¿Kãare jara ɓua chi Bibliaba wãwa awara neei naeɗe beaburuu ʉ̃rʉbena?

Chi Bibliaba panau ɓuu

Bibliaba jarawẽe warr cheke ɓiɗe nacei naeɗe awara jiratabi ɓuu ʉ̃rʉbena. Maamina Bibliaba jara ɓuu Dachi Akõreba kãare kʉ̃risia ɓuu dachi vidaɗebena mauɗe chi warr ɓiɗe niiɗebena.

Dachi Akõreba chi vida deaɗaa rekaloka (Génesis 9:6; Salmo 36:9). Dachi Akõre baita joma chi chokae ɓee kĩrawãrea ãrĩã ɓuu, warr cheke awara niiwẽa ɓuu siɗa. Chi niiba chi warr cheke awara ertabiiruubʉrã mau beatai kĩra ɓuu.

Chi ley Dachi Akõreba deaɗa baɗa Israelitarãmaa naka a ɓua: “Mukĩrarã ome niɗau chĩomaa panuuba wẽra wãwa baraa nii puʼuabudaubʉrã, maabea ichi naeɗe wãwa adausirã maamina ni aɓa biɗa biuwẽebʉrã, chi culpa baraa ɓuuba paai baraa chi wẽra kimaba wiɗiburuu chi daño aseɗa kakua. Paai baraa chi juezrãba jarabudau. Maamina, aɓa biurã, bichia deai baraa vida vida kakua” (Éxodo 21:22, 23).a

• ¿Sakaeɗeeɗa chokae koɓeebaraa chi ẽbẽra?

• Aɓauba chi warr cheke ertaburuubʉrã nacei naeɗe, ¿Dachi Akõreba perdonai ɓubaaka?

• Chi nawe maebʉrã chi warr cheke ẽpermaburuu bẽrã biuyua, ¿awara jirataaruu jãu kachirua ɓubaaka?

¿Sakaeɗeeɗa chokae koɓeebaraa chi ẽbẽra?

Chi vida ẽpesa nia chi wẽra ɓi baraa ɓuuɗeeɗa. Bibliaɗe jara ɓuu Dachi Akõre baita chi warra cheke awara neewẽa ɓuu ẽbẽra diwara ɓuu chi naweɗeebiɗa. Jeowa baita chi warr ɓiɗe ɓuu mauɗe chi nacesii nii araɓau kĩra nuree, mau ʉ̃rʉbena ochiaɗaika Bibliaɗe.

• Jeowaba ɓʉbiɗaa chi Davidba ichimaa jaraɗa: “Bichi dau baara unusia mʉ embrión ɓoosiiɗe” (Salmo 139:16). Jeowa baita David ẽbẽra aɓa ɓoosia nacei naeɗe.

• Dachi Akõreba kʉ̃risiasii trajo deai baita Jeremiasmaa ichi nacei naeɗe. Dachi Akõreba jaraɗa: “Mʉa bichi waui naeɗe, mʉ unuɗa baɗa bichi nawe ɓiɗe ɓoosiiɗe, mauɗe bichi nacei naeɗe mʉa jʉrʉɗa baɗa. Profeta nibayua chi puururã baita” (Jeremías 1:5).

• Lucas médico nibapeɗa mauɗe Bibliaɗe ɓʉɗa basii warr abiɗa nacewẽa nii mauɗe chi warr ara naceɗa ʉ̃rʉbena. Jãarã ome niɗauɗebena ɓʉ ɓoosiiɗe chi beɗea griegoɗe, ichia jara ɓoosii ãchi araɓau nuree (Lucas 1:41; 2:12, 16).

Aɓauba chi warr cheke ertaburuubʉrã nacei naeɗe, ¿Dachi Akõreba perdonai ɓubaaka?

Maka, Dachi Akõreba perdonai ɓua aɓaumaa chi warr awara jirataɓoosiiba. Mau ẽbẽrarãba Dachi Akõre kĩra kʉ̃risia panuuubʉrã, ãrĩã nomaa sentiɗaabayua ãchia aseɗa baɗaɗeeba. Bibliaba jara ɓua: “Jeowaba michuburia unupeɗa aiɗabaria [...] Chi ʉmada neeburuumare mauɗe chi ʉmada wãburuuɗaa, jãu tʉmʉa ãrĩã ɓuu; ara jãu kĩra chi miadaa dachia asepeɗaaɗa baɗa Jeowaba chi tʉmʉa kuɓubarii” (Salmo 103:8-12). Jeowabab perdonayua chi ẽbẽra nomaa sentiiburuubʉrã chi kachirua aseɗa baɗaɗeeba mauɗe jãu kachirua ɓuu waaburu aseebai (Salmo 86:5).

Chi nawe maebʉrã chi warr cheke ẽpermaburuu bẽrã biuyua, ¿awara jirataaruu jãu kachirua ɓubaaka?

Besɗe chi nureeba kʉ̃risiabadau chi dana maebʉrã warr biuɗai ɓua chi warr awara jiratabikaubʉrã, jãka dachia poyaa kʉ̃risiaɗaabai. Bibliaba jara ɓuu kĩra chi warr bitaɗe ɓuu ãrĩã vale nia.

Chi warr nacemaaɓuuɗe kachirua pasasiirã, ¿kaimaa ida biuyua, chi warr maebʉrã chi dana? Jãka pasaburuuɗe chi deɗabenarãburu jaraɗai ɓua kãare aseɗaiɗebena.