¿Kaiba asesaa Dachi Akõre?

Akõre niiba ichi warr 7 año niimaa jaraɓua: “Yataɗeeɗa, Dachi Akõreba nau iujãa aseɗabasia mauɗe chi ichiɗe eɗa kosarã baraurã siɗa. Mauɗe, Ʉmada, Jeɗeko, estreya keɗee waukaɗabasia”. Chi warr biʼia kʉ̃risianoɓeepeɗa mambea ichia wiɗisia: “Dada... ¿mauɗe kaiba asesaa Dachi Akõre?”.

“Dachi Akõre aɓabenaba aseebaɗaa. Ichira yataɗeeɗa nia”, chi akõreba panauɓua. Jambera, chi warr jãka panausiɗauba kĩrajʉʉ ɓeesia. Maamina, ichi warikãrii ɗauchia, mauchaburu kawa kʉ̃riaɓua. Ichi baita chaarea ãrĩã ɓua, kʉ̃risiaɗe ɓeei baita Dachi Akõre junebenaba aseebaɗa. Chi warrba naka kʉ̃risiaɓuu: “¿Mau sakasaa? Uniberso siɗa wauɗapeɗaaɗa baraaɓuuɗe”. Chi wiɗiɗabaɗa panauwẽabariɓua, ¿sãmabena neeɗabasaa Dachi Akõre?

¿Kãare jaraɓua Bibliaba? Ara jãka chi akõreba ichi warrmaa panausii kĩra. Moisesba Jeowamaa jaraɗabasia: “Yataɗeeɗabena asta waaburu nibayua, chi ea joma iujãa ɓee mauɗe joma barau asei naeɗeeɗa, bichi Dachi Akõre nii” (Salmo 90:1, 2). Chi propeta Isaiasba jãu kĩra ɓuu jaraɗabasia: “¿Makãrã aduabasee, ũriwẽa nika, Jeowaburu joma iujãaɗe barau aseɗabasia, ichira Dachi Akõre yataɗeeɗabena asta waa nibayu baita?” (Isaías 40:28). Mauɗe karta Judasɗeeba jaraɓuu Dachi Akõre yataɗeeɗabena asta waaburu nibayu (Judas 25).

Naarã testorãba jarapanuu, apostol Pabloba jaraɗa kĩra “Dachi Akõre Rei yataɗeeɗabena asta waaburu nibayu” (1 Timoteo 1:17). Dachia kawaɗawẽa sãabe tiempoɗe akarnaa tiempoɗe wãaduu, ichi jãma ɓua mauɗe waaburu nibayua (Apocalipsis 1:8). Dachi Akõre aɓabenaba aseebasia mauɗe poyaa biuwẽa, ichi jãka nia.

¿Sakayua jãu chaarea ãrĩã ɓua dachi baita boroɗe ɓʉɗai baita? Dachirã ɓaʼãraburu bibinuree bẽrã, dachirã baita chi tiempo ãrĩã unupanuumina, Jeowa baita biɗĩkaburu ɓua. Jeowa baita mil añorã dia aɓaburu ɓua, ichira yataɗeeɗa bibinii bẽrã (2 Pedro 3:8). Ejemplo ɓuuba kawaɗaika. Sisi mechia nii dia 50buru bibinia. ¿Jãu sisiba kawaɓue saka dachirã baita 70 maebʉrã 80 año bibinureeɗebena? ¡Makawẽma! Dachirãra jãu sisi kĩra duanua. Dachia chi waukaɗabaɗara ome kawa ochiaduubʉrã, dachi kʉ̃risiara biɗĩka ãrĩãburu ɓua ichi kʉ̃risia jʉ̃kaa kuɓuɗarã (Isaías 40:22; 55:8, 9). Mauɗeeba normal ɓua, kosarã dachia ara maka poyaa entendeɗawẽ ichi ʉ̃rʉbena.

Bariara dachi baita chaarea ɓuumina entendeɗayu, ichi yataɗeeɗa nii mauɗe asta waaburu nibayu, jãu jãka ɓua. Ẽbẽra ɓooɗabasirã Dachi Akõre wauɗa, makãrã ichi chi waukaɗabaɗa bai basia. Maamina, Bibliaba jaraɓuu Jeowaba joma aseɗabaɗa chi barau (Apocalipsis 4:11). Maubapeɗa, dachia kuitaapanuu yataɗeeɗa chi uniberso wãʼãe basii (Génesis 1:1, 2). ¿Saka neesaa chi uniberso? Kuitaapanua, yataɗeeɗa ɓoosia chi jãu aseɗabaɗa. Mauɗe ichi naeɗe ɓoosia ichi warr mauɗe anjelerã asekuai naeɗe (Job 38:4, 7; Colosenses 1:15). Kawapanua makãrã, Dachi Akõre joma barai naeɗe, du aɓa ɓoosii. Ichira junebenaba aseɗaabasia mauɗe uniberso ni ẽbẽra siɗa wãʼãe bas bẽrã.

Dachirãba kuitaapanuu Dachi Akõre nii, dachirã chokae duanuuɗeeba mauɗe chi uniberso siɗa ɓuuɗeeba. Chi uniberso joma ãdabiasii mauɗe chi leirã nau joma kawa mobeɗayua, makãrã yataɗeeɗa nibasia. Ichiaburu bida deɗekasia anjelerãmaa, ẽbẽrarã mauɗe animararãmaa biɗa (Job 33:4).