LECCIÓN 29
Jeowaba jʉrʉ adauɗaa Josuedu
Moisesba chi israelitarã ua nibaɗa año ãrĩãɗe, maka ɓumina, ichi biuiɗaa kãribasia. Jeowaba ichimaa jarasia: “Bʉa chi israelitarã chi iujãa mʉa deai a ɓuuɗaa uaɗoobayua. Maka ɓumina, bʉ dauburu chi iujãa ochiayua”. Moisesba Jeowamaa wiɗiɗa baɗa junebe mukĩra jʉrʉbii baita chi ẽbẽrarã ua nibayua. Maabae Jeowaba jaraɗa: “Josué ome beɗeaba, maabae jaraba ichíturu mʉa jʉrʉsii”.
Moisesba jarasii chi ẽbẽrarãmaa ichi biui ara kaita kuɓuu, mauɗe Jeowaba jaraɗa Josuedu jʉrʉɗa baɗa chi iujãa deai a ɓuuɗaa israelitarã uaɗoi baita. Maabae Moisesba Josuemaa naka jarasia: “Pera nibarã́ba. Jeowaba bʉ aiɗayua”. Mau kaaɗe, Moisés chi mode Nebo eaɗaa wãɗa baɗa. Jãmareeba Jeowaba ichimaa unubiɗa baɗa chi iujãa deai a ɓuu Abrahán, Isaac, mauɗe Jacobmaa. Moisés biusiiɗe, ichi 120 año ɓooɗa baɗa.
Jeowaba Josuemaa naka jarasia: “Chi do Jordán kĩaraa wãpeɗa, maabae chi iujãa Canaanɗaa wãba. Mʉa bʉ aiɗayua, ara jari mʉa Moisés aiɗasii kĩra. Chi Ley mʉa deaɗa baɗa noremaacha leaba. Pera nibarã́ba, chaarea nibayua. Aseɗe wãba joma mʉa aseba aɗa baɗa”.
Josueba mukĩra ome niɗau bʉisii chi puuru Jericó ochiaɗe wãɗayua. Chi lección kaaɗe leabudauba maucha kawaɗayua aria pasaɗa baɗa. Mukĩra ome niɗau waya Jericoɗebena neesiɗauɗe, maarãba jãabaera Canaanɗaa wãɗai ɓuu jarasiɗau. Mau norema, Josueba chi ẽbẽrarãmaa jaraɗa baɗa chi de ẽekuábaɗa aɗa. Maabae, Josueba jaraɗa chi sacerdoterãmaa chi arca pactoɗebena naa odoeɗayua chi do Jordanɗaa. Chi do ãrĩã wari noɓoosii mauɗe chi sacerdoterã chi baniaɗe jʉ̃rʉɗeeba tʉasiɗauɗe, chi do wari noɓooɗa baɗa apii koɓeepeɗa eɗaa wãɗa basia. Maabae chi sacerdoterã chi do põesãa kuɓuuɗe tʉasiɗau. Chi do kẽsa neesiɗauɗe, ãchi apii aka nopaneesiɗau, joma chi israelitarã kĩaraa tʉabiɗai baita. Jãu milagro unusiɗauɗe, ¿ãchia acorda panasaaka Jeowaba aseɗa baɗa chi do choroma Purea ɓuuɗe?
Año ãrĩã baɗakare, chi israelitarã jãabera neesiɗau chi iujãa Jeowaba deai a ɓooɗaɗaa. Ãchia de mauɗe puuru wauɗai ɓoosia. Ne uuɗai ɓoapeɗa uva uuɗai ɓoosia. Jãu iujãa bia ãrĩã ɓoosia. Mauɗeeba leche, miel baara deabachia.
“Jeowaba noremaacha unubiayua bʉ samare wãyu maabae joma bʉa nesita ɓuu deayua, bariara bʉ iujãa põesãa ɓuuɗe kuɓuu adua” (Isaías 58:11).