Chi “esclavo jipa nibapeɗa biʼia kʉ̃risia” ɓuuba ase ɓuu

Jesús “chibari konkrekasion” cristianorãɗebenabʉ (Efesios 5:23). Iɗibea, ichia chi “esclavo jipa nibapeɗa biʼia kʉ̃risia ɓuu” adau ɓua, ʉtʉ bajãareeba jaradeɗeka ua ɓooi baita ichi kaaɗe ãda nureabadaurãmaa nama iujãaɗe (Mateo 24:45 leas). Mau “esclavo” Jesusburu trʉ̃ jaraɗa basii, mauɗeeba jãu esclavoba dachirã ua ɓooi ɓuu. Maka ɓuu siɗa, ara jãka bari traja ɓua Cristo baita maabea ichi ãbarã aiɗa nia. ¿Kaiba mau esclavo? ¿Saka ochia ua ɓua dachirã?

1. ¿Kaiba mau “chi esclavo jipa nibapeɗa biʼia kʉ̃risia ɓuu”?

Jeowaba mukĩra makawẽebʉrã ɓaʼãraurã mukĩrarãɗeeba jaradeɗeka ua ɓua ichi puurumaa (Malaquías 2:7; Hebreos 1:1). Jesús biuɗakaɗe, chi apostolerã mauɗe dawaraurã Jerusalenɗebenarãburu jaradeɗeka ua panasia chi konkrekasionmaa (Hechos 15:2). Ara jãka, jãu diaɗe asepeɗaaɗa kĩra, iɗibea biɗa ɓaʼãraurã dawaraurã panuu, jarai bʉrã Chi Junta Jeowa ɗebena Jaranũrẽrãɗe, jãarãba jaradea panua Dachi Akõre ʉ̃rʉbena, kĩrabara chiko dea duanuu kĩra mauɗe waarãmaa jaradeɗekaɗai baita uaɗo panua. Chi naarãdu “chi esclavo jipa nibapeɗa biʼia kʉ̃risia” ɓuubʉ “mau chibariba [Jesusba] dea ɓuiɗa baɗa” jãu trajo (Mateo 24:45a). Joma Chi Juntaɗebenarã jʉrʉ adaupeɗaaɗa basia Jeowa Jauriɗeeba ʉtʉ bajãaɗe duaneeɗayua mauɗe ãchia espera duanua chi día kobernaɗai baita Cristo ome ichi Kobierno bajãaɗebenaɗe, ãchi kakua nama iujãaɗe biuɗakare.

2. ¿Saka jaradeɗeka ɓua chi esclavo jipa niiba kĩrabara chiko dea ɓuu kĩra?

Jesusba jaraɗa baɗa chi esclavo jipa niiba “chiko deɗekayu [waabenarã cristianorãmaa] chi día nee kuɓuuɗeburu” (Mateo 24:45b). Ara jãka chiko dachia ko duanuuba kakua bia ua ɓuu kĩra, dachirãba Dachi Akõre Beɗeaɗebena kawabudauba chaareabi ɓua Jeowa ɓuiɗaamaaba mauɗe Jesusba trajo deɗekaɗa baɗa aseɗai baita (1 Timoteo 4:6). Chi nau chiko kĩraka ɓuu dachirãmaa deɗeka duanuu reuniorãɗe, asamblearãɗe ũribudauɗe mauɗe chi kartarã bideorã baare Bibliaɗebena unubi ɓee ochiabudauɗe. Nauba dachia ãrĩãdu kauwa ũri panua chi Jeowaba kʉ̃ria ɓuu mauɗe dachirãra ichi ome aude amiko ba duanua.

AUDE KAWABA

3. Chi Jeowa puuru biʼia organiza koɓooyua

Jesusba uaɗo ɓua Chi Junta biʼia organizayua chi Jeowa ɗebena Jaranũrẽba asebadau. Naeɗeeɗa, chi konkrekasion cristianorãɗeba ara nau kĩra asebachiɗaa. BIDEO ochiábaɗa.

BIDEO: Jeowaba ichi puuru trajabibarii (6:18)

1 Corintios 14:33, 40 leaɗapeɗa, mambea nau ʉ̃rʉbena beɗeasturu:

• Naarã versiculorãba jara panuuɗeebara, ¿Jeowaba kʉ̃ria ɓue ichiɗebena Jaranũrẽrã biʼia organiza duanaɗayua? ¿Sakayua maka kʉ̃risia ɓua?

4. Chi esclavo jipa niiba biʼia organiza ɓua dachirãba jaradeɗekaɗai baita

Chi nabẽrarã cristianorã baita, jaradeɗekayudu trajo aude importante ɓoosia. Hechos 8:14, 25 leaɗapeɗa, mambea nau ʉ̃rʉbena beɗeasturu:

• Yataɗeeɗa, ¿kairãba uaɗo panasaa waarãmaa jaradeɗekaɗe wãbudauɗe?

• ¿Kãare asesiɗaa Pedro Juan baare waarã apostolerãba ãchimaa kãare aseɗaiɗebena jarasiɗauɗe?

Waarãmaa jaradeɗekaɗaidu trajo aude importante biʼia Chi Juntaba biʼia organiza ɓuu. BIDEO ochiábaɗa.

BIDEO: Dachirãba kauwa jaradea duanua (1:24)

Jesusba jaraɗa baɗa biʼia ãrĩã ɓuura waarãmaa jaradeɗekaɗe wãyu. Marcos 13:10 leaɗapeɗa, mambea nau ʉ̃rʉbena beɗeasturu:

• ¿Sakayua Chi Junta baita importante ãrĩã ɓua waarãmaa jaradeɗekaɗe wãyu?

• ¿Sakayua nesita panua “chi esclavo jipa nibapeɗa biʼia kʉ̃risia” ɓuuba biʼia organizayua nau trajo joma iujãaɗe?

5. Chi esclavo jipa niiba o biaɗe uaɗo ɓua

Chi Juntaba o biaɗe uaɗo ɓua cristianorã iujãa jomauɗe. ¿Saka kuitaa panaa ãchia kãare saka asebiɗayuɗebena? Ochiáse saka asebachiɗau chi junta cristianorã nabẽrarãba. Hechos 15:1, 2 leaɗapeɗa, mambea nau ʉ̃rʉbena beɗeasturu:

• ¿Sakayua chi nuree cristianorã nabẽrarã ãyaa kʉ̃risia bara ɓeesaa?

• ¿Kairã jʉrʉsiɗaa Pablo, Bernabé mauɗe waarã cristianorãba chi nauɗebena beɗeaɗayua?

Hechos 15:12-18 mauɗe 23-29 leaɗapeɗa, mambea nau ʉ̃rʉbena beɗeasturu:

• Saka aseɗai kʉ̃risiabudauɗe, ¿kãare asesiɗaa chi junta nabẽrarãba Dachi Akõreba jarayua kãare aseɗaiɗebena? (Versiculorã 12, 15 mauɗe 28 ochiábaɗa).

Hechos 15:30, 31 mauɗe 16:4, 5 leaɗapeɗa, mambea nau ʉ̃rʉbena beɗeasturu:

• ¿Kãare asesiɗaa chi cristianorã nabẽrarãba chi juntaba jarasiiɗe kãare aseɗaiɗebena?

• ¿Saka kuitaa panaa Jeowaba bendesikuasii ãchia ũripeɗaaɗa kakua?

2 Timoteo 3:16 mauɗe Santiago 1:5 leaɗapeɗa, mambea nau ʉ̃rʉbena beɗeasturu:

• Iɗibea Chi Juntaba asei naeɗe kʉ̃risiabudauɗe, ¿kãare asebadaa Dachi Akõreba jarayua kãare aseɗaiɗebena?

NAU KAWASIƊAA

Chi Junta jãu “chi esclavo jipa nibapeɗa biʼia kʉ̃risia ɓuu” Cristoba jʉrʉɗa baɗabʉ. Jãu esclavoba cristianorã joma iujãaɗebenarãmaa jara ɓua kãare aseɗayu, jaradeɗeka ɓua kĩrabara chiko dearuu kĩra.

Waya berreaɗaika

• ¿Kaiba jʉrʉ adausaa chi “esclavo jipa nibapeɗa biʼia kʉ̃risia ɓuu”?

• ¿Saka ochia ua ɓua dachirã Chi Juntaba?

• ¿Bichia kʉ̃risia ɓue Chi Junta jãu “chi esclavo jipa nibapeɗa biʼia kʉ̃risia ɓuu”?

NAU OCHIAS MAUCHABURU KAWAYUA

Kawas saka organizabadau Chi Junta ãchi trajo biʼia aseɗai baita.

“¿Kãareba mau Chi Junta Jeowa ɗebena Jaranũrẽrãɗe?” (Artículo jw.org ɗebena)

Biʼia kawaba kãare saka asebadau Chi Juntaba dachirãmaa arikʉɗe jaradeɗekaɗai baita.

Dachirã kartarãɗe arikʉɗe jaradea ɓuu (17:18)

¿Kãare saka kʉ̃risia panua Chi Juntaɗebenarãba Jesusba ãchimaa trajo ɓuikaɗa baɗa ʉ̃rʉbena?

Dairã kĩrajʉʉ duanua (7:09)

¿Saka kawabadaa reuniorãɗe mauɗe asamblearãɗe Jeowaburu Chi Junta uaɗo ɓuu?

Jeowaba ichi puurumaa jaradea ɓua (9:39)