Karta Chi Juntaɗe

Ãba chekerã:

Ẽbẽrarã Jeowa kʉ̃ria nureerãba ichi Beɗea ãrĩã kʉ̃riabadau. Jãuɗe ãrĩã kawaɗayua chi pasaɗaɗebena, saka biʼia nureaɗai baita mauɗe joma ase nii Jeowaba ẽbẽrarã kʉ̃ria ãrĩã niiɗeeba (Salmo 119:105; Lucas 1:3; 1 Juan 4:19). Dairãba kʉ̃ria panuu joma chi ẽbẽrarãba kuitaaɗayua chi biʼia ɓee Bibliaɗe ɓʉ kuɓuu. Jãuɗéburu, dai kĩrajʉʉ ãrĩã duanua unubiaɗayua cha nau libroɗebena: Bibliaba mʉʉmaa mipitaa jaradea kiruu. Daiba kawabi panuu saka ɓuu nau libro.

Cha nau libro wausiɗau warrarã chekerã baitaburu. Maamina, biʼia ãrĩã ɓooyua dawarau nureerã baita biɗa Bibliaɗebena kawaɗai baita. Chi Biblia jomaurã ẽbẽrarã baita bẽrã, jãu libroɗe eɗa ɓʉ kuɓuu kawabudauɗe, ãrĩã kĩrajʉʉɗayua.

Jari chi Bibliaba jara ɓuu kĩra, nau libroba nebʉrʉ ɓuu joma chi ẽbẽrarã wausiɗauɗeeɗebena. Dai ãrĩã trajasiɗau barikia niiba leaburuuɗe, nau beɗea biʼia ãrĩã kawai baita, joma chi pasaɗa baɗa mau biʼia kuɓusiɗau.

Nau libroba chi Bibliaɗebena nebʉrʉi baitaburuwẽe. Joma eɗa ɓʉ kuɓuu chi diujorã biɗa ara dachi dauburu unubi kuɓuu kĩra chi naeɗe pasapeɗaaɗa baɗaɗebena mauɗe chi ẽbẽrarã jãu ewariɗebena kʉ̃risiaɗapeɗa sentibachiɗau kĩra unubi kuɓuu.

Nau libroba kawabi ɓuu chi Bibliaba jara ɓuu chi ẽbẽrarã Jeowa beɗea ũripeɗaaɗarãɗebena mauɗe junebenarãba ũriɗawẽeɗebena. Mauɗe kawabi ɓuu ãchiɗiɗebena kãare kawaɗai ɓua (Romanos 15:4; 1 Corintios 10:6). Cha nau libro 14 sección bara ɓua. Chi sección ʉ̃rʉbena abudauɗe, beɗea ɓuu ɓiɗĩika chi kawaɗayuɗebena.

Bichi warrarã bara niibʉrã, lección aɓa ãchi ome leaɗai ɓua, mauɗe diujorã ʉ̃rʉbena beɗeaɗai ɓua. Mauɗe chi Bibliaɗe leai ɓua ara jãu historiaɗebena. Kawabiba bichi warrmaa saka chi libroba aiɗa ɓuu aseɗai baita Bibliaba jara ɓuu kĩra. Ara jãu kĩra asei ɓua dawarau nii ome biɗa Bibliaɗebena kawabii baita.

Daiba kʉ̃ria panuu nau libroba aiɗayua ẽbẽra biʼia kirureerã, chi warrarã chekerã mauɗe dawarau kirureerãmaa biɗa, kawaɗayua Dachi Akõre Beɗeaɗebena mauɗe jãma jara ɓuu kĩra nibai baita. Jãka asebudaubʉrã, Jeowa ũriɗapeɗa ichi kaita nureaɗayua.