¿Sakayua Jeowa ɗebena Jaranũrẽrãba chi chiko Kobadau Señor akordaɗayua abadau jãu reunión diwara asebadaa waabenarã religión kãyabãra?

Dachirãba ara jãka jari chi Bibliaba jara ɓuu chi chiko Kobadau Señor akordaɗayua abadau kĩraka asebadau (1 Corintios 11:20). Junebena religiorãba chi Bibliaɗe jara ɓuu kĩrakawẽe asebadau.

¿Sakayua chibʉrʉbadaa chi chiko Kobadau Señor akordaɗayua abadau aseɗai baita?

Dachirã chibʉrʉbadau ara kiruma aɗayua Jesusba aseɗa baɗa dachi kakua (Mateo 20:28; 1 Corintios 11:24). Jãuba dachi pekaoswãe nibabiyuwẽe. Bibliaba jara ɓuu dachia ritual aseɗaabai Dachi Akõreba dachi perdonabii baita. Bari dachia Jesusɗéburu ijãa panuubʉrã ichia perdonakuayua (Romanos 3:25; 1 Juan 2:1, 2).

¿Sãabecha naka aseɗaiba?

Jesusba jaraɗa baɗa ichi discipulorãmaa ichi biuɗaɗebena akordaɗayua maka ɓumina, sãabecha aseɗayu jaraabasia (Lucas 22:19). Chi nuree ẽbẽrarãba kʉ̃risiabadau mescha aseɗayu, junebenarãba kʉ̃risiabadau semanacha maebʉrã noremaacha aseɗayu mauɗe junebenarãba kʉ̃risiabadau ãchi ase kʉ̃riaburuuɗe aseɗai ɓua. Jãarãba naka jarabadaumina, dachia nauɗe kʉ̃risiabaraaɗai.

Chi dia chi judiorã Pascua asebadauɗe, ara jãu diaɗe Jesusba chi nabena reunión chi chiko Kobadau Señor akordaɗayua wau adauɗa baɗa, maaɗakare ichi biuɗa basii (Mateo 26:1, 2). Chi Bibliaba jara ɓuu Jesús chi oeja cheke Pascua baita beataaruu kĩra ɓoosii (1 Corintios 5:7, 8). Chi Pascua añocha asebachii (Éxodo 12:1-6; Levítico 23:5). Chi nabenarã cristianoba chi chiko Kobadau Señor akordaɗayua añocha asebachiɗau, mauɗeeba iɗibea chi Jeowa ɗebena Jaranũrẽrãba ara jãka asebadau.

Chi día mauɗe chi hora

Chi Jesusba jaraɗa baɗaba unubi ɓuu sãabecha aseɗayu, kãare diaɗe mauɗe kãare horaɗe aseɗayu. Ichia aseɗa baɗa 14 nisanɗe chi año 33ɗe, ichia ʉmada eɗa wãɗakare asesia, jãka aseɗa baɗa chi calendario jeɗeko Bibliaɗebenaɗe jara ɓuu kĩra (Mateo 26:18-20, 26). Dairã Jeowa ɗebena Jaranũrẽrãba ara aɓau ase nuree, ara chi hora chi día jãka pasaɗaɗe, chi nabena cristianorãba asebachiɗau kĩra.

Chi 14 nisanɗe año 33ɗe chi día viernesɗe basii, bariara jãka ɓumina, añocha barikiau día semanaɗebenaɗe bai ɓua. Kuitaaɗayua kãare diaɗe bai ɓuu chi 14 nisanɗe añocha, dairã chi Jeowa ɗebena Jaranũrẽrãba asebadau chi ẽbẽrarãba asebachiɗau kĩraka Jesús nau iujãaɗe nibasiiɗe, chi judiorã iɗibea asebadau kĩraka daiba jãka aseɗakaa.a

Chi pan chi vino baara

Jesusba chi pan levaduraswãe ɓuu chi vino adauɗa baɗa chi Pascuaɗe ɓeeɗa baɗa baara, nau reunión aseɗa baɗa (Mateo 26:26-28). Mauɗeeba, dairãba iɗibae adaubadau chi pan levaduraswẽa mauɗe aliñoswẽa ɓooyu, chi vino uva ɓaa mau asia ɓooyua, mauɗe chi vinoɗe duse eɗa ɓuebai, itua mauɗe kiɗua ɓaa siɗa eɗa ɓuebai, du aɓaburu asiabiiruu.

Chi nuree religiorãba adaubadau pan asiaɗa baɗa. Maka ɓumina, chi Bibliaba jara ɓuuɗe chi levaduraɗebena, jãuba jara ɓuu pekao mauɗe kachirua ãrĩã ɓoobarii kĩraka ɓuu (Lucas 12:1; 1 Corintios 5:6-8; Gálatas 5:7-9). Mauɗeeba chi Bibliaba pan levaduraswẽa mauɗe aliñoswẽa jara ɓuuɗe, jãuba jara ɓuu ara chi Jesús kakua jipa nii kĩraka ɓuu (1 Pedro 2:22). Chi nuree religiorãba chi uva ɓaa adaubadau chi vino bai baɗa kãyabãra. Bari Bibliaɗe naka jara kuɓuuwẽemina jãarãba kawabibadau itua akawa poyaa doobai, mauɗeeba naka ase nuree (1 Timoteo 5:23).

Chi pan mauɗe chi vino jãu Jesús kiuru maebʉrã Jesús oawẽema

Iɗi baerã chi pan asiawẽa ɓooyu mauɗe chi vino adaubadau reunionɗe Jesús biuɗaɗebena akordaɗayua, jãu chi Jesús kiuru kĩraka ɓuu mauɗe chi Jesús oa kĩraka. Jãu reunionɗe milagro aseɗakau pan kiuruɗe babiɗakau mauɗeeba vino oaɗe babiɗakau. Kawaɗai Bibliaba jara ɓuudu mauɗebena.

• Jesusba ichi discipulorãmaa jarai basia dóbaɗa mʉ oa, jãka jarasiiba, makarã Dachi Akõre ũrirã́baɗa ai basia (Génesis 9:4; Hechos 15:28, 29). Maka ɓumina, jãu makawãe basia Jesusba akawa jaraabasia Dachi Akõre ũrirã́baɗa ai basia, ichia kuitaasiiba Jeowa baita chi oa importante ãrĩã ɓuu (Juan 8:28, 29).

• Chi apostolerãba dosiɗau jãu Jesús oawẽe basia, jãu ẽsabuɗe Jesusba ichi oa ea ɓueɗayua aɗa basia, ichia jarasiiɗe abiɗa ichi biuwẽa koɓoosia (Mateo 26:28).

• Jesús jãka biuɗa baɗa ɓes aɓaburu asesia (Hebreos 9:25, 26). Añocha chi chiko Kobadau Señor akordaɗayua reunionɗe chi pan kiuruɗe babiyubʉrã mauɗe chi vino oaɗe babiyubʉrã, joma jãma wãbadau makarã ara Jesús aseɗa kĩraka ase nurea.

• Jesusba jaraɗa baɗa: “Nau asébaɗa mʉʉɗebena akordaɗayua”, maamina ichia jaraabasia: “Ara naka aseɗayua mʉa machi kakua ase ɓoosii kĩraka” (1 Corintios 11:24).

Chi ẽbẽrarãba ijãa nuree chi pan mauɗe chi vino baara, chi oa chi kiuru baɗa Jesusɗe, naka kʉ̃risiabadau junebenarãba chi textorã Bibliaɗe eɗa koɓee biʼiwẽe traducibadauɗeeba. Chi ɓeeba jara ɓee Jesusba vino adausiiɗe naka jaraɗa: “Nau mʉ oabʉ” (Mateo 26:28, Biblia Chamí, WPS.). Maka ɓumina, chi beɗea Jesusba jaraɗa baɗa, chi nureeba naka traducibadau: “Cha nau mʉ oa kĩraka ɓua”. Jesusba naka jara ɓoosii ichia kapichia ejemploɗeeba jaradeabachia (Mateo 13:34, 35).

¿Kairãba chi pan koɗapeɗa vino baara dobadau?

Chi chiko Kobadau Señor akordaɗayua reunionɗe ara ɓaʼãraburu nurea chi pan chi vino baara dobadaurã. ¿Sakaẽra jãka ase nurea?

Chi oa Jesusɗe ea ɓueɗaba aseɗa basia “beɗea chiwiɗi deai” maebʉrã “pacto chiwiɗi”, jãuba unubi ɓuu Jeowaba naeɗe beɗea deaɗa chi puuru Israelɗebenarãmaa chi sore ɓoosia (Hebreos 8:10-13). Chi jãu pacto chiwiɗiɗe duanuurãburu dobadaa chi pan chi vino baara chi chiko Kobadau Señor akordaɗayua reunionɗe. Jomaurãba Chi Jeowa ɗebena Jaranũrẽrãba pan koɗakau mauɗe vino doɗakau. Dachi Akõreba jʉrʉ adauɗadu ãchiaburu kobadau (Hebreos 9:15; Lucas 22:20). Bibliaba jara ɓuu 144.000 ẽbẽrarãdu, jãarãburu Jesús ome gobernaɗayua bajãaɗe (Lucas 22:28-30; Apocalipsis 5:9, 10; 14:1, 3).

Ẽbẽrarã ɓiɗĩikaburu duanua Jesús ome gobernaɗai baita bajãaɗe, maamina ãrĩã ẽbẽrarã nau iujãaɗe duanaɗai ɓua biuɗawẽa (Lucas 12:32; Apocalipsis 7:9, 10). Chi ẽbẽrarã nau iujãaɗe duanaɗai ɓuuba pan vino koɗakaumina, dachia wãuribadau ara kiruma aɗayua Jesús dachi kakua biuɗa baɗaɗeeba (1 Juan 2:2).