LESION 09
Ʉtaa wiɗiiruuba Dachi Akõre jʉ̃kaa nibabii ɓua
¿Bichia nesita kuɓuka junebenaba bichia mau aseyu jarabudau biʼia wãyua? ¿Bichia kʉ̃risiabaree kosa biʼia ase kʉ̃riaburuu, maamina adua saka kawayu? ¿Bichi nomaa akʉ ɓue? ¿Bichi Jeowa kaita niba kʉ̃ria ɓuka? Ʉtaa wiɗiburuuba aiɗai ɓua nau joma. Maamina, ¿mau saka wiɗiyuba? ¿Dachi Akõreba ũribarika jomaurã ʉtaa wiɗibudau? ¿Kãare asei ɓua Dachi Akõreba ũriyua bichia ʉtaa wiɗiburuuɗe? Kawaɗaika.
1. ¿Kaimaa ʉtaa wiɗiɗai ɓua? ¿Kãareɗebena ʉtaa wiɗiɗai ɓua?
Jesusba kawabiaɗaa Dachi Akõre ʉtʉ ɓuumaaburu wiɗiɗayu. Ichi ʉtaa wiɗibachia Jeowamaa. Naeɗeeɗa ichia naka jaraɗa baɗa: “Naka ʉtaa wiɗíbaɗa: ‘Dai Akõre ʉtʉ bajãaɗe ɓuu...ʼ” (Mateo 6:9). Jeowamaa ʉtaa wiɗiburuuba, aude kaita panee ɓua.
Dachia ʉtaa wiɗiburuuɗe jaraɗai ɓua ãrĩãɗebena. Maka ɓumina, dachia kʉ̃ria panuubʉrã Dachi Akõreba ũriyua, wiɗiɗai ɓua chi ichia kʉ̃ria ɓuudu. Bibliaba naka jara ɓuu: “Dachi Akõreba kʉ̃ria ɓuu kĩra dachiba ʉtaa iɗiiduubʉrã, kuitaa panuu ichiba ũribarii” (1 Juan 5:14). Jesusba kawabiaɗa kãareɗebena ʉtaa wiɗiɗai ɓua (Mateo 6:9-13 leas). Dachirã baita mauɗe junebenarã baita biɗa, maabea ara kiruma aɗayua dachirã baita ase niiɗebena.
2. ¿Saka wiɗiɗai ɓua?
Bibliaba jara ɓuu naka aseɗai ɓua: “Jarásturu [Dachi Akõremaa] machi corazonɗe eɗare kuɓuu” (Salmo 62:8). Dachi Akõremaa ʉtaa wiɗibudauɗe jara kʉ̃ria panua dachi corazón eɗare kuɓuu. Dachia ʉtaa wiɗibudauɗe jĩwa jaraɗapeɗa maebʉrã chũpea biɗa jaraɗai ɓua, aka nuɓuuɗe, õdarrare kuɓuuɗe, aka ɓuuɗe, maka ɓumina respetoɗeburu. Wiɗiɗai ɓua barikiau horaɗe mauɗe dachi ãi wãaduuɗe biɗa.
3. ¿Saka panaubaraa Dachi Akõreba dachia ʉtaa wiɗiburuuɗe?
Ichia ichi Beɗea, Bibliaɗeeba panaubaria dachia kawa kʉ̃ria niiɗebena. Biblia leaburuuba “biʼia kʉ̃risiabibarii chi adua niimaa” (Salmo 19:7; Santiago 1:5 leas). Dachi problema baraa kuɓuuɗe Jeowaba dachi kʉ̃risia biʼia sentibibaria. Mauɗe ichi ome traja nureerãmaa aiɗabibarii dachia nesitabudauɗe.
AUDE KAWABA
Kawaɗaika saka wiɗiɗayu dachi corazonɗeeba chi Jeowamaa bustabarii kĩra, maabea kawaba sakayua biʼia ɓuu ʉtaa wiɗiyu.
4. Dachi Akõremaa wiɗiiruuɗe barikia wiɗiɗaabayua
¿Kãare aseɗai ɓua Dachi Akõreba ũriyua dachia wiɗiburuuɗe? BIDEO ochiábaɗa.
Jeowaba kʉ̃ria nii ichimaaburu wiɗiɗayu. Salmo 65:2 leaɗapeɗa, mambea nau ʉ̃rʉbena beɗeasturu:
¿Bichia kʉ̃risia ɓuka Dachi Akõreba kʉ̃ria ɓuu bichia wiɗiyua? ¿Sakayua jãka kʉ̃risia ɓua?
Dachia kʉ̃ria panuubʉrã Dachi Akõreba dachia ʉtaa wiɗiburuu ũriyua, asebaraaɗai ichia jara ɓuu. Miqueas 3:4 mauɗe 1 Pedro 3:12 leaɗapeɗa, mambea nau ʉ̃rʉbena beɗeasturu:
¿Kãare kãribaiba Dachi Akõreba ũriyua dachia ʉtaa wiɗibudauɗe?
Chi soldaorã bando omeɗebenaba ʉtaa wiɗibadaubʉrã ãchi batalla kanaɗayua. ¿Dachi Akõreba ũriibaaka ãchia ʉtaa wiɗi panuu?
5. Dachia Jeowamaa ʉtaa wiɗiɗayua dachi corazonɗeeba
Ẽbẽra ãrĩã ʉrsabadau ãchi kʉ̃risiaɗeeba, jãu jãkaburu kawabipeɗaaɗa bẽrã. ¿Jãka Dachi Akõreba bustabaraaka ʉrsaɗayu? Mateo 6:7 leaɗapeɗa, mambea nau ʉ̃rʉbena beɗeasturu:
¿Kãare aseɗai ɓua ara aɓa ɓuu waa ʉtaa wiɗiɗaamaaba?
Bichia noremaacha kĩrawãrea ɓuu kʉ̃risias bichiɗebena maabea Jeowamaa ara kiruma aba mau kakua. Nau aserã semanaɗe, bichia beɗeasia makarã 7 kosarã diwara ɓeeɗebena, bichia ʉtaa wiɗiiruuɗe naarãra ara aɓa ɓuu jarawẽa waya.
Akõre bia kiɗiiba kʉ̃riabaria ichi warr joma jarayua ichi corazonɗebena. Jeowa biɗa kʉ̃riabaria dachia ʉtaa wiɗiiruu dachi corazonɗeeba.
6. Ʉtaa wiɗiburuu biʼia ãrĩã ɓua
Dachi problema baraa ɓuu ʉtaa wiɗiiruuɗe, ¿sakayua dachi chaarea sentibaraa? BIDEO ochiábaɗa.
Bibliaba jara ɓuu naeɗe dachi biʼiawẽe senti nibaɗa, jãabera biʼia senti nia ʉtaa wiɗiiruuba. Filipenses 4:6, 7 leaɗapeɗa, mambea nau ʉ̃rʉbena beɗeasturu:
Bariara chi ʉtaa wiɗiiruuba problema akabawẽe siɗa, ¿sakayua biʼia ɓua ʉtaa wiɗiyu Jeowamaa?
¿Kãareɗebena wiɗi kʉ̃ria ɓua?
¿Bichia kuitaa ɓoose?
Beɗea amén abadau jãu “maka ɓuai” a ɓua, makawẽebʉrã “ariɗe ɓuai” a ɓua. Naeɗeeɗa “maka ɓuai” abadau ʉtaa wiɗiɗakare (1 Crónicas 16:36).
7. Bichi tiempo jʉrʉba ʉtaa wiɗii baita
Ɓesesɗe dachirã ãrĩãdu okupa duanabarii, mauba ʉtaa wiɗiɗai baɗa embolatabadaa. ¿Jesús baita biʼia ɓoosee ʉtaa wiɗiyu? Mateo 14:23 mauɗe Marcos 1:35 leaɗapeɗa, mambea nau ʉ̃rʉbena beɗeasturu:
¿Kãare asebachia Jesusba tiempo jʉrʉyua ʉtaa wiɗii baita?
¿Bichia kãare momentoɗe ʉtaa wiɗii ɓua Dachi Akõremaa?
CHI NUREE ẼBẼRARÃBA NAKA JARABADAA: “Dachi Akõreba ũribarii chi ʉtaa wiɗibudau kapunia beɗeaɗeburu”.
¿Sakaiba bichia?
NAU KAWASIƊAA
Ʉtaa wiɗiiruu corazonɗeeba Dachi Akõre ome kaita nibabibaria. Maabea dachi biʼia sentibibaria chaarea nibaɗe wãyua chi Jeowaba wiɗi ɓuu asei baita.
Waya berreaɗaika
¿Kaimaaburu ʉtaa wiɗiɗayuba?
¿Saka wiɗiɗaiba?
¿Sakayua biʼia ɓua ʉtaa wiɗiyu?
NAU OCHIAS MAUCHABURU KAWAYUA
Kawaba chi panau kuɓuu ẽbẽra ãrĩãba wiɗibadau chi ʉtaa wiɗiburuuɗebena.
“7 wiɗi ɓee chi ʉtaa wiɗiiruu ʉ̃rʉbena” (Chi Kartaba, 1 octubreɗe 2010ɗebena)
Leachãu sakayua ariɗe ɓuu bichia ʉtaa wiɗiiruu mauɗe saka aude biʼia mau asei ɓua.
“¿Sakayua biʼia ãrĩã ɓua ʉtaa wiɗii?” (Artículo jw.org ɗebena)
Ochiaba jari Bibliaba jara ɓuu kaimaa ʉtaa wiɗiiruuɗebena.
“¿Ariɗe ɓue dachirãba santorã abaɗaurãmaa wiɗiɗayu?” (Artículo jw.org ɗebena)
Ochiachãu nau bideo kariɗayua jaraibʉrã sama mauɗe sakaeɗe ʉtaa wiɗiyu.