Chi naa miadaa ɓee Jeowaba bʉekaɗa

Chi Egiptoɗebenarãba israelitarã ãrĩã chaarea trajabipeɗaaɗa baɗa mau paaɗawẽa. Jeowaba bʉekaɗa Moisés Aarón baara naka jarabiyu faraonmaa: “Ida bʉekase mʉ ẽbẽrarã iujãa põesãa ɓuuɗaa mʉ kʉ̃riaɗai baita”. Chi faraón juakaya ãrĩã niiɗeeba naka jaraɗa: “Jeowaba jaraburuu mʉ baita biʼia ɓuuwãema. Mʉa bʉekawẽa chi israelitarã jãma wãɗai baita”. Makaɗakare, faraonba chi israelitarã naeɗe traja panaɗa aude trajabiasia. Jãka jarasiiɗeeba Jeowaba 10 kachirua ɓee bʉeyu basii Egiptoɗaa kastikai baita. Jeowaba Moisesmaa jarasia: “Faraonba mʉ ũri kʉ̃riawẽma. Dapeɗeeɗa ichi chi do Niloɗe koɓooyua. Jaraiba joma chi bania doɗebena oaɗeburu bayu, ichia mʉ ẽbẽrarã wãɗai baita ida ɓuwẽe basiiɗeeba”. Moisesba Jeowa ũripeɗa faraón ochiaɗe wãɗa. Chi faraonba unusii Aaronba uɗa baɗa dumaba chi do Nilo, maabae chi do oa ba diɗiɗa baɗa. Chi do miadaa ãrĩã ʉ̃ koɓeesii, doɗawẽe bai ɓoosii bania jãu doɗebena mauɗe ɓeda joma kinipeɗaaɗa. Chi faraonba abiɗa kʉ̃riawẽe basii ãchi chi iujãa põesãa ɓuuɗaa wãɗayu.

Siete día baɗakare, Jeowaba bʉeɗa Moisés faraonmaa naka jarai baita: “Bichia mʉ ẽbẽrarã bʉekawẽebʉrã, bichi iujãa joma ɓaso ãrĩã baraa diɗiyua”. Faraonba akawa ũriibasii baerã, Aaronba duma ʉtaa jira adausiiɗe, chi iujãa joma ɓaso ãrĩã biru diɗisii. Chi ɓaso deɗe joma unu kopaneepeɗa, paratuɗe, camaɗe… ¡Ãrĩã baraa diɗisii! Maabae faraonba naka jarasia Moisesmaa: “Jaraba Jeowamaa jãu kachirua joma acababiyu. Maabae, mʉa chi israelitarã bʉekayua” aɗa. Maabae Jeowaba jãu acababiɗaa, chi Egiptoɗebenarãba chi ɓaso biupeɗaaɗa ãbua bara bʉekasiɗau. Chi iujãa ãrĩã kachirua ʉ̃ kopaneesii, maabae maucha chi faraonba ida wãbiwẽe basii chi israelitarã.

Maabae, Jeowaba jaraɗa Moisesmaa: “Jaraba Aaronmaa dumaba chi ioro uyu. Ichia makaaruuɗe, chi jora baɗa joma sãkuɗarã babiyua”. Joma unu koɓeeɗa chi sãkuɗarã ẽbẽra kaabadaurã. Chi nuree ẽbẽra Egiptoɗebenaba faraonmaa naka jarasiɗau: “¡Cha nau kachirua Diosɗebena neesia!”. Maka ɓuu adua, chi faraonba israelitarã ida bʉekawẽe basia.