Wẽra judía niiba biʼia jara ɓuu sakayua ɓuisii ichia kerea nibaɗaɗe

Bichi ʉ̃rʉbena beɗeaɗaus.

1979ɗe nacesia mʉ, Estados Unidosɗe. Mʉ 3 año niiɗe, mʉ akõrerã amaasiɗaa. Mʉ naweba chi tradición judiaɗe waribisia, mʉ chi escuelarã judiaɗaarã wãbachii, yeshivás abadauɗaa. Mʉ 7 año niiɗe Israelɗaa wãpeɗaaɗaa; chi escuela mʉ wã ɓoosii kibutzɗe ɓee ɓoosia, maka jarabadau chi puururã ne joma uubadaumaa. Año aɓauɗe Mexicoɗaa wãsiɗaa.

Bariara de chi judiorã aria ʉtaa wãɗai baita mʉ de kaita wãʼãe basmina, mʉra judiorãba asebadau ase ɓoosia, sadoɗe velarã koa bʉeka basii, chi Torá leapeɗa [karta biʼia ãrĩã ɓuu judiorã baita] maabea ʉrsabachia libro ʉrsayua, ichi trʉ̃ sidur abadauba. Mʉ kõpaerorãmaa colegioɗe mʉ religionburu ariɗe jaradea ɓuu abachia. Mʉa naeɗe chi Nuevo Testamento leakabachia, jãuba jaradea ɓuu Jesucristo saka nibaɗa mauɗe kãare jaradeaɗa ʉ̃rʉbena; mʉ naweba jaraɗa basia waaburu jãu aseebayu mʉ jayoaruu kĩra aseemaaba.

¿Sakayua chi Nuevo Testamento leayu kʉ̃risiasaa?

17 años cumpliiruuɗe, Estados Unidosɗaa waya neesia chi estudiaburuu terminayua. Amiko niiba ichi cristiano nii aɗa basia mauɗe ichi Jesús kaita niiwẽebʉrã kĩrajʉʉ nibaabayu aɗa basii.

—Ẽbẽrarã Jesusɗéburu ijãa nuree setaaɗéburu duanua —a jaraɗaa.

—¿Bichia chi Nuevo Testamento leaɗae?

—Leaabasia.

—Makarã, ¿sakayua jãu jara ɓua? Biʼiawẽe ɓua dachia kawawẽa niiɗebena jarayu, jãra ẽbẽrarã adua nureeɗebʉ.

Ichi beɗeaba mʉ kʉ̃risia ʉ̃ɗaabisia, mʉa biɗa jãka ijãa ɓoosii bẽrã. Mʉa pena iɗaa, Biblia adauɗa basia maabea mʉa deeɗaa odoesii chi Nuevo Testamento leayua.

¿Saka ɓoosaa bichia leasii?

Naa, mʉ ãrĩãdu kʉ̃risiaɗaa chi jãu Nuevo Testamento judiorãburu ɓʉpeɗaaɗa ɓuu bẽrã. Maubapeɗa, waaburu maucha lea kãriiɗe, waa kawa kãribaɗe wãsia Jesús ẽbẽra bia ãrĩã kiɗii mauɗe barikia nii ẽbẽrarã aiɗa kʉ̃ria nii, waabenarã abusa kʉ̃riaamaa nii. Maabea mʉ biblioteca ɓuuɗaa wãɗa basia maabea librorã jʉrʉɗa basia Jesús ʉ̃rʉbenadu jara ɓee. Jãarãɗebena librorãba biʼia kʉ̃risiabiɗaabasia Jesús chi Mesías. Chi nureeba ichi Dachi Akõre a panasii, jãu mʉ baita biʼiwẽe ɓoosii. Mʉa kʉ̃risia ɓoosiira: “¿Kaimaa ʉtaa wiɗi ɓoosaa Jesusba? ¿Ichi du aɓaumaa?” Maubapeɗa, Jesús biuɗaɗe, maamina Bibliaba Dachi Akõreɗebena jara ɓuu: “Bichi biuubayua” a ɓuu.a

¿Kãare asesaa makarã?

Chi ariɗe ɓuu waya istu ãyaa jara ɓookaa, maabea mʉra jipa ɓoosia chi ariɗe jara ɓuu kawai baita. Mʉa Dachi Akõremaa ʉtaa wiɗiɗa basia corazonɗeeba mauɗe dauɓaaɗe —mauɗe, chi mʉ libro sidurwẽa—. Mʉa chi ʉtaa wiɗimaa ɓuu terminaaruu dauchia, mʉ poroa tocasiɗaa: Jeowa ɗebena Jaranũrẽ ome niɗau baɗaa. Beɗea panasia, maabea ãchia mʉʉmaa chi karta aɓa dea ɓuisiɗaa. Jãu karta ãchia ɓuisiɗauba mauɗe chi beɗeasiɗauba mʉʉmaa ijãabisiɗaa chi ãchia ijãa nuree Bibliaɗebena adau panua. Por ejemplo, Jeowa ɗebena Jaranũrẽrã baita, Jesús Trinidad abadauɗebenawẽebʉ, bari “Dachi Akõre Warr”b mauɗe “chi naa kuɓuu Dachi Akõreba wauɗaɗebena”.c

Mau kaaɗe Mexicoɗaa neesia waya, maabea aria estudia ɓeesia chi profeciarã Mesiasɗebena Jeowa ɗebena Jaranũrẽrã ome. ¡Ãrĩãdu baraa! Maamina, ara maka kʉ̃ris iɗaa ɓeesia. Mʉa kʉ̃risia ɓoosia: “¿Jesusdu basaaka chi aɓa nii naarã profeciarã cumpliɗa baɗa? ¿Makawẽebʉrã ichi setaa chi Mesías asiibʉrã ẽbẽrarãmaa setaa jarayua?”

¿Kãareba aiɗasaa bichia akawa ijãayua?

Jeowa ɗebena Jaranũrẽba profeciarã Mesiasɗebena kawabisiɗaa setaa jarabarii niibara poyaa cumpliibai ɓoosia. Por ejemplo, 700 año naeɗe jaraɗa basia chi Mesías Belenɗe naceyu.d ¿Kaiba jʉrʉbaraa chi sama naceyu? Isaiasba ɓʉɗa basia chi Mesías beaɗayu kĩrabara orroabarii kĩra, maabea ʉrrikorã tãeɗe ʉabudayu.e Jãarã profeciarã joma Jesusɗe cumplisia.

Chi mʉ akawa biʼia ijãabisiira Jesús samabena nee ɓoosii mauɗe kairã basii ichi nabẽrarã. Bibliaba jara ɓuu chi Mesías rey Davidɗebena neei baɗa.f Chi judiorã Jesús ɓʉ panasii aɓaaɓaa imibudauɗebena, mauɗeeba Jesús David deɗabena neewẽa ɓoosiirã, ichi iadaa nureerãba jomaurãmaa jaraɗai basia. Maamina poyaa aseɗaabasia, ichira ariɗe Davidɗebena uru ɓoosii bẽrã. Ẽbẽrarã ãrĩãrãba jara panasia “David Warr” aɗapeɗa.g

Año 70ɗe, 37 año Jesús biuɗa kaaɗe, soldaorã Romaɗebenaba Jerusalén akabasiɗaa, mauɗe joma ɓʉ koɓeaɗa baɗa chi nabẽrarã ʉ̃rʉbena joma daña wãusiɗaa. Mauɗeeba, chi ariɗe kʉ̃risia duanaɗayua kairã basii chi nabẽrarã, chi Mesías neeyu basia jãu año naeɗe.

¿Kãare kʉ̃risia ɓeesaa maabea?

Deuteronomio 18:18,19ɗe, Dachi Akõreba jara ɓooɗa basia profeta Moisés kĩra nii uruyu Israelɗaa maabea jarasia: “Ẽbẽrarã mʉ beɗea ũriɗawẽe ichi nauba mʉ trʉ̃ɗe jarayua, ara mʉareeba wiɗiyua sakayua aseebasii”. Chi Biblia joma estudiaruuɗe, mʉa akawara kawasia Jesús Nazaretɗebena jãu profeta basii.