koɓea. Salmo 19:7, 11 leas.