Jeowa ʉ̃rʉbena biʼia beɗeaɗaika konkrekasionɗe

1. ¿Kãare sentiɗa baɗa David Jeowa kakua, jãuba kãare asebi kʉ̃ria ɓoosaa?

CHI REY DAVIDBA ɓʉɗa baɗaa: “Jeowa mechia nia maabea biʼia ãrĩã beɗeaɗayua ichiɗebena” (Sal. 145:⁠3). Ichia Jeowa kʉ̃ria nibaɗaa, jãuɗéburu biʼia ãrĩã beɗea nibaɗa basia ichiɗebena “congregación tãeɗe” (Sal. 22:22; 40:⁠5). Dachia biɗa Jeowa kʉ̃ria nurea mauɗe kʉ̃risia panuu araɓau Davidba ɓʉɗa kĩra: “Bichidu kiɗibaika, Jeowa chi Dios Israelɗebena, Dai Akõre, naeɗeeɗabena mauɗe waaburu” (1 Crón. 29:​10-13).

2. (1) ¿Saka Jeowaɗebena biʼia beɗeaɗai ɓua? (2) ¿Kãare pasa ɓua chi nuree ãbarã, mauɗe kãareɗebena beɗeaɗaiba?

² Dachi jua ʉtaa ʉapeɗa berreaburuuɗe reunionɗe, jãmaria biʼia beɗeabaria Jeowaɗebena. Maka ɓumina chi nuree ãbarã baita chaarea ɓua. Ase kʉ̃riabadamina, poyaaɗakau. ¿Saka ida ɓuiba ãchi perabariiɗebena? ¿Kãare aseɗai ɓua chi jua ʉtaa ʉapeɗa biʼia beɗeayua? Cha wiɗi koɓee panaui naeɗe, ochiabudau chi kimareɗebena sakayua jua ʉtaa ʉaɗapeɗa beɗeabadau reunionɗe.

SAKAYUA REUNIONƊE JUA ɄTAA ɄAPEƊA BEƊEABADAU

3-5. (1) Hebreos 13:15ɗe jara ɓuuɗeebara, ¿sakayua reunionɗe dachi jua ʉtaa ʉaɗapeɗa beɗeabadaa? (2) ¿Sakayua kuitaa panaa Jeowaba wiɗikau joma araɓauɗe beɗeaɗayu baita?

³ Jeowaba dachimaa deaɗa baɗa biʼia beɗeaɗai baita ichi ʉ̃rʉbena, jãu biʼia ãrĩã ɓua (Sal. 119:108). Dachi jua ʉtaa ʉapeɗa beɗeaburuuɗe, dachia Jeowamaa deaburuu kĩraka ɓua, akawa wãʼãebayua ẽbẽraba deayu Jeowamaa dachirã kakua (Hebreos 13:15 leas). ¿Jeowaba kʉ̃riabaraaka jomaurã jua ʉtaa ʉapeɗa beɗeabudau ara aɓa ɓuudu? Makawẽma.

⁴ Jeowaba kuitaa nia dachi aɓaaɓaa diwara kʉ̃risia nureerã mauɗe araɓau nureewẽe. Ichia ãrĩã bustabarii chi dachia deaɗai kuɓuudu deabudau. Kʉ̃risiaɗaika chi ãnimararãɗebena israelitarãba deabachiɗau Jeowamaa. Chi nejarra bara nureerãba deabachiɗau cordera makawẽebʉrã cabrita. Chi nejarra wãʼãe kirureeba “tortolarã ome mauɗe chi ibana cheke ome”. Mauɗe akawa wãʼãe nii ibana cheke ome biɗa odoi baita, Jeowaba adaubachia “dos litros harina pono” (Lev. 5:​7, 11). Harina barato ãrĩã ɓosmina, Dachi Akõreba bustabachia jãu deaɗai siɗa, mau harina ponobʉrã, jaraibʉrã, harina biʼia ɓuuɗebenadu.

⁵ Dachi Akõreba ara maka kʉ̃risia nia iɗibea biɗa. Dachi jua ʉtaa ʉapeɗa beɗeaburuuɗe, ichia wiɗikaa biʼia ãrĩã beɗeaɗayu baita Apolos kĩra, maebʉrã jaradeayu Pablo kĩraka (Hech. 18:24; 26:28). Ichia wiɗi ɓuura biʼia aseɗai chi dachia poyaaburuudu. Kʉ̃risiaɗaika chi pẽdrãa niiba moneda ome kiruu deaɗa baɗa. Jeowaba ãrĩã bustaɗa baɗa ichia ira ɓooɗa baɗadu deasiiɗeeba (Luc. 21:​1-4).

6. (1) Hebreos 10:24, 25 jara ɓuuɗeebara, ¿saka duaneebadaa ũribudauɗe reunionɗe beɗeabara ɓeebudau? (2) ¿Kãare asei ɓua kĩrajʉʉ unubiyua ãbarã jua ʉtaa ʉapeɗa beɗeabudau kakua?

⁶ Dachi jua ʉtaa ʉaɗapeɗa beɗeabudauɗe, kĩrajʉʉbiabaria junebenarã siɗa (Hebreos 10:​24, 25 leas). Jomaurãba bustabadau jua ʉtaa ʉaɗapeɗa junebe diwara beɗeabudau reunionɗe. Warrarã jua ʉtaa ʉaɗapeɗa ɓiɗĩika beɗeabudau siɗa dachia ãrĩã bustabadau. Dachirãba chi awabadau aɓabena jua ʉtaa ʉapeɗa kĩrajʉʉ beɗeaburuuɗe saka ʉ̃raburu kawaɗa baɗa chi biawãra kuɓuuɗebena. Kĩrajʉʉ ũribadau aɓa nii jua ʉtaa ʉapeɗa beɗeaburuuɗe peraaruu adua maebʉrã ʉ̃raburu dachi beɗea beɗeai baita kawamaa ɓuu (1 Tes. 2:⁠2). ¿Ãchi ãrĩã berekabadau bẽrã dachirã kãare aseɗaiba unubiɗayua dachirã kĩrajʉʉ nuree mau kakua? Ara kiruma ayua chi reunión acabaɗakare mauɗe jaraɗai dachi kĩrajʉʉsiɗau ichia jaraɗa baɗa kakua. Mauɗe araɓau aseɗayua jua ʉtaa ʉapeɗa beɗeaɗayua. Jãkaburu, dachirã kĩrajʉʉɗapeɗa mauɗe waabenarã siɗa kĩrajʉʉbiɗayua (Rom. 1:​11, 12).

7. ¿Sakayua jua ʉtaa ʉapeɗa beɗearuu biʼia ɓua dachirã baita?

⁷ Jua ʉtaa ʉapeɗa beɗearuu biʼia ɓuu dachirã baita (Is. 48:17). ¿Saka? Jua ʉtaa ʉapeɗa beɗeayua kʉ̃risiabudaubʉrã, naa biʼia kawaɗayua reunión baita, biʼia entendeɗayua chi Dachi Akõre Beɗea mauɗe ara chi kawapeɗaaɗa kĩra aseɗayua. Maabea kĩrajʉʉ ãrĩã duanaɗayua reunionɗe, kauwa kʉ̃risiaɗe duanaɗayua mauɗeburu. Jua ʉtaa ʉapeɗa beɗeabudauɗe ãrĩã bereka ɓuu bẽrã dachia jaraburuu dachi boroɗe ɓeeyua.

8, 9. (1) Malaquías 3:16 jara ɓuuɗeebara, ¿bichimaa saka Jeowaba ochia ɓua dachia berekaɗapeɗa jua ʉtaa ʉapeɗa beɗeabudauɗe? (2) Maka ɓumina, ¿jomaurãba jua ʉtaa ʉapeɗa perayuswẽa beɗeabadae?

⁸ Jeowaba kʉ̃riabaria dachi feɗebena beɗeaburuu. Dachia kauwa kʉ̃risiɗai ɓua ichia dachi beɗea ũriburuu mauɗe kĩrajʉʉbaria dachia berekaɗapeɗa jua ʉtaa ʉapeɗa beɗeaburuu reunionɗe (Malaquías 3:16 leas). Maubapeɗa, ichia unubi ɓuu dachi ome kĩrajʉʉ nii dachimaa bendeciburuuba (Mal. 3:10).

⁹ Biʼia ɓua jua ʉtaa ʉapeɗa beɗeaburuu. Maka ɓumina, chi nureerã waaburu perabadau jua ʉtaa ʉapeɗa beɗeaɗayu. Bichi jãka ɓuubʉrã, nomaarã́ba. Ochia kawaɗaika textorã biʼia ɓee mauɗe kawaɗaika chi nuree ẽbẽrarã Bibliaɗe jara ɓuu, mauɗe kawaɗayua kãare aseɗai ɓuu jua ʉtaa ʉapeɗa beɗeaɗayua.

SAKA IDA ƁUIBA CHI PERA NII

10. (1) ¿Saka duaneebadaa chi nureerã jua ʉtaa ʉapeɗa beɗeabudauɗe? (2) ¿Jua ʉtaa ʉapeɗa beɗeabudauɗe peraɗayu miadaa ɓuka?

¹⁰ ¿Bichi perabaree reunionɗe jua ʉtaa ʉapeɗa beɗeayua? Jãkabʉrã, ara bichiduwẽe. Chi nuree dairãɗebena siɗa ɓãʼãra perabadau beɗeabudauɗe. Maka ɓumina, jãuba beɗeabiwẽebʉrã, kʉ̃risiabaarai saka jãka sentibarii. ¿Perabaree beɗeai baɗa akawa kʉ̃risiaɗebena wãburuuɗeeba maebʉrã ãyaa beɗeai ɓuuɗeeba? ¿Bichia kʉ̃risiabaree mʉʉɗe biʼiwẽe ãrĩã ɓuu waabenarãɗe kĩra? Bichi perabariibʉrã, jãuba unubi ɓuu bichi juakayawẽa nii mauɗe bichia kʉ̃risiabarii waabenarã bichi aude nuree. Jeowaba ãrĩã bustabarii dachi juakayaswẽa nibaidu (Sal. 138:⁠6; Filip. 2:⁠3). Maka ɓumina ichia kʉ̃ria nii bichia ichiɗebena biʼia beɗeayu mauɗe biʼia kĩrajʉʉbiyua ãbarã reunionɗe (1 Tes. 5:11). Ichia bichi kʉ̃ria inia maabea chaarea nibabiyua.

11. ¿Chi Bibliaba jara ɓuuɗebena kãareba aiɗai ɓua?

¹¹ Ochiaɗaika textorã biʼia ɓee Bibliaɗe. Dachi Akõre Beɗeaba jara ɓuu jomaurã araɓau biʼia beɗeaɗakau (Sant. 3:⁠2). Jeowaba wiɗikaa joma jipa nureaɗai mauɗe ãbarã biɗa maka wiɗiɗakaa (Sal. 103:​12-14). Jãarã dachi deɗabenarãka nurea mauɗe dachi kʉ̃ria nurea (Mar. 10:​29, 30; Juan 13:35). Mauɗeeba ãchia kuitaa panuu dachi beɗea dachia kʉ̃ria koɓooɗa kĩra ɓeeka.

12, 13. ¿Kãare kawaɗai ɓua Nehemías mauɗe Jonasɗebena ?

¹² Kawaɗayua ome mukĩra niɗauɗebena Bibliaɗebena. Nehemías trajabachii rey poder ãrĩã nii baita. Chi aɗu jʉ̃ka kuɓuu mauɗe chi poroa Jerusalenɗebena joma jeeɗa koɓooɗa baɗa ũrisiiɗe, Nehemías nomaaɗa baɗa (Neh. 1:​1-4). Kʉ̃risiaɗaika saka ichi pera koɓoosii chi reyba ichimaa wiɗisiiɗe sakayua nomaa ãrĩã ɓoosii. Panaui naeɗe Nehemiasba ʉtaa isa wiɗiɗa baɗa. Jãuɗéburu, reyba aiɗaɗa baɗa chi Dachi Akõre puuru (Neh. 2:​1-8). Chi Nehemías pasaɗa baɗa, jãuba kawabi ɓuu ʉtaa wiɗiyu beɗeai naeɗe. Mauɗe kʉ̃risiaɗaika Jonasɗe biɗa. Ichi ãrĩã perapeɗa ãyaa wãɗa baɗa Jeowaba jarasiiɗe aiɗayua chi puuru Niniviɗe duanuurã (Jon. 1:​1-3). Maka ɓumina, Dachi Akõreba aiɗasiiɗeeba, trajo asesii mauɗe ichia jaraɗa baɗaɗeeba aiɗasia chi mau puuruɗe duanuurã (Jon. 3:​5-10). Chi Jonás pasaɗa baɗaba dachimaa kawabi ɓua Jeowaba dachi ãrĩã aiɗai ɓua ichi baita trajayua pera kuɓuu adua. Dai ãbarãba dachi ãrĩã perabiɗakaa jari ninivitarãba perabibadau kĩraka ¿makawẽka?

¹³ ¿Kãare aseɗai ɓua jua ʉtaa ʉaɗapeɗa beɗeaɗayua reunionɗe? Maka ɓee ochiaɗaika.

14. (1) ¿Saka biʼia preparaɗaiba reunión baita? (2) ¿Sakaya preparaɗai ɓua?

¹⁴ Biʼia preparaduaɗaika joma reunionɗebenarã. Tiempo jʉrʉ panuubʉrã biʼia preparaɗayu chi reunionɗebenarã, peraɗawẽa beɗeaɗayua (Prov. 21:⁠5). Jomaurã araɓau nureewẽe. Eloise, pẽdrãa 80 año niiba semana empezaburuuɗeeɗa preparabarii Chi Kartaba. Ichia jara ɓua: “Mʉ kĩrajʉʉ koɓoobarii reunionɗe prepara ɓuubʉrã reunionɗebenarã chi diarã naeɗeeɗa”. Nawekau chi trʉ̃ Joy, ichi todo el día trabajabarii, estudiabarii Chi Kartaba reunión noremaeɗe, ichia jara ɓuu chi ichia kawaburuu ichi kʉ̃risiaɗe ua koɓooyua. Junior, dawarau nibapeɗa precursor nii, ichi ocupa ãrĩã ɓoobaria, ichia jara ɓua: “Mʉ baita ɓiɗi ɓiɗia estudiaidu nii chi semanaɗe, joma ara eteuɗe asei baɗabaarã”.

15. ¿Saka biʼia preparaɗaiba reunión baita?

¹⁵ ¿Saka biʼia preparaɗaiba reunión baita? Naa wiɗiɗayua Jeowamaa ichi Jauri deabiyua (Luc. 11:13; 1 Juan 5:14). Maabea, biʼia kauwa ochiaɗayua chi eɗa ɓʉ kuɓuuɗebena. Kʉ̃risiaɗayua chi título, chi subtitulorã, chi imagen recuadrorã baare. Maabea, kauwa ochiaɗaika chi párrafo aɓaaɓaa mauɗe leaɗayua chi textorã dachia poyaaburuuɗe. Kʉ̃risiaɗayua chi eɗa jara kuɓuuɗebena, mauɗe chi dachia jaraburuudu reunionɗe. Biʼia preparabudaubʉrã, biʼia ãrĩã ɓooyua dachi baita maabera jua ʉtaa ʉapeɗa beɗeaɗai ɓuu (2 Cor. 9:6).

16. ¿Celularɗe maebʉrã tabletɗe kãare ira koɓooi ɓua estudiai baita mauɗe saka estudiabaraa jãuɗeeba?

¹⁶ Ochia kawaɗaika aplicación maebʉrã programa kawai baita. Jeowaba ichi organizaciónɗeeba ãrĩã dea ɓua dachi preparaɗayua. Chi aplicación JW Library^® ichia dachia descargai baita dea nii chi kartarã estudiabadau chi telefonoɗe maebʉrã chi tabletɗe. Dachia estudiaɗai ɓua reunionɗe beɗeabudauɗebena, makawẽebʉrã leaɗapeɗa ũriɗayu, sama mauɗe sakaeɗe dachia kʉ̃riaburuuɗe. Chi nureeba nau aplicación ochiabadau ãchi trajoɗe maebʉrã escuelaɗe descansa panuuɗe, maebʉrã eɗu waa wãburuuɗe. Mauɗe, chi programa Watchtower Library mauɗe Watchtower KARTARÃ INTERNEƊE DUANUU^™, jãuɗe dachia estudiaɗai ɓua chi ekareɗa koɓee siɗa.

17. (1) ¿Sakayua biʼia ɓua aribia preparaɗayua beɗeai baita? (2) ¿Kãare kawasaa videoɗe Hazte amigo de Jehová: Prepara bien tu comentario

¹⁷ Dachia poyaai ɓuubʉrã, ãrĩã preparaɗayua beɗeai baita artículo aɓaaɓaa. ¿Sakayua? Dachimaa beɗeabiɗaayua dachi jʉa ʉtaa ʉaburuucha. Waabenarã araɓau jua ʉtaa ʉabudauɗe dachi beɗeabiɗawẽebʉrã. Mauɗe chi dachi beɗeabia kuɓuuba ãrĩã beɗeabiibai ɓuu tiempo wãʼãe diɗiburuuɗeeba. Mauɗeebiɗa kĩruɗaabapeɗa nomaaɗaabayua ara naa empezaburuu parrafoɗe beɗeabai ɓuubʉrã. Aribia chi beɗeai baita preparabudaubʉrã, ãrĩã beɗeai baita ɓooi ɓuu reunionɗe. Mauɗe chi texto Bibliaɗebena siɗa leaɗai ɓuu. Maka ɓumina, preparaɗaika jaraɗayua ara dachi beɗeaɗeebiɗa.b

18. ¿Sakayua ɓaʼãraburu beɗeabaraaɗaiba?

¹⁸ Ara ɓaʼãraburu jaraɗayua. Dachia ara ɓaʼãraburu jarabudaubʉrã, waabenarã kĩrajʉʉbadau. Mauɗeeba panauɗayua treinta segundoɗeburu (Prov. 10:19; 15:23). Importante ãrĩã ɓua chi aribia babudau reunionɗaa wãbadaurãba biʼia unubiɗayua waabenarãmaa ɓaʼãraburu beɗeayua. Minuto ãrĩã beɗeabudaubʉrã, waabenarã jʉa ʉtaa ʉaɗaabai ɓua, kʉ̃risiaɗapeɗa ãchi kĩra poyaa jaraɗaabai ɓuu. Mauɗe, ɓiɗĩika beɗeabudaubʉrã, ãbarã aribia beɗeaɗai ɓua. Dachi naa beɗeabibudaubʉrã chi parrafoɗe, aude importante ɓooyua chi panauburuu ɓiɗĩikaburu ɓooi, jarawẽa joma chi parrafoɗe eɗa kuɓuu. Chi bibuara ɓuu jarapeɗaaɗakare, maucha jaraɗai ɓuu chi eɗa ɓʉ kuɓuuɗebena (ochias chi recuadro “¿Kãare jarai ɓua jua ʉtaa ʉapeɗa beɗeaburuuɗe?”).

19. ¿Saka aiɗai ɓua chi wiɗikuabariiba, maamina dachiara kãare aseɗaiba?

¹⁹ Jaraɗai ɓua chi wiɗikuabariimaa chi parrafoɗe beɗeaɗayu. Naka aseɗai kʉ̃risiabudaubʉrã, beɗeaɗaika chi ãba ome reunión naeɗeeɗa. Chi párrafo neeburuuɗe, chi jua isa aribia ʉtʉ ʉapeɗa dachi unuɗayua.

20. ¿Reunión saka araɓau ɓua jari amikorã baare chiko kooruu kĩra?

²⁰ Chi reunión congregacionɗebena dachi chi chiko amikorã baare kooruu kĩra ɓua. Ãbarãba chiko kobiyua dachi invitaɗapeɗa mauɗe chiko kaebea kiruu odoébaɗa abudaubʉrã, ¿sakaɗaiba? Ɓiɗĩika peraɗai ɓuu, maka ɓumina, bereka odoeɗai chi chiko jomaurãba bustaburuudu. Chi reunionɗaa, dachi wãbibarii Jeowaburua, ichia mesa aɓa biʼia keɗee iɗaa preparabarii (Sal. 23:⁠5; Mat. 24:45). Ichia bustabarii dachia biɗa ɓiɗĩika odoeɗai, chi dachia poyaaburuudu. Jãuɗéburu, biʼia preparaɗayua mauɗe jua ʉtaa ʉapeɗa beɗeaɗayua dachia poyaaburuuɗe. Makaburu, koɗai panuu chi mesa Jeowaɗebena mauɗe aiɗaɗayua waabenarã siɗa maka aseɗayua.