¿Mukĩra kakua maebʉrã wẽra kakua iɗeeba sõyu araɓau ɓuẽ mukĩra wẽra baare kãi noɓooɗe wãaruu kĩraka?

Centros para el Control y la Prevención de enfermedades, Estados Unidosɗebenaba jara ɓuu kũudrãarã ãrĩãrãmaa 15 mauɗe 19 año nureerãmaa wiɗisiɗau ãchi mukĩra kakua maebʉrã wẽra kakua iɗeeba sõbadaurã. “Ãrĩãrãba maka asebadau apeɗaaɗa baɗa”, Sharlene Azam ichia ɓʉɗa baɗa chi libro Oral Sex Is the New Goodnight Kiss (Sexo oral: el nuevo beso de buenas noches). Ichia naka jaraɗa baɗa: “Barikiaurã kũudrãarã ome beɗeaburuubʉrã, mukĩra kakua maebʉrã wẽra kakua iɗeeba sõyu ʉ̃rʉbena, maarãba jaraɗayua jãka ariɗe ɓuu, mau araɓau ɓuuwãe kãi noɓeeruu kĩra junebena baara kʉ̃risiabadau.

• ¿Bʉa kãare kʉ̃risiai ɓua?

• ¿Sãuba chi ariɗe ɓuu?

• ¿Kachirua ɓuẽ maebʉrã biʼia ɓubaaka?

¿Bʉa kãare kʉ̃risiai ɓua?

Panauchãu maka o makawãe.

1. ¿Wẽra warr bara ɓeei ɓuẽ aɓauba ichi kakua iɗeeba sõburuubʉrã?

   1. Maerã

   2. Makawãe

2. ¿Mukĩra kakua maebʉrã wẽra kakua iɗeeba sõyu jãuba ẽpermai ɓuẽ?

   1. Maerã

   2. Makawãe

3. ¿Mukĩra kakua maebʉrã wẽra kakua iɗeeba sõyu araɓau ɓuẽ mukĩra wẽra baare kãi noɓooɗe wãaruu kĩraka?

   1. Maerã

   2. Makawãe

¿Sãuba chi ariɗe ɓuu?

Chi panauɗa baɗa ekare kuɓuu ome kauwa ochiaba.

1. ¿Wẽra warr bara ɓeei ɓuẽ aɓauba ichi kakua iɗeeba sõburuubʉrã?

   Panau ɓuu: Makawãema. Mauɗeeba chi nureeba kʉ̃risia panuu mukĩra kakua maebʉrã wẽra kakua iɗeeba sõyu jãka kachiruawãe ɓuu.

2. ¿Mukĩra kakua maebʉrã wẽra kakua iɗeeba sõyu jãuba ẽpermai ɓuẽ?

   Panau ɓuu: Maerã. Chi niiba mukĩra kakua maebʉrã wẽra kakua iɗeeba sõburuubʉrã deai ɓua hepatitis A o B, verrugas dachi kakua ɗoiɗubenaɗe, kajeraa, mau herpes maɗau, sida, maebʉrã sífilis.

3. ¿Mukĩra kakua maebʉrã wẽra kakua iɗeeba sõyu araɓau ɓuẽ mukĩra wẽra baare kãi noɓooɗe wãaruu kĩraka?

   Panau ɓuu: Maerã. Mukĩra kakua maebʉrã wẽra kakua iɗeeba sõyu, mukĩra kakua ãdaumaa bʉeyu, mauɗe mukĩra kakua maebʉrã wẽra kakua aɓabenaɗe wauyu, mau ara aɓau ɓuu mukĩra wẽra baara kãi noɓooɗe wãaruu kĩra.

¿Kachirua ɓuẽ maebʉrã biʼia ɓubaaka?

Ochiaɗaika kãare jara ɓua chi Bibliaba mukĩra kakua maebʉrã wẽra kakua iɗeeba sõyu ʉ̃rʉbena.

Chi Bibliaba jara ɓuu: “Dachi Akõreba kʉ̃ria ɓuu [...] machi kakuaba barikiu kachirua waurã́sturu” (1 Tesalonicenses 4:​3, Biblia Chamí, WPS.).

“Machi kakuaba barikiu kachirua waurã́sturu” a ɓuumaa jara ɓuu barikia ɓee asebadau chi kima bara nurerãwãe kãiɗayu baita, mukĩra kakua maebʉrã wẽra kakua iɗeeba sõyu, mukĩra kakuaɗeeba ãdaumaa bʉeyu mauɗe mukĩra kakua maebʉrã wẽra kakua aɓabenaɗe wauyu. Chi ichi kakuaba barikiu kachirua wauburuubʉrã; kachirua ãrĩã wãyua mauɗe Dachi Akõreɗe biɗa kaita nibaɗe wãyua (1 Pedro 3:​12).

Chi Bibliaba jara ɓuu: “Kakuaɗeeba kachirua wauruubʉrã, dachi kakua kachirua ɓeei” (1 Corintios 6:​18, Biblia Chamí, WPS.).

Mukĩra kakua maebʉrã wẽra kakua iɗeeba sõoruubʉrã ichi ẽpermai ɓuu mauɗe Dachi Akõreba akawa ɓuyua, maabae nomaa nibaɗe wãyua. Chi libro Cómo hablar de sexo con los adolescentes para que te escuchen, jãuɗe naka jara ɓuu: “Chi nuree junebena baara kãipeɗaaɗakare nomaa sentibadau jãu baitaburu jʉrʉɗapeɗa maabae wãbadauɗeeba, chi nureeba mʉ jãu jãka aseebai baɗa abadau mauɗe mukĩra kakua maebʉrã wẽra kakua iɗeeba sõpeɗaaɗakare biɗa maka sentiɗai ɓuu. Jãka barikia ɓee kachirua ase nii araɓau junebena baara kãi noɓooɗe wãaruu kĩra”.

Chi Bibliaba jara ɓuu: “Mʉ, Jeowa, bichi Akõrebʉ, chi jaradea nii bichi biʼia wãbiyua” (Isaías 48:​17).

¿Bichimaa biʼia ɓuẽ chi Dachi Akõreba jara ɓuu mukĩra wẽra baare kãibadauɗebena? ¿Bichia ijãa ɓuẽ jãka biʼiwãe ɓuu? Carretera aɓa ɓuuɗe señalna transito baita ãrĩã kuɓuu, jãuba jara kuɓuu sãabeɗaa ãdayu mauɗe saka bari noɓeeɗauyu baita. ¿Bʉ baita biʼia ɓuẽ, jãarã señalna? ¿Kãare pasaiba bichi makawãebʉrã junebenarãba caso ase kʉ̃riaɗaabʉrã?

Araɓau ɓuu Dachi Akõreba jara kuɓuu ome. Bichia ũriwẽebʉrã kachirua wãyua (Gálatas 6:​7). Chi libro Sex Smart (Sexo inteligente) jãuɗe naka jara ɓuu: “Bichia asewẽebʉrã chi kuitaa kuɓuu biʼia ɓuu, ara bichi du aɓa biɗa respeta nibaabayua”. Maka ɓumina, bichia aseburuubʉrã chi Dachi Akõreba jara kuɓuu unubiyua bichia kuitaa ɓua chi sãu biʼia ɓuu makarã bichi kʉ̃risia biʼia nibayua (1 Pedro 3:​16).