¿Bichimaa jãu jãka pasabaree? Bichia chi Biblia lea kʉ̃risiamina mau poyaa aseebasii. Ẽbẽra ãrĩãrãmaa chi Biblia poyaa leaabai ɓuu kʉ̃risiabadau. Maka ɓumina ¿chi jara ɓuuba dachi kĩrajʉʉbiibʉrã? ¿Saka bustai ɓubaama aude chi Biblia leai baita? ¿Unu kʉ̃ria ɓue chi biʼia ɓuu jarayu chi Bibliaba?

Ochiaba saka asiɗau chi nuree ẽbẽraba chi Biblia ẽpesa leaburuuɗe mau ãchia kawasiɗau biʼia ãrĩã ɓuu.

Ezekiel, 20 años niiba, jara ɓuu: “Naeɗe chi ẽbẽra perde nii kĩraka kʉ̃risiaɗa baɗa sama wãi ɓuu, maka ɓuuɗe Biblia lea ɓoosiiba mʉ chi o unubi ɓuu. Chi beɗearã biʼia ãrĩã ɓee dachi noremaacha baita”.

Frieda siɗa, 20 años niiba jara ɓuma: “Mʉ naeɗe chi kĩru ãrĩã nibaɗa barikiauɗeeba, maka ɓumina mʉa chi Biblia kawaɗakare, mauba biʼia nibaɗe wãɗa. Maabea mʉ ẽbẽra bia nibaɗe wãpeɗa mauɗe amikorã siɗa maucha ua nii”.

Wẽra Eunice aude 50 años niiba jara nii: “Nauba mʉ aiɗamaa ɓuu ẽbẽra bia nibaɗe wãpeɗa mauɗe mʉ bidaɗe biʼiawẽe ɓooɗa kambiabisii”.

Chi Bibliaba bichi biʼia nibaɗe wãbipeɗa mauɗe ẽbẽra biʼia babiyu jari naarã ẽbẽrarã pasasiɗau kĩra mauɗe ẽbẽra ãrĩãdu (Isaías 48:17, 18). Jãuba bichi aiɗa ɓua kawa kʉ̃risiapeɗa biʼia aseyua, amikorã bia nuree ome nibai, ãrĩã kĩrukaraamaaba mauɗe ãrĩã kawayu chi joma Waukabarii ʉ̃rʉbena. Chi beɗea Bibliaɗe eɗa koɓee jãu Dachi Akõreɗebenadu kuɓuu, jãuɗeeba dachi biʼiawẽe wãɗaabayu jãu ase ɓuubʉrã. Ichia konsejorã kachirua deakau.

Maka ɓumina ẽpesayua chi Biblia leai baita. Chi waabenarã articulorãɗe unuyua saka leayu chi Biblia maabea ãrĩã bustayua chi Biblia lea nibayu.

¿Saka chi Biblia leamaa ɓuuɗe kĩrajʉʉpeɗa kʉ̃risia akʉ ɓeeyua ãrĩãdu kawayua? Kawaba kãare chi Bibliaɗebena lea nuree aiɗamaa ɓuu.

Jʉrʉs sama chũpea akʉ ɓooyu baita. Jʉrʉs sama biʼia akʉ ɓooyu biʼia leayua. Mauɗe jʉrʉs sama biʼia ũɗaa akʉ ɓooyu mauɗe biʼia pũa ɓuu akʉ ɓooyu, jãuba aiɗayua biʼia kʉ̃risiayua chi lea kuɓuuɗe.

Lease kʉ̃risiaɗe kawayu baitaburu. Chi Biblia jãu rekalo kĩraka ɓua Dachi Akõre ʉtʉ bajãaɗe ɓuuɗe. Biʼia adauyua chi Bibliaɗe eɗa ɓʉ kuɓuuɗebena learuuɗe kawaɗayua biʼia ãrĩãdu jari warrarãba akõreba jaraaruu ũribadau kĩraka jãka kawayua. Kʉ̃risiarã́ba chi miadaa ɓeeɗe makawẽebʉrã junebena ẽbẽraba jarabudau siɗa mauɗe Dachi Akõremaa baita kawabiba (Salmo 25:4).

Ʉtaa wiɗiba ẽpesai naeɗe. Chi Bibliaɗe kuɓuu chi Dachi Akõre kʉ̃risiadu, jãuɗéburu dachia aiɗa nesita panua kawaɗayua. Ichia jara ɓuu ichi Jauri deabarii ichimaa wiɗibadaurãmaa (Lucas 11:13). Ichi Jauriba kʉ̃risiabibarii saka kʉ̃risiayu chi dachi Waukaɗaba. Mauɗe ɓaʼãra kawayu “chi Dachi Akõreba jaraɗaɗe” (1 Corintios 2:10).

Leaba kawayua. Bariarã learã́ba. Bichia aɓa lea kuɓuuɗe kʉ̃risiaba kãareɗebena jara ɓuu kawayua. Nauɗe kʉ̃risiaba: “¿Kãare chi biʼia unubisii chi ẽbẽraba mʉa leamaa ɓuuɗe? ¿Saka aseiba ara aɓau chi mʉa kawamaa ɓuu?”.

Kawa kʉ̃risiaba chi kuitaa kʉ̃ria ɓuu. Kĩrajʉʉ biʼia akʉ ɓooyua chi Biblia leamaa ɓuuɗe kãareba bichi aiɗai ɓuu kʉ̃risiayua. Waaburu unuyu Dachi Akõre, ẽbẽra bia nibayua, wẽra bia ãrĩã nibayua kima ome, makawẽebʉrã kima bia nibayua wẽra ome, jãka ɓee. Maabea jʉrʉs chi ɓee Bibliaɗebena nau aseyua.a

Cha naarãba aiɗai ɓua ẽpesayua, maamina ¿bichi kãare asei ɓuu waaburu kawayua bichia Biblia leaburuuɗe? Chi uruburuu articuloɗebenaba waaburu aiɗai ɓua.

Bichia Biblia leaburuuɗe kĩrajʉʉ akʉ ɓeeyu makawẽebʉrã biʼiawẽe sentiyu, maka ɓuumina jãu ara bichidu aɓaburu kãare leamaa ɓuu kʉ̃risiayua. Kawaba bichia leamaa ɓuuɗe kãare aseyu aude bustayua.

Jʉrʉse chi Biblia jãuɗebena leaburuuɗe biʼia kawayu. Bichia leaburuuɗe biʼia kawawẽe basirã mauɗe chi beɗearã nabẽraeɗe ãrĩã ɓuubʉrã, makarã bichi kĩrajʉʉwẽe chi Biblia leamaa ɓuuɗe. Mauɗeeba, jʉrʉse bichia chi Biblia eɗa ɓʉ kuɓuu bichimaa biʼia ãrĩã kawai ɓuu beɗearã jãuba bichi sõ ãrĩãdu aiɗa ɓaeyua. Mauɗeeba chi tradusi kuɓuuɗebena wãrabenadu jara ɓuuɗebena bayua maabea dachia ijãayua mauɗe.a

Kawase chi tecnologiaɗebena. Iɗibea, baraa chi Bibliaɗebena imprimibadau, mauɗe interneɗe eɗa biɗa. Bichia descargai ɓua computadorɗe, tabletaɗe mauɗe celularɗe makawẽebʉrã leai ɓua interneɗeeba. Chi ɓee Bibliarã eɗa ɓea dachia araɓau versiculoɗebena jʉrʉyua chi eɗa ɓʉ koɓeerã diwara Bibliarãɗebena maucha kawayua, mauɗe kawayua waabenarã versiculorãba jara panuuɗebena. Bichia lea kʉ̃riawẽebʉrã chi Biblia makawẽebʉrã ũriyu chi interneɗeeba ũri kuɓua. Chi nuree baita biʼia ãrĩã ɓua carroɗe wãburuumisa trajoɗaa chi Biblia ũriyu, maebʉrã orropa jeraamaa ɓuumisa, mauɗe barikiau momentoɗe bari duanuumisa. ¿Bʉmaarã saka biʼia ɓuu chi Bibliaɗebena kawayu? Berekachãu mau aseyua.

Jʉrʉse aude kawayua. Diwara kartarã duanuu Bibliaɗebenaba bichi aiɗaɗayua ãrĩã kawai baita leaɗakare. Jari mapa ira ɓuu drua nabẽraeɗebena kawayua sama basii chi Bibliaba jara ɓuu naeɗebena mauɗe kʉ̃risiabiyua nauɗe. Mauɗe chi ɓee articulorã nau kartaɗe mauɗe “Bibliaɗebena kawapanuu” internet jw.org ɗe, naarãba bichimaa kawabi ɓuu kãare ariɗe jara ɓuu Bibliaɗebena.

Diwara ɓeeɗebena kawaba Biblia leaɗakare. Biblia leai baita ẽpesaeɗeeɗebena waa akabaaruuɗaa chaarea ɓuubʉrã bʉ baita, kawase chi bichia aude busta ɓuuɗebena. Ẽbẽrarã nabẽrarã saka nureasiɗau kawai ɓuu Bibliaɗebena. Chi rekuadro “Maucha kawaba Bibliaɗebena ẽbẽrarã nabẽrarã saka nureasiɗauɗebena Bibliaba jara ɓuu kawaaruuba”, nauɓa aiɗai ɓua bichia kawa kʉ̃ria ɓuubʉrã aɓa ẽbẽra ʉ̃rʉbena. Mauɗe leai ɓuu sakaeɗe pasasii chi Bibliaba nebʉrʉbariiɗebena. ¿Maka kawai kʉ̃ria ɓue?

Chi Biblia libro barikia ɓuuwẽe. Jãuɗéburu unu panuu chi dachimaa jaradea ɓuu chi dachi Waukaɗaba (2 Timoteo 3:16). Chi jãma jara kuɓuuba ãrĩãdu aiɗa ɓua bichi. Jãuɗéburu, ara chi Bibliaba jara ɓua: “Dachi Akõre beɗea chokae ɓuuka ɓuu mauɗe poder ãrĩã ira ɓuu” (Hebreos 4:12). Cha nau libro poder ãrĩã baraa ɓuu bichi aiɗayua omerãɗebena: ichia jaradea ɓuuba ãrĩãdu aiɗa ɓuu, maabea Dachi Akõreɗebena waaburu kawayua mauɗe ichia jara ɓuu kãare uneburuu ichia jaraɗa baɗaɗebena (1 Timoteo 4:8; Santiago 4:8).

Jaradea ɓuu dachi ewariiruuchabena. Chi Bibliaba dachimaa ãrĩãdu jaradea ɓuu.

• Biʼia ãrĩã nibayua waabenarã ome (Efesios 4:31, 32; 5:22, 25, 28, 33).

• Dachi waaburu ẽpermaɗaamaaba mauɗe biʼia ãrĩã kĩrajʉʉ duanaɗayua (Salmo 37:8; Proverbios 17:22).

• Waaburu chi biʼia ɓee ase nibayua (1 Corintios 6:9, 10).

• Dachi chi nejarra biʼia ãrĩã adauyua (Proverbios 10:4; 28:19; Efesios 4:28).a

Aɓa kimabaraa niɗau Asiaɗebenaba kawasiɗau chi biʼia ɓuu chi Bibliaba jaradea ɓuu. Ara jari ãrĩãdu ʉ̃rãburu kimabaraapeɗaaɗa nureerãmaa, ãchimaa biʼiawẽe ɓoosii ãbua nibaɗayu maabea biʼiawẽe beɗeaɗayua. Maabea nibaɗe wãsiɗau jari chi Bibliaɗe jara ɓuu kĩra. ¿Kãare sãasaa? Vicent, chi kimaba, jara ɓuu: “Mʉa chi Bibliaɗe jarasiiɗe mʉ ãrĩã aiɗasii dai problema ãrĩã baraa nibapeɗaaɗa biʼia ãrĩã beɗeaɗayua kʉ̃ria ãrĩãdu. Aseyu cha nauɗe jaradea ɓuu kĩraka biʼia kĩrajʉʉbi panua”. Chi wẽra, Annalouba, ara jãka jara ɓua: “Chi Bibliaba jara ɓuu kĩraka ãrĩãdu aiɗasia. Jãabera wẽra kĩrajʉʉ ãrĩã nia mauɗe mʉ kĩrajʉʉ ãrĩã nii ara aɓau aseɗai ɓuuɗeeba”.

Dachi ãrĩã aiɗa ɓua Dachi Akõreɗebena kawayua. Vicent biɗa jara ɓua: “Chi Biblia lea ɓeesiiba mʉ ãrĩã Jeowa kaita nibaɗe wãbisia”. Cha nau jarasiiɗebena biʼia ãrĩãdu ɓua: chi Bibliaba aiɗa ɓua bichi biʼia ãrĩãdu kawayua Dachi Akõreɗebena. Bichia Dachi Akõreɗebena kawaburuuɗe biʼia ãrĩã wãyua ichia biʼia jaradea ɓuuba, maabea bichi ichi amiko bayua. Bichia unuyua chi Bibliaba chi uruburuu biʼia ãrĩã ɓooyu jara ɓua, dachi biʼia ãrĩã biuɗawẽa nibaɗayua (1 Timoteo 6:19). Jãka unuwẽe bichia junebena libroba bichimaa jãka deabai ɓuu.

Bichia apii chi Biblia lea niiɗebenabʉrã bichi biʼia ãrĩã wãyua, maabea biʼia ãrĩã kawayua chi Dachi Akõreɗebena. Bichia chi Biblia leaburuuɗe bichia nau sakaba a wiɗiyua. Bichi jãka pasaaruubʉrã chi traja nii kobiernoɗe Etiopiaɗebena kĩraka pasayua, ichi 2 mil años aude nibaɗaa. Cha nau mukĩra ãrĩã wiɗi ɓeesia chi Bibliaɗebena. Felipe, Jesús kaaɗe ãdanibabariiba wiɗiɗa baɗa ichia kawa ɓue jari leamaa ɓuuɗe aɗa, maabea ichia panauɗa baɗa: “¿Mʉa saka kawaiba mʉʉmaa junebenaba jaradeawẽebʉrã?”.b Maabea cha nii mukĩra Etiopiaɗebenaba jarasii Felipemaa aiɗábaɗa apeɗa mau ichi mukĩra biʼia kawabi niiɗeeba (Hechos 8:30, 31, 34). Kʉ̃riabʉrã bichi siɗa jãka asese, chi Bibliaɗebena kawa kʉ̃ria ɓuubʉrã, ɓʉi ɓua bichiɗebena interneɗe makawẽebʉrã ɓʉi ɓua bichimaa ara kaita ɓuuɗaa, cha jara ɓuu cha nau kartaɗebena. Makawẽebʉrã beɗeai ɓua chi Jeowa ɗebena Jaranũrẽrã ome bichi ɓoobariimaare makawẽebʉrã bichi wãi ɓua Jeowa ɗebena Jaranũrẽ Deeɗaa. Jʉrʉ adause ara iɗi chi Biblia maabea bichi biʼia nibaɗe wãyua.