Chi kũudrãa aɓa niiba unu ɓuu ẽbẽrarã wãuribudaa Jeowa ɗebena Jaranũrẽ Deeɗaa

KŨUDRÃARÃ AWẼRARÃ OMEBA WIƊI PANUU

¿Sakayua biʼia ɓua Jeowa ɗebena Jaranũrẽ Deeɗaa wãyua?

Chi Jeowa ɗebena jaranũrẽrã ome bes semanaɗe duanabadaa ãbua chi Jeowa ɗebena Jaranũrẽ Deeɗe. ¿Kãare asebadaa aria? ¿Kãare baita serbi ɓua mau reunionɗaa wãɗayu?

¿Kãare asebadaa chi Jeowa ɗebena Jaranũrẽ Deeɗe?

Aria jaradeɗekabadaa kãare baita serbi ɓua Bibliaba jaradeɗeka ɓuuɗebena. Chi reuniorãba naarã baita jaradeɗeka ɓua:

Dachi Akõre ʉ̃rʉbena chi ariɗe ɓuu kawaɗai baita.
Kawaɗayua sakayua iɗibea ne joma barau ʉ̃rʉbena.
Ẽbẽra bia nibai baita.
Amikorã biʼia kiruree jʉrʉɗai baita.

¿Nau kuitaa ɓoosee? Dachia reunión asebadaa Jeowa ɗebena Jaranũrẽ Deeɗe naka trʉ̃badaa, jãmaria chi aude beɗeabadau Dachi Akõre Kobierno ʉ̃rʉbena (Mateo 6:9,10; 24:14; Lucas 4:43).

¿Sakayua biʼia ɓua bichi aria wãyu?

Chi aria jara ɓuuba bichi aiɗayua. Chi Bibliaɗebena jaradea panuu chi reuniorã Jeowa ɗebena jaranũrẽrãɗe ũkuru waaburu kawabiɗayua biʼia kʉ̃risiabii baita (Proverbios 4:5). Bibliaba ũkuru aiɗai ɓua chi biʼia ɓuu asei baita. Mauɗe chi ɓee wiɗi ɓeerã ũkuru panauyua, nau kĩra ɓee:

Nauɗebena beɗeabadaa chi reunión saado maebʉrã domingoɗe:

¿Sakayua dachirã Bibliaɗeeba duanaɗaiba?
¿Kaimaa karibábaɗa aɗai ɓua dachia supri duanuuɗe?
¿Kãare asemaa ɓua dachirã kakua Dachi Akõre Kobiernoba?

“Kõpaero eskuelaɗebena neesia reunionɗaa. Mʉ deeɗabenarã baara akʉ ɓeesii maabea chi kartarã araa ãbua lea panasii. Mau kaaɗe, mʉʉmaa jarasii ichia ãrĩã bustaɗa basii ẽbẽrarãba ne joma wiɗi duanuu unusiiɗe. Mauɗe ichi iglesiaɗe ichi wãuribariimaa kartarã ara jãka uru duanuuwẽe kawaɗai baita dachirã kĩra” (Brenda).

¿Nau kuitaa ɓoosee? Jeowa ɗebena Jaranũrẽ De wãi baita bari ɓuu mauɗe aria chi nejarra wiɗiɗakaa.

Ẽbẽrarã bichia aria unuuruuba ũkuru biʼia akʉ ɓeebi ɓua. Bibliaba jara ɓuu dachirã ũkuru ãbua reuni duanuu dachi chiya biʼia akʉ ɓeebiyua (Hebreos 10:24, 25). Nau iujãa chi ẽbẽrarã juakaya ãrĩã ɓuuɗe, dachi tiempo ãbua duanaɗai ẽbẽrarã Dachi Akõre kakuaburu ãrĩã kʉ̃risia duanuu ome mauɗe waabenarã ome ãrĩãdu kĩrajʉʉbi ɓua.

“Besesɗe diaɗe mʉ ãrĩãdu nomaapeɗa kãsa akʉ nuɓuabaria, maamina chi ẽbẽrarã Jeowa ɗebena Jaranũrẽ Deeɗaa wãuribudauba mʉ biʼia ãrĩã kiruu sentibibadaa. Mʉ waya deeɗaa neeburuuɗe chi reunión akabaɗakare, kĩrajʉʉ ãrĩã sentibaria mauɗe chi noremabena baita mʉ jãabera ariɗe biʼia nuɓeebarii” (Elisa).

¿Nau kuitaa ɓoosee? Nau iujãa jomauɗe 120 mil konkrekasion aude baraa Jeowa ɗebena jaranũrẽɗe mauɗe 60 mil lukarna barau reunión aseɗai baita. Añocha 1.500 de reuniorã baita karaaɗayua ãrĩã ẽbẽrarã imibadauɗeeba.a

Kãare kʉ̃risiabadaa waarã kũudrãarã awẽrarãba

“Mʉ awẽra nibasiiɗe, kõpaero eskuelaɗebena mʉ ome wã ɓoosii reuniorãɗaa maabea ichi ãrĩãdu kĩrajʉʉsii ẽbẽrarã dawuarã kirureerã, kũudrãa kirureerã baara ãbua kawa duanuuɗeeba. Ara nauɗe chibari mʉʉɗe neesia maabea mau siɗa ãrĩã kĩrajʉʉsii dairãba Biblia ãrĩãdu leamaa ɓuuɗeeba. Mʉa ichi ãrĩã kĩrajʉʉ nii unusiiɗe jãuba mʉʉmaa ãrĩã aude kʉ̃ria kawabisia chi reuniorãɗe” (Jessica).

“Mʉa unu ɓuu reunionba mʉ problemarã ua ɓuu ãrĩã kʉ̃risiabikau. Aria mʉa kawa ɓuu dachi biʼia bibiɗai, mauɗe ẽbẽra bia nureaɗai baita jaradea ɓua, mauɗe waabena ãrĩã barau siɗa. Mʉ Jeowa ɗebena Jaranũrẽ Deeɗaa wãɗakare ariabena mʉ ãrĩãdu chaarea ɓuu awara wãbarii” (Timothy).

Mukĩra aɓa niiba mʉa reunionɗaa wãɗa aɗa, naka asii: ‘Mʉ bari neeɗabasii sama machia ãyaa jaraaruu unuyua chi machia ijãa nureeɗe. ¡Maamina chi mʉa ijãaruu kĩra mʉa ãyaa kʉ̃risia ɓoosii!’. Mauɗe ichia ãrĩã bustasii chi Jeowa ɗebena jaranũrẽrã barikia kirureerã. Ichia jarasii mʉʉmaa: ‘Maamina ʉ̃rãburu unukuasmina, ãchia mʉ kĩrabara yataɗeeɗa unubadauka ochiasiɗaa’” (Jacob).

“Mʉa besesɗe kʉ̃risiabarii: ‘Chi reunión akabaɗakare mʉ isa wãi deeɗaa’. Maamina mʉ chi reunionɗe ɓuumisa jãu olbidabaria. Mauɗe waabenarã baara beɗearuu mʉa wãkau kʉ̃risia uru ɓooɗa naeɗe. Mʉa amikorã biarã ua kirua reunionɗaa wãbariiɗeeba” (Madison).

a Kuitaa kʉ̃ria ɓuubʉrã sama reunión asebadau, nau paginaɗaa wãse, “Konkrekasion ʉrreuniorã Jeowa ɗebena Jaranũrẽɗe” maabea bertús “Lukar bichi kaita jurus”.