Dachi Akõreba iujãa bajãa baara wauɗa basia

Dachi Akõre Jeowa dachi Waukaɗa baɗa nii. Ichia joma wauɗa baɗa, chi joma barau dachia unubadau mauɗe dachia unuɗakau. Chi dachia unubadau waui naeɗe, ichia waukasii angelerã ãrĩã́turu. ¿Kuitaa ɓuẽ kairãba chi angelerã? Ãchirã Jeowaba waukaɗa baɗa ara ichi kĩra nureerã. Jeowa mauɗe chi angelerã baara dachia unuɗawẽa. Jeowaba naa chi ángel wauɗa baɗa ichi aiɗabii baita. Ichia ũkuru wausii chi estrellarã, joma chi ʉtare kuɓuu. Dachi nureabadau chi nau iujãa mipitaa kiruuɗe, planeta Tierra abadau.

Maaɗakare, Jeowaba joma wau ɓoosii nau iujãaɗe ãnimara chekerã mauɗe ẽbẽrarã nibaɗayu baita. Ichia wausii chi ʉmada ʉ̃ɗaayu baita iujãa ʉ̃rʉ. Mauɗe maucha wauɗa baɗa chi mode, chi do choroma mauɗe do ɓiɗĩika siɗa.

¿Kãare pasaɗaba maaɗakare? Jeowaba jara ɓoosii: “Mʉa wauruu chi kiɗuarã, siruaka ɓee, bakururãka ɓee”. Jãuɗéburu dachi iujãaɗe diwara kiɗuarã baraasii, chi jõ, ãrĩã netaa mauɗe neponorã siɗa. Jeowaba maucha wauɗa basii, ãnimararã june diwara baraurã siɗa, ãnimararã ũuɓaribadaurã, doɗe eɗa ũubadaurã, jeeɗa ursu nureerã. Jeowaba wauɗa baɗa ãnimara chekerã ɓiɗĩika kiruree, conejoka ɓee mauɗe ãnimara choroma wau ɓoosii, elefanteka ɓee. ¿Sãuba chi ãnimara bichia ãrĩã bustabarii?

Maaɗaba, Jeowaba chi nabena ángel waukaɗa baɗamaa naka jaraɗa baɗa: “Ẽbẽra wauɗaika”. Chi ẽbẽrarã diwara nureaɗai basia ãnimara chekerã kãyabãra. Ãchirãba ãchi juaɗeeba diwara ɓee wauɗayua, ãchi chiya beɗea nureaɗapeɗa, ʉiɗapeɗa mauɗe ʉtaa wiɗiɗayu Dachi Akõremaa. Ãchia ochia ua nibayu chi iujãa mauɗe chi ãnimara chekerã siɗa. ¿Kuitaa ɓuẽ bichia kai basii chi nabena ẽbẽra? Kawaɗaika.