Dachirãra fe bara duanua Jeowaba jaraɗa baɗa ʉ̃rʉbenaɗe

1. ¿Dachia saka kʉ̃risiaɗaiba chi fe ʉ̃rʉbena?

CHI FE Cristoɗe ãrĩã biʼia ɓumina, chi nuree ẽbẽrarãba Cristoɗe ijãa kʉ̃riaɗakau (2 Tes. 3:2). Mauɗeeburu, Jeowaba joma ichi baita traja nureerãmaa fe deɗeka ɓuu (Rom. 12:3; Gál. 5:22). Joma ẽbẽrarã fe panuuɗeeba kĩrajatua ãrĩã nureaɗayua.

2, 3. 1) ¿Ẽbẽra fe ɓuubʉrã kãare mipitaa ɓuu neeburuu? 2) ¿Kãareɗebena kawaɗaiba?

² Jesusba jara ɓoosii Dachi Akõreba ẽbẽrarã ichi jʉ̃kaa nureabii ɓuu ichi Warrɗeeba (Juan 6: 44, 65). Dachi Akõreba dachi pekao kakua perdonaɗayua Jesusɗe ijãa panuuɗeeba, mauɗeeba dachi Jeowa ome kaita nibaɗai mauɗe ichi amiko nibaɗayua (Rom. 6:23). Dachi pekao bara nuree baerã, dachia adau nii biuyúturu (Sal. 103:10). Jeowaba kuitaa ɓuu ẽbẽrarãba chi biʼia ɓuu aseɗai ɓua, mauɗeeba ichia kʉ̃riaɗeeba aiɗabarii ichi beɗeaɗe ijãabiɗai baita. Mauɗeeburu, dachia Jesusɗe ijãa nibayu adaubaria biuɗawẽa nureaɗayua (1 Juan 4: 9, 10 leas).

³ ¿Kãareba chi fe? Jeowaba iujãa mipitaa kiruuɗe aseyuɗebena dachi kakua kuitaa ɓuubʉrã, ¿mauburu fe ɓuẽ? ¿Saka unubi panaa dachi fe?

FE UNUBI PANUA DACHI CORAZONBURU

4. Fe bara nureebʉrã, ¿kãare aseɗaiba?

⁴ Jeowaba iujãa mipitaa kiruuɗe aseyuɗebena dachi kakua kuitaa panumina, mauburu fe ɓuuwẽma. Ẽbẽrarã fe bara nureerãba Dachi Akõre beɗea ũriɗayua. Ẽbẽrarã Jesusɗe fe bara nureerãba junebena ẽbẽrarãmaa kawabiɗayua Dachi Akõre beɗea ʉ̃rʉbena. Chi apóstol Pabloba naka jaraɗa: “Bichi iiba Jesús jomaurã Mechiu aaruubʉrã, mauɗe Dachi Akõreba ichi chokae jiradubiɗa bichi sõɗeeba ijãaruubʉrã, ichiba karibai. Biawãra chi mauba sõɗeeba ijãaruubʉrã, chi Dachi Akõre daaɗe jipa nuree baara ɓuai. Iiba Jesús jomaurã Mechiu aaruubʉrã Dachi Akõreba karibai” (Rom. 10:9, 10, Biblia Chamí, WPS.; 2 Cor. 4:13).

5. 1) ¿Sakaẽra importante ãrĩã ɓua fe bara nibayu? 2) ¿Saka bara nibaiba dachi fe karr chaarea nibayua? Ejemploɗeeba jaras.

⁵ Dachi fe karr chaarea niibʉrã biuɗawẽa nureaɗayua. Chi nepono biumaaba bania ea unibayua, ara jãu kĩraka dachi fe karr chaarea nibapeɗa ãrĩã cuida nibayua. Chi nepono cheke ewariruucha wari ɓuumisa cambia koɓeebaria. Noremaacha bania ea unibaaruubʉrã, waaburu wari koɓeebaria. Dachia jãka aseɗawẽebʉrã, ichi bʉʉsaapeɗa biuyua. Ara jãu kĩraka, dachi fe cuidawẽebʉrã biuyua (Luc. 22:32; Heb. 3:12). Dachia cuidabudaubʉrã dachi fe, mauchaburu waripeɗa jãadua nibayua (2 Tes. 1:3; Tito 2:2).

KÃARE JARA ƁUA BIBLIABA CHI FEƊEBENA

6. ¿Hebreos 11:1ɗe jara ɓuuɗeebara kãareba chi fe?

⁶ Hebreos 11: 1ɗe (leas, Biblia Chamí, WPS.) naka jara ɓuu fe ʉ̃rʉbena: 1) “Chi dachiba eseɗaubadau”, nauba jara ɓuu chi neeburuu wabiɗa pasawẽeɗebena, por ejemplo, joma chi kachirua barauɗebena acababuruuɗe mauɗe chi iujãa mipitaa kiruu neeruuɗe. 2) “Chi dachiba unuɗakau mau ɓoabarii kuitaa panuu”. Cha nau beɗearã, griego beɗeaɗe jara ɓuu dachia mau unuɗakaumina, jãu ariɗe ɓuu kuitaa panuu, por ejemplo, dachia kuitaa panuu Jeowa, Jesucristo mauɗe angelerã siɗa biawãra panuu mauɗe chi joma Dachi Akõre Kobiernoba ʉtareeba asebadauɗebena (Heb. 11:3). Dachia joma Jeowaba jaraɗa baɗaɗebena mauɗe Bibliaba jara ɓuu unuɗakauɗebena akawa ijãa panuubʉrã, dachi beɗeaɗeeba mauɗe dachi asebadauɗeeba unubiɗayua nauɗe akawa ijãabadau, dachia naka asesiɗarã dachi fe chaarea ãrĩã ɓoi.

7. ¿Saka chi Noé aseɗa baɗaba kawabi ɓua kãareba chi fe? (Ochias chi diujo página nabenaɗebena).

⁷ Hebreos 11:7ba chi fe Noeɗebena naka jara ɓuu: “Dachi Akõreba Noemaa jarasii chi wabiɗa unukau neei ʉ̃rʉbena. Noeba mau ijãasiiɗeeba, Dachi Akõre wapea ɓuasiiɗeeba jãba chi mechiu wausii ichi deɗebenarã karibai baita” (Biblia Chamí, WPS.). Noeba fe bara ɓoosii bẽrã, jãba mechia wausii. Noé jʉ̃kaa panasiiba ichimaa wiɗisii kãare kakua jãu jãba mechia wausii. ¿Ichi chũpea koɓeesaa o makawẽebʉrã ichia mʉʉmaa wiɗirã́se mauɗebena, a jara ɓoosaa? Makawẽma, Noeba ichi feɗeeba perawẽa jara ɓoosii ẽbẽrarãmaa Dachi Akõreba ɓaʼãra castigaɗayua. Joma Jeowaba Noemaa jarasiiɗebena ichia ara jãka jara ɓoosii ẽbẽrarãmaa: “Mʉa akababurua joma chokae nureerã iujãaɗe, chi mukĩrarãba joma kachirua ãrĩã kuɓúturu ase bara ɓeesiiɗeeba iujãaɗe. [...] Makarã mʉa kue mechibena eneeburua chi iujãa joma waabirubiyua nauba joma newãetayua bajãa ekare. Joma chi iujãaɗe duanuu biuɗayua”. Dachi Akõreba jara ɓoosii kĩra Noeba ẽbẽrarãmaa jaradea ɓoosii ãchi jãba eɗa duanuubʉrã chokae duanaɗayua. Nau aseburuuba Noeba “dachi jipa nibaɗai ʉ̃rʉbena jaradeabachii” mauɗe ichi fe unubisii (Gén. 6:13, 17, 18; 2 Ped. 2:5, Biblia Chamí, WPS.).

8. ¿Kãare jaraɗa basaa Santiagoba kãareba chi fe wãrabena ɓuuɗebena?

⁸ Santiagoba ɓʉɗa basii ichi karta Pabloba jaraɗakare chi feɗebena. Ara jari Santiagoba jaraɗa kĩraka dachia ijãa nibapeɗa ase nibayua chi fe biawãra ɓuu bara niiɗeeba, ichia naka jara ɓoosii: “Bichiba biʼia wauwẽa unubise, Jesucristoɗe biawãra ijãa ɓuu. Mauɗe biʼia wau ɓuuɗeeba mʉʉba unubii Jesucristoɗe biawãra ijãa ɓuu” (Sant. 2:18, Biblia Chamí, WPS.). Ichia jarasii kãare ijãayu mauɗe fe unubiyu, jãu ara aɓau ɓuuwẽe, nau kawabii baita beɗeaɗa baɗa chi demoniorãɗebena. Ãchia Dachi Akõre nii ijãabadaumina, Dachi Akõreba ase kʉ̃ria ɓuu kĩraka aseɗakau, mauɗe ne kachirua ase nuree, naka asebadau fe biawãrabena wãʼãe nureeɗeeba (Sant. 2: 19, 20). Maaɗaba beɗeasii mukĩra fe bara nii baɗa naeɗeeɗabena, maabae naka wiɗisii: “¿Dachi chi judiorã akõre Abrahamba wauɗa Dachi Akõreba mau jipa unuubaska? Dachi Akõreba Abrahammaa ichi warr Isaac baa deábaɗe asiiɗe Abrahamba makaɗe wãsii. ¿Dachi Akõreba ichi mau kakua jipa nii unuubaska? Bichiba kuitaa ɓuu Abrahamba maka wausii, biawãra Dachi Akõreɗe ijãasiiɗeeba. Mauɗe maka wausiiɗeeba unubisii Dachi Akõreɗe biawãra ijãa ɓuu”. Maabae naka jaraɗa: “Biuɗa jauri wãʼãe nii. Ara mau kĩra Dachi Akõreɗe ijãa ɓuu a ɓuuba biꞌia wauwẽebʉrã, biawãra ijãawẽa ɓuu. Ichiba ijãa ɓuu a ɓuu ẽbẽra biuɗa kĩra nii” (Sant. 2:21-23, 26; Biblia Chamí, WPS.).

9, 10. ¿Kãare Juanba jara ɓoosaa chi fe unubiyuɗebena?

⁹ Treinta año maaɗakare, apóstol Juanba ɓʉɗa baɗa chi karta Beɗea bia Jesús ʉ̃rʉbena mauɗe june õbea karta siɗa ɓʉsii. ¿Ichia biʼia kuitaa nibasaa saka unubiyu chi fe biawãra nii jari jarapeɗaaɗa baɗa kĩraka junebena ɓʉsiɗaurãba chi Bibliaɗebena? Juanba aude ɓʉɗa baɗa ichi kartaɗe chi fe wãrabena ɓuuɗebena maebʉrã saka unubiyu chi fe.

¹⁰ Ichia naka jarasii: “Chi ichi Warrɗe ijãa ɓuu Dachi Akõre ome ewaricha chokae ɓuai, maamina chi ichi Warr ida ɓu ɓuu Dachi Akõre ome ewaricha chokae ɓuabai. Mau Dachi Akõreba kastikai” (Juan 3:36, Biblia Chamí, WPS.). Dachi fe wãrabena bara niibʉrã chi Jesús beɗea biʼia ũri nibabaria. Juanba ãrĩã ɓʉɗa basia Jesusba jaraɗa baɗa kĩra, dachia noremaacha dachi asebadauɗeeba unubi nibayua dachi fe bara nii (Juan 3:16; 6:29, 40; 11:25, 26; 14:1, 12).

11. ¿Dachia kãare ase panabaria ara kiruma aɗai baita Jeowamaa chi ariɗebena kawa panuuba?

¹¹ Dachia Jeowamaa ara kiruma jaraɗai ichia ichi jauriɗeeba dachi chi ariɗe ɓuu kawabibaria mauɗe ijãabii baita chi mipitaa uruburuuɗebenaɗe (Lucas 10:21 leas). Noremaacha dachia ara kiruma aɗai Dachi Akõre Jeowamaa ichia ichi Warrɗeeba dachi ichi ome jʉ̃kaa nibabiɗeeba (Heb. 12: 2). Dachia ʉtaa wiɗiɗapeɗa mauɗe Dachi Akõre beɗea kawa panuubʉrã, dachi fe chaarea ɓooyua mauɗe ara kiruma aɗayua Jeowamaa (Efes. 6:18; 1 Ped. 2:2).

12. ¿Dachia saka unubiɗaiba fe bara nuree?

¹² Dachi asebadauɗeeba waabenarãmaa unubiɗaya fe bara nuree Dachi Akõre Jeowaba aseyu jaraɗa baɗaɗe. Dachi Akõre Kobierno ʉ̃rʉbena jaradeɗakaɗe wãbudauɗe mau unubiɗayua. “Mauɗeeba, dachia aseɗayu panuuɗe, chi biʼia ɓuu aseɗaika jomaurãmaa, bari aude dachi ãbarã ara dachi kĩraka ijãa nureerã ome” (Gál. 6:10). Mauɗe berekaɗapeɗa chi naa kachirua kʉ̃risiapeɗa ase nibaɗa awara jiratayua chi kachirua asebiɗaamaaba, naka ase panuubʉrã dachi Jeowa ome ara kaita duanaɗayua (Col. 3:5, 8-10).

FE BARA NIIBɄRÃ CRISTIANO ARIƊE NUREAƊAYUA

13. 1) ¿Sakayua biʼia ãrĩã ɓua Dachi Akõreɗe ijãa nibai baita? 2) Dachia fe bara nureebʉrã, ¿kãare aseɗaiba?

¹³ Bibliaba naka jara ɓuu: “Dachi fe wãʼãebʉrã Dachi Akõre dachia kĩrajʉʉbiibayua, Dachi Akõre jʉ̃kaa nibayua ijãabaraai ichidu nii mauɗe ichia aiɗa nia ichi ãrĩã jʉrʉbadau” (Heb. 11:6). Chi Bibliaba jara ɓuu kĩra fe bara niibʉrã, cristiano ariɗe nureaɗayua mauɗe Jeowamaa ɓuiɗaabayua (Heb. 6:1). Dachia berekapeɗa aseɗayua chi biʼia ɓuudu Jeowaba kʉ̃ria ɓuu kĩraka mauɗe ichi kaita duanaɗai baita (2 Pedro 1:5-7 leas; Jud. 20, 21).

14, 15. Kʉ̃ria ãrĩã nibabarii mauɗe mau kãyabãra chi fe, ¿sãu aude biʼia ɓuu?

¹⁴ Chi mukĩrarã Bibliaɗebena ɓʉpeɗaaɗa baɗaba chi fe ʉ̃rʉbena ãrĩã jarasiɗau, nau unubi ɓuu chi fe ãrĩã importante ɓuma. ¿Chi Bibliaba fe ʉ̃rʉbena ãrĩã jara ɓuu bẽrã, makarã chi cristianorãba feɗeburu kʉ̃risia nurea baraaka?

¹⁵ Pabloba naka jara ɓoosii chi fe mauɗe kʉ̃riai ʉ̃rʉbena: “Sõɗeeba biawãra ijãa ɓuuɗeeba ea poyaa ãyaa ɓuuruubʉrã, mauɗe waabenarã kʉ̃riawẽa ɓuubʉrã, mʉ baleswãe nii kĩra nii” (1 Cor. 13: 2; Biblia Chamí, WPS.). Jesusmaa wiɗisiɗauɗe sãuba chi mandamiento aude importante ãrĩã ɓua, ichia Dachi Akõre ãrĩã kʉ̃ria nibai aɗa basia (Mat. 22:35-40). Chi Bibliaba jara ɓuu kʉ̃riaruuba jomaɗe ijãabarii, joma chi Dachi Akõreba jara ɓuu ichi beɗeaɗe dachia ijãa panuu mauɗe maucha nesita panuu chi biʼia ɓee unibaɗayua (1 Cor. 13:4, 7).

16, 17. 1) ¿Saka kawabi ɓua chi Bibliaba chi kʉ̃ria nii chi fe baara importante ãrĩã ɓua? 2) Chi omeerãɗebena kʉ̃ria ɓuu chi fe baara, ¿sãuba aude biʼia ɓua?

¹⁶ Bibliaɗe Griego Beɗea Ɓʉ Ɓeeba chi fe kʉ̃ria ɓuu ome ãbua jara ɓuu, jãka jarabarii chi omeerã importante ãrĩã ɓuuɗeeba. Pabloba nau jaraɗa baɗa chi ãbarãmaa kokoroaba kakuaɗe jʉ̃barii chaarea kĩra, ara jãka ãchi fe mauɗe kʉ̃ria baara jʉ̃́baɗa a ɓoosii (1 Tes. 5: 8). Pedroba ɓʉtasii: “Machiba Jesucristo unuɗakamina mau kʉ̃ria panuu. Ʉ̃rauɗaa unuɗawẽa panumina ichiɗe ijãa panuu” (1 Ped. 1: 8, Biblia Chamí, WPS.). Santiagoba naka wiɗiɗa baɗa chi ãbarãmaa: “Ãbarã mʉa kʉ̃riakuabarii, ¡ũrísturu! ¿Dachi Akõreba nau iujãaɗe chi nejarr barauwãe nuree Jesucristoɗe ijãaɗamera karibasiiwãeka? Maka maarã barau panuu kĩra nuree. Dachi Akõreba maarã ichi juaɗe ua ɓuai. Maka biawãra jarasii, chi ichi kʉ̃ria nureerãmaa” (Sant. 2: 5, Biblia Chamí, WPS.). Mauɗe Juanba ɓʉtasii: “Wãradu, cha nadu ichia manda nii: dachirãdu fe unibayua ichi Warr, Jesucristo trʉ̃ɗe, maabea kʉ̃ria duanaɗayua aɓaaɓaa jomaurã, ara ichia jaraɗa kĩra” (1 Juan 3:23).

¹⁷ Iɗibae chi fe importante ãrĩã ɓumina, Dachi Akõreba jaraɗa baɗa cumpliburuuɗe mauɗe iujãa mipitaa ãrĩã ɓuu unuburuuɗe, maabae fe nesitaɗaabai. Maamina, noremaacha aude kʉ̃riaɗai Dachi Akõre mauɗe ẽbẽrarã siɗa. Mauɗeeba Pabloba jarasii: “Nau õbea panuu wãꞌãekau: ne jomaɗe biꞌia ijãa ɓuai, eseɗau ɓuai joma biꞌia neemera mauɗe waabenarã kʉ̃ria ɓuai. Mau õbeaɗebena, aɓau kʉ̃ria ɓuai chi aude bibuara ɓuu” (1 Cor. 13:13, Biblia Chamí, WPS.).

ARA ÃBUA DUANUU DACHI FEƊEEBA

18, 19. ¿Iɗibea saka duanaa dachi feɗeeba, mauɗe kaiɗeeba jãka panaa?

¹⁸ Iɗibea Jeowa ɗebena Jaranũrẽba Dachi Akõre Kobiernoɗe ijãa panuu. Mauɗeeba, iujãa jomauɗe ocho millón ẽbẽrarã aude Dachi Akõre Jauriɗeeba ara ãbua duanuu (Gál. 5:22, 23). Nauba unubii ɓuu cristianorã ariɗe nuree fe mauɗe chi kʉ̃ria baare nibabadaurã.

¹⁹ Ẽbẽrarã juaɗeeba jãka duanaɗakau. Dachi Akõre juaɗeebaburu kĩrajʉʉ duanabarii. Nauba asebii ɓuu chi ẽbẽrarãba Jeowaɗebena biʼia jarabadau mauɗe mau cambiaabai (Is. 55:13). Mauɗe “Jesusɗe ijãasiɗauɗeeba Dachi Akõreba ichi sõbiaɗeeba machi karibasii. Ara machi du aɓa karibaɗaabasii, maumaarã Dachi Akõréburu bari karibasii” (Efes. 2:8, Biblia Chamí, WPS.). Iujãa mipitaa kiruuɗe joma ẽbẽrarã aude biʼia nureaɗayu iɗibea kãyabãra, mauɗe Dachi Akõre ʉ̃rʉbena noremaacha biʼia jaraɗayua. Iujãa mipitaa kiruu neeruumisa, Jeowa jarapeɗaaɗa baɗaɗe ijã́sturu.