LESION 22
¿Bichia saka jaradeai ɓua chi beɗea biarã?
Chi biawãrabena kuɓuu Bibliaɗe kawaburuuɗe, bichia kʉ̃risiai ɓua: “¡Jomaurãba kuitaaɗai ɓua nauɗebena!”. Maarã makabʉ. Maka ɓumina, bichi perai ɓuu waabenarãmaa jarayu chi bichia kawamaa ɓuuɗebena. Ochiaɗaika bichi saka ida ɓui ɓuu jãu jãka pera ɓuuɗebena maabea kʉ̃risiayua kĩrajʉʉ ãrĩã waabenarãmaa jarai baita chi beɗea biarãɗebena chi Bibliaɗe jara ɓuu.
1. ¿Saka nebʉrʉi ɓua waarãmaa bʉa kawa ɓuuɗebena?
Chi Jesús kaaɗe ãda nureerãba naka jarapeɗaaɗaa: “Chi daiba unupeɗaaɗa mauɗe ũripeɗaaɗa jaraɗai poyaa ida ɓuɗaabai” (Hechos 4:20). Ãchirãba chi biawãra kawapeɗaaɗa kʉ̃ria duanasiiɗeeba, jara kʉ̃ria panasia jomaurãmaa. ¿Bichis ara jãka senti ɓuka? Jʉrʉba saka beɗeayu respeto iɗaa bichi deɗabenarã mauɗe amikorãmaa bichia kawa ɓuuɗebena (Colosenses 4:6 leas).
Bichi saka erdaui ɓua beɗeayua
Beɗeaburuuɗe deɗabena ome, naka erdauba beɗeayu Bibliaɗebena “Cha nau semana kawasii biʼia ãrĩã ɓuuɗebena”.
Bichi amiko ẽpermo kuɓuuɗe, maebʉrã preokupa kuɓuuɗe, texto Bibliaɗebena unubiba biʼia sentibii baita.
Bichi baare traja duanuurãba wiɗibudauɗe saka wãsii chi saɗoɗe mauɗe misaɗe, nebʉrʉs ɓaʼãra kawaɗa baɗa chi Bibliaɗebena maebʉrã ɓaʼãra kawaɗa baɗa reunión konkrekasionɗebena.
Kawabise bichi amikorã chi sitio internetɗebena jw.org.
Waabenarã imibiba bichi ome Bibliaɗebena kawabiyua, mauɗe unubise saka wiɗiyu ichimaa Bibliaɗebena kawabii baita jw.org ɗe.
2. ¿Kãarea bia ɓua kʉ̃risiayu jaradeaɗe wãi konkrekasion ome?
Chi Jesús kaaɗe ãda nureerã beɗeabachiɗaa beɗea biarã ʉ̃rʉbena chi unubadaurã ome. Mauɗe Jesusba ãchi “naa omeemea bʉikasii puurucha wãɗamera” jaradeɗakaɗe mama aria (Lucas 10:1). Ãchi ordenɗeburu jaradeɗakaɗe wãsiɗau bẽrã, ẽbẽrarã ãrĩãrãba ũrisiɗaa chi beɗea biarã. Maabea, chi Jesús kaaɗe ãda nureerã kĩrajʉʉ ãrĩã wãuchiɗau ãbua jaradeɗekaɗe wãurisiɗauɗe (Lucas 10:17). ¿Saka kawaiba bichi siɗa ara jãka wãi ɓuubʉrã jaradeɗekaɗe?
AUDE KAWABA
Ochiaɗaika kãare asei ɓuu bichi pera ɓuu ida ɓuyua maabea kĩrajʉʉ jaradeɗekayua chi beɗea biarã.
3. Jeowa bichi baare ɓooyua
Chi nureeba jaradea kʉ̃ria nureerã preokupa panuu ãchi ome kĩruɗai ɓuuɗeeba maebʉrã junebenaba ãchi ʉ̃rʉbena ãyaa kʉ̃risiaɗai ɓuuɗeeba.
Bichia kʉ̃risiaburuuɗe junebenamaa jaraburuu bichia kawamaa ɓuuɗebena, ¿perabarika o makawẽebaa? ¿Sakayua?
BIDEO ochiaɗapeɗa, mambea nau ʉ̃rʉbena beɗeasturu:
¿Saka ida ɓupeɗaaɗaba chi kũudrãarã pera panaɗa baɗa chi bideoɗebena?
Isaías 41:10 leaɗapeɗa, mambea nau ʉ̃rʉbena beɗeasturu:
¿Sakayua ʉtaa wiɗiiba bichi perabariibʉrã jaradeaɗe wãyu?
¿Bichia kuitaa ɓoosee?
Iɗibea ãrĩã chi Jeowa ɗebena Jaranũrẽrã kʉ̃risiapeɗaaɗa baɗa ãchia poyaa jaradeaɗaabai ɓuu. Mukĩra chi trʉ̃ Sergey ichi senti ɓoosii ichi baleswẽa nibaɗa mauɗe poyaawẽebai ɓoosii beɗeayu ẽbẽra ome. Maka ɓumina día aɓa kawa koɓeesii chi Bibliaɗebena. Ichia naka jara ɓua: “Mʉ pera nibaɗa basmina, mʉ ẽpesa koɓeeɗa beɗeayua waabenarã ome chi mʉa kawamaa ɓuuɗebena. Naa kʉ̃risia ɓooɗa baɗa mʉ baleswẽa nii, jãabera kĩrajʉʉ nibapeɗa mauɗe mʉ corazonɗe eɗa ɓeeɗa baɗa mʉa kawasii chi Bibliaɗebena”.
4. Respeto iɗaa beɗea nibaba
Junebenamaa jaradeai naeɗe kʉ̃risiaba chi kãare jaradeayuɗebena, mauɗe chi saka jaradeayu siɗa. 2 Timoteo 2:24 mauɗe Tito 3:2 leaɗapeɗa, mambea nau ʉ̃rʉbena beɗeasturu:
¿Saka beɗeai ɓua Bibliaɗebena waabenarã ome chi naarã versiculorãɗe jara kuɓuu kĩra?
Bichi deɗabena maebʉrã amiko bustaka ɓuu niibʉrã. ¿Saka ai ɓua? ¿Kãare aseebai ɓua?
¿Sakayua respeto iɗaa beɗeaɗai ɓua ãchirã ome jarai baɗabaarã ãchia kãareɗe kereaɗayu ʉ̃rʉbena?
5. Dachi beɗea biarãɗebena beɗearuuba kĩrajʉʉ ãrĩã paneebarii
Jeowaba Jesús bʉesia jaradeɗekayua chi beɗea biarã ɓeeɗebena. ¿Saka unuɗaba Jesusba nau trajoɗebena? Juan 4:34 leaɗapeɗa, mambea nau ʉ̃rʉbena beɗeasturu:
Chiko biʼia ɓee koburuuba dachi chokae nibabi ɓua maabea kĩrajʉʉbibaria. ¿Sakayua Jesusba jaraɗa basaa Dachi Akõreba jara ɓuu aseyu jari waabenarãmaa jaradeɗakayu, mau kĩrabara chiko biʼia kooruu kĩraka ɓuu?
Bichi baita, ¿sakayua kĩrajʉʉ nibai ɓua jaradeaburuuɗe chi beɗea biʼia ɓeeɗebena waabenarãmaa?
Bichia nau asei ɓua
Chi reunión semanaɗebena, ochiaba saka ẽpesayua beɗea adauburuuɗe.
Beɗeáse chi kawabi kuɓuu ome mau kãare asei ɓuu chi reunión semanaɗebenaɗe chi programaɗe kuɓuɗayua. Discurso deabudau mauba aude kawabi ɓua waabenarãmaa jaradeɗekai baita chi kawamaa ɓuuɗebena.
Nau libroɗe “Chi nuree ẽbẽrarãba naka jarabadaa” a ɓuuɗe o maebʉrã “Chi nuree ẽbẽrarãba naka wiɗibadaa” a ɓeeɗe jʉrʉpeɗa ensayas saka jarayu ẽbẽrarãba wiɗibudauɗe.
CHI NUREE ẼBẼRARÃBA NAKA WIƊIBADAA: “Yataɗe basiita unuwẽa nii, ¿saka kãrima?”.
¿Chi niiba naka jaraburuubʉrã, bichia saka jarai ɓua chi kawamaa ɓuu Bibliaɗebena?
NAU KAWASIƊAA
Dachia chi beɗea biarã jaraburuuba dachi ãrĩã kĩrajʉʉbibaria, dachi ẽpesa beɗeaburuuɗe chaarea ãrĩã ɓuukau bichia kʉ̃risiai ɓuu kĩra.
Waya berreaɗaika
¿Kãareba bichi jaradea kʉ̃riabi ɓua chi beɗea biarãɗebena?
¿Saka bichi beɗeai ɓua respeto iɗaa?
¿Kãare asei ɓua chi perabarii ida ɓuyua?
NAU OCHIAS MAUCHABURU KAWAYUA
Ochiaba chi kimarebena fácil ɓuu jaradeai baita chi jw.org ɗe.
Kawaba bichi saka nibaiba biʼia jaradeayua chi beɗea biʼia ɓeeɗebena.
Unuse Bibliaba nebʉrʉ ɓuu ʉ̃rʉbena jãuba dachi chaarea nibabi ɓua jaradeɗekai baita dachirã kũudrãarã nuree adua.
Ochiáse saka beɗeayu Bibliaɗebena bichi deɗabenarã baare abiɗa kawa adua nureerã Jeowaɗebena.