Chi nuree ẽbẽrarã baita difícil ɓua Dachi Akõre kʉ̃riaɗai baita, ãchia kʉ̃risiabadauɗeeba ichia kawabiwẽa bari mirubarii, dachiɗeeba kaitawẽe nii, mauɗe ichi miadaa nii. Ochiaba chi nuree ẽbẽrarãba jarabadau:

• “Mʉa Dachi Akõremaa aiɗaba abachii adua, kʉ̃risiaɗa baɗa mʉʉɗeeba kaitawẽe ãrĩã ɓuu. Unukabachii bẽrã kʉ̃risiaɗa baɗa ichi biawãra ɓuuwẽe mauɗe akawa sentikau.” (Marco, Italia.)

• “Dachi Akõre baita traja kʉ̃ria ɓoosii, maka ɓumina mau kaitawẽe ãrĩã ɓuu kĩraka ɓooɗa. Kʉ̃risiabachii Dachi Akõreba ãrĩã iadaabarii, kastikai baitaburu dachirã unu ɓuu. Kereakabachii dachirã kʉ̃ria uanii.” (Rosa, Guatemala.)

• “Mʉ chuburi nibasiiɗe kʉ̃risiabachii Dachi Akõreba bari ochiabarii dachi miadaa ase nii mawãa kastikayu. Maabea mʉa kʉ̃risiasii ichi kaitawẽe ãrĩã nii, kĩrabara chi presidenteba ẽbẽrarã kʉ̃risiawẽa ichi juaɗe ua ɓuu kĩraka.” (Raimunda, Canadá.)

¿Bichia saka kʉ̃risia ɓua? ¿Poyaawẽebai ɓue Dachi Akõre kʉ̃riayu? Yataɗeeɗabena, cristianorãba jãuɗebena wiɗi duanuu. Ʉskareɗa, ãrĩã ẽbẽrarãba Dachi Akõremaa ʉtaa wiɗiɗakabachiɗau. ¿Sakayua? Ãchia perabachiɗauɗeeba. Chi kauwa ãrĩã nii Will Durant mauba naka aɗa basia: “¿Saka chi miadaa aseɗa baɗaba wiɗii basaa perdón chi kaitawẽe nibapeɗa chi miadaa niimaa?”.

¿Saka wã nuɓua ẽbẽrarã jãka kʉ̃risiai baita Dachi Akõreɗebena? ¿Kãare biawãrabena jaradea ɓua chi Bibliaba? ¿Fácil ãrĩã ɓue ichi kʉ̃riai baita kawapeɗaaɗa basirã chi biawãrabena ɓuu ichiɗebena?

CHI ẼBẼRARÃBA JARA DUANUU

“Poyaa kʉ̃risiaɗawẽe aɓa ɓuuɗeburu chi Dachi Akõre biawãra trʉ̃ bara nii. Maka basirã, akawa aduabai basii kai chi trʉ̃.” (Profesor David Cunningham, ichi libroɗe Theological Studies.)

CHI BIBLIABA JARA ƁUU

Ara Dachi Akõreba jaraɗa baɗa: “Mʉ Jeowabʉ. Jãu mʉ trʉ̃bʉ” (Isaías 42:8). Jeowa jãu chi trʉ̃ hebreoɗe jara ɓuu “Ichia ida babibarii” (Génesis 2:4, nota).

Jeowaba kʉ̃ria ɓuu ichi trʉ̃ jaraɗayu. Chi Bibliaba jara ɓuu: “Jarábaɗa ichi trʉ̃”. “Unubiábaɗa ichia ase nii ichi puururãmaa. Kawabiábaɗa ichi trʉ̃ mechibena ɓuu” (Isaías 12:4).

Jesusba Dachi Akõre trʉ̃ jarabachia mauɗe ichi kaaɗe ãda nureerãmaa kawabiaɗa baɗa. Ɓes aɓa naka ʉtaa wiɗisii ichi Akõremaa: “Mʉa bichi trʉ̃ unubi kawasia”. ¿Sakayua jãka asesaa? Ichia naka asia: “Jari bichia mʉ kʉ̃riasii kĩra ãchi siɗa chiya kʉ̃ria panaɗayua, mauɗe mʉ ãchi baare ãbua ɓooyua” (Juan 17:26).

SAKAYUA KAWABARAAIBA

Chi profesor religionɗebena Walter Lowrieba naka ɓʉɗa basii: “Ẽbẽraba unu adua nii Dachi Akõre ichi trʉ̃ɗeeba, adua nia saka nii [...] mauɗe kʉ̃riawẽa ijãawẽebʉrã ichiara ɓuu”.

Mukĩra nii chi trʉ̃ Victor semanacha wãbachii iglesiaɗaa, maka ɓumina adua nibasii akawa Dachi Akõre ʉ̃rʉbena. Ichia jara ɓua: “Mʉa kawasiiɗe chi Dachi Akõre trʉ̃ Jeowa, mʉa kʉ̃risiasii mʉʉmaa unubibudau kĩra. Jãabeaburu kawasii kaiɗebena jarabachiɗau. Jãabeaburu Dachi Akõre biawãra nii a kʉ̃risiaɗa baɗa, ara mauɗeeɗabena mʉ amikoa”.

Jeowa ara kaita neebaria “ichi trʉ̃ɗeburu kʉ̃risia nureerãmaa” mauɗe naka asei jara ɓua: “Ãchi mʉa kĩra chuburiayua, ara jari mukĩraba chuburiabarii kĩra chi warr ichi baita trajabariiɗebena” (Malaquías 3:16, 17). Mauɗe Dachi Akõreba bendesi nia ichi trʉ̃ɗeburu jara nureerã. Chi Bibliaba naka a ɓua: “Jomaurãba Jeowa trʉ̃du jarabudaudu maarãdu karebakuaɗayua” (Romanos 10:13).

CHI ẼBẼRARÃBA JARA DUANUU

Chi Diccionario Akal crítico de Teología jãuba jara ɓuu: “Chi Trinidad chi Dios aɓa ɓuu õbeaɗe ɓuu, chi Akõre, chi Warr mauɗe chi Dachi Akõre Jauri”. Mauɗe chi Diccionario abreviado del cristianismo jãuba naka a ɓuu: “Catolicorã, ortodoxorã, anglicanorã mauɗe protestanterã, maarãba ara aɓa ɓúdu kawabi nurea”.

CHI BIBLIABA JARA ƁUU

Jesús, chi Dachi Akõre Warr niiba, jaraabaɗa ichi araɓau nii chi Akõre ome. Bari jaraɗaa: “Mʉ Akõremaa wãburuu, mʉ Akõre mʉ aude niiɗeeba” (Juan 14:28). Maabea, aɓa ichi kaaɗe ãda niimaa naka asia: “Mʉ Akõremaa ʉtaa wãi, mauɗe mʉ Akõre mauɗe machiɗe” (Juan 20:17).

Chi Dachi Akõre Jauri aburuu mau ẽbẽrawẽe. Chi cristianorã naeɗeeɗabenarã “chi Dachi Akõre Jauriɗeeba paneesiɗau”, mauɗe Jeowaba naka asii: “Deaburua mʉ Jauri chi barikia nureerã ẽbẽrarãmaa” (Hechos 2:1-4, 17). Chi Dachi Akõre Jauri Trinidad abadauɗebenawẽe, bari mau chi Dios poderturua.

SAKAYUA KAWABARAAIBA

Chi Biblia kawabadaurã católico nureerã Karl Rahner mauɗe Herbert Vorgrimler maarãba jara duanuu mau chi Trinidad “poyaa kawaabai ɓuu dachirãmaa Dachi Akõreba kawabiwẽebʉrã, mauɗe dachimaa kawabiburuu siɗa poyaa akawa entendeebai ɓuu”. Maka ɓumina, ¿kʉ̃riai ɓubaaka dachia entendeka ɓuu nii mauɗe ichi ʉ̃rʉbena poyaa kawaka ɓuu nii? Makawẽma. Mauɗeeburu, chi Trinidad ʉ̃rʉbena jaradeabadau mauba Dachi Akõre kʉ̃riabiwẽa.

Marco, jari naa kuɓuu articuloɗe jarasii, ichia kʉ̃risiabachii chi Trinidad mau kĩrabara aɗu jʉ̃ka kuɓuu kĩraka ichi mauɗe Dachi Akõre ome. “Mʉa kʉ̃risiabachii Dachi Akõre mirubarii ichi kai kawabiimaaba, jãuba poyaa kawabiibayu mauɗe ichi kaita biɗa ɓoobai ɓuu”. Maka ɓumina, “Dachi Akõreba kawayuswẽa nibabikaa” (1 Corintios 14:33, La Biblia de las Américas). Ichi merakaa kai, bari jarabaria. Jesusba jaraɗaa: “Dairãba kʉ̃riaɗapeɗa ũri panuu chi dachia ichi kuitaa panuudu” (Juan 4:22).

Marcosba naka asii: “Mʉa kawasiiɗe Dachi Akõre Trinidadwẽe, jãabera kawasii ichi amiko bayu.” Kʉ̃risiabudauɗe Jeowa biawãra ɓoapeɗa mauɗe mirukau makarã kʉ̃riaɗai ɓua. Chi Bibliaba jara ɓua: “Chi kʉ̃riawẽa nii Dachi Akõre kauwa adua nia, Dachi Akõreba joma kʉ̃riakua ɓuuɗeeba” (1 Juan 4:8).

CHI ẼBẼRARÃBA JARA DUANUU

“Chi jauri ẽbẽrarã miadaa nureaɗa baɗaɗebenarã infiernoɗaa wãbadau biuɗakare, mamaria akawa ‘baa ɓooɗe wãbadauʼ ” (Catecismo de la Iglesia Católica.) Mauɗe, chi nuree sacerdoterã pastorna baare jara badau chi infierno akawa ẽbẽra nii Dachi Akõreɗebena awara nii.

CHI BIBLIABA JARA ƁUU

“Chi alma kachirua aseburuu... biuyua” (Ezequiel 18:4). Chi biupeɗaaɗarã “akawa kʉ̃risiaswẽa paneebarii” (Eclesiastés 9:5). Chi alma biupeɗa mauɗe chi biupeɗaaɗarã kʉ̃risiaswẽa nuɓuubʉrã, ¿saka sufriɗaiba “chi auko kuɓuuɗe” maebʉrã chi Dachi Akõreɗebena awara wãburuu?

Chi Bibliaɗe, chi beɗearã hebreo mauɗe griegoɗebena kapunia beɗeaɗe “infierno” abadau mauba jara ɓuu chi ẽbẽra “ʉa ɓeerã”. Por ejemplo, Job mimichia ẽperma ɓoosiiɗe, ichia Dachi Akõremaa naka wiɗiɗa basia: “Mʉ meraɗa basirã ʉaburuuba ara ɓuma” (Job 14:13, Nueva Versión Internacional). Mauɗe La Sagrada Biblia, Guillermo Jünemannɗe jãuɗe jara ɓuu kĩra, “infiernoɗe”. Job Dachi Akõreɗeeba kaitawẽe ɓoo kʉ̃riabasii ichi baa ɓooimare; bari eɗaburu ʉa ɓuu kʉ̃ria ɓoosii biʼia descansayua.

SAKAYUA KAWABARAAIBA

Dachi Akõre miadaa nii ayu awara nibaɗe wã ɓua ichiɗebena. Wẽra chi trʉ̃ Rocío Mexicoɗebena naka nebʉrʉ kuɓua: “Chuburi niiɗeeɗa mʉʉmaa kawabisiɗau infierno barau. Mʉ ãrĩã pera nibabachii Dachi Akõre kakua poyaa kereakabachii ichi biʼia nii. Kʉ̃risiabachii bari kĩru nii mauɗe ãrĩã iadaabarii nii.”

Chi Bibliaba Dachi Akõreɗebena jara ɓuu mauɗe saka duanuu chi biupeɗaaɗa baɗa jãuba biʼia kʉ̃risiabisii Rociomaa. Ichia naka jara ɓuu: “Mʉ biʼia ãrĩã sentiɗa baɗa kĩrabara mʉ ʉ̃rʉ chikʉa koɓooɗa ertabudau kĩraka. Mʉa kawasii Dachi Akõreba biʼia ɓuudu kʉ̃ria ɓuu dachirã baita, dachi kʉ̃ria nii mauɗe mʉa biɗa ichi kʉ̃riai ɓuu. Jãabera kawa ɓuu ichi Dachi Akõreba chi warrarã cuidabarii mauɗe chi biʼia ɓuudu bara nureabi kʉ̃ria nii” (Isaías 41:13).

Ẽbẽra ãrĩã chi ɓee religionɗe nuree infiernoɗebena pera niiba, maka ɓumina Dachi Akõreba kʉ̃riawẽe ichi baita trajayu pera niiɗeeba. Jesusba ara jãka jaraɗa basia: “Kʉ̃riabaraai Jeowa bichi Akõre” (Marcos 12:29, 30). Mauɗe kawabudauɗe Dachi Akõreba miadaa ɓee asekau, kawaɗayua ichidu jipa nii chi miadaa nureerã kastikaburuuɗe. Jari Elihú, chi amiko Jobɗe, jaraɗai ɓua biʼia kʉ̃risiapeɗa: “¡Dachi Akõre ichiaraba ne miadaa waukaa, ichidu Aude Poder ira ɓuuɗeeba ne miadaa waukaa!” (Job 34:10, Nueva Versión Internacional).

Día aɓa ɓuuɗe, Jesús beɗeaɗa baɗa ichi Akõre Jeowa ʉ̃rʉbena Jerusalenɗe maabea ichia unubisii chi líder religiosorã setaa jarabadaurã (Juan 8:12-30). Chi ichia jaraɗa baɗaba dachimaa kʉ̃risiabi ɓuu kawabaraaɗai chi ẽbẽrarãba Dachi Akõre ʉ̃rʉbena ijãa duanuuɗebena. Ichia naka jarasia: “Ara maka ũribudaubʉrã chi mʉa jaradeaɗaɗebena, biawãra ãda nurea mʉ kaaɗe, kawaɗayua chi biawãra kuɓuuɗebena, chi biawãra kuɓuuba machi jʉ̃a ɓooɗa awara wãaruu kĩra bʉekayua” (Juan 8:31, 32).

Jesusba jarasiiɗe “ara maka ũribudaubʉrã chi mʉa jaradeaɗaɗebena”, Jesusba kawabi nii saka kuitaaɗayua chi ẽbẽrarãba ijãa panuu biawãra ɓuu o makawẽe. Bichimaa jarabudauɗe Dachi Akõreɗebena, kʉ̃risiaba nauɗe: “¿Araɓau ɓue jari Jesusba kawabiɗa baɗa kĩra mauɗe chi Dachi Akõre Beɗeaɗe jara ɓuu kĩra?”. Aseba chi Apóstol Pablo ũripeɗaaɗarãba asesiɗau kĩra: kauwa estudiaba chi Biblia kawayua chi jarapeɗaaɗa biawãra ɓuu (Hechos 17:11).

Jãka asepeɗaaɗaa Marco, Rosa mauɗe Raimunda, chi naeɗe beɗeapeɗaaɗa baɗa: estudiasiɗau chi Biblia chi Jeowa ɗebena Jaranũrẽrã ome. ¿Kãare kawasiɗaa?

Marco: “Chi Jeowa ɗebena Jara nibabarii daimaa kawabibachiiba chi Bibliaɗeeburu panaubachii mʉ wẽra omeeba wiɗibudauɗe. Ɓiɗi ɓiɗia Jeowa kʉ̃ria wãsiɗau, jãuba dai ãrĩã aiɗasia mʉ kima ome ãbua nibai baita”.

Rosa: “Mʉa kʉ̃risiabachii chi Biblia jãu libro filosofiaɗebena ɓuu bereka kawabi ɓuu kai Dachi Akõre kawayua kʉ̃risia ẽbẽrarãɗe. Maaɗakare panau koɓeesii chi mʉa wiɗi koɓeeɗebena. Jãabera, Jeowa biawãra nii mauɗe ichiɗeburu confiayu”.

Raimunda: “Mʉa wiɗisii Dachi Akõremaa mʉ aiɗayua ichi ʉ̃rʉbena kawai baita. Mau kaaɗe, mʉ kima ome chi Biblia estudia kopaneeɗa. ¡Mauɗéburu kawasiɗau chi biawãra kuɓuu Jeowaɗebena! Kĩrajʉʉ ãrĩã paneesiɗau kawasiɗauɗe kai Dachi Akõre”.

Chi Dachi Akõre Beɗea, chi Biblia, jãuba kawabi ɓuu chi setaa Dachi Akõreɗebena jarapeɗaaɗa, mauɗe kawabi ɓuu ichi biʼia ãrĩã niiɗebena. Maubapeɗa, ũkuru kawabi ɓuu “chi Dachi Akõreba dachimaa deakuaɗa baɗa ichi sõbia niiɗeeba” (1 Corintios 2:12). ¿Sakayua ara bichia kawawẽa kãare jara ɓuu chi Bibliaba Dachi Akõreɗebena chi ichia aseiɗebena mauɗe ɓoapeɗa dachi saka nibaɗaiɗebena? Waaburu leai ɓua nauɗebena www.jw.org/cmi ɗe, nau eɗakare “Bibliaɗebena kawapanuu > Panauɓee Bibliaɗebena wiɗiɓee”. Jãma biɗa wiɗii ɓua bichimaa jaradeai baita Bibliaɗebena Jeowa ɗebena Jaranũrẽrãba. Jãka aseburuubʉrã, kawayua bichia chi Dachi Akõre kʉ̃riai ɓuu.