LESION 47
¿Bichi biʼia koɓee ɓue bautizai baita?
Bichia Bibliaɗebena kawamaa ɓuuɗeeba, ãrĩãdu Jeowaɗebena kawa koɓeesii. Mauɗe bichi naeɗe nibaɗa kĩra nibakaa, chi bichia kawaburuuba Bibliaɗebena ãrĩãdu aiɗa ɓuuɗeeba. Maka ɓumina bichi wabiɗa Jeowa ome comprometepeɗa bautizawẽa koɓeeruubʉrã, mau aseyua baraa chi bichimaa idaarabiwẽeɗeeba. Nau lesionɗe beɗeabudaa kãare asepeɗaaɗa chi Bibliaɗebena kawabadaurãba bautizaɗayua mauɗe chi bichia asei ɓuu ara jãarã kĩra aseyua ʉ̃rʉbena.
1. ¿Bichia Bibliaɗebena ãrĩã kawabaraayue bautizai naeɗe?
Bichi bautizayua, “chi biawãra ɓuuɗebena biʼia kawayua” (1 Timoteo 2:4). Maka ɓumina bichi bautizai naeɗe joma wiɗi ɓee Bibliaɗebena panaui nesitawẽe. Chi naeɗebena bautizapeɗaaɗarãba wabiɗa kawamaa duanuu (Colosenses 1:9, 10). Maka ɓumina kawabaraai: chi Bibliaba jaradea ɓuu aude biʼia ɓuuɗebena. Chi dawaraurã konkrekasionɗebenarãba bichi ome beɗeaɗai ɓuu bichia Bibliaɗebena ariɗe kawa ɓuu kuitaa.
2. ¿Kãare aseɗaima bautizai naeɗe?
Chi Bibliaba jara ɓuu: “Arrepentipeɗa maabea chi kachirua ida ɓústuru” (Hechos 3:19 leas). Nadu bichia asei ɓuu bautizai naeɗe. Maamina ¿mau sakaba? Bichi ãrĩã nomaa aka ɓee ɓuu chi pekao asesiiɗeeba Jeowamaa perdón iɗi ɓuu. Mauɗe chi kachirua ɓuuɗebena akawa asewẽa koɓeepeɗa, Jeowaba kʉ̃ria ɓuu kĩra nibayua. Maubapeɗa, bichi reuniorã konkrekasionɗebenarãmaa wã koɓee ɓua mauɗe publicador bautizawẽa nii baarua waabenarãmaa jaradeɗekayua.
3. ¿Sakayua peraabaiba bautizayua?
Chi nuree kʉ̃risiabadaa ãchi jipaburu poyaa ãdaɗai ɓuu Jeowa ome, ãchia naeɗe jarasiɗau kĩra mauɗeeba perabadaa. Bichi ãyaa asei ɓuu, ara jãu kĩraka chi mukĩrarã wẽrarã jipa nuree Bibliaɗe jara ɓuuɗebena. Makasmina Jeowaba kuitaa ɓuu ichi baita traja nureerã chi jipa ɓuudu noremaacha poyaa aseɗakaa (Salmo 103:13, 14 leas). Ichi kĩrajʉʉ ɓeeyua bichia asei ɓuudu aseeruubʉrã. Mauɗe Jeowaba bichi aiɗayua. Mauɗeeba ichia jara ɓua “wãʼãe bayua chi Dachi Akõreba kʉ̃riaɗai baɗa idaarabiibayua” (Romanos 8:38, 39 leas).
AUDE KAWABA
Kawaɗaika omeɗebenaba bichi aiɗayua bautizai baita: Jeowaɗebena aude kawaburuuba mauɗe ichia aiɗa niiɗe ijãaburuuba.
4. Maucha kawaba Jeowaɗebena
¿Ãrĩã Jeowaɗebena kawa nesita ɓubaaka bautizayu naeɗe? Bichia Jeowaɗebena kawai ɓuu ichi kʉ̃ria ɓeepeɗa ũri ɓeeyua. BIDEO ochiábaɗa kawayua saka mau ase panuu chi Bibliaɗebena kawabadaurãba joma nau iujãaɗe. Mambea nau ʉ̃rʉbena beɗeasturu:
Bideoɗeebara, ¿kãareba aiɗasaa chi ɓee Bibliaɗebena kawabadaurã biʼia koɓeepeɗa bautizaɗayua?
Romanos 12:2 leaɗapeɗa, mambea nau ʉ̃rʉbena beɗeasturu:
¿Bichia kereawẽa ɓue chi Bibliaba jaradea ɓuuɗe? ¿Ariɗe kerea ɓuka chi Jeowa ɗebena Jaranũrẽ chi biawãrara ɓuu jaradea panuu?
Ijãawẽa ɓuubʉrã, ¿kãare asei ɓuu?
5. Berekaba naa kãribai baita
Jomaurãba problema bara panuu, Jeowa ome comprometepeɗa bautizayua kʉ̃risiaburuuɗe. Nauɗebena kawayua, BIDEO ochiábaɗa. Mambea nau ʉ̃rʉbena beɗeasturu:
¿Kãare asesaa Narangerelba Jeowa baita trajayua?
¿Saka Jeowa kʉ̃riaruuba aiɗasaa naaburu kãribayua?
Proverbios 29:25 mauɗe 2 Timoteo 1:7 leaɗapeɗa, mambea nau ʉ̃rʉbena beɗeasturu:
¿Kaiba dachirã kĩra ʉɓʉa nureabi ɓua naaburu kãribaɗai baita?
6. Ariɗe kuitaaba Jeowaba bichi aiɗaaruu
Jeowaba bichi aiɗayua asei baita chi ichia kʉ̃ria ɓuu. BIDEO ochiaɗapeɗa, mambea nau ʉ̃rʉbena beɗeasturu:
¿Sakayua chi Bibliaɗebena kawa nii bideoɗebena bautiza koɓeebasia?
¿Kãareɗe aude kereabisii Jeowaɗe?
Isaías 41:10, 13 leaɗapeɗa, mambea nau ʉ̃rʉbena beɗeasturu:
¿Sakayua bichia ariɗe kuitaa ɓua bichi Jeowa ome comprometesiiɗe ara jãka nibai ɓuu?
7. Jeowaba bichi kʉ̃riaburuuba kĩrajʉʉ nibaba
Jeowaba bichi kʉ̃ria ɓuu, nauɗebena kʉ̃risia ɓuuɗeeba ara kiruma ai kʉ̃riaburuu mauɗe ichi baita traja koɓeeruu kʉ̃riayua. Salmo 40:5 leaɗapeɗa, mambea nau ʉ̃rʉbena beɗeasturu:
¿Chi Jeowaba bichimaa dea ɓuuɗebena sãu aude busta ɓuu?
Chi profeta Jeremiasba Jeowa mauɗe chi ichia jarasia ãrĩãdu kʉ̃ria ɓoosia, mauɗe kĩrajʉʉ ɓeesia chi Jeowa trʉ̃ odoesiiɗeeba. Ichia naka jarasii: “Bichi beɗearã maarãba mʉ corazón kĩrajʉʉbisiɗau, mʉa bichi trʉ̃ odoe ɓuuɗeeba, Akõre Jeowa” (Jeremías 15:16). Maabea panause naarã wiɗi ɓee:
¿Sakayua kĩrawãrea ãrĩã ɓua Jeowa ɗebena Jara nii bayua?
¿Bichia bautiza kʉ̃ria ɓuu Jeowa ɗebena Jara nii bayua?
¿Kãareba bichi idaarabiwẽma?
¿Kãare asei ɓua bichia bautizayua?
CHI NUREE ẼBẼRARÃBA NAKA JARABADAA: “Mʉ jipaburu poyaa ãdaabai ɓuu Jeowa ome, ara jãka chi Jeowa ɗebena Jaranũrẽ bautizapeɗaaɗarãba asebadau kĩra, mauɗeeba perabarii”.
¿Bichia ara mau kĩra kʉ̃risia ɓue?
NAU KAWASIƊAA
Jeowaba bichi aiɗa ɓuuɗeeba naa kãribai ɓua bautizayua.
Waya berreaɗaika
¿Bichia Bibliaɗebena ãrĩã kawabaraayue bautizai naeɗe?
¿Kãare aseɗaima bautizai naeɗe?
¿Sakayua peraabaiba bautizayua?
NAU OCHIAS MAUCHABURU KAWAYUA
Kʉ̃risiaba sakayua bichi mau asei ɓua.
“¿Bichi biʼia koɓee ɓue bautizai baita?” (Chi Kartaba, marzo 2020ɗebena)
Kawaba kãare asei ɓuu apii ɓeemaaba naaburu kãribayua.
“¿Kãareba mʉ idaarabiwẽe bautizayua?” (Chi Kartaba, marzo 2019ɗebena)
Ochiaba saka chi mukĩra asesii naa kãribapeɗa bautizayua.
Aɓaeɗeeɗa, mukĩra ichi trʉ̃ Ataa kawawẽa ɓeesia bautizai baita. Kawaba kãareba aiɗasii mau biʼia ãrĩã ɓuu aseyua.