KŨUDRÃARÃ AWẼRARÃ OMEBA WIƊI PANUU
¿Kãare aseɗai ɓua ne kachirua aseɗaamaaba?
Chi apóstol Pabloba ɓʉsii: “Mʉa biʼia ɓuu ase kʉ̃ria ɓuuɗe, chi miadaa ɓuu mau mʉʉɗe bara ɓua” (Romanos 7:21). ¿Araɓau kĩra kʉ̃risiasee? Naka kʉ̃risia ɓuubʉrã nau articuloba aiɗayua kachiruaɗe ɓaemaaba.
¿Kãare kuitaabadaa?
Ẽbẽrarãba ara kapichia ne miadaa asebii kʉ̃riaɗapeɗa tentacionɗe ɓaebii baita. Jãuɗeeba Bibliaba jara ɓuu: “Chi kõpaerorã kachiruarãba dachia biʼia ase nibaɗa ida ɓuibi panua” (1 Corintios 15:33). Besɗe dai kõpaerorã kachiruarãba ne miadaa asebi kʉ̃ria panuu bẽrã o maebʉrã internetɗe ochiabadaa kĩra ase kʉ̃ria panuu bẽrã jãuɗeeba besɗe chi miadaa ase kʉ̃ria ɓuu (Éxodo 23:2).
“Ɓoobaria asei baita waabenarãba ochiaɗayua, waabenarãba ase panuu kĩra aseɗai kʉ̃risia panuu, maarãba dachiɗebena atua jaraɗaamaaba” (Jeremy).
Nauɗe kʉ̃risiaba: ¿Sakayua chaarea ɓua kachirua aseemaaba junebenarãba dachi ʉ̃rʉbena kachirua kʉ̃risiaɗai ɓuuɗeeba? (Proverbios 29:25).
Nau kawasiɗaa: Ida asebirã́ba kachirua junebenarãmaa Bibliaɗe jara ɓuu kãyabãra.
¿Kãare asebadaa?
Ijãaba bichia kʉ̃risia ɓuudu. Akawa ne biadu kerewẽebʉrã, waabenarãba ne kachirua asebiɗai ɓua. Nau beɗea Bibliaɗebena ũriba: “Joma mau kauwa ũrísturu, maamina aɓa chi biáturu ijásturu” (1 Tesalonicenses 5:21). Biʼia kuitaaruuba chi bichi kere ɓuuɗebena chaareawẽebayua chi kachirua aseebai.
Nauɗe kʉ̃risiaba: Bichi baita, ¿sakayua biʼia ɓua Dachi Akõre Beɗea ũriyua?
“Bibliaba jaraburua aseburuuɗe junebenarãba kachirua asebudau aseebayu makarã respeto iɗaa trataɗayua” (Kimberly).
Daniel kĩraka aseɗai ɓua: Kũudrãa nibasiiɗe Daniel kʉ̃risia ɓoosii “ichi corazonɗeeba” Jeowa beɗea akawa ũrii baita (Daniel 1:8).
Aduabʉrã kãare kʉ̃ria ɓuu, makarã muñeco kĩraka ɓua junebenarãba jarabadau kãare aseyu.
Kʉ̃risiaba chi bichia wabiɗa biʼia asewẽe. Bibliaba jara ɓuu: “Kũudrãarãba kachirua kʉ̃riabadau kĩra waurã́se” a ɓuu, kũudrãarã duanuuɗe ne miadaa ãrĩã ase kʉ̃ria panuuɗeeba (2 Timoteo 2:22). Besɗe kũudrãarãba ne miadaa ãchi kakuaba ase kʉ̃riabadau, mauɗe kʉ̃riaɗakaa waabenarãba atua jaraɗaamaaba jãuɗeeba consejo biʼia ũri kʉ̃riaɗakaa.
Nauɗe kʉ̃risiaba: Bibliaba jara ɓuu: “Kachirua waui kʉ̃risia ɓeebarii ara dachiba maka wau kʉ̃ria panuuɗeeba” (Santiago 1:14). ¿Kãare kʉ̃ria baraa bichia joma dachi kakua ome kachirua asebariiɗebena?
“Bichi du aɓa biʼia kʉ̃risia barai chi kachiruaɗebena kãare aude ase kʉ̃ria ɓua. Leaba kãare asei ɓua ne miadaa aseemaaba maubapeɗa ɓʉtase biʼia recordai baita, ne kachirua ase kʉ̃riaburuuɗe” (Sylvia).
David kĩraka aseɗai ɓua: Besɗe Davidba ẽbẽrarã kachiruarã kĩraka kʉ̃risiapeɗa ne miadaa ase ɓoosii. Maamina David arrepentio ɓeesii mauɗe waa ne kachirua aseebasii. Jeowamaa naka ʉtaa wiɗisii: “Corazón jayoaswẽa deaba, mauɗe ne biadu ara kapichia asei baita” (Salmo 51:10).
Nau aseba. Bibliaba naka jara ɓuu: “Aɓauba machi kachirua wauruubʉrã ara mau kĩra waurã́sturu” (Romanos 12:21). Ni aɓa biɗaba ne miadaa asebii ɓua. Bichidu chi biʼia asei ɓua.
Nauɗe kʉ̃risiaba: Ne kachirua ase kʉ̃risiaburuuɗe, ¿saka ne biaburu asei ɓua?
“Ne kachirua asei naeɗe kʉ̃risia ɓuu saka sentiyua. Naeɗe biʼia aria koɓooɗa baɗa, maaɗakare jãabera biʼiwẽe sentibaria” (Sophia).
Pablo kĩraka aseɗai ɓua: Pabloba jaraɓoosii ichi jipawẽa nibasmina, ichia berekasii ne biadu asei baita, ichia jaraɓoosii ichi kakua chaarea waubasia mauɗe waubai ichia waubi ɓuu (1 Corintios 9:27).
Nau kawasiɗaa: Bichi du aɓa kʉ̃risiai ɓua kãare asei mauɗe kãare aseebai.
Melissaba 20 año ɓuu, naka jara ɓuu: “Mʉ kũudrãa nibasiiɗe chaarea ɓoosia ne kachirua aseemaaba, maka ɓumina iɗibea jãu chaareawẽma mʉ baita”. Ichi siɗa naka jara ɓuu: “Iɗibea nauɗe kʉ̃risiaruuba kĩrajʉʉ ãrĩã ɓua ne kachirua aseebasiiɗeeba, mauɗe iɗibea ne kachirua ase kʉ̃ria ɓuubʉrã naka kʉ̃risia ɓuu mʉ asewẽe bẽrã kĩrajʉʉ nibayua”.