¿Chi Bibliaba aiɗa ɓubaaka mʉ du aɓa biui kʉ̃ria ɓuuɗe?

Chi Bibliaba panau ɓuu

Maerã, aiɗai ɓua, jãu Dachi Akõre Beɗea bẽrã mauɗe ichia kĩrajʉʉbiabarii chi kĩra nomaa nuree (2 Corintios 7:6). Biblia libro jari sicólogo abadauɗebenawẽmina, jãuba aiɗabarii ida ɓuyua kʉ̃risiai baita istu biu kʉ̃ria nibayu. Chi Bibliaba biʼia ɓee jara ɓuuba bichi siɗa aiɗai ɓua.

• ¿Kãare biʼia ɓee Bibliaba jara ɓua?

• ¿Bibliaba jara ɓuẽ ẽbẽra biu kʉ̃riapeɗaaɗa baɗa?

• ¿Sãu textorã Bibliaɗebenaba aiɗai ɓua bichi biu kʉ̃ria koɓeeburuuɗe?

• ¿Sãaɗaiba amiko niiba jaraburuuɗe maucha vivi kʉ̃riawãe nii aburuuɗe?

• Mʉ bereka biuyu jʉrʉ awa ɓuu, ¿kãare asei ɓua?

¿Kãare biʼia ɓee Bibliaba jara ɓua?

• ● Chi bichi senti kuɓuuɗebena aɓabenamaa jarase.

  Chi Bibliaba jara kuɓuu: “Amiko ariɗe kiɗii kapichia kʉ̃ria nibabaría, ãba kĩra nii nomaa kuɓuuɗe” (Proverbios 17:17).

  Jãu textoba saka jara ɓua: Dachia ãrĩã kʉ̃risiaɗapeɗa nomaa duaneebudauɗe, aiɗai nesita duanua.

  Junebenamaa jarawẽebʉrã bichi saka senti niiɗebena, dachi sõɗe aude chaarea ɓeeyua. Maka ɓumina, waabenarãmaa chi bichi senti kuɓuuɗebena beɗeaburuubʉrã, bichi kakua chaarea koɓooɗa baɗa mamabera ũesãa diɗibaria, dachi problema michia ɓuu kʉ̃risia ɓooɗa baɗa, jãabera ɓiɗĩika ɓuu kʉ̃risia ɓeei ɓua.

  

  Nau asechaase: Ara iɗi junebena ome beɗeaba, bichi deɗabenarã ome maebʉrã amiko biʼia kiɗii ome biɗa.a Mauɗe, bichi senti kuɓuuɗebena kartaɗe ɓʉtai ɓua.

• ● Doctormaa maebʉrã sicólogo abadaumaa wãse.

  Chi Bibliaba jara kuɓuu: “Ẽpermo nureeba ʉrrmiɗia deabarii jʉrʉɗakau. Maumaarã chi ẽpermo nuréburu jʉrʉbadau” (Mateo 9:12, Biblia Chamí, WPS.).

  Jãu textoba saka jara ɓua: Bichi ẽpermo koɓeerã doctormaa wãi.

  Bichi biu kʉ̃ria koɓeeruubʉrã sicólogo abadaumaa wãi nesita ɓoi ɓuu. Dachi ẽperma kopaneebudauɗe peraɗakau medicomaa wãyua, ara jãka kachirua kʉ̃risiaɗapeɗa mistu aɓa biu kʉ̃ria koɓeeruubʉrã, peraɗaabayua sicologoɗaa wãyua. Mau baita biɗa tratamiento baraa.

  Nau asechaase: Isa doctormaa wãse.

• ● Bichi boroɗe adause Dachi Akõreba bichi ãrĩã kʉ̃ria nii.

  Chi Bibliaba jara kuɓuu: “¿Sẽetao omeeba ibana chekerã jua aɓa nedoobai ɓuka? Maamina Dachi Akõreba ibana joma nubarii. [...] Dachi Akõre baita machi ibana ãrea audeara biꞌia nureeɗeeba wapeaɗawẽa panásturu” (Lucas 12:6, 7, Biblia Chamí, WPS.).

  Jãu textoba saka jara ɓua: Dachi Akõreba bichi ãrĩã kʉ̃ria ua nii.

  Bichi mistu aɓa kiruu senti kuɓuu siɗa, mistu aɓa ɓuwẽma. Dachi Akõreba bichi ochia ua ɓuu, bichi saka senti nii. Bichi biu kʉ̃ria nii siɗa, Dachi Akõreba bichi kʉ̃ria ua nii. Salmo 51:17ɗe jara ɓuu Dachi Akõreba “corazón kõpeta koɓoopeɗa berpetabari ɓuu, [...] ida ɓuibayua”. Dachi Akõreba bichi biawãra kʉ̃ria nia mauɗe bichi biubi kʉ̃riawẽa.

  Nau asechaase: Bibliaɗe jʉrʉba Dachi Akõreba bichi kʉ̃ria nii jara ɓuumare. Chi capítulo 24ɗe libro Acerquémonos a Jehová jãuɗebena jara ɓua.

• ● Dachi Akõremaa ʉtaa wiɗiba.

  Chi Bibliaba jara kuɓuu: “Preocupabudauɗe Dachi Akõremaa jarásturu ichia machi ochia uakeraabariiɗeeba” (1 Pedro 5:7).

  Jãu textoba saka jara ɓua: Dachi Akõreba ichimaa jarabi kʉ̃ria ɓua joma bichi senti koɓoopeɗa preocupa niiɗebena.

  Bichi nomaa koɓooɗa baɗa Dachi Akõreba waya ũesãa koɓeebibaria mauɗe fuerza dea nia naa tʉa kãribai baita (Filipenses 4:6, 7, 13). Makaburu Dachi Akõreba aiɗa nibabaria chi ichi jʉ̃kaa neebudaurã (Salmo 55:22).

  

  Nau asechaase: Iɗi Dachi Akõremaa wiɗiba. Ichi trʉ̃, Jeowa, jaras mauɗe bichi senti kuɓuuɗebena siɗa jaraika (Salmo 83:18). Ichimaa wiɗiba naaburu tʉa kãribai baita.

• ● Kawa kʉ̃risiase chi Bibliaba jara ɓuu chi biʼia uruburuuɗebena.

  Chi Bibliaba jara kuɓuu: “Mauba dachi aiɗa ɓuu ãrea ijãa panaɗamera anclaba jãba jãaduabarii kĩra. Dachiba adauɗai panuu biawãra kuitaa panuu” (Hebreos 6:19, Biblia Chamí, WPS.).

  Jãu textoba saka jara ɓua: Bichi nomaa kuɓuuɗe aɓa kachirua kʉ̃risia koɓoopeɗa maabea june junea kʉ̃risia noɓeebaria, ara jari pua koɓeeburuuba barco ãyaa wãkarãa koɓeebarii kĩraka. Madu Bibliaba chi biʼia ɓuu uruburuuɗebena jara kuɓuuba dachi jãaduabibaria ara jari anclaba barco jãaduabarii kĩraka.

  Chi Bibliaba biʼia uruburuuɗebena jara kuɓuura biawãra bayua, Dachi Akõreba jara kuɓuuɗeeba, ichia joma dachi sufribia ɓuu acabakuaburuu (Apocalipsis 21:4).

  Nau asechaase: Aude leachãu Bibliaba chi neeburuu jara ɓuu ʉ̃rʉbena chi articuloɗe “La esperanza real de un mañana mejor”.

• ● Chi bichia busta kuɓuu aseba.

  Chi Bibliaba jara kuɓuu: “Chi corazón kĩrajʉʉ ɓuubʉrã mara ʉrrmiɗia kĩra ɓuu” (Proverbios 17:22).

  Jãu textoba saka jara ɓua: Dachia chi busta kuɓuu asebudaubʉrã, dachi kakua dauchia nibapeɗa mauɗe dachi kʉrisia siɗa ũesãa diɗibaria.

  

  Nau asechaase: Chi bichia asei bustabarii aseba. Chi chaabudauba bichi biʼia sentibi kuɓuu ũripeɗa, karta leapeɗa maebʉrã junebena bichia busta kuɓuu aseba. Mauɗe waabenarã aiɗaburuubʉrã, bichi kĩrajʉa nibai ɓua, ɓiɗĩika aiɗaburuu siɗa (Hechos 20:35).

• ● Dachi kakua ẽpermaamaaba cuida nibaba.

  Chi Bibliaba jara kuɓuu: “Ejercicio aseyu biʼia ɓuu dachi kakua baita” (1 Timoteo 4:8).

  Jãu textoba saka jara ɓua: Ejercicio asepeɗa, biʼia kãi noɓeepeɗa mauɗe chiko bia koburuuba bichi dauchia nibayua.

  Nau asechaase: Awara wãba ãdaɗe, ida maka quince minuto ɓuu siɗa.

• ● Problema ɓuubʉrã solucionai ɓua.

  Chi Bibliaba jara kuɓuu: “Maamina machiba adua panuu nubena ewariɗe kãare sãai” (Santiago 4:14, Biblia Chamí, WPS.).

  Jãu textoba saka jara ɓua: Bichi problema michia kuɓuubʉrã, mau siɗa ɓoapeɗa solucionai ɓua.

  Bichi baita problema chaarea ɓuu siɗa, nubena ewariɗe solucionai ɓuu. Makarã jãu bereka solucionayu ida ɓurã́ba (2 Corintios 4:8). Problema jãwãre solución unuɗai ɓua, maka ɓumina ẽbẽra du aɓa biuburuubʉrã ara jãmaburu neebaria.

  Nau asechaase: Bibliaɗe leachãu chi ɓee ẽbẽrarã nomaa nureapeɗaaɗa baɗa ãchia biu kʉ̃ria nureasiiɗebena. Kawaba saka ãchi biʼiawẽe koɓooɗa baɗa siɗa kawawẽeɗe waya biʼia kopaneesiɗau. Ochiase chi ɓee naarãɗebena.

¿Bibliaba jara ɓuẽ ẽbẽra biu kʉ̃riapeɗaaɗa baɗa ʉ̃rʉbena?

Maerã. Bibliaba jara ɓuu barau ẽbẽra biu kʉ̃riapeɗaaɗa. Maka ɓumina Dachi Akõre kĩruwẽebasia ãchi ome, bari jaraɗa baɗa ãchi aiɗai baita. Ichia bichi siɗa aiɗai ɓua.

Elías

• ● ¿Kai basaa Elías? Ichi profeta kĩra ʉɓʉa nibasmina, ɓesɗe ichi nomaa sentibachia. Santiago 5:17ba jara ɓuu “Elías dachi kĩra ẽbẽra basii” (Biblia Chamí, WPS.).

• ● ¿Sakayua ichi biu kʉ̃ria ɓoosaa? Elías du aɓa sentiɗa basia, ichi perapeɗa mauɗe valeswãe nii kʉ̃risiaɗa basia. Mauɗeeba naka ʉtaa wiɗisia: “Jeowa, mʉ biubis” (1 Reyes 19:4).

• ● ¿Kãareba aiɗasaa? Eliasba ichi corazón ewapeɗa jarasii ichia senti kuɓuuɗebena Dachi Akõremaa. ¿Jeowaba saka biʼia sentibisaa? Ichia kawabisii kʉ̃ria unii mauɗe ichi chaarea nii unubisii. Mauɗe jarasii ichi ãrĩã vale nii mauɗe aiɗayu baita deasii ichi biʼia cuida ua nibai baita.

• ▸ Leas Elías ʉ̃rʉbena: 1 Reyes 19:2-18.

Job

• ● ¿Kai basaa Job? Job chi nejarra mauɗe warrarã siɗa ãrĩã bara nibasia mauɗe ichi jipa traja nibabachia Jeowa baita.

• ● ¿Sakayua ichi biu kʉ̃ria ɓoosaa? Eteuɗe, joma akawa kachirua ãrĩã ɓee ɓaeɗa basia. Joma ichia inibaɗa perdeɗa basia, joma chi warrarãɗeeɗa biusiɗau mia chuburi mauɗe ẽpermeda chi puʼua ãrĩã ɓuu deaɗa basia. Maaɗakare, maucha ichi ʉ̃rʉbena kachirua ãrĩã beɗeapeɗaaɗa basia, jarasiɗau ichi kachirua ãrĩã ɓuu ase nibasiiɗeeburu jãka kachirua pasasii. Job jãabera maucha vivi kʉ̃riawẽebasia maabae jarasia: “Mʉ mauchaburu vivi kʉ̃riawẽma” (Job 7:16).

• ● ¿Kãareba aiɗasaa? Job ichiba Jeowamaa ʉtaa wiɗisii mauɗe waabenarã ẽbẽrarã ome beɗeasia (Job 10:1-3). Amiko biʼia nii, Elihú abadauba ichimaa biʼia beɗeasii, ichia aiɗasii ichi pasamaa ɓuuɗebena ãyaa kʉ̃risiabiimaaba. Chi biʼia ɓoosii Job ichiba ũrisii Jeowa maabae ichia aiɗaaruu ijãasii.

• ▸ Leas Job ʉ̃rʉbena: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

• ● ¿Kai basaa Moisés? Ichíturu chi líder baɗa Israel naeɗeeɗabenaɗe mauɗe profeta kĩra jipa nii nibasia.

• ● ¿Sakayua ichi biu kʉ̃ria ɓoosaa? Moisés trajo ãrĩã bara ɓoosia asei baita, ichi ʉ̃rʉbena ãrĩã kachirua beɗeabachiɗaa kapichia mauɗeeba ichi akawa surebarii ɓeesia. Mauɗeeba Dachi Akõremaa naka wiɗisia: “Muchuburia mʉ beas” (Números 11:11, 15).

• ● ¿Kãareba aiɗasaa? Moisesba jaraɗa Dachi Akõremaa saka senti ɓuu. Dachi Akõreba chi ɓee trajo ẽebarikuaɗa baɗa ichi biʼia sentibiyua.

• ▸ Leas Moisés ʉ̃rʉbena: Números 11:4-6, 10-17.