Abrahán Sara omeeba Jeowa ũrisiɗaa

Chi puuru Ur abadau, chi puuru Babel kaita koɓoosii. Mama chi ẽbẽrarãba Jeowa ũriɗakau basii, ãchirãba junebenarã diostu ũri nureasia. Mau puuruɗe mukĩra aɓa Jeowa ũri nibasii, chi trʉ̃ Abrahán.

Jeowaba Abrahanmaa naka asia: “Bichi de ɓuiba mauɗe bichi deɗabenarã siɗa, maabea wãba chi puuru choroma mʉa bichimaa unubiiruuɗaa”. Maabae, Jeowaba naka jaraɗaa: “Bichiɗiɗebena ẽbẽrarã ãrĩã baɗayua. Bichiɗeeba mʉa mipitaa ãrĩã ɓooyu neebiyua jomaurã ẽbẽrarã baita”.

Abrahanba adua baɗa Jeowaba ichi samaa bʉeburuu, maka ɓumina Abrahanba Jeowaɗe ãrĩã ijãa nibasia. Abrahán, ichi wẽra Sara, ichi akõre Taré mauɗe ichi sobrino Lot, maarãba Dachi Akõre ũri nibasiɗaa. Chi ãchia uaɗobudaudu joma uaɗoɗapeɗa wãsiɗau.

Abrahán 75 año nibasii ichi deɗabenarã baara neesiɗauɗe chi drua Jeowaba wãba aɗa baɗaɗaa. Ãchi neesiɗau drua Canaán abadauɗaa. Maabae mama Jeowaba naka jaraɗa basii: “Joma chi drua bichia unu kuɓuu, bichi warrarãmaa deayua” aɗa basii. Maka ɓumina, Abrahán ichi wẽra Sara ome chõra ãrĩã nibasiɗau mauɗe warr aɓa biɗa wãʼãe niɗau. Makarã, ¿Jeowaba saka asei basaa ãchi warrarã adaubii baita?