Jʉrʉse amiko meraaɗai baita biʼia nureedu

Chi amiko biʼia nureerãba dachi biʼia kĩrajʉʉbibadau. Mauɗe dachi problema baraa ɓuuɗe, ãchia dachi aiɗabadau. Maka ɓumina, dachia ochiaɗai Bibliaba jara ɓuuɗeebara, jomaurã ẽbẽrarã amiko biʼia nureewẽe. Makarã, ¿bichia saka jʉrʉi ɓua chi amikorã? Ochiáse cha nama ekare ɓʉ kuɓuu.

1. ¿Kãare asebibadaa amikorãba?

Ɓesesɗe dachi waabena ẽbẽra jʉ̃kaa duaneesirã o maebʉrã mau ome ãrĩã berreasiɗarã celularɗeeba, chi ẽbẽra ichi nibabarii kĩrachaa ara mau kĩra nureaɗai ɓua. Bibliaba naka jara ɓua: “Chi biʼia kʉ̃risiabadau baare ãda ɓuubʉrã makarã mau siɗa biʼia kʉ̃risia kerai, maka ɓumina biʼia kʉ̃risiaɗakaurã [ẽbẽrarã Jeowa kʉ̃riaɗakaurã] baare koɓeesirã biʼiawẽe wãi” (Proverbios 13:20). Chi amikorã Jeowa ũriɗapeɗa kʉ̃riabadaurã maarãba aiɗaɗai panua ichi ara kaita panaɗai baita, mauɗe kʉ̃risiaɗapeɗa biʼia aseɗayua. Maamina, konkrekasionɗe nibakau ome ãrĩã meraa niibʉrã, Jeowa ida ɓui ɓua. Mauɗeeba Bibliaba jara ɓua dachia amiko jʉrʉɗai baita ãrĩãdu ochiaɗai ɓua naaburu kuitaa panaɗai ɓua. Dachi amikorã biɗa Dachi Akõre kʉ̃riabadauɗe, ãchi biʼia wãɗai ɓua mauɗe dachirã siɗa. Dachia nau beɗea ũriɗai ɓua: “Mauɗeeba chiya kĩrajʉ́sturu. Mauɗe chiya aiɗásturu biʼia ijãaɗai baita machiba wau panuu kĩra” (1 Tesalonicenses 5:​11).

2. ¿Jeowaba kʉ̃ria ɓue bichia barikiau amiko jʉrʉi baita?

Jeowaba jʉrʉbarii chi amikorã biʼiaurãdu. “Ichi ara kaita ɓoobarii ichi ome jipa waa nuree” (Proverbios 3:​32). ¿Jeowaba saka kʉ̃risiabaraa chi ichi ʉ̃rʉbena kʉ̃ria nureewẽe ome meraa duaneesirã? ¡Ichi ãrĩã aburri koɓeei ɓua! (Santiago 4:4 leas). Maka ɓumina, dachia ida kuɓuusiɗarã amiko miadaa nuree, maabea ichi ome ara kaita kopaneeɗai mauɗe ichi kʉ̃riabadau ome biɗa meraa panuubʉrã, ichi ãrĩã kĩrajʉʉ koɓeei ɓua mauɗe ichi amiko nibai ɓua dachirã ome (Salmo 15:​1-4).

AUDE KAWABA

3. Kaubaa chi amikorã miadaa nuree ome

Chi kõpaero miadaa ɓeerãba Jeowa kʉ̃riaɗapeɗa ũriɗakau. BIDEO ochiaɗapeɗa, mambea nau ʉ̃rʉbena beɗeasturu:

BIDEO: Saka ida ɓui chi kõpaero miadaa ɓee (6:17)

• ¿Saka ira nureaɗai ɓua chi kõpaero miadaa nuree dachia kawawẽa niiɗe?

1 Corintios 15:33 leaɗapeɗa, mambea nau ʉ̃rʉbena beɗeasturu:

• Bichi baita, ¿chi sãu ẽbẽrarã kõpaero miadaa ɓooi ɓua? ¿Sakayua?

Salmo 119:63 leaɗapeɗa, mambea nau ʉ̃rʉbena beɗeasturu:

• ¿Saka ɓooi ɓua chi amiko bichiɗe?

4. Chi ẽbẽrarã diwaraa nuremina dachi ãchi ome amiko nureaɗai ɓua

Bibliaba jara ɓua David Jonatán ʉ̃rʉbena, maarã puuru Israel yataɗeeɗebena basiɗau. Aɓa chõra ɓoopeɗa mauɗe aɓabena kũudrãa nimina, ãchi amikorã ãbuarãa nureasii. 1 Samuel 18:1 leaɗapeɗa, mambea nau ʉ̃rʉbena beɗeasturu:

• ¿Mʉ kũudrãa o chõra niibʉrã chi amiko mʉchi kĩra nibai ɓue, o dachia chi nejarra ãrĩã ira ɓuubʉrã mauɗe chi ẽbẽra aɓa akawa chi nejarra wãʼãe ɓuubʉrã, dachi mau ome amiko ɓooi ɓue?

Romanos 1:11, 12 leaɗapeɗa, mambea nau ʉ̃rʉbena beɗeasturu:

• ¿Chi amikorã Jeowa kʉ̃ria nureabariirã maarãba saka biʼia jarabadaa ãchi chiya kĩrajʉʉ nureai baita?

¿Saka unusaa amikorã kũudrãa aɓa niiba kawawẽeɗe? BIDEO ochiaɗapeɗa, mambea nau ʉ̃rʉbena beɗeasturu:

BIDEO: Dachia kawawẽeɗe amiko unubaria (5:06)

• ¿Sakayua Akil akõre nawe baare preokupa ãrĩã nureasiɗaa ichi warrba amikorã escuelaɗe ira ɓooɗa ʉ̃rʉbena?

• ¿Sakayua Akil chi jãu amikorã ome ɓoo kʉ̃ria ɓooɗa aɓaeɗeeɗa?

• ¿Ichia kãare ase ɓoosaa ichi du kĩra nomaa nibaamaaba?

5. Dachia saka ira panaɗai ɓua chi amikorã biʼia nuree

BIDEO: ¿Kai amiko biʼia kiɗima? (4:14)

Proverbios 18:24 mauɗe 27:17 leaɗapeɗa, mambea nau ʉ̃rʉbena beɗeasturu:

• ¿Saka chiya aiɗabadaa chi amikorã biarã?

• ¿Bichia ira ɓue amiko biʼia nuree Proverbiosɗe jara ɓuu kĩrachaa? Makawẽebʉrã, ¿kãare asei ɓua chi amikorã biʼiau unui baita?

Filipenses 2:4 leaɗapeɗa, mambea nau ʉ̃rʉbena beɗeasturu:

• Amikorã biʼia nuree ira ɓooi baita, bichi siɗa amiko biʼia kiɗii bayua. ¿Saka maka nibai ɓua?

NAU KAWASIƊAA

Dachia chi amikorã biʼiaurãdu jʉrʉsiɗarã, biʼia wãɗai ɓua mauɗe Jeowa kĩrajʉʉbibadaa.

Waya berreaɗaika

• ¿Sakayua Jeowaba kʉ̃riakaa dachia barikiau amiko jʉrʉɗai baita?

• ¿Kairã ome poyaa meraaɗaabaiba?

• ¿Kãare aseɗai ɓua dachi amikorã ãbuarãa chibura nureaɗai baita?

NAU OCHIAS MAUCHABURU KAWAYUA

Kawaba saka amikorã biʼia nureeba aiɗaɗai ɓuu dachi ãrĩã problema chaarea ɓuuɗe.

“Amikorã ãbuarãa chibura nureaɗai chi miadaa barau akabai naeɗe” (Chi Kartaba, noviembre 2019ɗebena)

Kawa ochiáse kãare asei ɓua amikorã biʼia nuree ira ɓooi baita.

“¿Saka nurea chi amikorã biarã?” (Chi kũudrãarã awẽrarã omeba wiɗi panuu. Chi panau ɓee [Libro 1], capítulo 8)

¿Kãare kuitaabaraaiba bichia chi amikorã internetɗe duanuu ʉ̃rʉbena?

Kaubaa internetɗe ẽbẽra ome meraaburuuɗe (4:12)

Leas chi nebʉrʉ ɓuu “Mʉa akõre ira kʉ̃ria ɓooɗa”, jãuɗe jara ɓuu sakayua ɓuisaa ichi amikorã.

“Ãchi nibapeɗaaɗabaɗa kambiasia Bibliaɗeeba” (Chi Kartaba, 1 abrilɗe 2012ɗebena)